Joon 20
20
Jisasol aiyo aiko te adukavoka tovinokwono
(Matyuu 28:1-8; Mak 16:1-8; Luuk 24:1-12)
1Toruda'ai iruko Sande tollugwojuro lomwo iru'mago tovi dugumdo kuuno juna'duke toga wagwolago Makdalada'ai abolo Mariyav a'mwo buuso sulpuuto tomuuno plaino sumaiyokwe ai'movokakwono. Toro ki'mo'mno sumaiyokwe aro kwonoka tov sulo bwotonyo kuunodo tool a'mwo buuso tovuro kudo'aiko allukurusopo kwollu kuruv me'no amodukwopingiko tovi kwonokakwono. 2Toro wonyuno sumaiyokwe Mariyav kano kano plavo'no Saimoon Pitaike'aro Jisasolluro kalo buuropino kwinyajuko uumjunyokwe toonyuge'aro toonallu nakuru'maro'no aro anakudokakwono. “Nemi Aguto toolluro kulako bwiyo tov a'mwo buuso tovida'ai bomokalokwodupu me'no amokavla'mapokwono. Aki gamoro kulako bwiyo su tovi gadomuu amorosumapoldukoneyokwe tovino nevu kuudo miyau'mwakuuwono.” Anakudokakwono.
3Toro anakudoka tovi Pitaike'aro nuu Jisasolluro uumjunyokwe gabovo toonyuge'aro toonal bolokwino sumawoleyokwe a'mwo buuso tomuuno yere avlavowolonakono. 4Yiuwi'nokai toonal kano kano plavowolno kuvi kuruv nuvu uumjunyokwe gabovo toonyu Pitallu uuwolovono a'mwo buuso toru muudu'no ai'movonyugono. 5Toro ki'mo'mno sumoneyokwe suduko inuguto'narono a'mwo buuso sulpuuto tomuu auloonyopiyanyugono. Toro kuuloonyopino sumoneyokwe Jisasollu amoweyomgurosopo laplap tov wo'duke auloonyopiyanyugono. Toro kuvi kuruv a'mwo buuso tovi anakuuto tomuu maulanyugono. 6Toro yodore toga Saimoon Pital lukomgu kano kano numjungobo'no a'mwo buuso toru abai'movokaikono. Pitalno'gwowi a'mwo buuso su toru bai'mo'mno sumaiyokwe anakuuto tomuu aulokaikono. Toro kuulno sumaiyokwe Jisasollu amoweyomgurosopo laplap tov wo'duke tovi kwonokaikono. 7Aki laplap puruv Jisasolluro mido tovi amoweyomgurosopo tovi kwonokaikono. Jisasolluro sumdomago tovi amoweyomgurosopo laplap su tov laplap pugai avalo toru mworokakwono. Toro kuvi kuruv laplap judo su tov pumuu amogutowosungiko tovi kwonokaikono.
8-9Nuu Jisasolluro uumjunyokwe toonyu a'mwo buuso su toru sumdomgu bai'movono yere maulanyugono. Toro kuvi kuruv Pital a'mwo buuso tovi me'no kuuloduke toga'no'gwowi nuu kwonyu kuruv lukomgu kuumjungoulanyugono. Sumdomgu gamoro yiuwi'nokai uumjunyokwe toonol Gooti toolluro yogalo sokwollosungiko puvino kuudo yere miyouromallajuwonogano. Yogalo su tov arokwono. “Oo Kraisol bolnodo tomuuda'ai aiyo aiko te nodukawonekono.” Su toro tovino kuudo yere miyouromallajuwonogano. Toro kuvi kuruv nuu gamoro uumjunyokwe gabovo toonyuno'gwowi a'mwo buuso tovi me'no wonyuno sumoneyokwe kuudo kuubweyonyugono. 10Toro te navu uumjunyokwe toonal a'mwo buuso tovida'ai bolokwino sumawoleyokwe nami ago tomuuno aikomgu avlavowolonakono.
Makdalada'ai Mariyav Jisasollu kwonoka tovinokwono
(Matyuu 28:9-10; Mak 16:9-11)
11Toro kuvi kuruv Mariya'gwowi a'mwo buuso tovi kwa'mgu tomuu davo'no kumdo ajuda'nyajukokwono. Kumdo juda'nyuno sumaiyokwe toga a'mwo buuso sulpuuto tomuu kuuloonyopiyo'moneyokwe suduko tov sunuguto'narokakwono. 12Toro inuguto'na'no sumaiyokwe kwonoka tov ensel pworal youro wiya'jo tokwe yesolno Jisasolluro kulako bwiyo kwollajuko toru mwalodole toorallu kwonokakwono. Ensel su tooralluro pwol Jisasolluro mido tov kwollajuko toru amwalokaikono. Aki pwol Jisasolluro suvlo toval kwollajuko toru amwalokaikono. Toro mwalodole toorallu kwonokakwono. 13Toro te ensel su tooral Mariyavi aro kuudolorakono. “Abolovoo, guu buro'nyo'mo kumdo dodadokuuno?” Toro kuudolo toorallu Mariyav kuudokakwono. “Mi Aguto toolluro kulako bwiyo tovi a'mwo buuso tovida'ai me'no bomokalokwodupu amokavla'mapekono. Aki gamoro kulako bwiyo su tov gadomuu amorosumapoldukoneyokwe tovino nuu kuudo miyau'mwakono.” Kuudokakwono. 14Toro wuujuno sumaiyokwe Mariyav gunyubworo'no Jisasol noda'mduke toollu kwonokakwono. Toro kuvi kuruv aro kuudo miyouromarokakwono. Oo a'mwo su tool Jisasoldeyo. Kuudo miyouromarokakwono.
15Abolo su tovi Jisasol aro kuudoganokaikono. “Abolovoo, guu kumdo adumwakudo tov buro'nyo kavlo tovino'mdeyo? Guu ala'mwolluno a'mgono ja'mgonadokuuno?” Kuudoganokaikono. Toro kuudoganoka su toolluno Mariyav aro kuudo saurokakwono. Oo a'mwo su tool kwako ikulsul womdokwe tovi mollomwalokwe tooldeyo. Su toro kuudo yau'no sumaiyokwe aro kuudokakwono. “A'mwo Agutoloo, guu Jisasolluro kulako bwiyo tov amokavla'modekuno'juki gamoro kulako bwiyo su tovi amorosumodo tomuuno guu neya donyudono. Toro anyudubi tov nuu gamoro kulako bwiyo su tovi nokwo maro'mi mokavla'me'gono.” Kuudokakwono.
16Toro kuudoka tovi Jisasol aro kuudokaikono. “Mariyavoo.” Toro kuudoka toga Mariyav yadu'mwonyuno sumaiyokwe suworovomarokakwono. Toro iworovoma'no sumaiyokwe Hibruu yogaljo tovida'ai aro kuudokakwono. “Raboonaiyoloo.” Yogalo, Raboonaiyolo, tovino kavlo tov Ibwasokweyolo'mokwono. 17Toro wuujuno sumaiyokwe Jisasol kuudokaikono. “Guu gumi ato tokwe mi manubogai'nubiyo. Su tov aro tovinokwono. Nuu mi Nyunumiyago toollomno yere milmwola tovinokwono. Toro kuvi kuruv moro nyugwai'yagoruvobusuko nyumo'nodupudo tooraiyomno guvu plavo'bi mino aro duudono. “Nuu mi Nyunumiyago toollomno nyulamonyugono. Su tool kev kworekulluro Tellunumiyagekono. Aki nuu mi Gooti toollomno nyulamonyugono. Su tool kev kworekulluro Gooti tookono. Toro toollomno nyulamonyugono.” Duudono.” Kuudokaikono.
18Toro wuujuno sumaiyokwe Makdalada'ai Mariyav wuugollu'movo'no Jisasolluro uumjunyokwe tooraiyomno plavo'no aro kuudokakwono. “Oo nuu Aguto toollu me'no kwonme'gono.” Wuudo'no aki Jisasolluro yogalo kuudoka togai'aro kuudokakwono.
Jisasol gami uumjunyokwe toorai wiyalo'noduke toollu kwonopo tovinokwono
(Matyuu 28:16-20; Mak 16:14-18; Luuk 24:36-49)
19Toruda'ai iruko Sande su tollugwojuro sulato toga Jisasolluro uumjunyokwe tooro ago puvi aullu'bwo'nomwaloporogano. Toro tooro Juu tooraino luko sopo tovino tov kudo'aiko tovi guureji momjoguropino sumaveyokwe aullu'bwo'nomwaloporogano. Toro kuullu'bwo'nomwalodopure toga Jisasol anakuuto tomuu kuullalo'nyuno sumaiyokwe uumjunyokwe su tooravuro akuuto toru davo'no aro kuudokaikono. “Kemoro sumwoluko ton kavo to'no doosunyulo.” 20Jisasol toro wuujuno sumaiyokwe gamoro ato tovake'aro suumdo tokwe'aro tonyu kuuduuwallokaikono. Toro kuuduuwalloka tovi gamoro uumjunyokwe tooro wono'mno kemi Aguto su toolluno ilaiyo soporogano. 21Toro yodopure toorai Jisasol aki aiko te aro kuudokaikono. “Kemoro sumwoluko ton kavo to'no doosunyulo. Moro Nyunumiyago tool mi amonuwopiyabokaikono. Toro to'busuko kubalno nuu kev kworekullu kuruv a'mwo abolo kwako akavi mwalodupudo tonyomno amekwapimono.” Kuudokaikono.
22Jisasol toro me'no wuujuno sumaiyokwe gamoro sumuujudo tov uumjunyokwe su toorai uuwapiyo'no aro kuudokaikono. “Kevu Gooti toolluro Kuullo toollu nomapinorekikono. 23#Mt. 16:19, 18:18Toro toorekul a'mwo abolo punyuro buro'nyo buro'nyo ma'no ma'nodo tovuro kirumwallo tovi amodukwopipi toga Gooti kwol kuruv ma'no ma'nodo su tovuro kirumwallo tovi nomodukwopiyonekono. Toro kuvi kuruv kevu ma'no ma'nodo tovuro kirumwallo tovi mamodukwopipi to'gwowi Gooti kwol kuruv ma'no ma'nodo su tovuro kirumwallo tovi mamodukwopiyonekono.” Kuudokaikono.
Toomasol Jisasollu wono'no kuudo kuubweyoka tovinokwono
24Toruda'ai a'mwo 12-pela uumjunyokwe tooraida'ai pwol Jisasol abai'movoka toga mamwalokaikono. A'mwo su toolluno yovo tov Toomasolekono. Aki gamino yovo puruv, Didimasolekono. 25Toro toollu Jisasolluro uumjunyokwe gabovo tooro aro kuudoporogano. “Oo nevu Aguto toollu me'no kwonmawekono.” Toro kuudopo kuvi kuruv Toomasol aro kuudokaikono. “Nuu, Oo nebalo'mdeyo, kuudo yere muubwemonyugono. Nuvu gamoro nillo imuulo tonyu wono'mi aki gamoro ato tovake'aro suumdo tokwe'aro tovalluda'ai imuulo tonyu moro pollo tov aulopiyami toga'no'gwowi kuudo nokwo uubwemonyugono.” Kuudokaikono.
26Toruda'ai 7-pela iruko pubuul me'no abawoka toga Jisasolluro uumjunyokwe tooro ago puvi aiko te aullu'bwo'nomwaloporogano. Su toro toga Toomasol kworogai aullu'bwo'nomwalokaikono. Toro kuullu'bwo'nomwalno sumaveyokwe kudo'aiko tonyu guureji momjoguropiyo'mno aulomwaloporogano. Toro kuulomwalodopure toga Jisasol kuullalo'no'no kworavuro akuuto toru aulodavokaikono. Toro kuuloda'mno sumaiyokwe aro kuudokaikono. “Kemoro sumwoluko ton kavo doosunyulo.” 27Toro wuujuno sumaiyokwe toga Toomasollu kuudokaikono. “Gumoro pollo tov akawai uubogai'no'bi aki moro ato tovida'ai imuulo kwosuko tovi doonono. Aki gumoro ato tov ruuguusapiyo'bi moro suumdo tovida'ai imuulo tovi doulopiyawono. Guu moro aduka'mo tovino kuudo noullo maullo miyau'binono. Toro kweku kuruv moro me'no aduka'mo su tovino kuudo neya duubweyono.” Kuudokaikono. 28Jisasol toro kuudoka tovi Toomasol aro kuudokaikono. “Guu mi Agutekugonoo! Aki guu mi Gooti tookugonoo!” Kuudokaikono.
29Toro kuudoka tovi Jisasol kuudokaikono. “Guu me'no anuwonmado tovino tov kuudo anubwemwakuno. Toro kuvi kuruv a'mwo abolo mi manuwonopi kuudo to'no anubwepi su tono'gwowi ilaiyo bwotonyo tov nuuwo'mwalonogano.” Kuudokaikono.
Buukiyo akavuro kavlo tovinokwono
30Jisasolluro duuwallo jurogudo bwotonyago ton buukiyo akavi me'no sokwollosumonyugono. Toro kuvi kuruv Jisasolluro duuwallo jurogudo bwotonyago punyuno'gwowi buukiyo akavi miyokwollosumonyugono. Duuwallo jurogudo su ton gamoro uumjunyokwe tooravuro sumdo muugona'dopure toru kuuduuwallajukogano. 31Toro kuvi kuruv kuuguudo me'no sokwollosumo su ton kevu aro tonyuno kuudo uubwepureyokweyo'mokwono. Oo nebalo'mdeyo. Jisasol Gooti toolluro amonekwopiyaboka Krais tool kwoldeyo. Aki toro tool Gooti toolluro Kwolaiyoldeyo. Su toro toolluno kevu kuudo kuubwepi tov gamoro yovo tovi'aro aiyo yiunokuudo mujomwekovlaiyo'moneyokwe tov nomapinogaikikono.
လက်ရှိရွေးချယ်ထားမှု
Joon 20: SMB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2022: Ethnos360 Sanford, Florida