BOTHUBO 2
2
Atsala Akütsüniu, Alhou no Akulhoqhi
1Ikehu atsütsü ngo ayeghi, eno tilehi akeu kümtsü mlaqhive. 2Eno atsala akütsüniu loye Alhou no kiu mla akeno qhoi mlaqhive, eno Pa no atsala akütsüniu loye Pa kümla lono akulhoqhive. 3Ikehu Alhou no atsala akütsüniu kümghatsü eno tipau pesü akimthe shitsüe, kughengu tipau tsala lono Alhou no pulhoküsü kümla kümtsü tave no akulhoqhilu ke.
Kiptimi ngo Totimi Pulhoküsü
4Hino Ampeu Alhou no
atsütsü eno ayeghi lhophe
kelono tipaqo ikoighi keu ke.
5Aluza lo asübo tsüni no ayeghi lo ipeghi moke züu, eno küghüyezü lhoipeghi moke züu—kughengu Ampeu Alhou no ayeghi shou tsüghu puku pemono ae, eno achhigha hokideni kemi timi kühano 6akimhi no ayeghi lono ipeghi no achhigha shou zapuku ake— 7tileno Ampeu Alhou no achhigha lono ayeghimkhu pesü timi kughulho eno pa nigipe lo aküxüpu tuthu shesü tsü, eno timi huno aküxüküa lhoxü shive. 8Ampeu Alhou no kipelau Eden lo aghutu lakhi qhitsüno Pa no timi khuu lhophe keno tile qhive. 9Ampeu Alhou no asübo jeli khikhino aloqiqhiyi ithulu kepu eno achuqupu ghenguno alo kepu keno, kümtsü achhigha lono lhoipeghi lupe. Aküxüpu eno akivi ngo alhoksa kighithi sübo no aghutu mta lo ae.
10Aghutu zapütsü nike ghenguno Eden lono aghoki lakhi qoipeghi ae, eno tipau no kijethape aghoki bidi shive. 11Atüghüu je no Pishon. Tipau no Havilah yeghi, khile ameshoyi acheni keno, ti vehomxa qowu chekeu ke. 12Eno tipau yeghi lo ameshoyi ye aloe; bdellium ngo onyx tu ye tile ani. 13Aghoki akiniu je no Gihon. Tino Cush yeghi kümtsü vehomxa qowu ani. 14Aghoki aküthüu je no Tigris, tino Assyria kipelau qowu ani. Eno aghoki abidiu je no Euphrates.
15 Ampeu Alhou no timi hu sawo Eden ghutu mlaphepe eno jukuto penike tile qhive. 16Ampeu Alhou no azah pa tsüno pi, “Aghutu lo akeu xathibo kümtsü nono vejoi chulu nani, 17ikemu no ye akivi ngo alhoksa kighithi sübo loye chumoni, kughengu tipau chuke tsala lono no ye mtsüqheino thive nani.”
18Tishino Ampeu Alhou no pi, “Timi pelo pa likhi apekeu ye aloamoe; pa sasü kümghülu kepu akukuphuu lakhi I no mlanie.” 19Ampeu Alhou no aluza lo tüghashi kümtsü eno atsütsü lo aghau kümtsü ayeghi chhigha lono lhophe no tipaqo sasü timi huno kiu je kutsü nani keno juniye pa lau ighie. Pa no kishi aküxüküa lhoxü lakhikhi ku keno, tino pütüta je shive. 20Timi huno pichepighi, atsütsü lo aghauqo, eno aluza lo tüghashi kümtsü aje kuvetsü. Ikemu Adam ghengu ye pa sasü kümghülu kepu akukuphuu ithumlave. 21Ikehu Ampeu Alhou no timi pelo zücheivepe, eno pa no zü ake lono pa kuchughi lakhi luve no ashicho pesü tipa-a jonhave tsü. 22Eno Ampeu Alhou no timi launo akuchughi ikhiluve keu pesü totimi mlave no li sasü timi lau ighi. 23Tileno timi huno pi,
“Aghi ghi hino I ghi,
eno ashi ghi hi no I shi;
Totimi ipi kuniae, kughengu li
ye timi launo ikhiphelu ke.”
24Tighenguno timi lakhi ye pa puaza qhive no pa nipu sasü küghüna wuveni, eno pama ye ashi lakhi shiveni. 25Timi eno pa nipu pama ye aphikümsa shi akemu kujove moe.
လက်ရှိရွေးချယ်ထားမှု
BOTHUBO 2: SUMRVBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
The Bible Society of India
© 2023, Used by permission. All rights reserved. More