Yunus 4
4
Fo Yunus añuumulne, Díino ayik bankabaŋo
1Anabila Yunus, mungu, bafégi ni Díino abonkerne jamanku Niniwa, ahóoja dáde. 2Ayéj UMUYHINTOR:
- Ah! UMUYHUM! Eke hómár gibenuhne f'eroŋne bim a bukokum? Me ípápájul mara nim gukankánehne. Gúmár akanne me ígir ídekeh ba a bukoku Taasis. Agida me ípápájul n'úmiirne. Afeereemfeer mara fi Díin n'abonkerumeh, n'ayik bankabaŋo dáde. Kasáro buñuumul. Bupokunkon afufuuh dáde. Gutengay jamaŋo, ukaskas bubayunku gúfeguno g'údekeherne ba gúfeginkininer. Nim gúmiirne. Inini, ífefeg mara ba bubonkerhinin gúdekehne. Me na súumurum. 3Inini, UMUYHUM, bujoom. Biniiroŋo akohumeemne kanjébo.
4Yunus balóbi nim, UMUYHINTOR aŋoyindem ayéjem:
- Inini, fi n'uñuumulohne inini, hóge a marigen gugune?
5Balóbi nim Yunus akeng afúr a bukooro akok bi bísibaŋo afúruntohne. Badékiidek awonn k'ajóonin bákáso k'agog na. Banoohi na k'agoga aningeh bukooro, n'asíiba búpájulo h'adékehne buyiko a bukooro. 6Angu, f'anoone na, UMUYHINTOR awalun sino #4.6 Wúur pájiireŋ ni sino símár amíirne . Kanda ayikyik sino s'ópájul s'awalahne bim s'apiren awal buruhu santimetreŋ buruhur ingi haala a bísiba ímbenduk. «Ricin» ganyéjehne ingi gufáranseŋo. Karo símár awalne, pájiiraa. maŋ na k'agoogenem, nim dayoh dáde. Yunus, bafégi sinoŋo asúumom dáde. 7Kanda gucunkunom harennaamo, Díino abúuñor faka apus. Angu, apuso adék akáb sinoŋo nip f'adék alaaf. 8Angu bísibaŋo barenni, Díino abúuñor bawuc b'adúhun, b'afúrumor bi bísibaŋo afúruntohne. Bísibaŋo acukunkom ingi sembe k'agíf maf arino agír. Afaŋunum n'ayoh angu. Añuumul ingi UMUYHINTOR fanfaŋ. Angu, aŋoolin akiina Díino ayéjem:
- Bújoom! Me, biniiroŋo akohumeemne kanjébo!
9Díino aŋoyindem ayéjem:
- Yunus! Fi n'uñuumulohne ineeŋ a nintiku ni sinoŋo aniirone, hóge a marigen gugune?
Yunus aŋoyindem ayéj:
- Oo! Abábár iñuumul. Nanka k'egune, biniiroŋo akohumeemne kanjébo.
10Angu, UMUYHINTOR ayéjem:
- Inini, fi f'ummo na n'uwoseneh a gubaarhu sinoŋo bareŋ. Agida hantaŋ akanne ki sinoŋo awal? Ingah! Fi rufundo sinoŋo! Me irufunne. Fi muyuro. Bacumbi miñireŋ aniiro. Buruhu bísiba ímbenduk bareŋ gawalne. Te na bareŋ gukokurne jamméejhen. 11Kanda, bukooro boŋon, Niniwa, m'úyejne ikoomun, wosendo a gubaarhu immereŋ! Ingah! Jamaŋo m'angune na anrumunrumun deh! Ninginkint na! Meŋen nip biyabárenkum. Ingah! Jaraaho j'angune na pirendeŋeŋ anficálahin hójooninno ingi hójondoŋo. Immereŋ ambábár agofoŋ wuuliyeŋ keme ingi buruhur. Abónonkánin mees anlabalaba fanfaŋ. Síibaari bukoomunkánin. Te f'umoŋe n'uñuumuloh a gubaarhu n'ibujne sinoŋo k'úyejeh ibuj jamanku Niniwa nip, biki iyik bankabaŋo imbi immereŋ? Horaŋ akanne?
Nim Díino alóbne ingi Yunus.
Na líibáro inno amukne.#4.11 Angu hóge Yunus atiftif mahar a gubaarhu h'akanne ingi ni yikireŋne bankabaŋ imbi jamanku Niniwa? Hóge akúbulkubul jamméejhinem imbi Díino? Ñaañiiraa arenn a kóliibáro inko. Kanda atiftif mahar k'akúbul jamméejhinem imbi Díino. Fégeŋ baŋ, úmár añaañne líibáro inno. Te aji úfegi añaañi líibáro inno, ki nim mintoroŋ mees impirenoŋ inlinnahoŋ na honj.
လက်ရှိရွေးချယ်ထားမှု
Yunus 4: GD
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Copyright Vision Intégrale, Senegal