یوحنا 3
3
هَنی دِنیا اومِه
1ایله مِردی به کن، فَریسیون فرقه عالیمونکا بَه و چَی نوم نیوقودیموس بَه، اَ یَهودیون ایلَه رَئیسونکا بَه. 2ایی شَو، اِم مِردعیسی وَرآمَه و بَی واتِش: «اِستا، بَموستیمون تِه موعلّمی هستیشه کن خدا طَرَفیکا آمَه یَه، اِمی خونه کن هیچ‌کَم نیَشا نِشونَه اِن و موعجیزَاِنی کن تِه اَنجوم بَداشَه، اَنجوم بدَرِ، مَگَم اِمکن خدا اَینَه دَرِببو.» 3عیسی جَوابیکا واتِش: «حَییقتا بَه تِه باتیمَه، تا کَسی هنی دِنیا مَعا، نیَشا خدا پادیشاهی بِوینِه.» 4نیقودیموس عیساش واتَه: «کَسی کن پیرَ آدَمَه، چِنتَرَ بَشایَه دِنیا با؟ بَشایَه ایی کَرَ دییَر اِشتَن نَنَه لَوَ را آگَردِ و دِنیا با؟» 5عیسی جواب داشه: «حَییقتا بَه تِه باتیمَه تا کَسی آویکا و خدا روح کا دِنیا مَعا، نیَشا خدا پادشاهیکا دِلَه دَشو. 6اَچی ایی کن جِسمیکا دِنیا با، جِسمانیهَ؛ و اَچیی کن روح کا دِنیا با، روحانیه. 7تعجوب مَکَه کن واتِمَه، ”پی هَنی دِنیا بِرَ“! 8وا هر جگارا کن اَپیشه بومَی؛ چَی سَسی دَشَرَست، ولی نیشَموست کِرَم جِگاکا کا آمِه و کِرَم جگارا بَشیَه. هرکسی کن خداروح کا دِنیا با، اِنتَرَیَه.» 9نیقودیموس عیساش واتَه: «اِنتَرَ چی ایی چِنتَه ایمکان دارِ؟» 10عیسی جواب داشه: «ته، خدا قامی موعَلیمیشَه وهَنوزَنی اِم چییونکا سَر آنِگِنی؟ 11حییقتا بَه تِه باتیمَه کن اَمه، اَچیی ایکا کن بَموستیمون گَف بَژَمون و اَچیی سَردِرِ کن بَویندیمون شَاهیدی بَدامون، اَمّا شمَه، چَمَه شاهیدی قِبول نینّکَرد. 12اَگَم هَنگومی کن زمینیَه چییون خونِه شمَه نَه واتِمَه، باور نِکَردرون ایسَه اَگَم آستامونیَه چییون خونه شمَه نَه بواجم، چنتَه باور بَکَرون؟ 13هیچ‌کَم آستامونیرا کَفا شَه نی، مَگَم اَ کن آستامونیکا ویرمَه، یعنی اینسانی زوعَه. 14هَته کن موسی اِ پَیغَمبر وَیاوونیکا، برنجییَه نَلَتی چو سَر ژِشَه و راست آکَردِش، اینسانی زوعَه نی پی هَتَه راست آکَرن، 15تا هر کَم اَی ایمان بوعَرِ، زَیرونَه زندَگی بِدارِ.
16« اِمی خونه کن خدا اَنَ دِنیا رَی داری کن اِشتَن تاکَه زوعَه آداشَه تا هر کم بَی ایمان بوعَرِ نیفله آمَبو، بَلکَم زَیرونَه زندَگی بِدارِ. 17چیرا کن خدا اِشتَن زوعَه دِنیا را رَونَه آنِکَردَش تا دِنیا محکوم بکَرِ، بَلکَم رَونَه آکردش تا دِنیا چَی واسیطَنَه نیجات پَیدا بِکَن. 18هر کَم بَی ایمان بوعَرِ محکوم آنیَب، اَمّا هر کم بَی ایمان مَوَرِ، هِم ایسَه محکومَه، اِمی خاطرکن خدا تاکَه زوعَه نومی سَر، ایمان وَردَش نی. 19و محکومیت اِمَه کن، نور دِنیا دِلَرا آمَه ولی آدَمِن، ظِلَماتی، نوریکا ویشتر رَی دارینَه، چیرا کن چَوون اَعمال بَد بَه. 20چون کَسی کن بَدَ کار بَکَی، نوریکا نیفرت دارِ و نوری دِلَه نیام، تا نِکَر چَی کارن دیارآبون ورِسوا ببو. 21ولی اَکَن دِرِستَه کار بَکَی نوری دِلَرا بومَی تا دیار آبو کن چَی کارِن خدا کاریَرینَه اَنجوم آبَیَه.»
22چَی به دوملَه عیسی و چَی شاگردن ولَتِه یَهودیَه آوادی اونرا شینه. عیسی، ایی مودتی اِشتَن شاگِردونَّه اَجگا کا مَندَ و مردمی غُسل تعمید اَدَریَه. 23یحیی نی آوادیِه عِیْنونیکا کن شهر سالیمی نِزِک بَه، مردومی تعمید اَدَریَه، اِمی خاطر کن اَجگاکا آو فِرَوون بَه و مردوم آین و تعمید اَگِرین. 24اِم موقه یَحیی هَنوزَنی زیندان دَگِنستَه نِبَه. 25ایی روج یحیی شاگردون و ایله یهودی وَسَطیکا بحثی دَگِنه کن چنته ببیَه جیفینین به کا پاجا آبون. 26یحیی شاگِردن چَی وَرآمینه و بَی واتِشون: «اِستا، اَ کن بَه تِنَه اوردونی رباری اَوَریکا بَه، و تِه چَی خونه شاهیدی دارَ، ایسَه اِشتَن مردومی تعمید دَرِ و گرد چَی وَر بَشینَه.» 27یحیی جَوابیکا واتِش: «هیچ کَم نیَشا چی ایی به‌دست بوعَرِ، مَگَم اِمکن خدا طرَفیکا، بَی عطا ببو. 28شمَه اِشتَن شاهیدینَه کن اَز واتِمَه: “اَز وَعدَ آدوعَه مسیح نیمَه، بَلکَم بَیکا نارتَر رَونَه آبَه ایمَه“. 29وَیوو بَگی شنَه، ولی بَگی رَفِق کن قِرَقیکا پا مَندَ و چَی سَسی دَرَرَست، بَگی سَسیکا بَرک خَش آرَب. ایسَه چمن خَشی نی هِنتَرَکه کامیل بَبی. 30اَ پی یال آبو ولی ازگِچ آبوم.
31«اَ کن آستامونیکا آ، گردیکا یالتَرَ، اَکَن زَمینیَه، زَمینی شِنَه و زَمینی چییونکا گَف بَژَی. اَ کن آستامونیکا آ، گردیکا یالتَرَ. 32اَ، اَچی ایی خونه کن ویندَشهَ و دَرَستَشَه شاهیدی دَرِ،ام حالینه هیچ‌کَم چَی شاهیدی قِبول نیَکرد. 33اَکَن چَی شاهیدی قِبول بَکَی، تَایید بَکَی کن خدا حَییقَتَه. 34چون اَکَن خدا بَی عَندَشَه، خدا کلامی باتی، اِمی خونه کن خدا، بی اَندازَ اِشتَن روح بَی آرَدا. 35دَدَ، زوعَه رَی بَداشتی و گردِ چییون چَی دَست آدوعَشَه. 36اَکَن بَه زوعَه ایمان دارِ، زَیرونَه زندَگی دارِ؛ اَ کن زوعَه کا فِرمون نیَبَرد، زندَگی نیَویند، بَلکَم خدا غَضَّب چَی سَردِرِ بَمَندیَه.»
လက်ရှိရွေးချယ်ထားမှု
یوحنا 3: CTB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
@ 2024 Korpu Company