มาระโก 10
10
เหย่ซู่ อิซว๊าอี๊แส่ตา อู เร๊อ โอ่แกเม อาหรี่อาแก
(มัทธิว ๑๙:๑-๑๒, ลูกา ๑๖:๑๘)
1โทเร๊อ เหย่ซู่ โอ่ เบ๊อะเนอ เร๊อ อา เถ่จว๊าแก เด๊อ ยูดาห์เก่ เร๊อ อา จว๊า เด๊อจอร์แดน เทอแลโหมะเบ๊เรตากยา. แกแย ตู๊หมู่ดุ แฮโอ่ปล๊อตาวา เกอลอคยาแซ๊ลู ตอกล๊อตูปลู เร๊อ อา อิซว๊าตา เป่ อู ฮู๊ อาเหล่โกล อิซว๊า เป่ อู ปว๋า โพ๊ เนอ.
2ฟาริสี เต๊เห่เห่เนอ อา แฮ เต่อเกอ เด๊อ เหย่ซู่ อา โอ่ เร๊อ เหย่ซี ซิหยื่อ แฮ แม๊ปู ปื่อ แบ่เจ่ เหย่ซู่ อาเตซื๊อ เร๊อ อา แฮ แด๊เฮอ จู๊แก่ ลู เน๊อ, “แกแย เตเพรเพร โอ่แก อาเม หม่า อาหนิ แพ๊ เป เตซว๊าเตแส่ เฮ๊เนอ ฮู๊เนอ แอ?”
3เร๊อ เหย่ซู่ แด๊เฮอ เหย่ซี เน๊อ, “คูโมเสส เฮ๊แก ซี โหง่ ฮู๊เต?”
4เหย่ซี เฮ๊ฉื่อ เน๊อ, “แกแย เด๊อ อา โอ่แก อาเม เต๊เห่เนอ คูโมเสสปลวาแพ๊ เหย่ซี เด๊อ อา เก่ รา ลีโอ่แกอาเม อา เตราม๊า ต๊าบ่า เร๊อ อา เด๊อ เร๊อ อาเม เร๊อ อา เก่ โอ่แก อาเม เฮ๊เนอหม่า อาหนิ แพ๊.”#โด่แน ๒๔:๑-๔, มัทธิว ๕:๓๑
5เร๊อ เหย่ซู่ เฮ๊ฉื่อ เหย่ซี เน๊อ, “คูโมเสส ราแก เป ซี เตซว๊าเตแส่ ฮู๊เออ เมเตเฮ๊เรอ ซี ย๋อ ซิปล่อชอเร๊อ ดื่อ ซีเง เนอ. 6หม่าแน๊เรอ เด๊อ จอแปแหร่ แบ๊แลลู่ เห่ขุ เร๊อ ม๊อขุ เบ๊อะเนอหม่า ‘จอแปแหร่ แบ๊แลดื่อ เพรเหมาะ เตเพร เร๊อ เพรคู เตเพรแพ๊.’#เห่ขุทวาลู่ ๑:๒๗, ๕:๒ 7‘เด๊อ เตหรี่เตแก เออ อาคยา เพรคู เออเนอ อา เบ่ แด่แก อาโหมะอาเพ เร๊อ อา เบ่ จว๊า โอ่เตอเกอ เร๊อ อาเม,#เห่ขุทวาลู่ ๒:๒๔ 8เร๊อ แกแย เออซิเนอเนอ อา ทวาแถ่เฮ๊อ เตเพรเพร่ว เฮ๊อ.’#เห่ขุทวาลู่ ๒:๒๔ ฮู๊เนอเรอ เหย่ซี หม่า แกแย ซิเนอ หม่าปาโต่เฮ๊อ. อา ทวาแถ่เฮ๊อ ลู เตเพรเพร่ว เฮ๊อ. 9ฮู๊เนอเรอ เตเด๊อ จอแปแหร่ แด่โอ่เต่อ ลูเนอ, แกแย เบ่ นอโอแกหนิลู เตเพร่ว โต่.”
10เบ๊อะเหย่ซี กาโต่ เด๊อ หี่ เบ๊อะเนอ, อา โคเจ่ เต๊เห่ แด๊เฮอโป่ ลู เตหรี่เตแก เออ, 11เร๊อ อา เฮ๊ฉื่อ เหย่ซี เน๊อ, “เพรคู เตเพร เก่ โอ่แก อาเม เร๊อ อา เก่ จว๊าพย๊า เต๊เปล่ เร๊อ เพรเหมาะ เด๊อ อาโรเตเพร เฮ๊เนอหม่า อาจว๊าซื๊อ อาเมเลอ เออเนอ เฮ๊อ.#มัทธิว ๕:๓๒, โครินธ์ อาเหร่อเล๊อ ต๊าบ่า ๗:๑๐, ๑๑ 12โทเรอ เพรเหมาะ เตเพร เก่ โอ่แก อาเว เร๊อ อา เก่ จว๊าพย๊า เต๊เปล่ เร๊อ เพรคู เด๊อ อาโรเตเพร เฮ๊เนอหม่า อา จว๊าซื๊อ อาเวเลอ เออเนอ เตเพร เฮ๊อ.”
เหย่ซู่ อาเด๊อะบุ๊ยเด๊อะเตอเรอ พู๊เจ่ฮู๊ เต๊เห่
(มัทธิว ๑๙:๑๓-๑๕, ลูกา ๑๘:๑๕-๑๗)
13แซ่ฮู๊ เหย่ซู่ เก่ แด่แถ่หนิ อากู๊ขุ เด๊อ พู๊เจ่ฮู๊ เออเต๊เห่ อาเหน่ลูเนอ #10:13 เหย่ซู่ แด่แถ่ อากู๊ขุ เด๊อ พู๊เจ่พู๊ เออเต๊เห่ อาเหน่ลู เร๊อ อา เก่ อาเด๊อะบุ๊ยเด๊อะเตอเรอ เหย่ซี เนอ, แกแย เต๊เห่ เอ๊แฮหนิ แลแค พู๊เจ่ฮู๊ เด๊อ เหย่ซู่ อา โอ่. หม่าแน๊เรอ อา โคเจ่ เต๊เห่ ซิพรวาฉื่อ แกแย เอ๊แฮหนิ พู๊เจ่ฮู๊ เออเนอ เต๊เห่. 14เหย่ซู่ แม๊เถอะ เหย่ซี เมฮู๊เนอเรอ อา ซิปล่อดุ เหย่ซี เร๊อ อา เฮ๊ เหย่ซี เน๊อ, “ปลวาแฮ พู๊เจ่ฮู๊ เนอเต๊เห่ เด๊อ แว โอ่เออ. เมตาตือ แต่ เหย่ซี แต่เหม่, เมเตเฮ๊เรอ จอแปแหร่ อาเทออาเก่ เนอหมา แกแย เด๊อ อา แด่หยว่า อาซิปล่อ แซ่เน๊อ พู๊เจ่ฮู๊เออเนอเต๊เห่ อาเตเฮ๊อ. 15แว เฮ๊จ๊อจ๊อ ซี, ซี เก่ นอเป๊อเร๊อ ซีเหน่ เร๊อ จอแปแหร่ ฮู๊ พู๊เจ่ฮู๊เต๊เห่ นอเป๊อหนิเกอ เร๊อ อาเหน่ เนอโต่ เฮ๊เนอ, ซี โน หนิ แจ่ เด๊อ จอแปแหร่ เทอ อาเก่กู แตแค๋ โต่.”#มัทธิว ๑๘:๓ 16โทเรอ อา แพ๊แถ่ พู๊เจ่ฮู๊ เด๊อ อาเหน่ลู เตเพร โท เตเพร เร๊อ อา แด่แถ่โท อากู๊ขุ เด๊อ พู๊เจ่ฮู๊ เต๊เห่ อาเหน่ลู เร๊อ อา อาเด๊อะบุ๊ยเด๊อะเตอเรอ เหย่ซี.
แกแย ดุแหย่แถ่เซ เตเพร เฮ๊เบ่ เร๊อ เหย่ซู่
(มัทธิว ๑๙:๑๖-๓๐, ลูกา ๑๘:๑๘-๓๐)
17เบ๊อะเหย่ซู่ เป๊อแถ่ เถ่จว๊าแกเฮ๊อ เบ๊อะเนอ, แกแย เตเพร แกล่แฮ เด๊อ ลูโอ่ เร๊อ อา แฮ แด๊งือแล เด๊อ ลู เป๊เส่เง เร๊อ อา แด๊เฮอ เหย่ซู่ เน๊อ, “เก๋อ ซ๊าร๊าแร๋ แซ่ฮู๊ แว เก่ พย๊าหนิ เกออู ซิปล่อเซอเพร ตูจูเพร ตาแลเคเร๊อาเง เนอเรอ, แว โตเบ่ เมแคร๋ หม่าอิเต?”
18เหย่ซู่ แด๊เฮอ ลู เน๊อ, “เน จว๊าเอ๊ โต่ แว เร๊อ ซ๊าร๊าแร๊ เมเต? แกแยแร๊ โอ่ เตเพร่ว โต่, อา โอ่ แพ๊ตื๊อ จอแปแหร่ เตเพรแพ๊. 19เน ซิเง จอแปแหร่ โหง่เฮ๊แก เต๊เห่ เฮ๊ เน๊อ, ‘เมเซอ แต่ แกแย เหม่,#เถ่จว๊าแลเปล๊ ๒๐:๑๓, โด่แน ๕:๑๗ เมซื๊อ แต่ อูพู๊อูเม เหม่,#เถ่จว๊าแลเปล๊ ๒๐:๑๔, โด่แน ๕:๑๘ เอ่โห่เอ่ฮี๊ แต่ อูเต่ เหม่,#เถ่จว๊าแลเปล๊ ๒๐:๑๕, โด่แน ๕:๑๙ จว๊าข่าแลโฮแลแห่ แต่ อู เหม่,#เถ่จว๊าแลเปล๊ ๒๐:๑๖, โด่แน ๕:๒๐ จว๊าเอ่กะโอแปล แต่ อูขุ เหม่,#เถ่จว๊าแลเปล๊ ๒๐:๑๒, โด่แน ๕:๑๖ เบ่จูลาพย๊าโหง่ เนโหมะเนเพ.’”#เถ่จว๊าแลเปล๊ ๒๐:๑๒-๑๖, โด่แน ๕:๑๖-๒๐
20เร๊อ อา เฮ๊ฉื่อ เหย่ซู่ เน๊อ, “ซ๊าร๋า เออเนอเต๊เห่ แว หนิดา โทลอเฮ๊อ เร๊อ แว ครวาเม โทลอเฮ๊อ เด๊อ แว พู๊เจ่เค เนอ ปา เจ๊อเฮ๊อ.”
21เร๊อ เหย่ซู่ แม๊ตา ต๋า ลู เร๊อ อา ซิยอเร๊อ ลู เร๊อ อา เฮ๊ เน๊อ, “เตเด๊อ เน โหล่เม เนอ อา โอ่ปา เต๊อเจ่อ, กา อิเชแกลอ เน ตาหมื่อตาเต เนอเต๊เห่ เร๊อ เด๊อะแก เร๊อ แกแย โซพ๊าโซแรพู๊ เนอ. เน เก่ เมฮู๊เนอ เฮ๊เรอ เน อา พย๊าหนิ เตดุแหย่แถ่เซ เด๊อ ม๊อขุ ปา. กาเมโทเฮ๊อ ฮู๊เนอ เร๊อ แฮครวา เกอแวคยา.”
22อา ย๋อ ดุแหย่ ตาป่อตาเป เจ๊อ อาขว่าอาคยา, เบ๊อะอา หนิโฮ โท แบ่เจ่ เหย่ซู่ เฮ๊ ลู ฮู๊เออ เบ๊อะเนอ, อา คย๊า โทเรอ อา เป๊เส่ปย๊า เร๊อ อา เถ่กาแก.
23เหย่ซู่ ตีรี๊ตาวา แม๊ เร๊อ อา เฮ๊ อา โคเจ่ เต๊เห่ เน๊อ, “แกแย ดุแหย่แถ่เซ เต๊เห่ เตเรโน เด๊อ จอแปแหร่ อาเทออาเก่กู เนอ, อาแหย่ แหน่เจ๊อ เด๊อ เหย่ซีเง เจ๊อ!”
24อา โคเจ่ เต๊เห่ หนิโฮ ลู เฮ๊เบ่ ฮู๊เออ เร๊อ อา เถ่ตาปา ลอปลี เจ๊อ ลู#10:24 แกแยยิวพู๊ เต๊เห่ อาเตเน เร๊อ จอแปแหร่ อาเด๊อะบุ๊ยเด๊อะเตอเรอ เพรดุแหย่แถ่เซ เร๊อ อา จว๊า เด๊อ ม๊อขุ ปา โทเรอ อา เฮ๊ คยาโป่ เหย่ซี เน๊อ, “แวพู๊ ซี๋, อู เตเร โน เด๊อ จอแปแหร่ อาเทอ อาเก่กู เนอหมา อาแหย่ แหน่ เจ๋อ. 25ตีซิโบดุ โตโด เตเร ปย๊าโน เด๊อ เท๊หลิกูเนอ อายู เล๊อปา เจ๊อ เร๊อ แกแย ดุแหย่แถ่เซ เตเพร เตเร โน เด๊อ ม๊อขุ เทอ อาเก่กู เนอ เจ๊อ.”
26อา โคเจ่ เต๊เห่ อา เถ่ ตาปา ลอปลี ลู เร๊อ เหย่ซี เฮ๊ หนิเร๊อลู เน๊อ, “เก่ เมฮู๊เนอเรอ อูเป เตเพร เตเร หนิเแจ่ปา เตเมแลเปล๊กาฮู๊เต?”
27เหย่ซู่ แม๊ เหย่ซี เร๊อ อา เฮ๊ เหย่ซี เน๊อ, “แกแย เมจว่าแลเปล๊ แจ่ เกอเร๊อ อาเหน่โต่ หม่าแน๊เรอ จอแปแหร่ ย๋อ เมแจ่ ปว๋า เต๊อเจ่อ อาคยา, อา เมแลเปล๊ แจ่ แพ๊.”
28คูเปโตร เฮ๊ ลู เน๊อ, “แม๊มอ, เป แด่แก ลอ เจ๊อเฮ๊อ เตปว๋า เต๊อเจ่อ เร๊อ เป ครวาเกอ เฮ๊อ เนคยาเฮ๊อ.”
29เร๊อเหย่ซู่ เฮ๊ ฉื่อ เน๊อ, “แว เฮ๊แหน่ เจ๊อ ซี, เด๊อ แวเง เร๊อ แว เตซิครือมีลา เออเนอ เร๊อ แกแย เตเพรเพร เก่ วีแก อาหี่อาแพ เร๊อ อาโป่อาแหม่, อาโหมะอาเพ, อาพู๊อาเลอ, เร๊อ อาเพร๊ อาแหล่ ซีเต๊เห่ เฮ๊เนอ, 30อา โอ่เซอเพร เออตือทือเรอ, อา เก่ พย๊าหนิ เอ๊แถ่ เล๊อโป่อาเลอ อาหี่, อาโป่อาแหม่, อาโหมะอาเพ, อาพู๊อาเลอ, อาเพเร๊อาแหล่ ซีเต๊เห่ เด๊อ อาโพ๊ เตเย เจ๊อ ปา หม่าแน๊เรอ อู เก่ เมจาเมจือ อา ปา เนอปา ตือทือ เร๊อ อา เก่ พย๊าหนิ ซิปล่อเซอเพร ตูจูเพร ตาแลเคร๊ ปา. 31หม่าแน๊เรอ แกแย โอ่ เด๊อ เงเล๊อ เต๊เห่เนอ, อา เก่ โอ่แก เด๊อ คยาเล๊อ อู ปา, เร๊อ แกแย โอ่แก เด๊อคยาเล๊อ เต๊เห่เนอ อา เก่ โอ่ เด๊อ เงเล๊อ อู ปา,” เหย่ซู่ เฮ๊ เป เหย่ซี ฮู๊ เนอ.#มัทธิว ๒๐:๑๖, ลูกา ๑๓:๓๐
เหย่ซู่ เฮ๊ เป อู เน๊อ แว เบ่เซอปา อาหรี่อาแก คยา โซโพ๊โตโพ๊
(มัทธิว ๒๐:๑๗-๑๙, ลูกา ๑๘:๓๑-๓๔)
32เหย่ซู่ เร๊อ อา โคเจ่ เต๊เห่ แถ่ แลแค เด๊อ วีเยรูซาเล็ม เร๊อ เบ๊อะอา แถ่ เด๊อ แกล๊ลู เบ๊อะเนอ, เหย่ซู่ จว๊า เหร่อ เหย่ซี เด๊อ เง. เหย่ซู่ แถ่ เป่ เหย่ซี เด๊อ วีเยรูซาเล็ม อาคยา, อา โคเจ่ เต๊เห่ อาคย๊าอายื๊อ ลอปลี เจ๊อ ลู, เร๊อ แกแย เด๊อ อา ครวาแถ่ เต่อเกอ เร๊อ ลู เต๊เห่เนอ, อา ซิอิเช ลอ ปลีเจ๊อ. เร๊อ เหย่ซู่ เอ๊ปล๊อ คยาแซ๊ อา โคเจ่ เช๊อซิเนอ เร๊อ อา เป๊อแถ่ แด๊โฉ่โล เป เหย่ซี เร๊อ ช๋า เหย่ซี จว๊าโต่ เด๊อ วีเยรูซาเล็ม ปาเนอ, อา เก่ ทวาแถ่ แคร๋ อาเหน่ ฮู๊เต ปา เนอเต๊เห่ อาหรี่อาแก คยา. 33เร๊อ อา เฮ๊ เหย่ซี เน๊อ, “หนิดา ตาเต แลแค, กู๊แหน่ เร๊อ เป แถ่ เด๊อ วีเยรูซาเล็ม. เบ๊อะเนอ ปาหม่า อู เก่ อิแช๊ปื่อ แกแยพู๊คู หม่าดื่อ แวเออเนอ เด๊อ เพรหลู่แต ทวาดุทวาเต เต๊เห่ เร๊อ เพรอิซว๊า เตซว๊าเตแส่ อาซ๊าร๊า เต๊เห่ อา กู๊ยากู ปา. เร๊อ เหย่ซี อา ซิปล่อ โต ลอ ลู เด๊อ อา เก่ เมเซอแก แว ปา. อา เก่ เด๊อะตาแก แว เด๊อ แกแยยิวพู๊ หม่าโต่ เต๊เห่ อา กู๊ยากู ปา. 34ฮู๊เนอเรอ แกแยยิวพู๊ หม่าโต่ เต๊เห่ อา เฮ๊เบ่ แลหวิแลวอ โก๊นีโก๊โหน่ ลอ แว ปา, เหย่ซี อา ถู่ปล๊าถู่ซี ลอ แว ปา, อา เก่ ปลี๊ แว ปา, เร๊อ เหย่ซี อา เมเซอแก แว ปา หม่าแน๊เรอ อา โอ่บาเฮ๊อ โซเนอ ปาหม่า แว ก๊อถ่อเซอเพร กาคยา คยาแซ๊ ปา.”
คูยากอบ เร๊อ คูยอห์น อา เตกุยซิยอ
(มัทธิว ๒๐:๒๐-๒๘)
35เพเศเบดี อาพู๊ คูยากอบ เร๊อ คูยอห์น แฮผื่อ เด๊อ เหย่ซู่ อา โอ่ เร๊อ อา เฮ๊ ลู เน๊อ, “ซ๊าร๋า เป กุย เน อิเตเต๊ เบ่เบ่, เป ซิหยื่อ เด๊อ เน เก่ เม เป่ เป.”
36เหย่ซู่ เฮ๊ฉื่อ เหย่ซี เน๊อ, “ซี ซิหยื่อ นอเม แว อิเตเต๊?”
37เร๊อ เหย่ซี เฮ๊ฉื่อ ลู เน๊อ, “เบ๊อะเน แถ่ โอ่แนเฮ๊อ เด๊อ เนเทอเนเก่ เร๊อ เน โอ่เฮ๊อ เด๊อ เนเตอเรอดุทู อากู เฮ๊อ ปาเนอ, เด๊อะโอ่แน เป่เกอ เป เด๊อ เน กู๊ขุ จ๊อทว๊า ตากยา เตเพร, เร๊อ เด๊อ เน กู๊ขุ จ๊อจิ ตากยา เตเพร ปา นี๋.”
38เร๊อ เหย่ซู่ เฮ๊ฉื่อ เหย่ซี เน๊อ, “ซี กุย เตเออเนอ ซี ซิเง เกอเร๊อ อาหรี่อาแก คยา โต่. เตจาเตจือ อาเทอเบ เด๊อ แว เตเร โอ เออเนอ ซี โอ่ เบ๊เกอแหน่ ช๊าเหล่ ปาแอ? โทเรอ เหล่จาเหล่จือ เด๊อ แว เตเร ข่าจา เออ ปา เนอหมา ซี ข่าเบ๊ ช๊าเหล่ ปา แอ?” #ลูกา ๑๒:๕๐
39เร๊อ เหย่ซี เฮ๊ฉื่อ ลู เน๊อ, “เป จ่าเพรอเบ๊ แพ๊.”
เร๊อ เหย่ซู่ เฮ๊ฉื่อ เหย่ซี เน๊อ, “เทอเบ เด๊อ แว เตเร โอ เออเนอ ซี เก่ โอน๊อเกอ ปา, โทเรอ เตจาเตจือ เด๊อ แว เตเร ข่าเบ่ เออเนอ ซี เก่ ข่าเบ่น๊อ เกอดื่อ ปา. 40หม่าแน๊เรอ อาเหล่โอ่แน โอ่ เด๊อ จ๊อจิ ตากยา เนอ เบ่เบ่, เด๊อ จ๊อทว๊า ตากยา เนอ เบ่เบ่, อา โอ่ เด๊อ แว กู๊ยากู หม่าโต่, จอแปแหร่ เก่ เด๊อะโอ่แน เหล่โอ่ เออเนอ เร๊อ แกแย เด๊อ อา ตี๊หรี่แตแร หนื่ออื่อ เป่โทเฮ๊อ ลู เนอเต๊เห่ อาเง ปา.”
41เบ๊อะ อา โคเจ่ เด๊อ อา โอ่แก เพรเช๊อ เออเต๊เห่ หนิโฮ อา แด๊เฮอ ฮู๊เออเนอ เบ๊อะเนอ, เหย่ซี ซิปล่อดุ คูยากอบ เร๊อ คูยอห์น, 42ฮู๊เนอเรอ เหย่ซู่ เอ๊แฮ ปล๊อลอ เหย่ซี เด๊อ อา โอ่ เร๊อ อา เฮ๊ เหย่ซี เน๊อ, “ซี ซิเง ดื่อเฮ๊อ เร๊อ แกแยยิวพู๊ หม่าโต่ เต๊เห่เนอ อา โอ่ เร๊อ อา ทวาดุทวาเต เด๊อ อา เป๊อ เกอเร๊อ เหย่ซี เต๊เห่, โทเรอ เทอเก่พู๊ ทวาดุทวาเต เออเนอเต๊เห่ อา นอเอ่ เกอเร๊อ แลแค อา เตอเรอฉว่าชอ เออเนอ เด๊อ เทอพู๊เก่พู๊ เต๊เห่ อาขุ.#ลูกา ๒๒:๒๕,๒๖ 43หม่าแน๊เรอ ล๋อ ซี เออเนอเต๊เห่เนอ ซี โตเบ่ เมฮู๊เนอ โต่. เด๊อ ซีเกลเนอ, แกแย เตเพรเพร อา ซิหยื่อ ทวาดุ เฮ๊เรอ อา โตเบ่ ทวา ซี หลู่เล๊.#มัทธิว ๒๓:๑๑, มาระโก ๙:๓๕, ลูกา ๒๒:๒๖ 44เด๊อ ซีเกลเนอ, แกแย เตเพรเพร อา ซิหยื่อ ทวา แกแย เด๊อ อู โหล่ดุเล๊อ ลู เก่เฮ๊เรอ อา โตเบ่ ทวา แกแย ล๋อ ปลี หลู่. 45เมเตเฮ๊เรอ แกแยพู๊คู หม่าเฮ๊อ แวเออ, แว แฮ เด๊อ อู เก่ เม เป่ แวเง เนอ หม่าโต่. แว แฮ เด๊อ แว เก่ เม เป อูเง แพ๊. เร๊อ แซ่ฮู๊ แว เก่ เอ๊ถ่ากาหนิ เหย่ซี อาเงเนอเรอ, แว เด๊อะแลแก แว ซิปล่อ เซอเพร เด๊อ แกแย โอ่โร๊ลู อาเง.”
เหย่ซู่ เมลีกา คูบารทิเมอัส อาเป๊เส่
(มัทธิว ๒๐:๒๙-๓๔, ลูกา ๑๘:๓๕-๔๓)
46เหย่ซู่ เร๊อ อา โคเจ่ เต๊เห่ จว๊าโต่ เด๊อ วีเยรีโค เร๊อ เบ๊อะเหย่ซี เถ่จว๊าแกเฮ๊อ เร๊อ วีเยรีโค เบ๊อะเนอ, แกแย ตู๊หมู่ดุ เบ๊อะวีกู เนอเต๊เห่ เถ่จว๊า เกอ เร๊อ เหย่ซี. เบ๊อะเหย่ซี เถ่จว๊า เบ๊อะเนอ, แกแยเพ เป๊เส่คี๊ ยอยเอ่ โอ่แนโอ่ เบ๊อะแกล๊ทือเนอ เตเพร. อามุย เร๊อ คูบารทิเมอัส, อา หม่า เพทิเมอัส อาพู๊ เตเพร. 47เบ๊อะอา หนิโฮ เร๊อ แกแยนาซาเร็ธพู๊ เหย่ซู่ แฮ เด๊อ แกล๊ลู เบ๊อะเนอ, อา เป๊อแถ่ เอ๊โท เน๊อ, “เก๋อ เพดาวิด อาพู๊คู เหย่ซู๋ ซิยอหนิ เกอ เร๊อ แว.”
48แกแย ซิพรวาเอ๊ลา ลู เร๊อ อา เฮ๊ แลแค ลู เน๊อ, “โส่โส โอ่แม๋” หม่าแน๊เรอ อา ลื๋อ เอ๊โทแถ่ ฉว่าฉว่า เน๊อ, “เก๋อ, เพดาวิด อาพู๊คู เหย่ซู๋, ซิยอหนิ เกอ เร๊อ แว นี๋.”
49เหย่ซู่ โอ่โก๊ เร๊อ อา เฮ๊ เน๊อ, “จว๊าเอ๊แฮ อา เบ๊อะเออ” เร๊อ เหย่ซี จว๊า เอ๊กา ลู เร๊อ อา เฮ๊ ลู เน๊อ, “ซิเปล แต่เหม่, ก๊อถ่อมอ, เหย่ซู่ อาเอ๊ เฮ๊อ เน.” 50เร๊อ อา โปล๊เถ่ อาจากลอ เร๊อ อา พาตาแก. โทเรอป๊า, อา ป่าก๊อถ่อ เร๊อ อา แฮ เด๊อ เหย่ซู่ อา โอ่.
51เหย่ซู่ แด๊เฮอ ลู เน๊อ, “เน ซิหยื่อ นอเม แว หม่าอิเต?”
เร๊อแกแย เป๊เส่คี๊ เออเตเพร เฮ๊ฉื่อ ลู เน๊อ, “ซ๊าร๋า, แว ซิหยื่อ แม๊เถอะ แจ่ เกออูนี๋.”
52เร๊อ เหย่ซู่ เฮ๊ ลู เน๊อ, “เน กาหนิ เฮ๊อ. เน เตหยื่อ เมโอ่เหม่ เป เน เฮ๊อ.” เบ๊อะเนอ โตโพ๊โต อาเป๊เส่ แม๊เถอะแจ่ คย๊าเจ๊อ, เร๊อ อา ครวาจว๊าเกอ เหย่ซู่.
လက်ရှိရွေးချယ်ထားမှု
มาระโก 10: EKTNTGEN
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ