Yunus 2
2
Ho Yunus alóbne UMUYHINTOR f'agune a búyeku dakato
1Angu, Yunus baworaa a fankaaso UMUYHINTOR abúuñ dakat dadeh k'adómom. Dakato badómem aguy na a búyeku dakato buruhu ásibaŋ alallaŋ, jaket báárig. 2Angu Yunus alób ingi UMUYHINTOR, Díino Amánduko n'aramunahne maŋ na a búyeku dakato, ayéj:
3- UMUYHUM. Me, a waato n'eyohne dáde, ikiinahenkiina dáde.
Bikiinahen, uwaalaraam k'unahaam h'ekiinahenne.#2.3 Na akankaan ininkaman na Yunus aŋoolinkinŋoolinkin gúbid gúduk gu Gúloku Díino. Ninger líibáro n'ayéjuhne Bákimo 18.7, 30:3.
Oo! UMUYHUM! F'edasne bukenum
ikiinahenkiina k'upahánaam.
Bikiinahen uyennehindeem, k'unahaam.
Abocin ayéj UMUYHINTOR:
4- Bikaanerenku fi akanne anworeem a fankaaso k'ilim na baman a réeŋununku fankaaso.
Úbuuñribuuñ gumbaŋo k'adoorumbinkum, adékukum f'adék alimuneem.
5Ilahlah karo útibareemtibar.
Nim gilaherne. Kanda n'upahuneemne a baaruŋo, afeereem mara ifak ífekineh Jaamehen Adénno #2.5 Jaameŋo Adénno - Nómár agune ka Ñanyahudo anramunahne Díino a bukooro b’aretuhne Jerusalem. Dígo nómár alódaalod kanda ammímiir ingi Tanto Arenninno n'ayikne a jamaanihu Musa. Gúmár ingine ayikyik na kantígo k’arennáne ingi kantígo k'afaŋumne n'arenn. n'arennáne.
6Agida n'ilim, iruuhoh baaruŋo, f'akaan ininkaman ba bubujhum gadékehne.
Jakoboloraŋo agoolombinkum a bigofo.
7Yunus abocin ayéj UMUYHINTOR:
- Me, ilim a baaruŋo f'édek íput a kánkirunku montaaño.
Akaanaam ininkaman iŋanŋan a kantíg k'ópájul gankimbenekimben gúmángááro k'anrahun, k'anlaho maŋ na baman dagurumaareŋ.
Nim gilaherne. Kanda fi UMUYHUM, Díino n'efuuhurinehne, úfunnureemfunn a dasuno d'eguyerne k'uyoofunoom uŋoyineem a kanjébo.#2.7 Bákimo 30.4
8F'ewosenne mara biniiro bareŋ afallaheemne, fam giŋoolinne a binankan, k'iŋay gukiinahan, fi UMUYHUM.
Bikiinahen mees, gukiinaŋo g'ekiinahenne aŋaf baman maŋ na a raafo a Jaamehen Adénno n'arennáne.
9Abocin afak ayéj UMUYHINTOR:
- Hafaaso nafaaraŋ wúur. Angu, m'anfuuhurinehne hafaaso danfég kabonkerihen.#2.9 H'aññaañne na rennireŋ. Apiren aguy «M'anramunahne hafaaso anhunamhunam Umuyhintor.»
10Me mungu, a gubaarhu hójooninno h'okandeemne ba búfunndukon leeyaŋo gídekehne. Iramunkuno a gubaarhu h'okandeemne mees. H'éjikirindenne mungu ídek ikankáneh.
UMUYHUM, nim gikankánehne, mara fi bareŋ upirenne upahun jamaŋo.
11Nim Yunus alóbne ingi Díino a búyeku dakato. Balóbi nim UMUYHINTOR ayéj dakato:
- Inini, lotorem a gúmeero!
Dakato anik akaan maŋ nim k’alotom a gúmeero.
လက်ရှိရွေးချယ်ထားမှု
Yunus 2: GD
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Copyright Vision Intégrale, Senegal