Luc 14
14
Jésus amadôngéda môbeene
1Nyovo edunda, Jésus amakea gôéaa môyakô gô eba apene aApharisien. Ane amadenganôni amabono Jésus na nzôô. 2Mômôgôô môvo amaviga na gôndé Jésus amabaka n’ebeea éaahndaga. 3Jésus ameevôa évovie na Apharisien mbe: ?Mitômamie na migemie mimatôtsikéôni mitôsingéa gôédôngéda môma nyee edunda-a? 4Ivô omee ane asinyôngéô émôaabéa. Na vane Jésus amatsôpa môbeene g’ôgoge na amamôdôngéda. Na amamôénda mbe: Kiaka. 5Vane Jésus amavovo n’ane amadenganôni mbe: Gandé anye amôgôô nôndé n’ananyô, na ébodu éanyô. Okô muana môvo, vo gébodu gévo ékea ékekuyaméa gô éduku étibani ?nôsangayavôga ékea gôééyuua-a? Buéyé mbe ti nyee edunda nôngakea gôééyuua. 6Omee ane asiôngôé ta na ébubua.
Mônongo ôsevou gédigaa na mônongo ôkôvu oma
7Jésus ameena gameenda ane amakôvuku gô môyakô. Muetso amanyôngéô édigaa gô étungu éokumaka. T’ebandô Jésus amagunya ahngô tsavane mbe: 8Vangabambéô éwe na gô sueti éayômba, ômbiakea gôédigaa gô gébôngô sokumaka. Osamenya, mavooe gôndé na muene amakôvuni ootéa môvôni n’ewe. 9Na kumu asueti, ône akôvi anye muetso gôéaa, kabaga aviga gôétimôa éwe mbe: Gébôngôge géne, kaka soo. Te samôma okumaka. ?Na vane ôsangoba na tsoyi-a? Na ôngakea ôkedigaa gô gébôngôge sagô kôbangô. 10Nôeni éne éôtéa ényepani te mbe vangakôvu éwe na gô sueti, kiaka ôkedigaa gô gébôngô sagô kôbangô. Vane kumu asueti angagôbambéa mbe: Waé, vigaka. Ovidigaa éva n’ami gô gédigaage samôsôba egé. Na vane va miso makoo muetso akôviôni, te éwe ôgobediôni. 11Endé te nane. One aabatéda amuene, angasugédu. Na ône aasugéda amuene angabatédu.
12Na vane Jésus amavovo na kumu ebee amakôvanani mbe: Gô môambôe woo, ômbiabambéa wee yoo ta na môvo, na ana atétee n’oo na kindoo na ékitie ébambana n’ewe yeba. Ombiabambéa ahngô, tsangô mbe éwe ôngabambéô n’ahngô dôta te mônongovo. Na tsangô mbe ônganikédéô éne émadimbanédewe gô môambôe. 13Gô môambôe woo asueti, bambéaka te misuga, na ane ahmagégésanéani na ane atsuédimani, n’asi pogu. 14Ti gô gényônga géngaba n’ewe gôébégô ane ayeeyi môambôe woo asangagônikédéa ta na sôma gévo. Ivô te Nzambé angagônikédéani gô nyee ôngakunduga ane amawani amayanzéa Nzambé ganyôngéô angô.
Tsava éamôambô ôvôni
(Bono na Matt. 22:1–10)
15Vamookô oma éne émavovo Jésus, môvo amabaka n’edi digaa va tabudé amavovo mbe: Ti gô gényônga géndéké n’ane angaa môambôe g’ôkumu aNzambé. 16Kumu Jésus amabika gô tsava mbe: Gômabaka mômôgôô amakônza môambô ôvôni. Amabambéa oma ayekani. 17Gô ndéône émabéa môyakôe, amatôma môyanzi edi gôéwanyéda omee mbe: Okani, môyakôe ôbéyi. 18Ivô muetso amabambéôkôni ahmavovo môvo môvo mbe: Kokooye éwe. Tsangoongôa éviga. One amapanga, amavovo n’edi mbe: Me nasômbi tsaga. Nakea nakéena yangô. Kokooye éwe. Me tsangoongôadô éviga. 19Môvo angô mbe: Namasômba nzima amandombo, migadi mitayi na miômé mitayi. Me nakea nakéena gandé mangô. Kokooye éwe. Me tsangoongôa éviga. 20Môvo angô mbe: Me nabaayi ti n’atsatsee. Me tsangatsika môgayami. Me tsangoongôa éviga. 21Môyanzine amanika gôébeenda kumu éamôambôe mbe: Ane abambéyiôkôni ahsiviga. Na vane, kumu éamôambôe asiene buedi, amaba n’opisa. Amatôma môyanzine mbe: Kiaka bambéa misuga na tôpôpéa n’asi pogu n’ane atsuédimani. 22Môyanzine amabeenda kumu éamôambôe mbe: Ane abambéyi éwe gô mikii ahnguaa. Gôgébaka gétungu. 23Kumu éamôambôe amoomba étôma môyanzine mbe: kiaka ôkebambéa asi gô madeke, n’ane ahndé gô tsaga yaô mbe: Ahvigé gô suetine. Ahsavéa. Ahviduga gô ebami. 24Nagôbeenda mbe ane ahmapanga ébambéôni ahmakinakani ahsabémba môyakôe wami.
Ene engeenda môneengi aJésus
(Bono na Matt. 10:37–38)
25Jésus amakea gô môtôô na géômbé gévôni. Amagéngôga gôébono ahngô. Amavovo mbe: 26One akea n’ami nzéepo asangoongôa étetu mbe môneengi aJésus, angô gékiné tétedi na yeedi na môgayedi na anedi na anayeedi amôgôô n’ageto. Angakina dôta béyé n’otôe wedi amuene. 27One asatsua gésumuge sedi sowa na asakea nzéepo n’ami, angô asangatetu mbe môneengi ami. 28Gandé anye amôgôô, nônyôngéô ésaa eba ôvôni. N’egésaaka, ôngadigaa gôépanga étanga dodeye dingadukuni na dine dôta dindé n’ewe, ôkô mbe dingadugu ngu n’eyanzee. 29Okô môma asiinda nane angayanzéda te môkaka ôtévo, géôngôé éteméda ebee. Oma muetso angootani angamôseka mbe: 30E-e-e, mômôgôône ôdôô amabaka mbe asaa eba éva, ivô akôndi. 31Gôndé môtômi atsenge akea gôégenya ébadi te mônongovo. N’egékiaka angapanga étasa mbe: Me éva nandé na nzimepo amitônisa miamigode. Môkasô dôta, môdudeone aviga gôégenya n’ami na mine miedi nzima dibaé yamitônisa. ?Nangoongôa-ma? 32Okô mbe asangoongôa égenya, angatôma gévovi gôéwanyéda môdudeone gôémôvooto agébaka gôdagôda mbe: Gôsabadô môgenye. Tôkônzéké ébégôe. ?Onyôngéô nayee? 33Va vane Jésus amatimbôanéda mbe: Gôndé anye te mônongovo. Gôsaba môma angakea n’ami nzéepo gôéba môneengi ami, angô gékiné éetso éndé n’edi.
Vianga viagébé na tsoongo
(Bono na Matt. 5:13, Marc 9:50)
34Vianga te sôma samôsôba. Ivô, ôkô viangô visabadô na duegi ?môma angoomba évinikéda duegine nayee? 35Viangô visaba na tsoongo, buéyé gôényepeda totone, vo gôékandéda mbôtône visanyepa. Vingagunyu te gunyugu. Okô mbe anye nôndé na matô, ka te nôôkôkôma.
လက်ရှိရွေးချယ်ထားမှု
Luc 14: TSV
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Alliance Biblique du Gabon (Bible Society in Gabon) 1983