Luuk 15
15
Sipsip sounosoka toolluno yovekurajokwono
(Matyuu 18:12-14)
1 #
Lk. 5:29,30 Toruda'ai a'mwo takis nuugwiyo mallokwe toorogai'aro a'mwo ma'no ma'nodokwe toorogai'aro tooro Jisasolluro yogalo tovi wuu'nyo'moneyokwe wobo toru aboporogano. 2Toro bodopure kuvi kuruv Farasi toorogai'aro loowo tovino pi'mwo kuudokwe toorogai'aro tooro mebweyogalo aro ajunoporogano. “Oo a'mwo akal a'mwo ma'no ma'nodokwe toorai ilaiyo molloma'dowodekono. Toro molloma'dowodo su toorogai kuulonomwalodowodekono.” Ajunoporogano.
3Mebweyogalo toro junodopure toga Jisasol yovekurajo puruv aro kuudokaikono. 4“Kuudo neya jaullulo. Kemida'ai a'mwo pwol wan handret sipsip tooro kurukwekono. Toro tool sipsip yiuno pwolnodo toollu sounoso'ji tov a'mwo su tool nokwo wonyapino to'no yonoldukono? Awiyo, a'mwo su tool 99-pela sipsip tooro kwako kuu'maiyo tomuu mwalodopure toorai wuugollu'mowo'ji sipsip sounoso'ji su toolluno yo'mgonomollonekono. 5Toro tool yo'mgonomollowo'ji sipsip sounoso'ji su toollu kuvinono so'mgonomaro'ji toga a'mwo su tool gami sipsip sounoso'ji su toolluno ilaiyo bwotonyo yonekono. Ilaiyo yowo'ji sipsip su toollu gami yagwo tovi'aro mollukwovomokavlawonekono. 6Aki toro tool gami ago tomuuno mollukwovomokavlawo'ji gami ibwoto'nyo toorogai'aro a'mwo abolo wobo toru mwalodupudo togai'aro tonyu domarowo'ji wuudonekono. “Oo nuu moro sipsip sounoso su toollu me'no so'mgonoma'monyugono. Toro tovino tov kevu bopi nuvuge ilaiyo yano.” Wuudonekono.
7Su toro to'busuko kubalno nuu aro ikudumo'mokwono. A'mwo ma'no ma'nodokwe pwekwo Gooti toollomno kuudo muuduko souragunyumo'no'ji tov Gooti toolluro ago muunyu kai'muu mwalodupudo ton ilaiyo bwotonyo yodupudogano. Su tov aro tovinokwono. 99-pela a'mwo abolo pun aro kuudo yaupinogano. Oo nevu sugudonoldeyo. Toro tonol Gooti toollomno kuudo youragunyumo'nyo'mo tov supto mimwakuuwono, kuudo yaupinogano. Toro tovino tov a'mwo yiuno pwolnodo toolno'gwowi Gooti toollomno kuudo souragunyumo'no'ji su toolluno muunyu kai'muu mwalodupudo tonyuro ilaiyo ipino tov 99-pela a'mwo abolo kuudo miyouragunyumo'nupi su tonyuno ilaiyo tovi nuuwolowonokwono.”
Silva nuugwiyo sounosoka tovino yovekurajokwono
8Aki Jisasol yovekurajo puruv aro kuudokaikono. “Abolo puruv silva nuugwiyo atousal tobuul kurukweyokwono. Toro tov gami silva nuugwiyo yiuno pullugwonodo tollugwo sounoso'ji tov nyo'mgonomallo'moneyokwe gworeko tov luudapiyowo'ji ago tovi nobwokuronokwono. Toro tov a'mgono ino ino yowo'ji yere miyo'mgonoma'dowo'jure kuga kuruv a'mgono kuuno imwalonokwono. 9Toro tov me'no so'mgonomaro'ji toga gami ibwoto'nyo togai'aro gami wobo toru mwalodupudo togai'aro tonyu ju'bworomarowo'ji aro wuudonokwono. “Oo nuu moro silva nuugwiyo sounoso tollugwo aki aiko te me'no so'mgonoma'mokwono. Toro tovino tov nuuge'aro kevuge'aro yiuwi'nokai tonol ilaiyo bwotonyo neya yano.” Wuudonokwono. 10Su toro to'busuko kubalno nuu aro ikudumo'mokwono. A'mwo ma'no ma'nodokwe yiuno pwolnodo kwol kuruv Gooti toollomno kuudo souragunyumo'no'ji tov Gooti toolluro ensel tooro kevnokwerai akuuto toru ilaiyo bwotonyo ipinorogano.” Kuudokaikono.
A'mwo pwolluro muugunyo sounosoka toolluno yovekurajokwono
11Toruda'ai Jisasol yovekurajo puruv aro kuudokaikono. “A'mwo pwol kwolaiyo pworalokwe tool amwallajukekono.
12Kwolaiyo lukomguda'ai tool aro kuudokaikono. “Mi nyunumiyagoloo, guu yere mabolodo'bure akaga gumoro kuto ivito tovida'ai miyo'moneyokwe ton neya donyabono.” Kuudokaikono. Toro kuudoka tovi ganumiyago tool kuto ivito ton yado momuudeyosuno sumaiyokwe yiuno kwolaiyo lukomguda'ai toollo'mo ton kwiyokaikono. 13Toro kwiyoka tool momwora'no sumaiyokwe gami yiuwi'nokai kuto ivito su ton nuugwiyo'mo sodolovomarokaikono. Toro yodolovoma'no sumaiyokwe iruko pubuul me'no uuwolo'no'no gami yiuwi'nokai nuugwiyo ton momwora'no sumaiyokwe kwako manyu pumuuno avlavokaikono. Toro plaino sumaiyokwe toga buro'nyo buro'nyo pasudorodeyo toorai mujumovlaiyo'mo winoduke tool gami yiuwi'nokai nuugwiyo ton yasuwa'no adukwopiyajukekono.
14Me'no dukwopino sumaiyokwe toga kwako su towai muju'wuulo bwotonyo puruv abai'movokakwono. Toro abai'movoka toga noonyumwonyu tonyuno supto sokaikono. 15Toro tool kwako su towaida'ai a'mwo aguto pwollomno uuwo'no nuugwi womdo'mo kuudoganokaikono. Toro kuudoganoka toollu a'mwo aguto tool gamoro sa'ai wuulo toorai ki'duvollo'moneyokwe amorapiyokaikono. 16Toro amorapiyoka tool a'mwo aguto toolluro sa'ai wuulo toorai ai'duvollajukekono. Toro ki'duvolno sumaiyokwe sa'aiyo su tooro asudobo dapto ton nodopure tonyu wonyuno sumaiyokwe nonyo'mo kuudo saullajukekono. Aki su toro toga a'mwo pworo kwolaiyo su toollu wosamujuko nonyo'moneyokwe pun mabwiyajupekono.
17Toro mwalno sumaiyokwe kwolaiyo su tool kuudo ilaiyo pullugwo aro saurokaikono. Oo mi nyunumiyago toolluro womdokwe tooro wosamujuko ton nonyugollu'mopto yodupudorogano. Toro kuvi kuruv nuu tekwonyuno'gwowi akamuu mwalodum wosamujuko'mo nobollo'mo sadokwono. 18Toro te mi nyunumiyago su toollomno plavo'mi aro wuudumonyugono. “Doweloo, nuu Gooti muunyu kai'muu mwalodowodo toollu ma'no ma'no kwiyonyugono. Aki gumoro sumdo kuvi kuruv ma'no ma'no agujonyugono. 19Toro tekwonyu guu, “Moro kwolaiyekugono,” manyudubinonyugono. Toro kuvi kuruv gumoro womdokwe pwekwonyubusuko to'no gujumo'numonyugono.” Wuudumonyugono. Kwolaiyo tekwo su toro kuudo saurokaikono. 20Toro kuudo yau'no sumaiyokwe toga gami ganumiyago toollomno aikomgu avlavokaikono.
Toro pla'mduke toga gami ganumiyago tool manyu toruda'ai me'no kwonokaikono. Toro wonyuno sumaiyokwe kalo winoduke tool kwollomno kano kano uuwo'no gami kwolaiyo su toollu mogudupolopino sumaiyokwe molluduuduulo amollomarokaikono. 21Toro molloma'no sumaiyokwe gami kwolaiyo tool kuudokaikono. “Doweloo, nuu Gooti muunyu kai'muu mwalodowodo toollu ma'no ma'no kwiyonyugono. Aki gumoro sumdo kuvi kuruv ma'no ma'no agujonyugono. Toro tekwonyu guu, “Moro kwolaiyekugono,” manyudubinonyugono.” Kuudokaikono. 22Toro kuudoka kuvi kuruv gami ganumiyago tool gamoro womdokwe toorai kuudokaikono. “Kevu youro kumi'yago sugumaluko kuunodo puul yere mokabopi moro kwolaiyo akallu bomollubweyulo. Yopi gamoro pollo tovi yeso'moneyokwe rig tokwe'aro suulpweyo tokwe'aro yere mokabopi bomollubweyulo. 23Aki buulmokau taiyo bwotonyo novelanyo'mo tooke'aro movomokabopi ilaiyo bwotonyo yowa'ji lubullu doto yananokwono. 24Su tov aro tovinokwono. Moro kwolaiyo akal me'no abolokaldeyo kuudo yau'dumdo kwol kuruv aiyo aiko te duka'mdowo abonyuru'ma'mokaikono. Aki me'no sounopiyoka kwekwo kuruv aiko te so'mgonoma'mekono. Toro toolluno ilaiyo doto neya yonomwalanokwono.” Ganumiyago tool toro kuudokaikono.
25Toro yanodopure toga kwolaiyo sumdomguda'ai tool womdo tomuu somollajukekono. Me'no yomolluno sumaiyokwe ago tovi wobo toru abai'movokaikono. Toro bai'mo'mno sumaiyokwe toga kuu'noka tov ago tovida'ai dato kuulojanodopure kuu'nokaikono. 26Toro wuu'nyuno sumaiyokwe a'mwo womdokwe pwollu domaro'no aro samuugojokaikono. “Akaigworo buro'nyo jadokwovo?” Samuugojokaikono. 27Toro samuugojoka tovi a'mwo womdokwe tool kuudokaikono. “Oo gumi jugwai'yago tool kaiyako miyo'mgonomaro'no ilaiyo abai'mo'moka toolluno junumiyago tool buulmokau taiyo bwotonyo toollu romiyodowo lubullu doto ajanmwakovo,” kuudokaikono. 28Toro kuudoka kuvi kuruv kwolaiyo sumdomguda'ai tool surodo wuunyuno sumaiyokwe ago tovi kuullo'mo mwinokaikono. Kwa'mgu tomuu nokwo adaiyajukekono. Toro da'mduke toga ganumiyago tool bolokwino sumaiyokwe kwolaiyo su tool aulabwoneyokweyo'mo guureji kuudoganokaikono. 29Toro wuudoganoduke kuvi kuruv gamoro kwolaiyo sumdomguda'ai tool aro kuudokaikono. “Mi nyunumiyagoloo, nuu kworomo bwotonyago toga gumoro womdo ton gujodumdonyugono. Aki gumoro yiuwi'nokai yogalo nyudodore tonyu mamagudukwopiyodumdonyugono. Toro toonyu meme kula'nyo pwolnodo kwol kuruv mi ibwoto'nyo toorogai lubullu doto yanyo'mo manyuromiyodumdekugono. 30Toro kuvi kuruv gumi kwolaiyo akalno'gwowi gami yiuwi'nokai nuugwiyo ton kwonyalabolo tonyu me'no younopiyodowo abai'mo'moka toolluno buulmokau taiyo bwotonyo toollu lubullu doto janmwakovo,” kuudokaikono.
31Toro kuudoka toollu gami ganumiyago tool kuudokaikono. “Mi kwolaiyoloo, guvu yiuwi'nokai toga nuuge mwalodumdekugono. Moro yiuwi'nokai kuto ivito ton gumiyo'mogano. 32Toro kuvi kuruv gumi jugwai'yago akalno'gwowi me'no abolokaldeyo kuudo sauro kwol kuruv aiyo aiko te duka'mdowo abonyuru'ma'mokaikono. Aki me'no sounopiyoka kwekwo kuruv aiko te so'mgonoma'mekono. Toro toolluno ilaiyo mollomallo'moneyokwe lubullu doto neya yonomwalano,” kuudokaikono.” Jisasol yovekurajo tov toro kuudokaikono.
လက်ရှိရွေးချယ်ထားမှု
Luuk 15: SMB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2022: Ethnos360 Sanford, Florida