Joni 21
21
Sa rairai tale vei iratou na nona tisaipeli ko Jisu, a sa kana vata kei iratou, 1-14. Sa vakarota matua vei Petero me vakani ira na nona lami kei ira na nona sipi, 15-17; a sa tukuna na mate i Petero, 18, 19. Sa vunauci Petero ni sa tarogi koya e na vuku i Joni, 20-24. Na kenai vakataotioti, 25.
1NI sa oti na veika o qo, sa vakaraitaki koya tale ko Jisu vei iratou na tisaipeli mai na wai mai Tiperia: ia ka vakaraitaki koya vakaoqo: 2Eratou sa tiko vata ko Saimoni Petero, kei Tomasi, sa vakatokai ko Titimo, kei Nacanieli na kai Kena e Kalili, kei rau na luve i Sepeteo, kei na nona tisaipeli e lewe rua tale. 3Sa kaya vei iratou ko Saimoni Petero, Au sa laʼki qoli. Eratou sa kaya vua, Edatou na lako talega kei iko. Eratou sa lako yani, ka vodoka vakasauri na waqa; a sa sega e rawa e na bogi ko ya.
4Ia ni sa qai mataka mai, sa tu e na matasawa ko Jisu; ia sa sega ni kila ko iratou na tisaipeli ni sai Jisu. 5Sa qai kaya vei iratou ko Jisu, Ragone, sa tu vei kemudou na kakana, se segai? Eratou sa kaya vua, Sa segai. 6A sa kaya vei iratou ko koya, Dou viritaka na lawa ki na yasana i matau ni waqa, ka dou na kunea kina. Eratou sa qai viritaka, a ratou sa qai sega ni yavia rawa, ni sa vuqa sara na ika. 7A ka o qo sa kaya kina vei Petero ko na tisaipeli ko ya, o koya sa lomana ko Jisu, O qori na Turaga. Ni sa rogoca ko Saimoni Petero ni sai koya na Turaga, sa vakasulumi koya e na nonai curucuru vagonedau, (ni sa luvawale,) a sa rika ki wai. 8Ia ko iratou na tisaipeli tani, eratou sa lako e na waqa lailai; (ni sa sega ni yawa na vanua, me vaka ga na katu e limasagavulu,) a ratou sa yarataka na lawa sa sinai e na ika.
9Ia ni ratou sa qai sobu ki vanua, eratou sa raica ni sa tu na qilaiso sa waqa tu, kei na ika sa tu kina, kei na madrai. 10Sa kaya vei iratou ko Jisu, Kauta mai e so na ika dou sa qai rawata. 11Sa lako cake ko Saimoni Petero, ka yavia na lawa ki vanua sa sinai e na ika lelevu, e dua na drau ka limasagavulu ka mani tolu: ia ni sa vuqa vakaoqo, sa sega ni bote kina na lawa.
12Sa kaya vei iratou ko Jisu, Mai kana. Ia sa sega e dua vei iratou na tisaipeli sa doudou me tarogi koya, O cei ko iko? ni ratou sa kila ni sai koya na Turaga. 13Sa qai lako mai ko Jisu, ka kauta na madrai, kei na ika talega, ka solia vei iratou.
14Sai koya o qo na kenai katolu ni gauna sa vakaraitaki koya kina ko Jisu vei iratou na nona tisaipeli, ni sa tu cake tale mai na mate ko koya.
15Ni ra sa qai kana oti, sa kaya ko Jisu vei Saimoni Petero, Saimoni, a luve i Jona, o sa lomani au vakalevu, ka vakalailai ko iratou o qo, se segai? Sa kaya vua ko koya, Io, Turaga; o sa kila niʼu sa lomani iko. Sa kaya vua ko koya, Vakani ira na noqu lami. 16Sa kaya tale vakarua vei koya, Saimoni, a luve i Jona, o sa lomani au, se segai? Sa kaya vua ko koya, Io, Turaga; o sa kila niʼu sa lomani iko. Sa kaya vua ko koya, Maroroi ira na noqu sipi. 17A sa kaya vakatolu vua, Saimoni, a luve i Jona, o sa lomani au, se segai? Sa rarawa na loma i Petero e na vuku ni sa kaya vakatolu vua ko koya, O sa lomani au, se segai? A sa kaya vua, Turaga, o sa kila na ka kecega; o sa kila niʼu sa lomani iko. Sa kaya vua ko Jisu, Vakani ira na noqu sipi. 18E dina, e dina, au sa kaya vei iko, Ni ko a gone, ko a dauvauci iko, ka lako veitalia voli ga: ia ni ko na qase mai, ko na dodoka na ligamu, ka na vauci iko e dua tani, ka kauti iko ki na tikina ko na sega ni vinakata. 19Ia sa vosa vakaoqo ko koya, me vakatakila na mate ena vakarokorokotaka kina na Kalou ko koya.
Ia ni sa vosa oti vakaoqo ko koya, sa kaya vua, Muri au. 20Sa qai vuki ko Petero, ka raica na tisaipeli sa lomana ko Jisu, ni sa muri, o koya ka vakararavi talega ki na lomaserena e nai vakayakavi, ka kaya, Turaga, o cei ko koya ena soli iko yani? 21Ni sa raici koya ko Petero, sa kaya vei Jisu, Turaga, ena vakaevei ko koya o qo? 22Sa kaya vua ko Jisu, Kevaka kaʼu sa vinakata me bula tikoga ko koya ka yacova na siga kaʼu na lako tale mai kina, a cava o qori vei iko? o iko, mo muri au. 23Sa qai rogo yani vei ira na veiwekani na vosa o qo, ni na sega ni mate na tisaipeli ko ya: ia ka sega ni kaya vua ko Jisu, Ena sega ni mate ko koya: a ya ga, Kevaka kaʼu vinakata me bula tikoga ko koya ka yacova na siga kaʼu na lako tale mai kina, a cava o qo vei iko?
24Sai koya o qo na tisaipeli sa tukuna na veika o qo, ka vola na veika o qo: ia eda sa kila ni sa dina na nonai tukutuku.
25SA vuqa talega na ka tani sa cakava ko Jisu, ia kevaka sa volai kecega, au sa vakasama ni na oso ko vuravura e na veivola ena volai. Emeni.
လက်ရှိရွေးချယ်ထားမှု
Joni 21: FIJ1864
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
First full Bible in the Fijian language © British and Foreign Bible Society, 1864.