Mata 5
5
Nkǝr Ndǝrǝr Yɛsu ati ata Kǝra Gar
1Sakatǝ Yɛsu tara wula ndzǝ hang, dzǝ ka lǝti ata ngwama paya dzǝ ka ndzai. Antǝ ndzǝr nuwurni ka sǝti adzǝni, 2ba dzǝ ka baditsǝni hyipɛ ala dar ka nkǝrɛ:
3“Kutsari aka ndzǝ nam tara zǝndi kǝtikǝtikur dar akwa mambǝlɛ,
akuya kuhyikur Hyal nǝdar.
4 #
Isa 61:2
Kutsari ala ndzǝ nam ada sǝngǝlɛ,
akuya ndǝ ata siya sǝkǝti ɗǝfa dar.
5 #
Zab 37:11
Kutsari aka ndzǝ nam kǝlam,
akuya dar ani ata siya fa wartar dunya.
6 #
Isa 55:1,2 Kutsari aka ndzǝ nam ada nga mi aka thlǝlai akuya ka kalkalkur,
akuya ndǝ ata siya ghǝiyati tǝ dar.
7Kutsari aka ndzǝ nam aka kǝtǝrdzǝkur,
akuya ndǝ ata tsanti ala dar kǝtǝrdzi.
8 #
Zab 24:3,4 Kutsari aka ndzǝ nam aka ɗǝfu kǝtsǝkǝtsi,
akuya dar ata wula Hyal.
9Kutsari aka ndzǝ nam ada si aka ndzaiyir lapiyakur
akuya ka tǝ ndǝ ata ká tǝ dar madar Hyal.
10 #
1Bit 3:14
Kutsari aka ndzǝ nam tǝ ndǝ ada 'ya ala dar kulɗakur kadǝbar ka kalkalkur,
akuya kuhyikur nam atahyal nǝdar.
11 #
1Bit 4:14
“Kutsari aka gǝri sakatǝ ndzǝ ada ngǝngǝl tǝ gǝri, ba tsan bwanai ala gǝri kadǝbar yɛ. 12#2Sǝt 36:16; 'YaSu 7:52Ka gǝr ndzai aka kutsari ba ɗǝfu sǝɗa, akuya wadzǝɓar gǝri adai atahyal, akuya tsu apani tǝ dar tara tsan bwanai ala nabi yarɛ nam tara si akǝma ta gǝri.
Kagǝla ba Paraku
(Mar 9:50; Luk 14:34,35)
13 #
Mar 9:50; Luk 14:34,35 “Gǝr dza kagǝla ala dunya, ama ma sǝɗakur kagǝla ni kǝ tsabntadzi, mǝmi tǝ dzǝ awa 'ya sǝɗa kadamwa? Dzǝ adi aka paida kǝra wɛ, tar ka ndǝ punta tǝni ka ndzǝ dlǝdlaɓunta aka thlǝlɛ.
14 #
Yaw 8:12; 9:5 “Gǝr dza parakǝr dunya ni. Mǝlmɛ nam ati ata kǝra gar adi ata mǝzi ɗǝwardzi wɛ. 15#Mar 4:21; Luk 8:16; 11:33Tsuwɛ ndǝ adi ada ngyu u'u akwa pitǝla ka mbui akur kugwa wɛ; ama dzǝ ata hai ata sǝr ha tǝni, akuya ka dzǝ mbǝli ala sanga ndzǝ nam akwa kuta kǝiyari. 16#1Bit 2:12Tsu akwa ǝni ngyar ka parakǝr gǝri mbǝli akǝma ndzi, nam tǝ dar ata wula sǝr 'yar gǝri yarɛ nam ɗaku ka dar hǝm Tada gǝri nam atahyal.
Ghǝiyabadzǝr Mabari ni
17“Ta gǝri ta ɗǝnga apǝri Yi si ka Yi whuzanta Mabari wala nabi yarɛ; Yi ta si ka whuzanta tǝ dar wɛ ama ka Yi ghǝiyaba tǝ dar. 18#Luk 16:17Yi ada gha ala gǝri dzǝri, tar atahyal aka aghǝli kwatsǝni, tǝ rǝbwa nkyiɗǝ laka wala ntǝɗak nǝr rǝbwa laka, nam awa ɗǝntadzi akwa mabari ni wɛ tar ma kǝlara su ghǝiyabadzi. 19Kǝlara ndǝ nam tara ɓǝlnta duku nkyiɗu akwa ntsa tsau yarni ba hyipɛ ala ndzǝ damwa yarɛ ka 'ya tsu apani ndǝ ata kǝga tǝni nkyiɗu akwa kuhyikur nam atahyal, ama kǝlara ndǝ nam tara kǝthlǝr akǝri ka hyiptǝ tsau yarni ndǝ ata kǝga tǝ ndǝ ngga akwa kuhyikur nam atahyal. 20Yi ada gha ala gǝri apǝri tar ma kalkalkur gǝri kwatsǝni nǝr Farisi yarɛ ba nǝr malǝmǝr mabari yarni, dzǝri gǝri adi ata lǝkwa kuhyikur nam atahyal wɛ.
Tsa Ndɛ
21 #
Sǝb 20:13; Mab 5:17 “Gǝr kǝ ngati apǝri ndǝ gha ala ndzǝ tsu din, ‘Apǝri ta gǝri tsa ndɛ, ama kǝlara ndǝ nam tara tsi ndɛ, ndǝ ata 'ya alari haka nam dzau.’ 22Ama Yi ada gha ala gǝri apǝri kǝlara ndǝ nam tǝ ɗǝfari sǝwa ala zǝrangǝri ndǝ ata 'ya alari haka. Kadamwa, kǝlara ndǝ nam tara nkǝrɛ ala zǝrangǝri, ‘Dlang,’ ndǝ ata mwari aka dza akwa vui hakar ndzǝr Yahudi. Ama kǝlara ndǝ nam tara nkǝrɛ, ‘Gǝ dlang!’ dzǝ ata lǝkwa u'u kura kuri.
23“Kadǝbar ǝni, ma gǝ angwa hamnta sǝgar ngɛ ata muɓwɛ ba gǝ ka ɗǝngati sǝ laka akwa ɓwanga gǝri aka zǝrma, 24ngyar sǝgar ngari akǝma muɓwari. Tangǝlangkǝma ka gǝ mwara dzǝkutamǝdzi aka zǝrma kama gǝ si hamnta sǝgar ngari.
25“Ma ndǝ laka angwa lǝka bǝrkutsǝni tǝngɛ ka gǝ 'ya bǝtu ka gǝri dzǝkuti tǝng tǝ gǝri tsu akwa whalɛ ma gǝri ata tsǝbti vui haka, ta dzǝ ta mwari aka gɛ ala ndǝr haka. Ndǝr haka ni ata la tǝngɛ ala ndǝ ngga akwa kwatu, ba dzǝ ata ɗalmbwa tǝngɛ akwa fǝrsǝna. 26Yi ada gha ala gǝ dzǝri, gǝ adi ata sǝba wɛ, tar tǝ gǝ nkyinta sanga sǝ nam ata kǝra gɛ, wala anini adi ata mbi wɛ.
Badawikur
27 #
Sǝb 20:14; Mab 5:18 “Gǝri kǝ ngati tǝ ndǝ gha, ‘Ta gǝ ta 'ya badawikur.’ 28Ama Yi ada gha ala gǝri apǝri kǝlara ndǝ nam tara wul mwala tǝ dzǝ mauti dzǝ kurtaka 'ya badawikur aka dza akwa ɗǝfari. 29#Mat 18:9; Mar 9:47Ma ntsa gɛ nǝr bwar tsisǝmɛ ata hau tǝngɛ ka gǝ 'ya biku, kwaɗǝba tǝni ka gǝ ɗalnta. Kudzǝ ka gǝ nai ta bwa duku akwa dzá gɛ ta tǝ sanga dzá gɛ awa lǝkwa u'u kura kuri. 30#Mat 18:8; Mar 9:43Ma tsisǝmɛ gɛ ata hau tǝngɛ ka gǝ 'ya biku, dǝlnta tǝni ka gǝ ɗalnta. Kudzǝ ka gǝ nai ta bwa duku akwa dzá gɛ ta tǝ sanga dzá gɛ awa lǝkwa u'u kura kuri.
Ngǝla Mwala
(Mat 19:9; Mar 10:11-12; Luk 16:18)
31 #
Mab 24:1-4; Mat 19:7; Mar 10:4 “Tsuwɛ ndǝ kǝ nkǝrɛ apǝri, ‘Kǝlara ndǝ nam tara ngǝla mwalarni ntsakǝr ka dzǝ lari kakadǝr ngǝla tǝni.’ 32#Mat 19:9; Mar 10:11,12; Luk 16:18; 1Kwa 7:10,11Ama Yi ada gha ala gǝri apǝri kǝlara ndǝ nam tara ngǝla mwalarni, ma adi ata kǝra badawikur wɛ, dzǝ hau tǝni tǝ dzǝ ata ndzai ndǝr badawikur, ba kǝlara ndǝ nam tara kǝtǝ mwala nam tǝ ndǝ ngǝla ni dzǝ 'ya badawikur.
Mbǝrɛ
33 #
Fǝr 19:12;
Tsǝ 30:2; Mab 23:21 “Kadamwa, gǝr kǝ ngati tǝ ndǝ nkǝrɛ ala ndzǝ watsi apǝri, ‘Gǝ adi ata mbǝrɛ ata kǝra hawi wɛ, ama ka gǝ 'ya sǝ nam tǝ gǝ kǝl mbǝrɛ ata kǝri ala Thlaku.’ 34#Yak 5:12; Isa 66:1; Mat 23:22Ama Yi ada gha ala gǝri, Ta gǝr ta mbǝr tǝm, wala aka atahyal, akuya dzǝ ani vui ndzaiyir Hyal; 35#Isa 66:1; Zab 48:2wala aka dai, akuya dzǝ ani vui vǝ thlǝlari; wala aka Ursalima, akuya dzǝ ani mǝlmǝr kuhyi nam ngga. 36Ba ta gǝ ta mbǝrɛ aka kǝra gɛ, akuya gǝ adi ata mǝrti wala sǝsi duku mwapu wala mǝngǝl wɛ. 37Ama ngyar ka ‘Ar’ gǝri ndzai ‘A,’ ba ‘A'ár,’ gǝri ‘A'á’; kǝlara sǝ nam tara kwatsǝni ǝni hyati aka ndǝ kulɗa ni.
Ntsɛ akuya ka Ntsɛ
(Luk 6:29-30)
38 #
Sǝb 21:24; Fǝr 24:20; Mab 19:21 “Gǝri ngati tǝ ndǝ gha, ‘Ntsɛ ata vuiya ntsɛ, aka hyir ata vuiya hyir.’ 39Ama Yi ada gha ala gǝri, Gǝr adi ata nkyǝ sǝkur ata kǝra ndǝ nam tara 'ya ala gǝri kulɗakur wɛ. Ama ma ndǝ laka kǝ tsa tǝngɛ ata pahyim tsisǝmɛ gǝ, ka gǝ ndalti alari bwa nda yɛ. 40Ma ndǝ laka ada bara bǝrkwɛ tǝngɛ ka dzǝ dlutsi lǝkutǝr ngɛ, ka gǝ ngyar alari wala lǝkutǝr gudzǝbar ngɛ ma. 41Ma ndǝ laka ntsakǝr ala gɛ mwarǝr mǝyal pathlu, mwaramɛ aka dza mǝyal sǝɗɛ. 42La ndǝ nam tara kǝgyǝ su aka gɛ, ba ta gǝ ta whui ta ndǝ nam tara bara kimbǝl aka gǝ.
Yiɗɛ Dǝgun yarɛ
(Luk 6:27-28; 3:36)
43“Gǝri kǝ ngati tǝ ndǝ gha apǝri, ‘Ka gǝ yiɗǝ ntǝwhulǝr ngɛ ba ka gǝ ngǝla dǝgunmar ngɛ.’ 44Ama Yi ada gha ala gǝri: ka gǝri yiɗɛ dǝgunmar gǝri yarɛ ba 'yamɛ aduwa ala ndzǝ nam ada tsan bwanai ala gǝri, 45akuya ka gǝri ndzai madar Tada gǝri nam atahyal. Dzǝ ada hau tsǝtsǝr ni ka dzǝ mbǝli ata kǝra ndzǝ nam kǝmangar ba ndzǝ nam ɗa, ba dzǝ ada hyanti yimi ata kǝra ndzǝ nam kal-kal ba ndzǝ nam kura kal-kal. 46Ma gǝri ada yiɗɛ ndzǝ nam tara yiɗɛ tǝ gǝri ɗiɗi, wadzǝɓar mi tǝ Hyal ata la gǝri? Wala ndzǝr dlu tsǝm yarni ma adi ada 'ya apani wɛ? 47Ma gǝri ada thlawar madar mamar gǝri ɗiɗi, aka mi tǝ gǝri 'ya nam tara kwatsǝni ndzǝ nam damwa? Wala ndzǝ nam kura ta zǝndi Hyal yarɛ ma dar adi ada 'ya apani wɛ? 48#Fǝr 19:2; Mab 18:13Ka gǝri ndzai kura aka aibai kadǝbar ka apa tǝ Tada gǝri nam atahyal kura aka aibai.”
လက်ရှိရွေးချယ်ထားမှု
Mata 5: CKL
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
©2023 Seed Company in collaboration with Language Developers and Bible Translators Association