Marcos 1
1
Apvaiam Juan apkellavkeskama iemmen aniapom iokhalhma metkelha temma
1Asmak'ak altennama aktemakha ampai'akhasekha nkek nak ania'a aktaqmanma aplhenammap Jesucristo, apto nhan Eniapom Neten Apketka. 2Ka ktemo nak aptalheskama lhnak nanek vakkahak apkeltennasemmap ania'a Isaias annenga hengke'e:
«Angvapaksek hata sekama ania'a ehenkok apmanie lheiap, epeneskasok hata amai apankok ma'a amanie nhan apmahai'a emhangkok ma'a#1:2 Malaquias 3:1».
3Lhema enenlhet apkelpalhemama m'a metkelha temma, ka aptak hengke'e:
«¡Elpeneso ta amai kakpota evak Apveske, elpeiveso ta nhan!#1:3 Isaias 40:3», lhnak nanek aptemak ma'a.
4Apvai'ak nak Juan apkellavkeskama iemmen aniapom ma'a iokhalhma metkelha temma, apkeleltennaseiangka lhnak aplhamakho enenlhet eliaqmongkasekhak mo'ok apvalho'ok, ngkolhek na allavkesangko konne iemmen kakpota ngkolhek aktemeskesangka nkek na meleliehekho apkellaskamakha Eniapom Neten.
5Apkelvai'ak nak na enenlhet'avok apkelleniem'o iokhalhma Judea kakpota nhan apiav'akha temma Jerusalen, apkeleltemo lhnak ellailhok Juan ma'a. Apketlheianmo lhnak na apankavek apkeltemakha ngkollatsekama. Ka apkellavkesaiangko lhnak na konne iemmen Juan ma'a akieto alvata Jordán. 6Iama etanlheng apva lhnak apvenaktema aptalhnema Juan, apiapnama lhnoka kaselha aiempek, seva' lhnak na aptoma kanhan iavhan. 7Lhna aptemak apkeltennaiangka Juan apkellanemo enenlhet'avok hengke'e:
—Netamen ko'o evak hata apto apientalhnemo apankek, molhnok ko'o. Ngvannalhkek evalhok angvalhek kakpota al·hatsoskesek alhato'ok apnakteto apmankok ma'a.#1:7 Esclavo lhnak apkenmakmekama mota apkel·hatsoskasekamok apnakteto apmanko'ok alhato'ok apkelveskai'e apankok la'a. 8Askellavkaske niekhe ko'o ketlhengkap konne iemmen, hato ka m'a enenlhet anak malha ta etnek apkellavkeskama la akieplomo Espíritu Santo —lhna aptemak Juan apaqmeteiangka m'a.
Juan aplavkeskama konne iemmen Jesús
9Ntemengkek nak ma'a, ka apteiapmo lhnak Jesús natemma Nazaret akieto iokhalhma Galilea. Apvekho lhnak akieto alvata' Jordán, ka aplavkeskamo lhnak konne iemmen Juan ma'a. 10Neksa apteiapma lhnak nemmen Jesús, apvetai'o lhnak anmaihekho neten, apvaiventamo lhnak takhaplhet Espíritu, malha konemmaktek na aptemak ma'a. 11Netamen apkellengai'o lhnak enenlhet'avok ma'a nema aliatekama aniemai'o neten, lhna ntemak hengke'e:
—Lheiap eietka askamelaiam, apaiesekha mota evalhok —lhna ntemak ma'a nema aliatekama.
Jesús akieto iokhalhma metkelha temma
12Ka netamen ma'a apekhesaiangka lhnak Espíritu Jesús kakpota emhangkok iokhalhma metkelha temma. 13Aplomaka lhnak ma'a 40 aknem aiseksek kaselha nevhak. Nkeliaikama lhnak Satanas aktemakha akmahai'a nkoiepkonek Jesús ma'a, ángeles noka apkellasennaikama m'a.
Apkempai'akha sekha apmakmekama Jesús iokhalhma Galilea
14Apkaqlhengkasemmakpek nak Juan apkellavkeskama iemmen aniapom ma'a. Ka apmeiekho lhnak Jesús iokhalhma Galilea, apkeleltennaseiangka lhnak ma'a ania'a aktaqmanma aniem'o Eniapom Neten. 15Lhna aptemak:
—Ngva'ak aknem aklhenammalhko lhnak nane mota, nkanketva'ak na etnekhak hata apveske Eniapom Neten. ¡Eliaqmongkasekha ta mo'ok apvalho'ok, meliaskam ankek na ania'a aktaqmanma nak! —lhna aptemak Jesús ma'a.
Jesús apkellannengvaiam 4 enenlhet apteniaikamok kelasma
16Neksa aplhengama lhnak Jesús neiava alvata akieto Galilea, apvetangveiakmo lhnak Simon ka nhan apialheng Andres apkelhaikokho iama tetekko nemmen ma'a. Vanlha lhnak apkenmakmekama apkelteniaikamo mota kelasma m'a. 17Lhna aptemak Jesús apkellanemo:
—¡Etlheng, helieplomaha! Atlhekmosangkok hata nentemakha nenteniai'a enenlhet —lhna aptemak ma'a.
18Kolhvavek ankek nak apkakheseikokhak iama tetekko apanko'ok, apkelieplekho lhnak Jesús ma'a. 19Ka apketlhengamo lhnak mokhom tep atketsek ma'a, apvetangveiakmo lhnak Jesús Jacobo kakpota nhan apialheng Juan, Zebedeo apketkak nak ma'a. Apkakhaiangkek nak konne loma nemmen ma'a, apkellanekho lhnak iama tetekko apanko'ok alietiapma m'a. 20Ka apkellaveiangka lhnak na Jesús ma'a, apkelieniekhek nak apiapom kakpota nhan apkellennengkasekama konne loma nemmen ma'a, apkelieplekho nhan Jesús ma'a.
Enenlhet akmaikama keliaqhameiok
21Ka apvekho lhnak Jesús kakpota nhan apkeltamesaikamok natemma Capernaum, aknem nennekhelha sabado lhna ntemak ma'a. Ka apkelentalhnemo lhnak konne apkaqnekhelha judios ma'a, apkempai'akha sekha lhnak na apketlhekmoskama Jesús ma'a. 22Nkeliemaskangkek nak apvalho'ok apkellengai'a enenlhet'avok apketlhekmoskama akientalhnema, mang na nkolhnemok escribas#1:22 Apketlhekmosekamok hengetlhekmoskama henganemakha Moises. ma'a. 23Apnengkek nak na lhema enenlhet ma'a kasekapok av'alhok akpaiseiam akmaikama m'a, akpaiheiangka lhnak apatong ma'a:
24—¡Aiai, manghengeliasamolhma Jesús ko Nazaret! ¿Apmak'a nlho hennaqtevaksek, he? Asiave ko'o Eniapom Neten apokkanma lheiap —lhna ntemak kasekapok av'alhok ma'a.
25Koka lhna aptemak Jesús apkelpalhengkaseiangka m'a:
—¡Kovanma', kopaqnemekha enenlhet anak! —lhna aptemak Jesús ma'a.
26Nkelpelhiennengkeskangkek nak enenlhet akpaqnemekho kasekapok av'alhok akpaiseiam ma'a, mang nak na ngkeskamak akpaiheiangka atong ma'a. 27Nkeliemaskangkek nak apvalho'ok enenlhet'avok ma'a, apkelpaqmetkesammakpo lhnak mok apankave, lhna aptaiangkok:
—¿Se lha enenlhet ai'e? Apientelhe panke nak, alhnankok anak na hengetlhekmoskama. Mana ngkolhnok kasekapok alpaiseiam av'alho'ok aiempehek, nkellasekhave nak na apaivoma m'a —lhna aptaiangkok enenlhet'avok ma'a.
28Kolhvavek ankek nak nketkaikama ania'a iokhalhma Galilea lhamakho aktemakha qaselha apkellanai'a Jesús ma'a.
Jesús aptaqmelkeskaiam Simon apepiamong
29Ka apteiapmo lhnak Jesús apkaqnekhelha judios ma'a, apketlhelhma'ak noka Jacobo kakpota nhan Juan, apkelvekhavek nak apnemakha Simon kakpota nhan Andres. 30Nnengkek nak altennaskamo Jesús ania'a akietnema Simon apepiamong ma'a, nemmaskema akmelhanma aiempehek nak ngkaqhemak ma'a. 31Ka apteteskaiakmo lhnak Jesús ma'a, apmamo lhnak amek, apnesekho lhnak na neten ma'a. Ntaqmelekhek nak ma'a, netamen alpasmomo nhan aplhamakho m'a.
Aplhamakma anmaska piempeiok apkeltaqmelkeskaiam Jesús
32Apkelienaktesekama lhna lhma m'a, aplaqlentamo lhnak anmaska apiempeiok kakpota nhan enenlhet anmaikama kasekapok av'alho'ok apnakha Jesús. 33Apentelhe pankek nak enenlhet apkaqnekho atong pa'at ma'a. 34Apkeltaqmelkeskaiakmek nak Jesús aklhamakho aktemakha anmaska apiempeiok enenlhet'avok ma'a. Aplhaniek nak na apkelentepkaskesaikamok kasekapok av'alho'ok ma'a. Mang nak na eltemok nkotlhenek apvesai'a m'a ngkanek nkeliekpelkemavek na songkek ma'a.
Apaiesaikama ania'a Jesús lhamakho iokhalhma Galilea
35Mmopeiakmek na lhma' atsai'a m'a, aplhatekhai'o Jesús, apteiapmo lhnak natemma m'a. Apmeiekho lhnak aplhepkennenga metkelha akiennoma lhma' kakpota enmalhnama Eniapom Neten ma'a. 36Netamen nak ma'a Simon kakpota nhan apketlhelhma'ak apkenmeiekho apkeleliangvekha m'a. 37Ka apkelvetekho lhnak ma'a, lhna aptaiangkok:
—Apentelhek lhek enenlhet apkelketansema lheiap —lhnak aptaiangkok ma'a.
38Ka apkatemmoiangka lhnak Jesús ma'a, lhna aptemak:
—Nok po'ok temma nak aktakha nak nengaqte, ka asmak'ak aleltennasama ha'e, asvai'o nak na hengke'e asmahai'a atnek ko m'a —lhna aptemak apkellanemo.
39Ka aplhengamo lhnak Jesús ma'a, apkeleltennaseiangka lhnak lhamakho apkaqnekhelha la judios ma'a akieto iokhalhma Galilea. Apkelentepkaskesaiangkek nak na kasekapok av'alho'ok enenlhet'avok ma'a.
Jesús aptaqmelkasekha lhema enenlhet lepra ato'
40Apteteskai'o lhnak lhema enenlhet lepra ato' apnakha Jesús ma'a, ka apkelteklhekvai'o lhnak aptapno'ok nalhepop napaqtek ma'a. Lhna aptemak apkapiosemmakpo:
—Apveske ¿apmak'o la enialhnasekhak eiempek anak, he? —lhna aptemak.
41Apietnai'avek nak napa'at Jesús ma'a, ka apmangveiakmo lhnak, lhna aptemak:
—Hai', askeltavek ko'o ¡Kalhnekha apiempek anak! —lhna aptemak Jesús ma'a.
42Kolhvavek ankek nak nkalhnekhak apiempek ma'a, akmaskemo nhan nemmaskema. 43Ka apaiveskamo lhnak Jesús apkeltemo nhan etaqhekhak ma'a, lhna aptemak apkanemo:
44—Meleltennasamo nkek enenlhet'avok ania'a nak, vanlha toka elana aktemakha akpaivoma aklheianma nak ley apanko nak Moises. Eniakha ta apnakha sacerdote kakpota elanhok alhnekha apiempek anak, esakha ta nhan lhema qaselha apkaikamok la Eniapom Neten —lhna aptemak Jesús apkanemo enenlhet.
45Koka apketkasekama lhnak ania'a lhamakho iokhalhma, lhna songkek na Jesús mevomek moklhem'a la iokhalhma aniem'o apkeliasekamo lhma enenlhet'avok ma'a. Metkelha temma lhnoka aplomaka mota m'a, koka apentelhek nak na enenlhet apkelioiam apnaianlha mota m'a.
လက်ရှိရွေးချယ်ထားမှု
Marcos 1: TMF
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
©2023 LETRA Paraguay