Luuk 22
22
Juudasol Jisasollu morubweyo'moneyokwe tovino soureya'mgonyajuko tovinokwono
(Matyuu 26:1-5, 26:14-16; Mak 14:1-2, 14:10-11; Joon 11:45-53)
1 #
Moll. 12:1-27
Toruda'ai lubullu doto puruv yanyo'moneyokwe iruko tollugwo nobai'meyo'mo wobo toru sumo'nokakwono. Lubullu doto su tov Bret Mamunopingiko tovi yanyo'moneyokweyokwono. Lubullu doto su tovino yovo puruv Muunyu Toru'aro Surukuruwolovoka lubullu dotoveyokwono. 2Toro te lubullu doto su tovi yanodopure toga pris mido mollomwalokwe toorogai'aro loowo tovino pi'mwo kuudokwe toorogai'aro tooro Jisasollu romiyoso'mo kwinoporogano. Toro tooro aro sajunoporogano. “Nevu adadomgu'aro romiyosanoldukono?” A'mwo su tooro luko yo'mno toro sajunoporogano. Aro tovino luko soporogano. Oo kwolallo lubullu doto tovi yanodupudo ton molo nonekullupiyo. Toro tovino luko soporogano.
3Toruda'ai Satanyol Juudasollu aulomwalokaikono. A'mwo su tool 12-pela uumjunyokwe tooraida'ai pwekono. Aki toro toolluno yovo puruv Iskeriyootolekono. 4Toro te Juudasol pris mido mollomwalokwe toorogai'aro Jeruusalemda'ai ilomoropiyo'moneyokwe ago tovida'ai mollurogudo tooravuro a'mwo aguto pworogai'aro tooraiyomno avlavokaikono. Toro plaino sumaiyokwe a'mwo su tooravuro ato tovi Jisasollu morubweyo'moneyokwe tovino Juudasol kworogai adomwaloporogano. Toro toorai Juudasol aro kuudokaikono. “Nuu Jisasollu nomaikubwemonyugono.” 5Toro kuudoka tovi pris mido mollomwalokwe tooro wuu'no'mno ilaiyo amollomaroporogano. Toro molloma'no sumaveyokwe aro kuudoporogano. “Guu su toro subi tov nevu mubiyo nogujanonogano.” Kuudoporogano. 6Toro kuudopo tovi Juudasol, “kuvi imonyugono,” kuudokaikono. Toro wuujuno sumaiyokwe Juudasol aro tovino kuudo soureya'mgonyajukekono. A'mwo kwolallo mamuugona'dopure toga nuu Jisasollu adadomgu'aro morubwemonyudukoneyokwe tovino kuudo soureya'mgonyajukekono.
Jisasol gami uumjunyokwe toorogai lubullu doto tovi sonomwalopo tovinokwono
(Matyuu 26:17-25; Mak 14:12-21; Joon 13:21-30)
7Toruda'ai lubullu doto tov Bret Mamunopingiko tovi yanyo'moneyokwe iruko tollugwo abai'movokakwono. Lubullu doto su tovuro iruko muudu'nodo su tollugwoji Muunyu Toru'aro Surukuruwolovoka lubullu doto tovi yanyo'mo sipsip muugunyo toorai romiyosodupudogakono.
8Su toro toga Jisasol Pitaike'aro Jooneke'aro toorallu aro amodapiyokaikono. “Kevu plavo'bullu Muunyu Toru'aro Surukuruwolovoka lubullu doto tovi yanano'moneyokwe ton jovrowosulo.” Amodapiyokaikono. 9Toro kuudoka tovi Jisasolluro uumjunyokwe tooral samuugojolorakono. “Nevu Muunyu Toru'aro Surukuruwolovoka lubullu doto tovi yanyo'mo tov gadomuu plavowosi yovrowososuno'mo dogujunadopiyo?” Samuugojolorakono. 10Toro samuugojolo tovi Jisasol kuudokaikono. “Kevu wagwolago Jeruusalem tovi kuula'bullu a'mwo pwol wonyubiyo tokwe iromokavla'mdowo'jure toollu wuuru'maro'bullu kwollu duumjunyulo. Aki a'mwo su tool ago puvi kuulodowo'jure toollu duumjungouloulo. 11Aki kevu ago su tovuro jukwo toollu aro duujulo. “Ibwasokwe tool adumokaikono. “Nuuge'aro moro uumjunyokwe toorogai'aro toonol lubullu doto tov Muunyu Toru'aro Surukuruwolovoka tovi yananonogano. Toro te lubullu doto su tovi yanyo'mo toonol noulonomwalano'moneyokwe ago bwotonyo tov gadomuu dukwoso?” Ibwasokwe tool toro adumokaikono.” Duujulo. 12Toro kuudubullu tool gamoro ago tovi muunyu tomgu suloluulovamojungiko tovi mekuduuwallonekono. Ago su tovi yiuwi'nokai noluuleyo togai'aro nyulonomwallo'mo togai'aro ton me'no kwosungikokwono. Toro tovi amekuduuwallo'ji toga jovrowosulo. Toro sovrowosubullu tovi nevu yonomwalanokwono.” Jisasol gamoro uumjunyokwe toorallu toro wuudo'no amodapiyokaikono.
13Toro tooral wuugollu'mo'mno sumaleyokwe yiuwi'nokai Jisasolluro kuudoka ton kuvinono kwonolorakono. Toro tooral Gooti toolluro Muunyu Toru'aro Surukuruwolovoka lubullu doto tovi yanyo'mo ton sovrowosolorakono.
Jisasol gami uumjunyokwe toorai bret tokwe'aro wain wonyo tokwe'aro toval kwiyoka tovinokwono
(Matyuu 26:26-30; Mak 14:22-26; 1 Koorin 11:23-25)
14Toruda'ai lubullu doto su tovi nonyo'moneyokwe tov me'no abai'movoka toga Jisaseke'aro gamoro 12-pela kuurotokwe toorogai'aro tooro noluuleyo puruv wosamujuko ton wo'dopure tovi wobo toru abomwaloporogano. 15Toro wolomwalno sumaveyokwe Jisasol gami kuurotokwe toorai aro kuudokaikono. “Nuu danyu'nyuwuulo tov yere mibwosunodo'mure toga Muunyu Toru'aro Surukuruwolovoka lubullu doto akavi kevuge yonomwallo'moneyokwe tov ilaiyo guureji anyunadopiyo. 16Moro ilaiyo anyunadopiko tovino aro ikudumo'mokwono. Nuvu lubullu doto akavi aki aiko te yere manmonyugono. Yiuno aguto kig Gooti toolluro mido mollomwalo tovi anakuuto tomuu lubullu doto tov suuwiyo sumwojo'ji toga'no'gwowi aiko te numonyugono.” Kuudokaikono.
17Toro wuujuno sumaiyokwe Jisasol kapwo puruv wain wonyo tokwe surosungiko tovi amarokaikono. Toro malluno sumaiyokwe Gooti toollu, “Nenyoo,” subusu'nyogalo me'no wuudo'no gami uumjunyokwe toorai kuudokaikono. “Kevu maropi domomuudeyomworallulo.” Kuudokaikono. 18Jisasol toro wuujuno sumaiyokwe aki aro kuudokaikono. “Nuu ikudumo'mokwono. Ikulsulo wain tovida'ai wonyo akav aki aiko te manmonyugono. Toro kuvi kuruv yiuno aguto kig Gooti toolluro mido mollomwalo tov me'no abai'mowo'ji toga'no wain wonyo muuduko puruv numonyugono.” Kuudokaikono.
19Toruda'ai Jisasol bret pun maro'no Gooti toollu, “Nenyoo,” wuujuno sumaiyokwe bret su ton buudovo'no gami uumjunyokwe toorai kuumallokaikono. Toro wino sumaiyokwe kuudokaikono. “Akav moro kulako tokwono. Moro kulako tov kemi ikullo'mwojo'moneyokwe wimonyugono. Su toro tovino kevu aki aiko te kuudo yaullo'moneyokwe bret tov neya dobuudovonomwalogaulo.” Kuudokaikono. 20Toruda'ai Jisasol bret amaroka to'busuko kubalno kapwo puruv wain wonyo tokwe surosungiko tov amarokaikono. Toro malluno sumaiyokwe gami uumjunyokwe toorai aro kuudokaikono. “Kapwo akavi moro mujako tovino'busuko surosungikokwono. Moro mujako su tov kemi ikullo'mwojo'moneyokwe bwolawonokwono. Aki mujako su tov Gooti toolluro subuu'yamju muuduko puruv imo'nonokwono.” Kuudokaikono.
21 #
Da'bk. 41:9
Jisasol toro wuujuno sumaiyokwe aki aro kuudokaikono. “Kevu neya duu'nyulo. A'mwo pwol mi ikomago tooravuro ato tovi nomoranubweyonekono. A'mwo su tool aga toga noluuleyo akavi nuuge anomwaladopiyo. 22Su tov aiyoga Gooti toolluro me'no ajesajuko tomgu'aro kuvinono imo'nonokwono. A'mwo Kwolaiyo Kuunodo toonyu neya bolmonyugono. Toro kuvi kuruv a'mwo amoranubweyo'ji su tekwoji tabunyu bwotonyo tov nomaronekono.” Kuudokaikono. 23Jisasol toro kuudoka toga gamoro uumjunyokwe tooro aro abuudoganugoulaporogano. “Nemida'ai su to kuvi yono tool ala'mwoldukono?” Abuudoganugoulaporogano.
Jisasolluro uumjunyokwe tooro, “ala'mwol dukuuwolo'mwallo,” aullajunopo tovinokwono
24 #
Mt. 18:1; Mk. 9:34; Lk. 9:46 Aki Jisasolluro uumjunyokwe toorai akuuto toru kevnokwe tooro yogalo aro aullajunoporogano. “Nemoro akavida'ai pwol ala'mwol dukonekuuwolo'mwallo?” Aullajunoporogano. 25Toro kuullajunodopure toorai Jisasol aro kuudokaikono. “Juu miyawosunodupudo tooravuro a'mwo aguto kig tooro kevnokwero ilomoropunyu yapi a'mwo abolo tonyu guureji dumuurolo'mdupudorogano. Toro dumuurolo'mdupudo kuvi kuruv kevnokwe tooro aro yajunodupudorogano. “Oo nevu a'mwo abolo punyu ilaiyo igollokwenogano.” Yajunodupudorogano.
26 #
Mt. 20:25-27, 23:11; Mk. 9:35, 10:42-44 Toro yodupudo kuvi kuruv kev toorekulno'gwowi kwako akavida'ai a'mwo aguto su toorobusuko mimo'nupinono. Kemoro tovida'ai pwol a'mwo aguto imo'nyo'mo kwino'ji su tool yiuwi'nokai toorekullu nemuugunyo yovomaiyokwe pwolbusuko neya aikullumo'nono. Aki kemi mido mollekumwalokwe tool a'mwo ki'nato womdokwe pwolbusuko neya aikullumo'nono. 27#Jn. 13:12-15Kevu buro'nyo kuudo jukiyau'mwakovo? A'mwo pwol noluuleyo tovida'ai wosamujuko nomwalodowodo su tool agutoldukono oo a'mwo wosamujuko yovroubweyo'mo womdo wiyodowodo tekwo agutoldukono? A'mwo noluuleyo tovida'ai wosamujuko nomwalodowodo su tool agutekono. Toro kuvi kuruv nuvnokwe toonyuno'gwowi kemi akuuto toru mwalodum a'mwo womdo wiyodowodo pwekwobusuko ikullumo'nodumdekwonyugono.
28Toro toonyu tagunyo pun mi yamju nyoganyo'moneyokwe numi banyumo'nodupudogano. Toro banyumo'nodopure kuga kuruv kevu manugollu'mo'mdupodorekikono. 29Neya duu'nyulo. Mi Nyunumiyago tool aguto kig mollomwallo'moneyokwe womdo tov me'no anubweyokaikono. Toro anubweyoka to'busuko kubalno nuu kwonyu kuruv womdo avalo su tov kemi aikubwemono. 30#Mt. 19:28Nuu aguto kig toonyuro mido mollomwalo tovi kevu anakuuto tomuuda'ai noluuleyo tovi wosamujuko ton nonomwalpinorekikono. Aki toro toorekul aguto kig tooravuro sia tonyu ilomwalopi Isuraiyolda'ai 12-pela yovodolobunyo tonyu nojainyubwo'mwalpinorekikono.”
Jisasol Pitallu, “Guu mi buulo nonyugunyumopibinekugono,” kuudoka tovinokwono
(Matyuu 26:31-35; Mak 14:27-31; Joon 13:36-38)
31Toruda'ai Jisasol Pitallu aro kuudokaikono. “Saimoonoloo, Saimoonoloo neya duu'nono. A'mwo pwol wit tovuro no kuunodo tonyu momuudeyomallo'moneyokwe yamju wiyoganodowodekono. Su toro to'busuko kubalno Satanyol gumino tov kuunodoldukoneyokwe tovino yamju gujoganyo'mo winodowodekono. Aki Satanyol su toro gujoganyo'mo tovino Gooti toollu me'no kuudoganokaikono. 32Toro kuvi kuruv guvu mino kuudo nubweyodumdo tooku nobwolorabiyokweyo'mo Gooti tool gumi gujo'mwojono'moneyokwe tovino nuvu subusu'nyogalo me'no wuudodumdonyugono. Toro te nuu aro anyunadopiyo. Guu abwolorabi tov miyomno yere neya jouragunyumo'nono. Toro souragunyumo'nubi toga gumoro jugwai'yago toorobusuko gujumo'nodupudo pworo abwolorapi kuruv miyomno aikomgu yere neya youragunyumo'nupinorogano. Toro tekwojai jurogudo nokwo duuwimwojumwalbinekugono.” Kuudokaikono. 33Toro wuujuno sumaiyokwe Pital aro kuudokaikono. “Agutoloo, nuu toonyuno'gwowi guuge wuulo killo'mo ago tovi aulomeronakubwepi kuruv nokwo'mokwono. Aki toro toonyu guuge aromiyonakubwepi kuruv nokwo'mokwono.” Kuudokaikono. 34Toro kuudoka toollu Jisasol aro kuudokaikono. “Pitaloo, nuu gudumo'mokwono. Iruko akallugwoji kuukuuro kwolo pwol deko yere madodowo'jure toga guu tooku mino tov pugasalpuga aro dubinekugono. “Awiyo, nuu a'mwo su toolluno kuudo maiyonyugono.” Mino toro dubinekugono.” Kuudokaikono.
Jisasol gami uumjunyokwe toorai neya yovrowosunpino'moneyokwe kuudoka tovinokwono
35 #
Mt. 10:9,10; Mk. 6:8,9; Lk. 9:3, 10:4 Jisasol toro wuujuno sumaiyokwe gami uumjunyokwe toorai aro kuudokaikono. “Sumdomgu moro womdo tovi imwalpino'moneyokwe kemi amodekwapiyo toga aro aikudonyugono. “Kevu nuugwipweyodeyo oo kutodeyo oo suulpweyodeyo togai mamokavlapinono.” Toro modekwapino sumoneyokwe kevu moro womdo tokwe amollomollopo toga noonyumwonyu su tonyuno supto sajuporekuldukono?” Toro kuudoganoka tovi aro kuudoporogano. “Awiyo, supto miyajuwonogano.” 36Toro kuudopo tovi Jisasol kuudokaikono. “Toro kuvi kuruv aga'no'gwowi a'mwo pweku nuugwipweyo kurukweyonyudeyo adubi tov neya domokavlavono. Aki guu kuto kuruv kurukweyonyudeyo adubi tov neya domokavlavono. Aki guu molo'mo kwallu'mopto tov nonagutonyudeyo adubi tov gumi youro ton maket woso'bi molo'mo kwallu'mopto puul neya dobiyomarono. 37#Ais. 53:12Su toro tovino aro ikudumo'mokwono. Gooti toolluro yogalo numino sakwollungiko puruv suuwiyo neya imwojonokwono. Yogalo su tov arokwono. “A'mwo ma'no ma'nodokwe pwollubusuko kaiyako sugolopekono.” Mino yogalo sakwollungiko su tov wobo toga suuwiyo imwojono'mokwono.” Kuudokaikono. 38Jisasol toro kuudoka tovi aro kuudoporogano. “Agutoloo, doonono. Nevu molo'mo kwallu'mopto puusal amworakuuwono.” Kuudoporogano. Toro kuudopo kuvi kuruv Jisasolno'gwowi aro aduumjukurokaikono. “Mekono.” Aduumjukurokaikono.
Jisasol Muumuudo Oolip toollu muunyu toru subusu'nyogalo adoka tovinokwono
(Matyuu 26:36-46; Mak 14:32-42)
39Toruda'ai Jisasol wagwolago Jeruusalem tovi bolokwino sumaiyokwe gami pasudo sajuko to'busuko kubalno subusu'nyogalo wuujo'mo tool Muumuudo Oolip toollomno avlavokaikono. Aki gamoro uumjunyokwe kworo kuruv uumjuno'mno muumuudo toollomno avlavoporogano. 40Toro plaino sumaveyokwe Jisasol gami uumjunyokwe toorai aro kuudokaikono. “Yamju puruv kemi ikulloganodowo'jure toga kevu nobwolorapiyokweyo'mo tov subusu'nyogalo neya duudogaulo.” Kuudokaikono. 41Toro wuujuno sumaiyokwe Jisasol kuru'gwo kuuwokaikono. Toro kuuwoka su toru yiuno sulo pwollu pwapiyodupudo tomgu'aro toru'gwo kuuwokaikono. Toro wino sumaiyokwe gami suduko tov inuguto'no'no subusu'nyogalo aro adokaikono. 42“Nyunumiyagoloo, nuu dado su tovi mama'miyokwe puuto puruv nokwo youlanubwebinekudukono? Toro kuvi kuruv moro anyunadopiko su tovi muumjunbinono. Yiuno guvnokwekujuro yo'mo agujunadopiko tovino duumjunono.” Jisasol subusu'nyogalo toro adokaikono.
43Jisasol toro doduke toga Gooti toolluro ago muunyu kai'muuda'ai ensel pwol bwiyalo'no'no Jisasollu jurogudo aduuwimwojokaikono. 44Aki Jisasol jul'nyo bwotonyo ibwosunyuno sumaiyokwe subusu'nyogalo guurejuno adokaikono. Toro doduke toga gamoro dukwogulo tov muja'buugo bwotonyo imo'no'no kwako tovi abwolokakwono. 45Toro bwolo'no sumaiyokwe Jisasol subusu'nyogalo me'no wuudo'no aikomgu bino sumaiyokwe gamoro uumjunyokwe tooro sa wo'dopure toorai abwonokaikono. Su tooro kalo winodopure tovino tov sa kwollajuporogano. 46Toro wo'dopure toorai bwonyuno sumaiyokwe aro kuudokaikono. “Kevu buro'nyo'mo sa doo'mwakovo? Yamju puruv ikulloganodowo'jure toga kevu nobwolorapiyo. Toro toorekul mabwolorapiyokweyo'mo tov kevu dukavopi subusu'nyogalo neya duudogaulo.” Kuudokaikono.
Juudasol Jisasollu a'mwo nogalomworallo'mo toorai amorubweyoka tovinokwono
(Matyuu 26:47-56; Mak 14:43-50; Joon 18:3-11)
47Jisasol toro wuudoduke kuga'gwo kuuno a'mwo 12-pela kuumjunyajupo tooraida'ai pwol, Juudasolo, kuujajupo su tool Jisasollu galomworallo'moneyokwe a'mwo kwolallo toorai amollubworomokailabokaikono. Toro mollubworomokailabino sumaiyokwe Jisasollu molluduuduulo wiyo'moneyokwe wobo toru abokaikono. 48Toro boduke kuvi kuruv Jisasol aro kuudokaikono. “Juudasoloo, guu A'mwo Kwolaiyo Kuunodo toonyu ikomago tooravuro ato tovi manubwebino'moneyokwe molluduuduulo nyubino'mekudukono?”
49Jisasol toro wuudoduke toga aki gamoro uumjunyokwe tooro wobo toru adaiyajupo su tooro Jisasollu wimo'noduke su tovino kinoma'no sumaveyokwe aro kuudoporogano. “Agutoloo, nevu a'mwo su toorai nemoro kwallu'mopto togai romiyosanonoldukono?” 50Toro wuujuno sumaveyokwe a'mwo uumjunyokwe pwol kwallu'mopto toul lobwokuroma'no sumaiyokwe a'mwo womdokwe pwolluro kaduko tovi amodovodokuurapiyokaikono. A'mwo su tool pris aguto toolluro womdokwe pwekono. 51Toro toollu amodovodokuurapiyoka kuvi kuruv Jisasol aro aduullukurokaikono. “Kevu pasudo su tovi aro'aro' neya jogallu'meyulo.” Toro duulluku'no sumaiyokwe a'mwo womdokwe su toolluro kaduko tovi uubogai'no'no sukulokaikono.
52Toruda'ai pris mido mollomwalokwe toorogai'aro Jeruusalemda'ai ilomoropiyo'moneyokwe ago tovida'ai mollurogudo tooravuro a'mwo aguto toorogai'aro Juu tooravuro mido mollomwalokwe toorogai'aro tooro Jisasollu nogalomwora'dopure toga a'mwo su toorai aro kuudokaikono. “Kevu mino tov, Kuuko pwekono, kuudo jukiyanuu'mwakovo? Toro toorekul a'mwo kuukokwe pwollu galomwora'dupudo to'busuko kubalno mi galonumworapino'moneyokwe kemi kwallu'mopto togai'aro gado togai'aro miyomno buro'nyo'mo domokailabadokwovo? 53#Lk. 19:47, 21:37Nuvu yiuwi'nokai iruko toga Jeruusalemda'ai Gooti toollu ilomoropiyo'moneyokwe ago tovuro agwapto toru kevuge mwalodum kuuguudo yodekubwasodumdonyugono. Su toro yodekubwasodore toga nokwo agalonumworaropujuko kworekul kuruv magalonumwora'dupudorekikono. Toro kuvi kuruv kuujo sumdo akallugwono'gwowi kemoro ato tovi aikuuwoso. Aki aga toga dugumdo tovuro jurogudo tov kemi mido mollekumwaloduke tovi uumjunodupu kuvi kuuno sumwakovo.” Kuudokaikono.
Pital Jisasolluno tov, “Nuu a'mwo su toolluno kuudo maiyonyugono,” pugasalpuga adoka tovinokwono
(Matyuu 26:57-58, 26:69-75; Mak 14:53-54, 14:66-72; Joon 18:12-18, 18:25-27)
54Toro tooro Jisasollu me'no galomwora'no sumaveyokwe pris aguto toolluro ago tomuuno amogaibworomokavlavopekono. Toro mogaibworomokavla'mdopure toga Pital manyu tomuu'aro kuumjunokaikono. 55Aki pris aguto toolluro agwapto toru'no kuulno sumaveyokwe a'mwo duuwatokwe pworo agwapto tovi akuuto toru duko yamjurovo'mno nyumwonyallo'moneyokwe abwolomwekwoporogano. Toro bwolomwekwodopure toga Pital a'mwo su toorogai abwolomwalokaikono. 56Pital toro bwolomwalno sumaiyokwe duko sumwonyallajuko su tovuro bako tovi wobo toru amwalokaikono. Toro mwaloduke toollu pris aguto toolluro womdokwe sujuraiyo puruv kamwoga abiyomuugonarokakwono. Toro biyomuugona'no sumaiyokwe sujuraiyo su tov Pitalluno aro adokakwono. “A'mwo aka kwol kuruv Jisaseke amwallajulo pwekono.” Adokakwono. 57Toro kuudoka kuvi kuruv Pital abolo su tovi soukuu'nuudokaikono. “Awiyo, nuu a'mwo su toolluno kuudo maiyonyugono.” Soukuu'nuudokaikono.
58Aki lukomgu a'mwo gabovo pwol Pitallu wonyuno sumaiyokwe aro kuudokaikono. “Guu kweku kuruv a'mwo su toollu uumjunyokwe tooravuro pwekugono.” Kuudokaikono. Toro kuudoka tovi Pital aki aiko te aro soukuu'nuudokaikono. “A'mwoloo, awiyo. Nuu kwonyumaiyo.” Soukuu'nuudokaikono. 59Toro youkuu'nuudo'no mwaloduke toga kuujo sumdo pulluno uuwolo'no'no a'mwo gabovo pwol Pitalluno aiko te guureji aro adokaikono. “Oo nebalo'mdeyo. A'mwo akal Galilida'ai tooravuro yogaital'mullo dodowodo toolluno tov Jisasolluro a'mwo pwekono.” Adokaikono. 60Toro adoka kuvi kuruv Pital kuudokaikono. “A'mwoloo, awiyo. A'mwo adumado su toolluno kuudo maiyonyugono.” Pital su toro kuuno wuudoduke kuga'gwo kuuno kuukuuro pwol deko adokaikono.
61Toro adoka toga Aguto tool Pitallu sumdo agunyubworoonokaikono. Toro gunyubworoonoduke toga Pital gami Aguto toolluro yogalo aro me'no kuudoka tovino aiko te kuudo saurokaikono. “Guu kuukuuro tool deko yere madodowo'jure toga mino pugasalpuga kuunano aro wuudubinekugono. Awiyo, nuu a'mwo su toolluno kuudo maiyonyugono.” 62Pital Jisasolluro toro kuudoka tovino kuudo yauro'no su toruda'ai wuugollu'mo'mno sumaiyokwe kumdo bwotonyo amjodumovlavokaikono.
A'mwo mollurogudo tooro Jisasollu burekakwo me'nopiyo'mno iwago aromiyopo tovinokwono
(Matyuu 26:67-68; Mak 14:65)
63Toruda'ai a'mwo mollurogudo tooro Jisasollu pris aguto toolluro ago tovi me'no mokaulno sumaveyokwe amoduvomwaloporogano. Toro moduvomwalo'mno burekakwo me'nopino sumaveyokwe iwago aromiyopekono. 64Toro romino sumaveyokwe Jisasolluro sumdo tovi galobu'duvolomworaro'mno aro kuudoporogano. “Guu proofet pwekuno'juki donekudono. Ala'mwol dukoguromiyadopiyo?” Toro wuudo'mno iwago adaromiyoporogano. 65Aki burolyogalo go'no go'no bwotonyago ton wuudo'mno abwolomodomorumwogapiyapekono.
Kaunsel tooro Jisasollu kooti yogalo aduuwiyopo tovinokwono
(Matyuu 26:59-66; Mak 14:55-64; Joon 18:19-24)
66Toruda'ai lomwo iru'mago toga Juu tooravuro a'mwo aguto toorogai'aro pris mido mollomwalokwe toorogai'aro loowo tovino pi'mwo kuudokwe toorogai'aro tooro su'bwo'noporogano. Toro tooro kemi i'bwo'nodupudo towai'no Jisasollu mogaibworomokavlavo'mno aro kuudoporogano. 67“Guu Krais tookuno'juki, Nuu kwonyugono, donekudono.” Kuudoporogano. Toro kuudopo tovi Jisasol aro kuudokaikono. “Nuu kwonyugono, aikudumi tov moro yogalo tovino, nebalo'mdeyo, kuudo manubwepinorekikono. 68Aki nuu kemi yamuugojo puruv aikudoganmi tov kevu ku'nono manyudupinorekikono. 69Toro kuvi kuruv aga togada'ai kevu aro tovi nonuwonmwalpinonyugono. A'mwo Kwolaiyo Kuunodo toonyu Gooti jurogudo toolluro anato tomgu mwalodo'mure nonuwonmwalpinonyugono.” Kuudokaikono.
70Toro kuudoka tovi aro kuudoganoporogano. “Guu Gooti toolluro Kwolaiyo tookudukono?” Toro kuudoganopo toorai Jisasol kuudokaikono. “Kevnokwe toorekulluro me'no adumapo su tov kuvigono.” 71Toro kuudoka tovi wuu'nyuno sumaveyokwe aro sajunoporogano. “Oo gavnokweyolluro mago tovida'ai kaiya'no yogalo doduke me'no kuu'numawekono. Toro te a'mwo pworavuro kuu'maiyo dodoluwoso'moneyokwe yogalo pugai'aro tonyuno supto mimwakuuwono.” Sajunoporogano.
လက်ရှိရွေးချယ်ထားမှု
Luuk 22: SMB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2022: Ethnos360 Sanford, Florida