Joni 2
2
Na Vakamau mai Kena
1Ena i katolu ni siga, sa qai caka e dua na vakamau mai na koro o Kena mai Kalili. A tiko kina na tina i Jisu, 2ka ratou a bau sureti talega ki na vakamau o Jisu kei iratou na nona tisaipeli. 3Ia ni sa oti na waini, sa qai kaya vei Jisu o tinana, “Sa oti vei ira oqo na waini.”
4Sa qai kaya vua o Jisu, “Yalewa, a cava me daru mai leqataka kina? E se bera ni yaco mai na noqu gauna.”
5A sa qai kaya ga vei ira na dauveiqaravi o tina i Jisu, “Na ka kecega e kaya vei kemudou o koya, dou cakava.”
6E tu ena tikina o ya e ono na saqa vatu ni wai, ka rauta ni dua na drau na lita na levu ni ka e rawa ni ra tawana yadudua, ka ra dau vakasavasavataki ira kina na Jiu. 7Sa qai kaya vei ira o Jisu, “Dou vakasinaita na saqa ena wai.” E ratou sa qai vakasinaita sara na saqa kece o ya. 8Sa qai kaya tale vei ira o koya, “Dou takiva ka kauta yani vua na i liuliu ni soqo.” E ratou sa qai kauta yani na wai, 9na kena ka sa vukici tu oqo me waini, ka sa tovolea sara na i liuliu ni soqo. E a sega ni kila o koya se kau mai vei (ia o iratou ga na dauveiqaravi era a takiva yani na wai sa kila tiko); a sa qai kaciva na tagane vou 10ka kaya vua, “Na tamata kecega era dau solia taumada e liu na waini vinaka duadua, ia ni sa oti toka na nodra gunu vakalevu na vulagi, era na qai solia na waini vinaka vakarauta ga. Ia o iko sa maroroya tikoga na waini vinaka duadua me yacova sara mai na gauna oqo!”
11A sa vakayacora o Jisu na i matai ni nona cakacaka mana oqo ena koro o Kena mai Kalili. E a vakatakila mai kea na nona kaukauwa, ka ratou sa vakabauti koya na nona tisaipeli.
12 #
Maciu 4.13
Ni sa oti o ya, e ratou sa qai lako ki Kapenaumi o Jisu kei tinana, kei iratou na tacina, kei iratou na tisaipeli, ka tiko mai kea ena loma ni vica na siga.
Sa Lako ki Valenisoro o Jisu
(Maciu 21.12-13; Mari 11.15-17; Luke 19.45-46)
13Sa voleka sara mai na nodra gauna ni Solevu ni Lakosivia na Jiu, ka sa lako yani kina ki Jerusalemi o Jisu.#Lako 12.1-27 14A sa kunei ira ena Valenisoro na dauvolitaki bulumakau, kei na sipi, kei na ruve, kei ira na dauveisau i lavo ni ra qarava tiko na nodra teveli ni veivoli. 15Sa qai cakava o koya e dua na kuita waqaliqali ka vakasavi ira kecega mai na Valenisoro, ka wili kina o ira na sipi kei ira na bulumakau. E a qai sovaraka na nodra i lavo na dauveisau i lavo, ka vukica na nodra teveli, 16ka kaya vei ira na volitaki ruve, “Dou kauti ira tani sara eke! Kakua tale ni dou cakava na vale nei Tamaqu me makete ni veivoli!” 17E ratou sa qai nanuma na nona tisaipeli ni sa volai vakaoqo ena i Vola Tabu: “Na noqu gadreva na nomuni Vale Tabu, na Kalou, sa vaka ni waqa tiko e lomaqu e dua na buka!”#Same 69.9
18Era sa qai sauma na Jiu, ka kaya vua, “Na cakacaka mana cava e rawa ni o cakava me vakaraitaki kina vei keimami ni sa dodonu na ka o cakava?”
19Sa qai kaya vei ira o Jisu, “Dou talaraka sobu ki ra na vale oqo, ka'u na tara cake tale ena tolu na siga.”#Maciu 26.61; 27.40; Mari 14.58; 15.29
20Era sa qai kaya kina na Jiu, “Na vale oqo sa tara ena loma ni 46 na yabaki, ia o na tara cake tale li ena tolu ga na siga?”
21Ia na valenisoro sa tukuna tiko oqo o Jisu sai koya na yagona ga. 22Ia ni sa vakaturi cake tale mai na mate, e ratou sa qai nanuma na tisaipeli ni a sa tukuna oti vei iratou o koya na veika oqo, ka ratou sa vakadinata kina na i Vola Tabu kei na vosa i Jisu.
Sa Kila na Tamata Kece ga o Jisu
23Ena nona a tiko voli mai Jerusalemi o Jisu ena gauna ni Solevu ni Lakosivia, sa lewe vuqa sara era sa vakabauti koya ena vuku ni nodra raica na veika mana sa vakayacora. 24Ia sa sega ga ni nuitaki ira kece sara o Jisu, baleta ni sa kilai ira vakavinaka kece sara. 25A sa sega ni yaga vua me dua e tukuna vua na ka e baleta na tamata, ka ni sa kila o koya na ka e tu e loma ni tamata.
လက်ရှိရွေးချယ်ထားမှု
Joni 2: FNVDC12
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Fijian New Version including Deuterocanonical Books © Bible Society of the South Pacific, 2012.