Medhetethi 8
8
Dhayo Haatha Wodhetha
1Shin Xoossay Nohe, iyara markabiya giddon de7iya do7a ubbaanne mehe ubbaa qopidi sa7a bolla carko carkisin he haathay wodhi wodhi bis. 2Qassi biitta giddon de7iya ciimmuwa pultoynne salon de7iya haatha maskooteti gordetidosona; irayka salon teqetis. 3Yaanin, haathay xeetanne ishatamu gallas gakanaw wodhi wodhi bis. 4Haathay wodhin laapuntha ageenan, tammanne laapuntha gallasan markabey Araraate zumata bolla uttis. 5Haathay tammantha ageena gakanaw wodhi wodhi bis. Tammantho ageenas koyro gallas zumata xeerati bentidosona.
6Oytamu gallasape guye, Nohey ba keexida markabiya maskootiya 7dooyidi issi quuro kare yeddin quuroy haathay biitta bollafe melana gakanaw, yaanne haanne piradhishe gam7is. 8Qassi Nohey haathay biitta bollafe wodhi wuridaako be7anaw issi holle kare yeddis. 9Shin he holliya haathay biitta ubbaa bolla ha7ika de7iya gisho, shempiya bessi demmabuku. Hessa gisho, simmada, markabiyako yin, Nohey ba kushiya yeddidi, baako markabiya giddo ekis.
10Hessafe guye, laapun gallas gam7idi, holliw zaaridi yeddis. 11He holliya sa7i omarsiya wode iyako simmada yashe shamaho aacape duuthida irxa haythi ba doonan saxa ekada yasu. Yaatin, haathay biitta bollafe wodhidaysa Nohey eris. 12Qassi Nohey hara laapun gallas gam7idi, he holliw zaaridi yeddis. Shin he holliya iyako simmada yabuuku.
13Nohey usupun xeetanne issi laythi de7in, koyro ageenan koyro gallas, haathay biitta bollafe xiz7is. Nohey markabiya kamaa qaari xeellidi, biittay xiz7idaysa be7is. 14Nam7antho ageenan laatamanne laapuntha gallasan, biittay kumethi melis.
15Xoossay he wode Nohe haysada yaagidi kiittis; 16“Neeni, ne machiw, ne adde naytanne ne nayta macheta ekada markabiya giddofe keya. 17Enti yeletidi, darana mela de7oy de7iya medhetetha ubbaafe neera de7eyisata kafota, meheta, do7atanne biittara gooshetiya ubbaa neera kessa” yaagis. 18Yaatin Nohey ba adde naytara, ba macheranne ba nayta machetara markabiya giddofe keyis. 19Yaanin, meheynne do7ay, sa7ara gooshetiya medhetethay, kafoynne sa7a bolla woxi qaaxiyaba ubbay ba qommuwan qommuwan markabiya giddofe keyidosona.
20Hessafe guye, Nohey Godaas yarsho bessi gimbidi tuna gidonna mehenne do7a ubbaafe, tuna gidonna kafo ubbaafe ekidi, giigisida bessan yarsho oothidi xuuggis. 21Yaatin, Goday he yarshuwa peenuwa singidi, ba wozanan haysada yaagis; “Na7atethafe doomidi asi wozanan qopiyaba ubbay iita gidikoka taani asa qoho gisho gada nam7antho ha sa7aa baaddike. Qassi taani ha7i oothidaysada de7oy de7iya medhetetha ubbaa nam7antho dhaysike. 22Ha biittay de7ida wode ubban, zeriya wodeynne cakiya wodey, meegoyinne hombey, boneynne balgoy, gallasinne qammi ubba wode daana” yaagis.
လက်ရှိရွေးချယ်ထားမှု
Medhetethi 8: GFBLVF
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
The Word for the World International and The Word for the World Ethiopia