iMatiu 16
16
A mina ambɛ
1Emi iFarasi yi emi iSadusi ba mbi iYesu wa mbadin, a byun gbɛɛ non tso ama ambɛ ongwi esho.
2Nghanɛ iYesu nu uka gbɛɛ, #16:2 Olɔɔlɔ angbeka emi ababɔ dzɛ yi ambulu efa yi eta nɛ ba.<<Ni onɔ le gbɛsɛ ta, ema li gbɛɛ, <Imbe ka kwulu, ikyekyɛ akpesho ma,> 3mi egbegbe ema li gbɛɛ, <Inɛ mmbwo ka kya, ikyekyɛ akpesho ma i di yifu.> Ema li yagba ogbɔ ambɛ mgbi akpesho, kpaa ema ka yagba difwi ambɛ mgbi odzɛɛdzɛ ongwi onɛnɛ ba. 4Etɔ obube yi etɔ amah li le pita ambɛ okwulewo, nghaduu a ka nun onyi ba, se li ambɛ mgbi iJona na ta.>> IYesu si dzata ma lu.
Okwuna mgbi emi iFarasi yi emi iSadusi
5Ngwi engwafɔ iYesu foye utɔ nɛ, a gblimɔ okye ibredi byi. 6Nɛ iYesu nya ma gbɛɛ, <<Gbɛwɛbyi di ngyo ewoma mi okwuna mgbi emi iFarasi yi emi iSadusi na.>>
7A le gbɔ yi ewoma gbɛɛ, <<Li ikyegbɛɛ eyi kye ibredi onyi kpaa byi ba mani.>>
8Ngwi iYesu ye ewodzɛ mgbi ama nɛ, o gbɛɛ, <<Ema ngwu oyɛyɛ onuunu shanyɛ mbi ema nɛ, kyɔnɛse ema le gbɔ yi ewema kyɛ gbɛɛ li ikyegbɛɛ ema dzɛ yi ibredi ba? 9Ema difwi walo? Ema wɛ ibredi eda mi ikye inggisɛ idubu eda, yi ongwi ema gbe mbwo uya kwuba na lo? 10Naadi ibredi nghi egyafa mi ikye inggisɛ idubu enɛ, yi ongwi ema gbe mbwo uya kwuba na lo? 11Ani le gbɔdzɛ yi ema mi ikye ibredi ba, i wita sinɛ ngwi ema difwi ba? Kpaa ngyo ewema mi okwuna mgbi emi iFarasi yi emi iSadusi.>> 12Ta a difwi gbɛɛ o le nya ama gbɛɛ ni ama ngyo ewoma mi ikye okwuna owo ibredi ba, nghaduu li ikye otsootso mgbi emi iFarasi yi emi iSadusi.
IPyita gbɔ odzɛɛdzɛ mgbi iYesu
13Dafi iYesu ba ayɛsɛ mgbi iSisiria iFyilipi nɛ, o byi engwafɔɔn gbɛɛ, <<Inggisɛ li gbɛɛ Ongwɛ Inggisɛ li emɛ?>>
14A gbɛɛ, <<Angbeka gbɛɛ o li iJɔn okyɔ iBatisima, angbeka yɔ gbɛɛ o li Elaija, angbeka di gbɛɛ o li iJeremia hona onyi mbi ama ogbɛɛsɛ.>>
15IYesu byita gbɛɛ, <<Nghanɛ ema ma, ema gbɛɛ ani li emɛ?>>
16Nɛ iSaimɔn iPyita nu uka gbɛɛ, <<Abu li iMedzaya,#16:16 Ngwi li iKrestu mi ondu iGriki nani. Ongwɛ Imgbasho oshishe.>>
17IYesu nyan gbɛɛ, <<Mse no bɛ abu ewo, iSaimɔn ongwɛ iJona, bana li inggisɛ nya abu ungwɔnɛ ba, kpaa kyɛ mbi Otsani ongwi esho. 18Nghanɛ n kwu abu gbɛɛ iPyita,#16:18 Iyi iPyita na itan di ikwutsɛ mi ondu iGriki. ma li mi ikye ikwutsɛ nɛ n ka mbɛ okwakye mgbi emi iKrestu mgbi ani, ma onufozu udola ka yagba tukwu ofɛ ba. 19N ka gbe ungwɔ okwulu ofɛ esutɔ ongwi esho duu nu abu; alungwɔ ngwi abu kyi bwalu mi esɛ nɛ duu, a ka kye bwalu mi esho, alungwɔ ngwi abu di kye shɛlu mi esɛ nɛ duu, a ka kye shɛlu mi esho.>> 20Ta o kwo engwafɔɔn adɔ gbɛɛ nu ma ka nya inggisɛ onyi gbɛɛ ongwu li iMedzaya ma ba.
IYesu yegbɔ ikwu ewon
21Mi onɔ na lu iyayi iYesu wita onya engwafɔɔn gbɛɛ li kyɛmɛ ngwi ongwu ka kɛ iJerosalin ka gbiisɔ mi ungwɔ kwuba mi abɔ engyukwo emi Israi yi engyukwo ama ofifɛ bɛyi etsetse mgbi ola, a dika ngwɔ ongwu kyɛmɛ, nghaduu mi egbe ongwu ta ma ongwu ka kyɛɛ mi ikwu.
22Nɛ iPyita kyon lu enggengga ka wita okyɔkyɔ yan gbɛɛ, <<Imgbasho no tukwu ofɛ nani, Otsɛ! Ungwɔnɛ ka yama kyɔ abu ba!>>
23IYesu kyata yɛ nya iPyita gbɛɛ, <<Yɛ iyikpa mbi ani, iSatan! Abu li ungwɔ onu ani esɛ ogboogbo; bana abu kye ungwɔ ama nli mgbi Imgbasho ma wuuta ba, se li mgbi inggisɛ kyoon.>>
24Ta iYesu nya engwafɔɔn gbɛɛ, <<Kini inggisɛ mina okyɛdɔ ani yɔ, li kyɛmɛ ngwi o ka tangwɛ ewon yɛ kye ekwatsi mgban kyɛdɔ ani. 25Lubana ali inggisɛ nmina ona oshishe mgban tɔ yɔ, oshishe mgban ka byulu, kpaa inggisɛ nnu oshishe mgban byulu ikye ani duu ka tun. 26Ni inggisɛ tu alungwɔ mi ɛsɛ duu kpaa ni oshishe mgban nyanya lon ma, oyabɔ li ekyɛ? Naadi li ekyɛ ngwi inggisɛ ka kye nu gbikye oshishe mgban? 27Lubana Ongwɛ Inggisɛ ka wa ba mi okwɔkwɔ mgbi Otsɔn yi engyesɔ mgban, nɛ o ka nu ali inggisɛ umba mi okyɔɔkyɔ mgbi otsungwɔn. 28N nya ema otsitsi, ema angbeka kwudzɛ mmɛnɛ ma, nka di ikwu inɛ ba nghataa wa di Ongwɛ Inggisɛ kyɛ le ba mi esutɔ mgban.>>
လက်ရှိရွေးချယ်ထားမှု
iMatiu 16: UTR
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
©2024 Initiative for the Translation and Development of African Languages