KECHENG 16
16
Hagar Lapen Ishmael
1Abram apiso Sarai inutbak ta alangliphan osomar amahang pathek pi thekthe det-lo. Bonta bangpi inut Ijip abanpi amen Hagar, 2lasi bangpi Abram aphan pulo, “Hemphu nephan oso kedoji pen khang-lo. Kopisi nang nebanpi pen i-rap-re det-lo? Bangpi nephan inut a-oso nepi un tahai mene.” Sarai kepu alam Abram ta chedondunlo. 3Lasi alangliphan kepa en jisi bangpi Hagar pilo. (Lake Abram Kanaan adet kedo ningkan kep ahut si la plang-lo.) 4Hagar pen Abram irap-rap-lo, lapen bangpi aso chopathelo. Bangpi aso kedolo pu kechini pen bangpi cheparokalo lapen Sarai aphan pinremlo.
5Anke Abram aphan Sarai pulo, “Hagar nephan nekepinrem#mate laso kehingno apot nang pasungnang ke nang si adai, ne methangsi bangpi nangphan nangpilo, lapen bangpi aso kedolo pu chechini pen bangpi nephan nepinremlo. Hemphu le etum angbong komatsi kechokma nang pangsai lonang!”
6Abram thak-lo, “Mesenlo, bangpi ke nangbanlo, nangber si dolo; bangpi pen nang kopima nangning-kehang alingle klemnon.” Anke Hagar aphan Sarai lapu-an chenek-lo, bangpi katjuilo.
7Shur atovar anat kejejangtang ajo lang-amek along Hemphu apherangke Hagar aphan chetongdunlo, 8lapen pulo, “Sarai abanpi Hagar, nang konat pensi kevang-lo lapen konat-lo kedampo?”
Bangpi thak-lo, “Neli nelihemphi pen nangkekat-lo.”
9Alangli pulo, “Bangpi along chedamthunon, lapen bangpi abanpi plangnon.” 10Ako la puthulo, “Nangphan baduta kelakha un-e pin ke-ongdung nangso-nangsu Ne nangpipo. 11Nang inut sopo chopathepo, lapen nang la Ishmael#Ibri penke “Arnam aphan kephere” pu pusi amen irpo, pima nang keningri ase Hemphu arjulongtang-lo. 12Bonta nangsopo ke nampi agadha asonsi donangpo; lake abangphutin abe thurpo, lapen abangphutin la abe thurpo. La ke adon-arap kedo-an pen hempreksi dopo.”
13Hagar amethang charjulo, “Ne Arnam aphan ahokpet pen thek-long-loma#Ibri pen klardakde lapen la kethan nangji aphantong kereng nang-lo ma?” Lasi bangpi aphan keningje a-Hemphu aphan “Kethek-long Arnam” pusi hang-lo. 14La apotsi Kadesh lapen Bered angbong alangtuk aphan “Nephan nekethek-long kereng-et alangtuk pusi irlo.”
15Abram aphan Hagar inut sopo amahang pathekpilo, lapen alangli laphan Ishmael pusi amen irlo.#Gal 4.22 16Halaso ahut Abram arta ningkan 86.
လက်ရှိရွေးချယ်ထားမှု
KECHENG 16: KARBIBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Karbi Holy Bible © Bible Society of India, 2010.
Used by permission. All rights reserved worldwide.