LUK 2
2
Jesu Puhpu
(Mt 1.18-25)
1 #
Lk 3.1. Sha-a tüopa nyih hipak me tüo ngai; kahtoknyu üshei me shangtoi min nyanlak yangshe Kaisar Augustus mepu ngaolan yan. 2Hatüowa Syria me Quirinius governor ne ngohwante üwangpa min nyanpu hipak yah. 3Hüyange üshei yoi min nyanlak jingne yoi yoi chingnyute yan. 4#Lk 1.27.Hüyange Galilee me ngohpu Nazareth chingmepu Joseph-o David nokli mepu ne menge, David ahngpa puhpu ching Bethlehem ngoine tai. 5Joseph, I phei ngohne jiengyangpu, püm yekengpe ngohpu Mary phei yoi min nyan ne tai. 6Aope iman Bethlehem me ngoh, Mary me yoi ha wangngai ngelak hipak ngoi. 7Hüyange yhawe yoi halom puh, hüyange nye ükhaiye inne tam, hüyange mahu-sheng ja me lam ne tam, hangjingne iman ngoilak jingne yinnok me nyoi yenangpe ngoh.
Wangdang Shongmokpalan Hüyange Nyee Yompalan
8Hüyange tüopa kahtok me yoi nyee yomme wangnyak phapan pümpu Nyeeyompalan ükhong ja ngoh. 9#Lk 1.11; Lam 5.19.Hüyange Youngwanpa shongmokpa ja peiye iman shongme yong, hüyange Youngwanpa müktishiwa iman neikonne tee, hüyange iman meiyange nyam. 10Hüpoi shongmokpawe imante i; “Tahnyam, kahta üshei jingne ye-ongpu mongmei peilak, ngaolan ümei yahyange tao peinang. 11#Jn 4.42; Lam 5.31; Mt 16.16; Lam 2.36.Hangjingne, teyapu wangnyak me David chingnyu me numan Yinyepa Youngwanpa Khrista puh ngohnang. 12#1 Sam 2.34; 2 Ahng 19.29; Isa 7.14.Numan-e füo ne hatüo ngekülak: Naha-a yeonge meiye nyeye lümme inyange mahu-sheng me shinne ngelak.”
13Hüyange mokhshe shongmokpalan phei wangdang banghalan nangyange wangmepu ngaiye Kahwang te yihlupu hem lokke i:
14 #
Lk 19.38; 3.22. “Ütahpa me Kahwang te müktishiwa tüoh, hüyange
kahtoknyu me yoi mong hahpu kahta yo me chingmei!”
15Aope shongmokpalan iman mepu yan hüyange wang te ong, nyeeyompalanne iman yo me teingaowe i, “Youngwanpawe temante hanghe i, hüyange hanghe ngai tüote leine Bethlehem te taihah!”
16Iman mamshe yayonge tai; Mary hei Joseph ni, hüyange naha-a mahu-sheng me lam yange nge. 17Aope iman-e tüopa nge, shongmokpalanne naha jeng hangke iyapei tüopa imante shingne tam; 18hüyange aoyinne tüopa jeng jaiyapeih, iman üshei nyeeyompalanne imante ipu ngao me yashan. 19#Lk 2.51.Hüpoi Mary-e tüolan üshei teih-e tüo, hüyange tüolan jingne meiyange luwe teih. 20Hüyange shongmokpalanne imante hangke i, hüyange iman-e jaipu hei ngepu üshei jingne Kahwang te yihlupu hem lokke nyeeyompalan leih ye.
Jesute Min Min
21 #
Lk 1.31; Mt 1.25. Hüyange I nyih tet ngoi, aope üshokhüp, wangdang shongmokpawe nao nyoi me yha püm yekengpe man ngai wante min phapuke, I min Jesu she nyik.
Jesu Khümjingte Peipu
22 #
Lev 12.2-8. Hüyange Mosa ngaokeng kih-e momowe jaowe tamlak hipak aope ngoiyapeih, Joseph hei Mary niye Youngwanpate naha-a phalak jingne iman-e Jerusalemte yahpei, 23#Woi 13.2,12.(hangjingne Youngwanpa ngaokeng me hatüo nyanne ngohnang: “Üwangne ngaipu halom üshei Youngwanpa te phünne phalak.”) 24Hüyange Youngwanpa ngaokeng me ipuke, “Iman-e awshu ni yejema-a awyei ni yahyange khümne pei.”
25 #
Lk 2.38; 23.51. Tüohipak me Simeon she minpu kahta ja Jerusalem me ngoh, hüyange tüopa kahta khakshupu hüyange phünne phawe, Israel kahtalan hangke yinlak she tanne leiye ngoh yangki, hüyange Yaha Üjao I tangme ngoh 26hüyange Iye Youngwanpa Khrista mannge mannge I yelilak she, Yaha Üjaowe ütahte ngaiye hüoyange ngoh. 27Yaha Üjao woipu phei, Simeon khümjing te ong: aope naha Jesu ngaokeng wanglamme ngohpuke jonglak jingne nyu heipa lanne I yah pei, 28Simeonne yoi yak me naha-a paiyange Kahwangte minyong phawe i,
29“Sha-a Youngwanpa, nange janyangpu aope-o yepin,
nange nang shaoshanpa toloimeipu me yanne tamtüoh;
30 #
Isa 52.10; Lk 3.6. hangjingne, ü mükke nang yinyepu ngeteki
31hanghepa nange kahta üsheiye shinge tümme ang,
32 #
Isa 42.6; 49.6; Lam 13.47; 26.23. nang kahta Israel lante okpu phalak,
hüyange yinhulante wangngai ütahte ngaiye hüolak.”
33Naha jingne Simeonne ipu ngaote Inyu hei Ipa meiyange yashan; 34hüyange Simeonne imante moipha, hüyange Inyu Mary te i,
“Hüowü, sheyongpu jingne teihpu ütahte ngaiye hüolak,
Israel ünyong yete taipu loiyahlak jingne, hüyange I Kahwang mepu füo ne menge,
kahta maawe I phei tüi-e ngaolak;
35tüokaiye iman juteih ütahte ngaitamlak;
hüyange iman mongmengpu, ünah ni yanglow kih-e yoi mongjang te lütte peilak jingne, tüopa naha-a leye ngohnang.”
36 #
Lam 21.9; Jos 19.24; 1 Tim 5.9. Hüyange Asher jat mepu Phanuel üha, Anna she minpu hinyu ja ngoh; I wunyu ne mengteiye ngoh, hüpoi wangpeng nyit ngoiye yoi netanpa phei ngoh phei me, 37wangpeng detet me peli ngoiye wamnyune ngoh. Hahyingpu üshei angyange yhawe wangnyak wangngai Kahwang khümjing me yoppe ngoh. 38Tüopa hipak me khakshuwe yha pei, hüyange Kahwang te minyongpu pha, hüyange Jerusalem yinyelak jingne tanne ngohpu üsheite tüopa naha jeng i.
Nazarethte Leihye
39Aope iman-e Youngwanpa ngaokenge yahhupuke lampheli tümme sho, Galilee me ngohpu yoi chingshao Nazareth yamme leih ye. 40#Kahp 13.24; 1 Sam 2.26.Hüyange naha-a jong, hüyange Ime wong pei, Ime üngan ülong maawe pei, hüyange Kahwang shüpshe Ime ngoh.
Jesu Nahawan Khümjingme
41 #
Hin 16.1-8; Woi 23.15. Sha-a wangpeng lep iye yinyepu mo jingne Jesu nyupalan Jerusalem te ong. 42Aope Jesu wangpeng penme ni ngoiyapei, iman wanglam kih-e mo te omne ong. 43Aope mo hipak shoyapei, iman chinglam yamme ye, hüyangpoi Jesuwa Jerusalem me lakteiye ngoh. I laktepu she Inyu hei pa niye yeshing; 44I eihalan ükhong phei ngohlak she teihyange, nyihlao hipak kemme ngohyange, I shümpalan hüyange nok kahta lanphei ngohkülak she yam. 45I yenangpe ngoh, tüokhei I yamme Jerusalem te nishe leihye. 46Nyih lüm shepupa nyih me iman-e Jesuwa konnyüopalan phei kon teinyüowe hüyange ngao jaiye Jerusalem khümjing me shotte ngohpu iman-e nge. 47Aoyinne jelo phei janpu I ngao jaiyapeih üshei meiyange yashan. 48#Mk 3.31-35.Aope Inyu hei pa niye I ngeyapeih meiyange yashan, hüyange Inyuwe Ite i, “Ü-ha, nange tomante hang hüopuweih? Nangpa tomni nang yamme yeonge mong shang yangki.” 49Iye jan, “Numan-e Tao yamme hangne ngohlak shi? Üpa nok me Tao ngohlak she numan-e yeshing a?” 50Hüyangpoi imante Iye hang iyapeih, iman-e yeshing.
51 #
Lk 2.19. Hüyange iman pheite woiye Jesu Nazareth te ye, hüyange iman phang me ngao jaiye ngoh; hanghe ngaiyapeih khongkümpu Inyuwe yoi mongme yepipe ang. 52#Lk 1.80; 2.40.Hüyange Jesu püm hei ta hei konjong me, hüyange Kahwang hei kahta monghahpu me jong.
လက်ရှိရွေးချယ်ထားမှု
LUK 2: KONYBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.