مَتّی 3
3
تَعمید اَدَرَ یحیی راه آمادَه بَکَی
1خَیلی سال بَه دوملَه، تعمید اَدَرَ یَحیی یهودییَه وَیاوونیرا آمَه و آموج اَدَریَه. 2اَ اَوجیَه: «توبَه بِکرَ اِمی خونه کن آستامونی پادیشایی نِزکَه!» 3یحیی هَیَه کن اِشَعیای پَیغَمبَر چَی خونه باتی:
«ایی نفر وَیاوونی دِلَکا تَتَّه لَسَّه نَه باتی:
”خداوندی راه چَیرا آمادَ بکَر،
چَی آمَه راه راستَه آکَرَ!“»
4یحیی شندری شِترَ پَشمَه کا دَرَکَرییَه و چَرمینَه دالَه ایی مینیکا دَرَبستیَه، و چَی هَردَ چی، وَشتَک و وَیاوونیَه عَسَل بَه. 5مردوم شهراورشلیمیکا، وِلتِه یهودیَه گِردِ جگا اونکا و اوردونی رِبارَ کَنارِی گردِ منطَقه اونکا یحیی وَر اَشینَه، 6و اِشتَن گِناخون ایتراف اَکَرین، و اوردونی رباری دِلَه، یحیی بالینَه غُسل تَعمید اَگِرین.
7ولی وقتی یحیی ویندشَه کن خَیلیِن کن فَریسیون فرقه عالیمونکا و صَدّوقیون فِرقَه عالیمونکا بین چَی وَر بومَنَه تا تعمید بیگِن، اَیِنِش واتَه: «اَی اَفعیَه وَچَه اِن، کی بَه شِمَه هُوشدار داشَه تا غضَّبی کا کن کا آمِه بیوریجَه؟ 8اِشتَن اَعمالینه آمونَه کن واقییَن توبَرون کَردَیَه 9و اِشتَنَه نِواجَه کن ”اَمه ابراهیمِه پَیغَمبَری اودومیکامون”. چون بَشِمَه باتیمَه کن خدا قادِرَ اِم سِه اونکا اِبراهیمیرا خِردَنون سِی آکَرِ. 10حَتی ایسَه نی بَلتَه دارون ریشَکا آرَستَه یَه. هر داریی کن چاکَ میوۀ نِدَر دَنَّبیرد و آرا دِلَکا دَنَّفَند.
11«اَز بَشمَه توبَه کَردِرا، آوینَه تعمید دَرِم؛ اَمّا اَ کن چمن دوملَه بومَیَه بَمنکا قودور تَرَ، اَز چَی پاغَبون پِگَته لَیاقتی نِدارِم، اَ بَشمَه خدا موقَدَسه روح و آرا نَه تعمید آرَدا. 12اَ اِشتَن بِلَنگی اِشتَن بالیکا دارِ و اِشتَن گِرَگا پاکیَه آرَکَرد و گَندِمی اِشتَن انباریکا ذخیرَ بکَیَه، ولی سِمبَری آرا ایی دِلَکا کن دَنیَمردِن بَسوتیَه.»
عیسی تَعمید گَتِه
13اَموقه عیسی ولَتِه جلیلیکا، اوردونی رِباریا یَحیی وَر آمه تا یحیی بَی تعمید بدرِ. 14یحیی اَپیش بَه عیسی نَه بیگِرِ و بَی واتِش: «اَزیمَه کن پی اِشتِه بالینَه تعمید بیگم، ایسَه ته چمن وَرآمیش؟» 15ولی عیسی بَی جواب داشَه: «بَرزِن ایسَه انتَرکِه ببو، اِمی خونه کن اَمَرا اِم چاکَه کن، اَ چیی ایی کن دِرِسته اَنجوم بِدرَم.» پس یحیی راضی دَرمَه. 16عیسی تعمید گَته بَه دوملَه جخت آویکا بِرِن بَرمَه و آستامونِن چَی سَریکا آج آبینَه و اَ خدا روحِش ویندَ کن هِنتَه کَفتِری شیوارآستامونیکا ویرمَه و عیسی سَریکا نِشتَه. 17و چَی به دوملَه سَسی آستامونیکا واتش: «اِم چمن خاجَتیَه زوعَه یَه کن اَز بَیکا خَیلی راضی ایمَه.»
လက်ရှိရွေးချယ်ထားမှု
مَتّی 3: CTB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
@ 2024 Korpu Company