KECHENG 19
19
Sodom Apap
1Arnikangsam apor banghini Arnam apherangke atum Sodom anat kevang ahut Lot ke rongsopi anghap along si ingnilunlang. Latum aphan alangli kethek-long amat, alangli thur si halatum aphan kechetongji aphan damlo. Halatum angno alangli ingphun patongkilo, 2lapen pulo, “Akehai atum, nanglitum aphan kangdukjisi neli ladaksi dolo. Kanghon pen nanglitum nelihem nangdun non. Nanglitum nangkeng chingroipen ajo sang tame. Adapprang nanglitum thur dapprang-ra, lapen nanglitum atovar chedam ik-tame.”
Bonta latum thak-lo, “Kali, Nelitum ladak rongsopi achetai along si ajo pangthangpo.”
3Latum aphan alangli choning-ribomlo, lapen padu latum alangli hem dunjuilo. Aban atum aphan ajehak him kepangdangjisi Lot Hukum pilo lapen alohi atum aphan mesen akecho-kejun pasik-lo. La siktang si, latum la cholo.
4Alohi atum amek kejang aphrang, Sodom amonit atum hem kompet lo. Rongsopi pinso amonit atum an, oso lapen akesar ta hadak dopet-lo. 5Lot aphan latum hang-lo, lapen arjulo, “Peningve nanglong kesangji amonit atum konat-lo? Latum netum aphan nevanpi-etnon.” Sodom amonit atum latum penpen mek-langno akam kecheklemji pu aning hang-lo.#Kang 19.22-24
6Lot ingtan barsi inghap ingkirchek-lo, lapen panungthip-lo. 7Alangli halatum aphan pulo, “Jirpo atum nanglitum aphan neli nangcho ningrilo, lason mek-langno akam klemri! 8Langtha, nelisopimar atum banghini do, latum okarjang saidelang. Latum nanglitum aphan ingtan neli nangvan pidetpo, lapen latum aphan nanglitum kopi ma keklemji nangning kehang aling klemnon. Bonta lahei amonit atum aphan thangnat ta klemri; nehem latum alohi, lapen latum aphan neli raiveknangji.”
9Bonta latum pulo, “Netum atovar pen chetereknon, nang bang-adet aso! Netum kopima keklemnangji komat-lo nang netum aphan ne-kethan abang, netum atovar pen chetereknon, kalite latum aphan an sose netum nangphan nangklemji.” Latum Lot aphan aphi ingbaisi inghap kephangnojisi thurpak-lo. 10Bonta arlo kedo banghini amonit atum Lot aphan arlo pen santhorsi inghap ingkirthip-lo. 11Anke latum kedo-an amonit aphan amek pave-et-lo, anke latum inghap thek-longle det-lo.#2 Rec 6.18
Lot Sodom Ke-o
12Banghini amonit atum Lot aphan pulo, “Ladak jongsi nangsomar, nangsopimar, nang osa, mate rongsopi along mane nangdon nangrap do pulote, latum aphan ladak pen padamnon, 13pima laso adim netum pavirpo. Lahei arat aphuthak kepherememe kebok alam Hemphu arjulongtang-lo lapen Sodom kepavirji aphan netum aphan nangtoitang-lo.”
14Anke asopimar atum aphan ke-enji pu amonit atum along Lot damlo, lapen pulo, “Serak-ra ladak pen damseraknon; Hemphu laso adim pavirpo.” Bonta alangli kepachelai pusi latum mathalo.
15Adapprang pherangke atum Lot aphan patong-lo. “Seraknon!” Latum pulo. “Nangpiso lapen nangsopimar banghini aphan cheponra, damnon, anke rongsopi kepavir ahut nangtum achethe virvelo.” 16Lot aning pakungkeng-lo. Tebonseta Hemphu alangli phuthak ingjinsolo, lasi banghini amonit atum alangliphan, apiso aphan lapen asopimar banghini aphan ari pen ponsi ha rongsopi angtan padodam toilo.#2 Pit 2.7 17Anke inut apherangke abang pulo, “Nangpran aphan katnon! Nangphi chelangri lapen arlok along sangri. Inglong anat katnon, anke nangtum thinangnelo.”
18Bonta Lot thak-lo, “Kalilo, kanghon pen nelitum aphan la nepaklemrinon, akehai. 19Nanglitum neliphan nerappik-lo lapen nelipran ta pajok-lo. Bonta inglong-heihei an ke helo-ong-lo; kevir neliphan nangphopo, neli hadak lele ako neli thinangpo. 20Hala rongso nangli thek-long-lobo? La tebok muchot. Neliphan hadak nepadam longnon, la nangli thek-long-lo adim asap-ovet lapen la jokvanji.”
21Alangli thak-lo, “Chokpo, neta nangchedon dunlo. Halaso arongso ne pavirvelo. 22Seraknon! Katnon! Hadak nang leletik ne thangnat ta klemklelo.”
La bihek pu Lot kepu apotsi, rongso amen Zoar#Ibri penke “bihek” pu hang-lo.
Sodom Lapen Gomorrah Kevir
23Lot Zoar along kele ahut an ke arni vang-ang-lo. 24Sodom lapen Gomorrah arongsopi aputhak Hemphu menmen kechovurvur mede paklolo#Mat 10.15; 11.23-24; Luk 10.12; 17.29; 2 Pit 2.6; Jud 7 25lapen latum aphan pavirdet-lo, lapen arlok kangthim, hadak kedo arat an aphan, lapen hadak longle athak kejir asontin amar pavir-et-lo. 26Bonta Lot apiso anung chelang-lo, lapen ingti arlong cheplangdet-lo.#Luk 17.32
27Puthot adap, Abraham, Hemphu angno alangli karjap adim seraksi damlo. 28Alangli Sodom lapen Gomorrah anat lapen arlok kangthim anat lang-lo, lapen thedung ame angkang pen kebar amehi asonsi, longle pen mehi kethur thek-long-lo. 29Bonta Lot kedo arongsopi a-arlok Arnam kepavir ahut alangli Abraham aphan chemathalo, lapen Lot aphan pajok-lo.
Moab Lapen Ammon Aso Keplang
30Zoar along Lot kedoji pherelo apotsi, lapen asopimar atum ha inglong-heihei along cheterek-lo lapen longku along dolo. 31Amu aphan akleng abang pulo, “Epo sartang-lo, etum osomar kelong ji aphan lapen eke-enji abang pirthe adang#mate laso alongri monit avedet-lo. 32Vangnon, epo aphan hor pangritham lonang, anke alanglilong eli idunlongpo, lapen alangli pen eli oso chopathe longpo.” 33Halabangso aningve alangliphan latum drakha ahorlang pajunlo, lapen alangli pen asopi akleng abang dim-tar pasi det-lo. Bonta alangli lapu-an kangrilo, la chechinine det-lo. 34Puthot arni asopi akleng abang bangpi amu aphan pulo, Patove alangli long ne i-dunlo; peningve alangliphan puthot pangritham lonang, lapen alanglilong nang i-dunnon. Anke epo pen eli abangphutin ta inut nut oso longrep po. 35Lasi halaso aningve ta latum laphan pangrithamlo, lapen asopi akebi abang alangli pen dim-tar pasidet-lo. Puthot alangli lapu-an ingrilo, alangli la chechinine det-lo. 36Lasonsi Lot asopimar banghini ta halatum apo pen aso chopathelo. 37Asopi akleng abang inut asopo dolo, bangpi laphan Moab#Ibri penke “nepo pen” pusi amen irlo. Labang helo nonpu arni a-Moab atum aphusarlo. 38Asopi akebi abang ta inut asopo dolo, bangpi laphan Benammi#Ibri pen ke “nedo-nerap” asopo mate “Ammon” asopomar pusi amen irlo. La helo nonpu arni Ammon atum aphusarlo.
လက်ရှိရွေးချယ်ထားမှု
KECHENG 19: KARBIBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Karbi Holy Bible © Bible Society of India, 2010.
Used by permission. All rights reserved worldwide.