Maatiyos 12
12
Yeesus Sambat Maddara kinni
(Markos 2:23-28; Luukas 6:1-5)
1Amaa geddadde Yeesus Sambatah ilaw dhageh fantaako tillaabak yine. Kaa katattaynit lel safriitenyaako ilaw zalaala yiqhinthibinyaako beetoona erherhishen. 2Faarisiin amayim yublinyaako: “Ubul, ku katattaynit Sambatah takko ammissilinnixem abak yanin” akko yerhxin. 3Usuk lel: “Dawud safriite gedda kaalih yine mara kee isheh ayim abem maqhrayinnitiini? 4Yallih caredde orobeh, sheekhaako bextih farhinnanti beeto masmuux akkinnexe yisiddiqhin folo beyeh beeteyaako kaalih tinemih yoxoye. 5Sheekha maqhdas caredde, Sambat Sambatah yiscirinyaako cagab malit yekkiinim Sercatadde maqhrayinnitiini? 6Maqhdas careeko nabati talle yanem lel sinak arhxiyuk ane. 7‘Anu farham raxma kibah sadaqha maki’#Hosheeca 6:6 yarhxiinimhi macna teerhegiinih takkindo, cagab male cadale mirhaarhitiini. 8Amayim lel Xiyawti Barhi Sambat Maddara kinamhi sabbatah kinni” akko yerhxe.
Kafte gaba le xiyawto
(Markos 3:1-6; Luukas 6:6-11)
9Usuk amakkeeko tillaabeh ten sunagoogedde orobe. 10Amadde lel wuli gaba akko kafte xiyawti yine. Usun lel kaa yaksasoona ciloh: “Sambatah urusaanam masmuux kinni?” yerhxiinih kaa esseren. 11Usuk: “Sinko miyatto kinni, ciidotta leti, Sambatah boozodde rada gedda, yibbirheyaako kaa ayyaacinnixeti?” akko yerhxe. 12“Ciidottaako xiyawti ayidhdhah minabaho? Amaydo, Sambatah mecaani abaanam masmuux kinni” akko yerhxe. 13Sarrah amaa xiyawtok: “Ishi gaba iyfiddig” akko yerhxe. Amaa xiyawti lel yiyfiddigeyaako amaa gaba akah tineekah gaxteh, malammit gaba balih tekke. 14Faarisiin laakin yewcinyaako aaginah kaa yaylaynimhi xagaradde zatteyen.
Doorime Yallih khaddaam
15Yeesus tayim yeerhegeyaako amakkeeko yicrhiye. Mango mari kaa katattayenyaako lel usuk inkoh ten uruse, 16akko warishaanamko lel sirii ginah ten asuuse. 17Tayim lel nabii Isayas:
18“Taykinna, anu doore yi khaddaam,
yi rooxi alle xedena yi kaxantooli.
Inni Ufaye kayyakke oobisho kiyo, usuk lel Aki-marah xaqqe warisho kinni.
19Usuk yanzaagaxo maki hido zeero maki,
kaa dhaw lel shawaaricille walaa inketti yaabbo maki.
20Xaqqe sariigalla gudduusekkah,
yimchifliqhe shambuqqotta yagdalo maki;
tikkaa shimcatti tufulta lel badisho maki;
21kaa migacalle lel Aki-mari cag abitoona kinon”#Isayas 42:1-4
yerhxeyaako waanishem takmalo ciloh tekkem kinni.
Quddus kin Ufayehi waato
(Markos 3:20-30; Luukas 11:14-23)
22Amaymik sarrah, wuli yimjinnine inti-male kin naxar-male alle baahenyaako, waanisho kee yablo akah dhiicaakah kaa uruse. 23Inkoh amaa xiyaw cibrah rabeenih lel: “Tati Dawud Barha yakkeho?” yerhxin. 24Tayim Faarisiin yoobbin gedda laakin: “Ta xiyawti junuun ayyaacuk yanem, junuun manabotta kin Beelzebuuluh abeh kinni” yerhxin. 25Ten xisaab yeerhegeh laakin tahe akko yerhxe: “Umman nigsinna ishe-isheh xazziiminnaniya zibboyta, isheh xazxaazimte daafo hido cari lel daw-yarhxo maki. 26Sheethan Sheethan yeyyeecemko, ishe-isheh xazxaazimeh yane. Kaa nigsinna aaginah daw-tarhxo kinni? 27Anu Beelzebuuluh junuun ayyaaceh ekkemko, sin cindham aymih abaanah yayyaaciini? Amaydo, usun sin daaniya yakkoona kinon. 28Laakin anu junuun akah ayyaacem Yallih Ufayeh yekkemko, amaydo Yallih nigsinna sin bukalle temeeteh tane. 29Hido lel akkinnanti sirii xiyawtih caredde orobah aaginah kaa nuwaa baysha, yookomeh amaa sirii xiyawto yurhuweh akke wayemko? Amayek sarrah kaa care baysho dhiica. 30Yottaalih akkinnixeti yi didde kinni, yottaalih askattinnixeti lel faax-isha. 31Amaydo, umbuka zambe kee waato xiyawah xabbot geyo kinni, laakin Ufayi diddeh aban waato mixabbimtam sinak arhxiyuk ane. 32Xiyawti Barhih diddeh waanitta waanishinnanti xabbot geyo kinni. Quddus kin Ufayi diddeh uma waani waanisha tiyah laakin hido ta waqhtedde, hido lel yamiite waqhtedde xabbot geyo maki.
Xarha ishi daroh tamidhdhige
(Luukas 6:43-45)
33Xarha ishi daroh tamidhdhigemhi sabbatah, xarha eymeca, tee daro lel tamce, hido lel xarha oshshooma, tee daro lel taamo kinni. 34Ko datali zarawo, temmeege afcaadooko af waanishamhi sabbatah, uma mara kitin hanuk mecem aaginah waanishshoona? 35Mece xiyawti mece cukraako mecem yayyaace, uma xiyawti lel uma ishi cukraako umaani yayyaace. 36Amaa firdi max xiyaw inkoh amficinnixe waani waanishanyah xisaab geyoona kinon. 37Amayim lel sinni waanih sinne asxiqqiqhe kee sin waanih cadalime takkoona kitiinimhi sabbatah kinni.”
Yoonaas tuumar
(Markos 8:11-12; Luukas 11:29-32)
38Sarrah, sercat dhiiceenit kee Faarisiin: “Mucallim, kottaako wuli ishaara nablo fandha” yerhxiinih alle yedebbin. 39Usuk laakin: “Ta uma am-immine wayta ijo ishaara tablo farhak tanehaaki, nabii Yoonaas ishaaraako bextih, walaa inki ishaara akah tamxawo maki. 40Yoonaas naba caasattih garbadde adooxa lellec kee adooxa bar akah sugeekah, Xiyawti Barhi lel baarhot garbadde adooxa lellec kee adooxa bar kalo kinni. 41Nineweehti xiyaw, Yoonaas warroyishnan yoobbiinih yotoobiinimhi sabbatah firdelle ta ijoolih uguteenih ten yaqtsacoona kinon. Taykinna lel Yoonaasko nabam talle tane. 42Junuub nigisti#12:42 Junuub nigisti Junuub nigisti akko yarhxiinim nigisti Saaba kinni. Nigisti Saaba Israa-eel nugus kuuk yine Nugus Suleymaan gufto temeeteya ishaarishsha. Kaa fanah temeetem lel kaa xikma toobbe gedda dhacuma esseroruh kaa tacakkano ciloh kinni (1 Nuguusa 10:1-3 ubul)., Suleymaan xikma taabbo baarhot abayshimaako temeetemhi sabbatah, amaa firdi max ta ijoolih ugutteh tee taqtsaco kinni. Taykinna lel Suleymaanko nabam talle tane.
Najaasa-le ufayehi gaxnan
(Luukas 11:24-26)
43Najaasa-le ufayi xiyawtooko yawce gedda, kafin baarhooko yadiyeh alle yacrufekke wagiyah, inkim migeya. 44Sarrah lel: ‘Amaa akko ewce inni care fanah gaxo kiyo’ yarhxe. Yamiite gedda lel, foyya kin, fiyyiimeh yemxeedere care geya. 45Sarrah yadiyeh isheelih kaako uma aki malxina ufaye baaha, usun lel orobaanah amadde sigan. Amaa xiyawtih gondo lel awwalko taame. Ta uma ijoolih lel amayim balih takko kinni.”
Yeesus ina kee kaa sacul
(Markos 3:31-35; Luukas 8:19-21)
46Usuk kaddih xiyawlih waanishak anih, taykinna, kaa ina kee kaa sacul kaalih waanishoona farheenih, irolle daw-yerhxiinih yinin. 47[Wuli xiyawti lel: “Ku ina kee ku sacul kottaalih waanishoona farheenih, irolle daw-yerhxiinih yinin” akko yerhxe.] 48Yeesus laakin amah akko yerhxe tiyak: “Miyattö kinni yi ina? Miya kinni yi sacul?” akko yerhxe. 49Ishi gaba ishi katattaynitille yiyfiddigeh: “Ta mara kinni yi ina kee yi sacul” yerhxe. 50Amayim lel yi sacal, yi sacla kee yi ina kinam carshelle geytima yi Abbah farhi abinnantiya kinamhi sabbatah kinni.
လက်ရှိရွေးချယ်ထားမှု
Maatiyos 12: SCC
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
©2024 Wycliffe Ethiopia