LUK 9
9
Jesuwe Pinlan Penme Ni Shonnetei
(Mt 10.5-15; Mk 6.7-13)
1 #
Mt 10.1,5,7-11,14; Mk 6.7-12; Lk 10.4-11. Jesuwe pinlan penme ni jamshe nyik hüyange laa hei ünu yaha khongkümpu janglak hüyange dak mei oklak üngan wong hüyange wong imante pha. 2Tüophei me Kahwang ahngching jeng nyüolak jingne hüyange dakpalan meiye tamlak jingne Iye iman shonne tei. 3Hüyange Iye imante i, “Numan kemlak jingne hango tah yah: shengshaoh, nyekhok, nük hei ngin, hüyange phakshao ni hango tah yah she i. 4Hüyange ao nokke numan mongmei yahlakei, tüopa ching mepu mantai mantai tüopa nokme nyoitüoh; 5#Lam 13.51.hüyange aoyin kahta lanne numan yeyahlakei aope numan tüopa ching mepu yayonglakei, ümeng hüowe numan yapha mepu mak nehoi konge tüohyange taitüoh.” 6Pinlan yayong hüyange pungao ümei konnyüowe hüyange dakpalan meiye tamme chingshao üshei yete tai.
Herod Nüngneipu
(Mt 14.1-12; Mk 6.14-29)
7 #
Mt 14.1-2; Mk 6.14-16; Lk 9.19. Sha-a Galilee me wanglam lampa Herod-e hanghe ngaiyapeih khongküm jai, hüyange I yeonge nüngnei, hangjingne kahta ütam-e iyangki, “Baptipa John yange yeteki!” 8Hüyange ütam-e i, Elijah peiteki, tüohipak memuh ütam-e i, üshongwante ngohyangpu hipa ja yange yeteki. 9#Lk 23.8.Tüoyin khongküm jaiye Herodte i, “Taowe John shang yahyang phei ma-a, ao kahta jeng taowe jai hümpu shi?” Hüyange Iye Jesu ngehuwe leipu yelak.
Jesuwe Haja Nga Uhpu
(Mt 14.13-21; Mk 6.30-44; Jn 6.1-14)
10 #
Mk 6.30-31; Lk 10.17; Jn 1.44. Hüyange pinlan leihye, hüyange iman-e hanghe ling khongkümpu Jesute i; Iye iman khongküm woiyange Bethsaida she minpu ching ja te tai. 11#Mt 14.13-21; Mk 6.32-44; Jn 6.1-14; Mk 8.4-10.Aope ükhonge tüopa ngao jaiyapeih, iman üshei I pheite woi. Iman üshei I phei woine tam, Kahwang ahngching jeng imante ngaowe hüyange dakpalan meiye tamjang tamme tai.
12Aope ün hipak ngoi pinlan penme ni I tangte pei hüyange i, “Hatüowa hango yenangpu nyoiyang, ü-o me ngohpu ching hei kahtalan tangte taiye yoi yoi hahying hüyange lojing minyam yahne kahtalan yene tamtüoh.” 13#2 Ahng 4.42-44.Hüpoi Jesuwe imante i, “Iman jingne numan-e hahlak ütam phatüoh.” Iman-e janne i, “Toman-e ngohpu khongkümpu ne an ütoi nga hüyange nyah ni ngoh nangki. Tüome ngohpu kahta khongkümpu jingne toman taiye hahying shakne tamhuwe nange teih pu a?” 14(Hangjingne netanlan shaha haja nga nanjing ngoh). Hüyange Jesuwe I pinlante hüke i, “Tüome ngohpu khongkümpu, denga pong ükhong ükhong shotne tamtüoh.” 15Iye ipu kih pinlanne ling hüyange iman üshei shotne tam. 16#Lk 22.19; 24.30-31; Lam 2.42; 20.11; 27.35.Jesuwe antoi nga nyah ni jonyange wangyete lei, tüolan jingne Kahwangte minyong pha, hüyange khoih, tüophei me kahtalan te tamme phalak jingne pinlan yakme pha. 17Iman üsheiye wangpu shinne moh-hah; hüyange kahtalanne hahyange topu heeito muhto penme ni ngoiye pinlanne shaiye jem.
Jesu She Peterwe Janpu
(Mt 16.13-19; Mk 8.27-29)
18 #
Mt 16.13-20; Mk 8.27-30; Jn 1.49; 11.27; 6.66-69. #Lk 3.21; 5.16; 6.12; 9.28; 11.1.Hipak ja me Jesu I shaha yoppe ngohwante, pinlan I tangte pei. Iye imante tong, “Kahtalanne Tao ao she inangki?” 19#Lk 9.9; Mk 9.11-13.Iman-e jan, “Nanga baptipa John she ütamme inangki,” “Ütamme üne-o nanga Elijah she inangki, hüwante üne-o kahta ütamme nanga üshong wante ngohpu hipa ja yange yepu she inangki.” 20Iye imante tong, “Hüma-a numan-e Taowa ao she teihnangki?” Peter janne i, “Nanga Kahwangpa Messiah!”
Jesuwe I Lilak Hei Yangyelak Jeng Inang
(Mt 16.20-28; Mk 8.30—9.1)
21Hüyange Jesuwe imante ao te-o tah i she mongjüonge ngaokeng phawe i, 22#Mt 16.21; Mk 8.31; Lk 9.43-45; 18.31-34; 17.5.“Kahta Üha yeonge shaoshilak, hüyange jeiyonglanne, ütahpa ngengpa lanne, hüyange Ngaokeng nyüopalanne yeyahlak, I li ne tamlak, hüyangpoi nyih lüm shepu nyih me yange yelak.”
23 #
Mt 16.24-28; Mk 8.34—9.1. Hüyange Iye üsheite ngaowe i: “Ütamme ü-phei woihuma-a, Iye yoi nying nyingke tükyah, hüyange nyih jeih yoi tangpem paiyange ü-phei te woiyah. 24#Mt 10.38-39; Lk 14.27; 17.33; Jn 12.25.Hangjingne aowe yoi üyin yinhuya peih I mahlak; hüpoi üjingne aowe I üyin mahyapeih I yinlak. 25Hangjingne kahta ütamme yoi üyin mah ne tamyange kahtoknyu nopu okpu me hanghe küw ngohlak? Üting me tüone yeje! 26#Mt 10.33; Lk 12.9; 1 Jn 2.28.Kahta ütamme üjingne hüyange Taowe nyüopu konte wüowe teihma-a, aope Kahta Üha yoi müktishiwa phei hüyange üpa, hüyange üjaopa shongmokpalan müktishiwa phei yulakei, I jingne wüolak; 27#Lk 22.18; Mt 10.23; 1 Thes 4.15-18; Jn 21.22.Hüpoi ütingme Taowe numante ipha ning! Hatüo me yonge ngohpulan yo me ütamme Kahwang ahngching mannge mannge she, lipu yengsheng ye yinglak.”
Üshe Leijeipu
(Mt 17.1-8; Mk 9.2-8)
28 #
Mt 17.1-8; Mk 9.2-8; 2 Pet 1.17-18. #Lk 8.51; 3.21; 5.16; 6.12; 9.18; 11.1.Hüyange tüolan ngao ngao yang phei me hat ja nanjing ngohyange Jesu Peter, John hei Jeams woiyange kahtang ja te yopne ong. 29Aope I yoppe ngohyapeih, I sheta hei müklei lanshe leijeipu ngai hüyange I nyemo phihlange henge ngai. 30#Lam 1.9-11.Mokhshe I phei kahta ni ngai hüyange I phei ngao. Tüolan-a Mosa hei Elijah ne ngoh yangki. 31Iman wangdang müktishiwapu phei peiyangki hüyange Jerusalem me I lipu kaiye Kahwange mongpu ütahte ngailak jeng ngaowe i. 32#Jn 1.14.Hüyangpoi Peter hei I phei ngohpu shümpalan shihupuwe naoteiye ngohyangki, hüpoi loine tamme ang, hüyange iman-e müktishiwapu phei Jesu phei kahta ni yongyange nge. 33#Lk 5.5; 8.24,45; 9.49; 17.13.Aope Jesu mepu kahta ni yanne tai, Peterwe I te i, “Konnyüopa, teman tüome ngohpu yeonge meiteki. Toman-e tüome panha lüm nang jingne ja, Mosa jingne ja, hüyange Elijah jingne ja welakei.” (Iye hanghe ngaoyapeih meimei-e yeshingpe ngao)
34I ngaojang ngaowe ngohwante wangphom pei, hüyange imante büang, hüyange wangphomme iman tei ye-ngepe büangwante pinlan yeonge nyam. 35#Lk 3.22; Jn 12.28-30.Tüohipak me wangphom mepu ngao ja ngaiye hüke i: “Hatüowa taowe lepu üha, Ite jai tüoh!” 36#Mt 17.9; Mk 9.9-10.Hüyange aope ngaopu lakyapeih, Jesu shaha yongyange ngoh. Hüyange hanghe ngaiyapei, hatüo jeng ao te-o yengaipe pinlanne lowe ang.
Ünu Yaha Ompu Naoshe Ja Jesuwe Meitampu
(Mt 17.14-18; Mk 9.14-27)
37 #
Mt 17.14-18; Mk 9.14-27. Ünepu nyih aope iman kahtang mepu yu, ükhong üyong maawe peiye Jesu phei hüo. 38Ükhong yo mepu kahta jawe üngwünne i: “Konnyüopa, üha I shaha ngohpu üha te leipha she taowe nang te yoppuweih! 39Hangjingne mokhshe ünu yahawe I pho hüyange yashong me toiyeta, tüo kaiye I ju me mopphot ngai; tüo kaiye I kemme yongne yemeipe shaoshine tamnangki! 40Nang pinlante tüopa jange winyang pha she taowe tong hüyangpoi iman-e ye-ok.” 41Jesuwe janne i: “Üting yelakpu hüyange teikhahpu jin! Numan phei Tao hangshin ngohlak shi?” Tüophei me kahta te i, “Nang ha tüome yahpei kei.” 42Tüopa naha kemjang kemme ünu yahawe Ite shung, hüyange yashong me kahtok te lam. Jesuwe ünu yaha te ngaokeng phawe ngaowe i, tüophei me naha mei, hüyange Ipa te I phaye. 43#Mt 17.22-23; Mk 9.30-32; Lk 9.22; 18.31-34; 17.25.Ütahpa Kahwang wong ngeye kahta üshei yashan.
I Lilak Jeng Jesuwe Üne-o Inang
(Mt 17.22,23; Mk 9.30-32)
Jesuwe lingpu toishao lili ngeyange kahtalan yelakpe moppe yashan, tüohipak me Iye yoi pinlan te hüke i: 44“Taowe sha-a numante hanghe ngaolakei tahpe! Kahtalan yak me Kahta Üha phünne phalak oteki.” 45Hüyangpoi Iye hanghe ngaoyapeih iman-e yeshing. Iman-e min tah shing she iman mepu tüopa lowe ang, hüyange iman-e tüopa jeng Ite tonglak jingne nyamme teih.
Üyongpa Aoshi
(Mt 18.1-5; Mk 9.33-37)
46 #
Mt 18.1-5; Mk 9.33-37. Pinlan, iman yo me ao üyongpa ne menglak shi she, teingaowe mop ngai. 47Iman-e hanghe teih Jesuwe shing, tüophei me Iye naha ja I phin me yongne tamyange, iman te hüke i: 48#Lk 10.16; Mt 10.40.“Aowe Ü min me tüopa naha yah yapeih Iye Tao yahnang; Hüyange aowe Tao yahyapeih. Iye aowe Tao shonyapeih I-o yahnang. Hangjingne numan yo me ao üjoipa ne menglakei I üshei yome üyongpa ne menglak.”
Numan Phei Tüi-e Yeyongpu Üshei Numanpheipu
(Mk 9.38-40)
49 #
Mk 9.38-40; Lk 11.23. #Lk 5.5; 8.24,45; 9.33; 17.13.Johnne hüke ngaowe yong. Iye i, “Konnyüopa.” “Nang min me kahta jawe ünu yaha jange teipu toman-e ngeki, hüyange toman-e Ite büangyangki, hangjingne Iya teman ükhong ne yeje.” 50Hüpoi Jesuwe Ite janne i: “I lakne tahtam tüoh.” “Hangjingne numan phei tüi-e yeyongpu üshei numan pheipu.”
Samaria Ching Ja Me Jesu Yeyahpu
51 #
Mk 10.1; Lk 17.11; Jn 4.40-42. Aope Jesu wangdang te woiye inlak hipak owe peiyapeih, Iye yoi mongme teih-e Jerusalem te peilak jingne tüm. 52#Mt 10.5; Jn 4.4.Samaria ching ja me peiye I jingne lampheli tümme tanlak jingne, sheshao yete shongshonpalan ütam Iye shon. 53Hüyangpoi tüome ngohpu kahtalanne I yeyah, hangjingne Jerusalem yete linne tai lakne I pei. 54#Mk 3.17; 2 Ahng 1.9-16.Aope I pin Jeams hei John lanne tüo nge, iman-e tüo ngao i, “Youngwanpa, wangdang mepu vün yeiye iman üshei shuwe tamlak jingne nange tomante lingne tamhuya?” 55Hüpoi Jesu lüppe ye hüyange imante tee, 56hüyange iman ülao ching jate tai.
Jesu Pheite Woipu
(Mt 8.19-22)
57 #
Mt 8.19-22. Iman lamme kemjang kemme ngohwante, kahta jawe Jesute i, “Nang ümeken me tailakei, tao woilakei;” 58Hüwante Jesuwe Ite i, “Hiyanlan-e longsa ngohnang, hüyange wang awhalan ne ülüp ngohnang, hüyangpoi Kahta Üha shangje jing hüyange toloi meijing yenang.” 59Iye ülao kahta ja te i, “Ü-pheite woikei.” Hüpoi Iye i, “Konnyüopa, üwangne tao hüng yeshihning hüyange üpa mang muyang küning.” 60Hüpoi Jesuwe janne Ite i, “Lipalanne yoi mang minmu yah. Hüpoi nanga taitüoh hüyange Kahwang ahngching konnyüotüoh.” 61#1 Ahng 19.20; Phi 3.13.Ülao kahta jawe i, “Konnyüopa, nang pheite tao woilakei, hüpoi üwangne tao nokte ye-e yan ngao iyangkü ning.” 62Jesuwe Ite i, “Kahta aoyinne yayonge tailak jingne tümyange, tokphei yete leilakei, Kahwang ahngching jingne iman wangpu ne yeje.”
လက်ရှိရွေးချယ်ထားမှု
LUK 9: KONYBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.