Luc 16
16
Môsômbédi amabaka na mangônzô
1Jésus amagunya aneengi edi tsava mbe: Gômabaka gékiti amaba na môsômbédi edi. Nyovo amookô mbe: Môsômbédine woo amani édimbanéda ékôtee yoo. 2Kumu ekôtee amabambéa môyanzine na amavovo n’edi mbe: ?Tsangône éôkiô me gôndé éwe ékegea nayee? Tôtanga ékôtee. Nigôa me gamayanza éwe, mbe ôsangabadô môsômbédi ami. 3Môsômbédine amatanganéda gô môtémedi mbe: Mavooe kooko ami anganôtôa me gô éyanzee. ?Nangeenda nayee? Otôe wami ôsaba na ngudi mbe nangayanza gô pindi. Dôta nabaké gétseke gôéduka omee éne éngookô me tsôvé, te tsoyi. 4Eh, tsabômu éne éngeenda me. Na vane vanganôtôu me gô éyanzee, akasô muetso angasinga me nadigaa n’ahngô. 5Môsômbédine ône amabambéa ane amabaka na mitete na kooko edi gôéviga môvo môvo. One amapanga amaviga. Môsômbédine amamôévôa mbe: ?Omasombea kooko nayee? 6Môma nône amaabéa mbe: Namamôsombea te môkama amidega miamadi maakaga. Môsômbédine angô mbe: Ii-maa, gésangôge gématendu môtetee woo. Digaaka. Obusua môkama. Otenda te nzima ditayi. 7One amôbaé amaviga. Môsômbédine amamôévôa mbe: ?Omasombea kooko nayee? Môma nône amamôaabéa mbe: Me te mikama mitayi miébémbé éodesi. Môsômbédine angô mbe: Ii-maa, gésangôge gématendu môtetee woo. Obusua mikama mitayi, ôtenda te mikama minayi. 8Buéyé gamabaka angô môyanzi môbévani, kooko edi amamôsénga te séngaga gô mangônzôme medi. Asi tsenge nedué, ane adigaa gô évitsi ootéa éyanza na mangônzô anguene n’anguene. Géé ane adigaa gô gévede asamenya mane.
9Jésus amanigôa ahngô mbe: Me nanôongo ndongi mbe ôkitie ôndé ébégô édagani, ivô ôkô nôndé n’angô yanzani n’angô gôévamba n’oma. Nyee ôngagôga angô nôngeengédu na g’ôba gô tsenge éamôbô na môbô. 10One andé na mavôma gô tôbégô tôgetôge angaba dôta na mavôma gô mabégô mavôni. One andé muisui gô tômate tôgetôge angaba dôta muisui gô éôma évôni. 11T’ebandô ône asayanza n’okitie atsengene na mavôma ?ôkiti apie aNzambé angeetsô na ndaa? 12Ewe ôsiyanzé na mavôma n’angaa ôkiti ?ôngeetsô ôkitie ôngaba woo omuene na ndaa?
13Gôsaba môma angoongôa éyanzéa kumu dibaé kukepo. Angadudu épo na anganyôngéô épo. Angagobeda épo na angeenza épo. Okiti ôndé ga kumu gôétôma môtéma amôma. Nôsoongôa éneegeda kukepo ôkiti na Nzambé.
Mavo meekédu maJésus
(Bono na Matt. 11:12–13, 5:31–32, Marc 10:11–12)
14Apharisien amookô meekédu maJésus mokiti. Amamôdeta gôébégô anguene amootéa éba n’onzôô okitie. 15Jésus amavovo n’ahngô mbe: Anye te nôenanô n’oma mbe nôndé oma amisôba tambô Nzambé abono te môtéma amôma na asabômu mine mianyô. Menyani mbe éne étanganéda môma mbe ébégô évôni, va miso maNzambé ésaba na tsoongo.
16Bandôa na Moïse ngu na Jean-Baptiste, te mipuma miyekani mimaneegedu mige miaNzambé mimatôtsikéô na Moïse. Mipuma miyekani dôta mimaneegedu matendeo mapandôédi amatasa maNzambé. Ene ngékô épo. Epo ngékô ébandôa gô ndéô éaJean-Baptiste. Gô ngékô nedué étondéni, Tsangô Eamôsôba éokumu aNzambé éôkanô. Muetso agémbana môma na môma gôéengéa g’ôkumue ône. 17Buéyé gamoota ndéô émakitsô mige miaNzambé, gô miangô gôsangabusuu ta na vibéénda vivo. Tsina n’oba éngakôdéa te mige miaNzambé migétomaka.
18One akina môgayedi na abaa muene, akea te gésasô. One abaa môgeto amakinôni akea te gésasô.
Ebégô éagékiti na Lazare
19Vamaba gékiti. Amaataka maduani mokumaka. Minya mietso amaaka te ga sueti. Asibuté ta na sôma. 20Môsuga inedi Lazare, amabaka yamaa v’ombaa agékiti. Amabaka na miitsô, ôtôe wetso. 21Amanyôngéôkô éaa tseseye dimaagaka va tabudé éagékiti. Inzuaye dimaviaka gôévenda miitsômie miedi. 22Môsugee amawa. Asi g’ôba amavigédu na Nzambé gôémôtsua na vandé Abraham. Gékitige dôta amawa. Amagunyu. 23Gô tungu oma amawani, gékitige amookô pievia épôni. Amabôkaméa misome na ameena Lazare andé va mbôma aAbraham. Andé gôdagôda. 24Amaadôngana mbe: Téta Abraham, eena me ngeba. Tôma Lazare atsuété tsene éamôsavie edi gô meba gôévôgiméda ômenie ami. Me neena maguga magéndégégé gô soto gegé. 25Abraham amasiia mbe: Muanami ônabômu mbe ômadiiaka mamisôba vamaba éwe gô monyoe woo va tsina. Géé Lazare ôdôô, ameenaka maguga gô ône wedi monyo. Egôdô Lazare eena mamisôba n’ewe ôndé gô maguga. 26Eébéyée mbe nane, bonokoye. Va gatse asô n’anyô mbenge épôni gômbe ane anyôngéô énôtôga égô gôéôta na gôndé anye, asoongôa. Kôndi nane, ane anyôngéô énôtôga gône gôéviga n’egô asoongôa éviga. 27Gékiti angô mbe: Kokoo yewe téta Abraham, kudéga Lazare na gô eba atéta. 28Nandé n’aneya atayi. Akea akekenedangô na mabégô mema gômbe kabaga ahngô dôta kabaga aviga na gô gédigaa gegé samaguga. 29Abraham amasiia mbe: Anayoo andé na mitôma mimatsikéô angô na Moïse. Andé dôta na ndongi yapandôédi amatasa maNzambé. Mbe ookô yangô. 30Gékitige angô mbe: Aé, téta Abraham, asangookô éne. Okô môvo gôndé ane amawani akunduga gôékea na gôndé ahngô ahngakoa mitéma miaô gôéba wene mônongo. 31Na Abraham amamôbeenda mbe: Okô ahsiôkô meekédu maMoïse na mane mapandôédie, asavidôôkô buéyé mbe môma amawani akundugéké.
လက်ရှိရွေးချယ်ထားမှု
Luc 16: TSV
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Alliance Biblique du Gabon (Bible Society in Gabon) 1983