San Mateo 16
16
Nda fariseo xiꞌin nda saduceo ndúku nda yatuꞌun nuu Jesús
(Mr. 8:11-13; Lc. 12:54-56)
1Saa ndi̱xaa nda fariseo xiꞌin nda saduceo nuu Jesús. Ndi̱xaa nda xíto ndoso nda ra, yakan káꞌan nda xiꞌin ra, ikan ra yatuꞌun kuni nda ya kundaa ini nda án ndixa ra ke̱e nuu Ndioxi ku ra. 2Saa ndi̱kuiin ra, ndi̱kaꞌan ra xiꞌin nda, káchi ra:
―Xikuáa tá kuaketa ñu̱ꞌù, ndúkuaꞌa nuu ndivi ta káꞌan ndo: “Vaꞌa ni koo kivi taan”, káchi ndo. 3Tá xitaan ndúkuaꞌa nuu ndivi vaxi ñu̱ꞌù, ta íyo viko nuu ndivi, ta saa káꞌan ndo: “Väꞌa mií, kuun ni savi kivi vitin”, káchi ndo. “¡Ndóꞌo̱ uvi ini! Tá tu xíni ndo kíꞌin ndo kuꞌva xiꞌin tiempo, ta ¿ndachu köo kúndaa ini ndo xiꞌin ya xíto ndo tin ya xíni soꞌo ndo íkan i vitin? 4¡Ndóꞌo̱ iku ini, ndóꞌo̱ köo kándixa Ndioxi ku ndo! Saa chi ndúku ndo yatuꞌun nuu i, ya kuchiñu kandixa ndo án ra ke̱e nuu Ndioxi ku i. Ta ïkan i yatuꞌun kuni ndo. Ndisaa yatuꞌun kuni ndo ku ya ndo̱ꞌo ra profeta Jonás, ra ndi̱kaꞌan ndoso tuꞌun yuꞌu Ndioxi xinaꞌa ―káchi Jesús xiꞌin nda.
Saa ke̱ta ra kuaꞌan ra xiꞌin nda ítaꞌan xiꞌin ra.
Tá káa uxan iya saa íin nda fariseo
(Mr. 8:14-21)
5Saa nda̱a Jesús barco xiꞌin nda ítaꞌan xiꞌin ra, ndi̱yaꞌa nda inka ñaꞌñu yuꞌu nduta ñûꞌu Galilea. Ta ndi̱ndoso ini nda kundiso nda xita vaꞌa kuꞌun xiꞌin nda. 6Saa ndi̱kaꞌan Jesús xiꞌin nda, káchi ra saa:
―Koto vaꞌa ndo, kuenta ni koo ndo xiꞌin uxan iya nda fariseo xiꞌin nda saduceo ―káchi ra xiꞌin nda.
7Saa xa̱á nda káꞌan xiꞌin taꞌan mií nda, káchi nda saa:
―Án sana xaꞌa ya köo xíta vaꞌa ndíso yo yakan káꞌan ra saa ―káchi nda.
8Saa ku̱ndaa ini Jesús ya káꞌan xiꞌin taꞌan nda, ñaa ndi̱kaꞌan ra xiꞌin nda, káchi ra saa:
―¿Ndachu tuun ni ini ndo, köo xíin ndo kandixa ndo? ¿ndachu káꞌan ndo köo xita vaꞌa ndíso ndo? 9¿Án täꞌan kundaa ini ndo? ¿Án xa ndi̱ndoso ini ndo tá ndi̱taꞌvi i uꞌun xita vaꞌa xi̱xi uꞌun mil taa, ta kuaꞌa ni tika si̱kutu ndo xiꞌin ya ndi̱ndoo? 10¿Án köo ñúꞌu ini ndo tá ndi̱taꞌvi i uxa tiaka nuu xi̱xi kumi mil taa, ta kuaꞌa ni ñaꞌa ndi̱ndoo ndi̱kuiso ndo? 11¿Án köo kúndaa ini ndo süvi xaꞌa xita vaꞌa kua káꞌan i xiꞌin ndo? Ya káꞌan i xiꞌin ndo saa kua, kuenta ni koo ndo xiꞌin uxan iya nda fariseo xiꞌin nda saduceo ―káchi Jesús xiꞌin nda ítaꞌan xiꞌin ra.
12Saa ku̱ndaa ini nda ya köo ndi̱kaꞌan ra xiꞌin nda xaꞌa uxan iya ya kuakee xiꞌin xita vaꞌa, sundi ndi̱kaꞌan ra xiꞌin nda xaꞌa kuꞌva ya sínaꞌa nda fariseo xiꞌin nda saduceo.
Káꞌan ra Pedro xaꞌa Jesús ya kúu ra Cristo
(Mr. 8:27-30; Lc. 9:18-21)
13Saa ndi̱xaa Jesús iin ñaꞌñu náni Cesarea ya ndíkun ndaa Filipo, saa ndi̱ndakan tuꞌun ra nda ítaꞌan xiꞌin ra, káchi ra saa:
―¿Unkua káꞌan naꞌa xaꞌa yeꞌe, ra kixi nuu Ndioxi? ―káchi ra xiꞌin nda.
14Saa ndi̱kuiin nda ítaꞌan xiꞌin ra, káchi nda saa:
―Sava na káꞌan, ra Juan ra síkuchi naꞌa ku un, ta sava tuku na káꞌan, ra profeta Elías, án ra Jeremías ku un, án ndá ka inka nda profeta káꞌan tuꞌun yuꞌu Ndioxi ku un, káchi na xaꞌa un ―káchi nda xiꞌin ra.
15Saa ndi̱ndakan tuꞌun ra nda, káchi ra saa:
―Ta ndóꞌo̱, ¿unku i, káchi ndo? ―káchi ra xiꞌin nda.
16Saa ndi̱kuiin ra Simón Pedro, káꞌan ra:
―Yóꞌo̱ ku Cristo, ra ti̱ꞌvi Ndioxi xa̱a sikaku na ñuu ivi yóꞌó, ta kúu un Seꞌe Ndioxi ra táku ―káchi ra.
17Saa ndi̱kaꞌan Jesús xiꞌin ra:
―Ná kusini ni un Simón, seꞌe ra Jonás, saa chi süvi naꞌa, na ñuu ivi yóꞌó ku na ndítaxi ya xínituni un. Iva i Ndioxi, ra íyo nuu ndivi ni̱nù ku ra i̱kan saa xiꞌin un ―káchi Jesús xiꞌin ra.
18Ta yeꞌe káꞌan i xiꞌin un, vitin kunani un #16:18 Tuꞌun griego “petros” ta kivi Pedro kúni kachi ya yu̱ú loꞌo. Pedro ta sata yu̱ú yóꞌó sikuaꞌa i veꞌe ñuꞌu i, ta nda iin kivi ndïꞌi xaꞌa ya, chi ya xáꞌni naꞌa ta küchiñu ya ndundee ka ya nuu na veꞌe ñuꞌu i. 19Ta taxi i llave ndaꞌa un kuna un yeꞌe nuu kiꞌvi naꞌa nuu xáꞌnda chiñu Ndioxi. Saa tá kúu ndiꞌi ñaꞌa ya kátun un ñuu ivi yóꞌó, ta ndikunuꞌni ya nuu ndivi, tá kúu ndiꞌi ñaꞌa ndáxin un ñuu ivi yóꞌó, ta saa ndaxin tu ya nuu ndivi va ―káchi ra xiꞌin ra Pedro.
20Saa ndi̱kaꞌan Jesús xiꞌin nda ítaꞌan xiꞌin ra, ya ná käꞌan nda xiꞌin nda iin naꞌa ya kúu ra Cristo ra ti̱ꞌvi Ndioxi vaxi sikaku na ñuu ivi yóꞌó.
Ndítuꞌun Jesús ya kuvi ra
(Mr. 8:31–9:1; Lc. 9:22-27)
21Nda kivi saa xa̱á Jesús ndítuꞌun ra xiꞌin nda ítaꞌan xiꞌin ra, ya xíniñuꞌu kuꞌun ra ñuu Jerusalén. Ta ikán xaa nduvaꞌa ni na xikuaꞌa, xiꞌin nda ínuu nuu sutu tin nda maestro nda sínaꞌa ley Ndioxi, xaa nduvaꞌa ni nda xiꞌin ra. Saa kaꞌni nda ra, ta nditaku ra kivi uni. 22Ñaa ta̱va síin ra Pedro ra, ndi̱kaꞌan ra xiꞌin ra, káchi ra saa:
―¡Ná täxi Ndioxi kundoꞌo un ya yóꞌó, Tata! ¡Nda iin kivi ná kündoꞌo un saa! ―káchi ra xiꞌin ra.
23Saa ndi̱ko koo Jesús ndi̱kaꞌan ra xiꞌin ra, káchi ra saa:
―¡Kuataꞌa nuu i, Timiaꞌa! Saa chi sási un nuu i ya ná ïkan i ya kúni Iva i Ndioxi. Chi yóꞌo̱ ta köo ndíkani ini un tá kuꞌva ndíkani ini Ndioxi. Ndíkani ini un tá kuꞌva ndíkani ini na ñuu ivi yóꞌó va ―káchi Jesús xiꞌin ra Pedro.
24Saa ndi̱kaꞌan Jesús xiꞌin nda ítaꞌan xiꞌin ra, káchi ra saa:
―Tá ndá naꞌa kúni kundikun yeꞌe, ta xíniñuꞌu na ndindoso ini na xaꞌa mií na, saa ndikundiso na cruzin na, ta ndikundikun na yeꞌe. 25Saa chi ndiꞌi na kúni sikaku xiꞌin mií ta ndiꞌi xaꞌa na. Ta ndiꞌi na ndíꞌi xaꞌa ya kuaꞌan na ichí i, ta síkaku na mií na. 26Ni ná kuu mií na ndiꞌi ya kuika íyo ñuu ivi yóꞌó, tá ná ndiꞌi xaꞌa ya vaꞌa na, ta ni köo ndáa yaꞌvi ya kúu mií na, saa chi küchiñu na chaꞌvi na xiꞌin ya ikán nuu Ndioxi, ya sikaku ra na. 27Ta yeꞌe, Taa ra xa̱a ñuu ivi yóꞌó, vaxi kivi ndiko koo i ñuu ivi yóꞌó xiꞌin ndee ya vaꞌa Iva i Ndioxi, ta kixi na tatun ra xiꞌin i, ta saa chaꞌvi i iin iin na xaꞌa ya vaꞌa án ya väꞌa i̱kan na ñuu ivi yóꞌó. 28Ya ndaa káꞌan i xiꞌin ndo, sava ndo ndóo yóꞌó vitin, ta kutaku ka ndo nda kivi tá ná ndiko koo yeꞌe, Taa ra xa̱a ñuu ivi yóꞌó, ndiko koo i ya kaꞌnda chiñu i ―káchi Jesús.
လက်ရှိရွေးချယ်ထားမှု
San Mateo 16: xta
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Active: ©Wycliffe Bible Translators, Inc. All rights reserved.