انجیل لوقا 24

عیسی مَسیح زِندَ آبِه

1هَفتَه اَوَلین روجیکا، سوکه خون ژِنن اَدویَه اِنی کن آمادَ آکردشون بهَ، بَشتَنهَ پِگَتشونَه و تربَرا شین، 2و ویندشون کن اَ کازی کن تِربَه دَهَنَکا بَه ایوریرا گِلِل آبَیَه. 3ولی وَقتی کن تربه دِله دَشینهَ، خداوند عیسی مَیتی پَیدا نِکَردِشون. 4اَیِن اِم ایتفاقی خونِه حَیرون آبَه بینَه کن ایکَرَ ایی دِ گِلَه مِرد کن چَوون شِندِر شَپَق اَژَنیَه چَوون وَریکا پا مَندین. 5هَتَه کن ژِنن تَرسِستَه بین و اِشتَن کَلّه اون بن بَرفَندِشون بَه؛ اَ دِ مِرد اَیِنِشون واتَه: «چیرا مردَاون دِلَکا زِندَ دومله بگَردِستیرون؟ 6اَ اِم جِگاکا نییهَ، بَلکَم زِندَ آبَیَه! یاد آرَفَنه هَنگومی کن هَنوزَنی ولَتِه جلیلیکا بَه، چنتَه شِمَش واتَه کن 7اینسانی زوعَه پی گِناخکارون بالیکا تسلیم ببو، صلیبی سَر بَی بکشن و سِوّمَه روجیکا زِندَ آبو.» 8اَموقه ژِنن عیسی گَفون یاد آرَفَندشون. 9وَقتی کن تربه کا ویگردستین، گردِ اِم چیون اَ یانزَ رسولیرا و گِردِ دیَرَکَسونرا جیگیر کردشون. 10اَ ژِننی کن اِم خبَری رسولونرا آداشونَه اِمِن بین، مریمِ مَجْدَلیّه، یوآنّا، مریم یعقوبی نَنَه و دییَرَ ژننی کن اَوونه دَرِ بین. 11ولی ژِنون گَف رسولونرا هِنتَه هَزیانی شیوار بَه و چَوون گَفی باوَر نِکَردِشونَه. 12اَمّا پِطرُس راست آبَه و تربَرا ویریتهَ؛ اَ شَت آمَندَ و تِربَه دِلَه دَیشتِش، ولی غَیراَز کفن چیی ایی نِویندِش. پِطروس هَتَه کن اِم ایتفاقیکا حَیرون به، کَرا ویگردِستهَ.

عِمائوسی راکا

13هه روجیکا، دِ نفر شاگردونکا آوادی ایرا اَشیَنهَ، کن اَ آوادی نوم عِمائوس بَه وحِدودَن یانزَّ کیلومِتراورشلیمیکا دوربَه. 14اَیِن گِردِ اَ ایتفاقون خونِه کن دَگنستَه بَه، ِ یَندِ نَه گَفاگَف دَرِ بین. 15هَه تَه کن اَیِن کایبین یَندِنَه بحث و گَفه ژَنه کَردِ، عیسی اِشتَن، چَوون وَرآمَه و اوونَّه همرا آبَه. 16ولی اَموقه کا عیسی آزنِستِه اینجار، اَونکا ویگَتِه آبَه به. 17عیسی اَوونکا دَپرسِستَه: «چه چیی خونه رادَلَکا گَفه ژَنِه بَکَرون؟» اَیِن بَرضَخَه صَفَتینَه ایکَرَ ایی پابِند آبین. 18اَموقه ایلَه اَوونکا کن چَی نوم کْلِئوپاس بَه، جَوابیکا واتِش: «مَگَم اورشلیمی دِلَکا تاکَه، ته مِسافِریشَه، کن خَبَرِر نی اِم روجون دِلَکا چِه چییِنی اَ جِگاکا ایتفاق دَگنستَیَه؟» 19عیسی دَپرسِسته: «چِه چیی اِنی؟» اَیِن واتِشون: «اَچیِ اِنی کن عیسای ناصریرا گذَشته. اَ خدا حِضوریکا و گِردِ آدَمون وَریکا، هِم گَف ژِکا و هِم اِشتَن کارونکا قودورَ پَیغَمبَری بَه. 20چَمَه سران کاهنِن و قامی یالِن بَی تَسلیم کَردِشونَه تا مَردِرا محکوم ببو و صلیبی سَردِرِ بَی کِشتِشون. 21ولی امَه امید داریمون اَ هَه ببو کن پی خدا قامی براخِمونِه. اِمِن گِرد هییچ، ایسَه سِوّومین روجه کن اِم ایتفاقِن دَگِنِستَه اینَه. 22غَیراَز اِم، بَعضی ژِنن نی کن چَمه دِلَکا هستینهَ، اَمَشون حَیرونَه کَردَ. اَیِن اُمروج سوکَه خون تربَرا شین، 23وقتی اَیِن عیسی مَیّتی نِویندشون، ویگَردِستینَه و اَمَشون واتَه کن فرشتَه اِنی رویا کا وینَدَشونَه کن اَ فرشتَه اِن، واتَشونَه عیسی زِندَیَه. 24بَعضی چَمه رَفِقونکا تِربَرا شینَه، و گِردِ چییون هَتَه کن ژِنِن واتَشون بَه ویندِشون، ولی عیساشون نِویند.» 25چَی بَه دوملَه عیسی اَیِنِش واتَه: «اَی نافَمِن کن اَنَ پَیغَمبَرون گِردِ گَفون، عری باور بَکَرون! 26مَگَم نِباید مسیح اِم عَذابون بِوینِه و چَی بَه دوملَه اِشتَن شکوه و جلالی آرَسِه؟ 27چَی بَه دوملَه موسی توراتیکا و گردِ پَیغَمبَرون نِوِشتَه اونکا شِروو کَردِش و اَچییِنی کن گردِ مَقدَسه نِویشَه اونکا چَی خونه آمَیَه، اَ دِ نَفَریرا توضیح داشَه. 28وَقتی آوادیی ایکا کن اَپیشون بَه بشون، نِزک آبینهَ، عیسی اِنتَه آمونِستِش کن بَپیشهَ اِشتَن راه ایدامَه بدَرِ. 29ولی عیساشون بَرک ایصرار کَردَ و واتِشون: «امَه نَه بومون، اِمی خاطر کن دِ روجیکا چییی نِمندَ یَه و کا شَو آبِه.» پس عیسی دِلَرا شَه تا چَوون وَر بِومونِه. 30وَقتی اَوونَّه سِفرَکا نشت بَه، نونِش پِگَته شکر کَردش، پزارنستِشه و اَیِنِش آدوعَه. 31هَه هَنگومیکا، چَوون چَمِن آج آبین و عیساشون آزنِستَه، اَمّا جَخت عیسی چَوون چَمی ناریکا غَیب آبهَ. 32اَیِن یِندِ واتشون: «سَر آگِنیشَه اَموقه کن را دِلَکا امَنه گَف دَرِ بَه و موقدَسه نِوِشتَه اون چمَرا توضیح اَدَری، چَمه دل چَمَه سینَکا چِنتَه تِند کایبَه ژِ.» 33پس اَیِن هَه ساعَتیکا پِبینه و اورشلیمیرا ویگردِستین. اَ جِگاکا اَ یانزَ گِلَه رسولِن و چَوون هَمراهون پَیدا بَکَنه کن یَندِ وَر گِرد ‌آبَه بین، 34واَواجینَه: «خداوند عیسی واقییَن زندَ آبَه یَه و شَمعونیرا اَیر آبَه یَه.» 35چَی بَه دوملَه، اَ دِ نی جیگیر کردشونه کن را دِلَکا چه ایتیفاقی دَگنستَه بَه و چِنته عیساشون نونی پزارنستِه موقه آزنِستَه.

عیسی اِشتَن شاگِردونرا اَیر آرَب

36هَتَه کن کایبین اِم چییون خونِه گَفه ژِ عیسی اِشتَن چَوون دِلکا پا مَند و واتِش: «سلام بر شمَه!» 37ولی اَیِن بَرک تَرسِستین و جیپَرکیستینَه، و فِکر اَکَرینَه کن ایلَه روح کان ویندِ. 38عیسی اَینش واتَه: «چیرا اِنتَرَ تَتَه وَسَّه دَگِنِستیرون؟ چیرا اِشتَن دِلیکا چیمَه میمَه بَکَرون؟ 39چمن بالون و لِنگون دَیَسَه. اَزیمَه! بَمن دَست آسا بکَرَ؛ اِمی خونِه کن روح گوژد و اَستَش نی، ولی هِنتَه کن بَویندیرون مِرا هِستَه!» 40اِمی واتِشَه و اِشتَن بالون و لنگون اَیِنِش آمونِستَه. 41هَتَه کن، اَیِن خَشیکا و حَیرون بِه کا هَنوزَنی نَشا ینَه اَ چییِنی کن اَوینینَه باوَرکَردِ، عیسی اَیِنِش واتَه: «اِم جِگاکا چیی ایی هَردِرا دارَ؟» 42اَیِن پِسَه ایی مایَه کَواب عیسی آداشون. 43عیسی اَی ویگَتشَه وچَوون چَمون ناریکا هَردِش.

44چَی به دوملَه اَیِنِش واتَه: «اِمِن چمن گَفِه اینَه کن وَقتی هَنوزَنی شِمنه بیمَه، شِمَم واتَه؛ کن گِردِ چییِنی کن چمن خونِه موسی شَریعَتیکا و پَیغَمبَرون نِوِشتَه اونکا و داوودی کیتاو زَبوریکا نِوِشتَه آبَه یَه پی اَنجوم ببو.» 45اَموقه عیسی چَوون فِکری آکَردِشَه تا موقَدَسَه نِوِشتَه اونکا سَرآگِنِن. 46و ایِنش واتَه: «نوشتَه آبَیَه کن مسیح پی عذاب بِوینِه و سوّمَه روجیکا مَردَ اون دِلَکا زِندَ آبو، 47و چَی نومینَه، گردِ میلَتونرا توبه کردِ و گناخون بَخشِستِه پی اییلام ببو، و اِم کار شهر اورشَلیمیکا شِروو بَبی. 48شمَه اِم چییون شاهیدِنهَ. 49اَز چمن آستامونیَه ددَ وَعدَ، شمَه سَردِرِ رَونَه آمَکرد؛ ولی اِم شَهریکا بومونَه تا وقتی کن خدا خنَر آستامونیکا، شِمَه پَتلمَه آکَر.»

عیسی آستامونیرا شَه

50چَی بَه دوملَه عیسی اَیِنِش شهری بِرِنیرا تا بِیت‌عَنْیا آوادی نِزِک بردشَه و اِشتَن بالون راست آکَردَشه، و چَوونرا خَیرَ دِوا کَردِش؛ 51و هَته کن چَوونرا دِوا اَکَریَه، اَوونکا تاکَه آبه و بَی آستامونیراشون بَردَ. 52اَیِن عیساشون پرستش کَردَ و یاله خَشیینه اورشلیمرا ویگردِستین. 53اَیِن یَژَن مَعبَدیکا اَمونینهَ و خدا سِتایِش اَکَرینَه.

လက်ရှိရွေးချယ်ထားမှု

انجیل لوقا 24: CTB

အရောင်မှတ်ချက်

မျှဝေရန်

ကူးယူ