If you have would like a copy of this version please contact info@davarpartners.org

Arabic Chadian - 2019 Edition (OT) Non Drama

La Bible en arabe tchadien © Alliance biblique du Tchad, 2019

وَكِتْ أَبْرَامْ عِنْدَهْ 99 سَنَةْ، اللّٰهْ بَانْ لَيَّهْ وَ قَالْ: «أَنَا اللّٰهْ الْقَادِرْ. تَابِعْ كَلَامِي وَ أَبْقَى دَايْماً صَالِحْ. أَنَا نِثَبِّتْ مُعَاهَدَتِي مَعَاكْ وَ نَنْطِيكْ ذُرِّيَّةْ كَتِيرَةْ.»
أَبْرَامْ سَجَدْ قِدَّامْ الرَّبّ وَ هُو قَالْ لَيَّهْ: «دِي هِي الْمُعَاهَدَةْ الْبَيْنِي وَ بَيْنَكْ. إِنْتَ تَبْقَى أَبُو هَنَا أُمَمْ كَتِيرِينْ. مِنْ الْيَوْم، مَا يِنَادُوكْ أَبْرَامْ لَاكِنْ يِنَادُوكْ إِبْرَاهِيمْ أَشَانْ أَنَا نِسَوِّيكْ أَبُو هَنَا أُمَمْ كَتِيرِينْ. وَ نَنْطِيكْ ذُرِّيَّةْ كَتِيرَةْ وَ الذُّرِّيَّةْ دِي تَبْقَى أُمَمْ كَتِيرِينْ وَ يَمُرْقُوا مِنَّكْ مُلُوكْ. وَ مُعَاهَدَتِي السَّوَّيْتهَا مَعَاكْ إِنْتَ وَ مَعَ ذُرِّيّتَكْ مِنْ بَعَدَكْ تَقْعُدْ دَايْماً. وَ الْمُعَاهَدَةْ الدَّايْمَةْ دِي تِوَصِّفْ كَدَرْ أَنَا نَبْقَى إِلٰـهَكْ وَ إِلٰـهْ ذُرِّيّتَكْ. وَ نَنْطِيكْ إِنْتَ وَ ذُرِّيّتَكْ كُلَّ التُّرَابْ هَنَا بَلَدْ كَنْعَانْ الْإِنْتَ سَاكِنْ فَوْقهَا أَجْنَبِي. وَ الْبَلَدْ دِي تَبْقَى وَرَثَتْهُمْ إِلَى الْأَبَدْ وَ أَنَا نَبْقَى إِلٰـهُّمْ.»
وَ بَتَّانْ اللّٰهْ قَالْ لِإِبْرَاهِيمْ: «وَاجِبْ إِنْتَ وَ ذُرِّيّتَكْ تِتَابُعُوا مُعَاهَدَتِي السَّوَّيْتهَا مَعَاكُو مِنْ ذُرِّيَّةْ لِذُرِّيَّةْ. دِي هِي مُعَاهَدَتِي التِّطَبُّقُوهَا إِنْتَ وَ ذُرِّيّتَكْ. وَاجِبْ تِطَهُّرُوا كُلَّ دَكَرْ مِنْكُو. وَ طَهُورِتْكُو دِي فِي جِلِدْكُو تَبْقَى عَلَامَةْ هَنَا الْمُعَاهَدَةْ الْبَيْنِي وَ بَيْنكُو. وَاجِبْ تِطَهُّرُوا أَيِّ دَكَرْ مِنْ ذُرِّيِّتْكُو فِي تَمَانَةْ يَوْم بَعَدْ وَالُودْتَهْ. وَاجِبْ تِطَهُّرُوا أَيِّ دَكَرْ الْمَوْلُودْ فِي بُيُوتْكُو أَوْ عَبِيدْكُو الشَّرَيْتُوهُمْ مِنْ عِيَالْ الْأَجَانِبْ الْمَا مِنْ نَفَرْكُو. وَ تِطَهُّرُوا كُلَّ الدُّكُورْ الْوِلْدَوْهُمْ فِي بُيُوتْكُو وَ الْعَبِيدْ الشَّرَيْتُوهُمْ. وَ بَيْدَا، مُعَاهَدَتِي تَقْعُدْ فِي جِلِدْكُو وَ هِي مُعَاهَدَةْ دَايْمَةْ. أَيِّ دَكَرْ مِنْكُو الْمَا طَهَّرَوْه، وَاجِبْ يَفْصُلُوهْ مِنْ شَعَبَهْ أَشَانْ هُو قَطَعْ مُعَاهَدَتِي.»

وَ اللّٰهْ قَالْ بَتَّانْ لِإِبْرَاهِيمْ: «بَعَدْ الْيَوْم، مَرْتَكْ سَارَايْ بَتَّانْ مَا تِنَادِيهَا سَارَايْ لَاكِنْ نَادِيهَا سَارَةْ. وَ أَنَا نِبَارِكْهَا وَ نَنْطِيكْ مِنْهَا وِلَيْد وَ هِي تَبْقَى أَمّ هَنَا أُمَمْ وَ يَمُرْقُوا مِنْهَا مُلُوكْ هَنَا شُعُوبْ.»
وَ بَعَدْ دَا، إِبْرَاهِيمْ سَجَدْ قِدَّامْ اللّٰهْ وَ ضِحِكْ وَ قَالْ فِي قَلْبَهْ: «كِكَّيْف نَقْدَرْ نَلْدَ، أَنَا الْعِنْدِي 100 سَنَةْ؟ وَ كِكَّيْف سَارَةْ الْعِنْدَهَا 90 سَنَةْ تَقْدَرْ تَلْدَ؟» وَ إِبْرَاهِيمْ قَالْ لِلرَّبّ: «خَلِّي بَرَكَتَكْ دِي تُكُونْ فِي إِسْمَاعِيلْ!» لَاكِنْ الرَّبّ قَالْ لَيَّهْ: «لَا، مَا مِثِلْ كَيْ! مَرْتَكْ سَارَةْ تَلْدَ لَيْك وِلَيْد وَ تِسَمِّيهْ إِسْحَاقْ. وَ أَنَا نِثَبِّتْ مُعَاهَدَتِي الدَّايْمَةْ مَعَايَهْ وَ مَعَ ذُرِّيّتَهْ. وَ أَنَا سِمِعْت سُؤَالَكْ فِي شَانْ إِسْمَاعِيلْ. أَنَا نِبَارِكَهْ هُو كُلَ. وَ يَلْدَ عِيَالْ كَتِيرِينْ. وَ ذُرِّيّتَهْ تَبْقَى كَتِيرَةْ مَرَّةْ وَاحِدْ. وَ يَمُرْقُوا مِنَّهْ 12 مُلُوكْ وَ أُمَّةْ كَبِيرَةْ. لَاكِنْ مُعَاهَدَتِي دِي، نِسَوِّيهَا مَعَ إِسْحَاقْ، السَّارَةْ تَلْدَاهْ لَيْك فِي السَّنَةْ الْجَايَةْ فِي نَفْس الْوَكِتْ دَا.» وَ وَكِتْ الرَّبّ كَمَّلْ كَلَامَهْ، فَاتْ خَلَّاهْ لِإِبْرَاهِيمْ.
وَ بَعَدْ دَا، فِي نَفْس الْيَوْم، إِبْرَاهِيمْ سَوَّى الشَّيّءْ الْاللّٰهْ أَمَرَهْ بَيَّهْ. شَالْ إِسْمَاعِيلْ وِلَيْدَهْ وَ كُلَّ الدُّكُورْ الْوِلْدَوْهُمْ فِي بَيْتَهْ وَ كُلَّ الْعَبِيدْ الشَّرَاهُمْ وَ الْقَاعِدِينْ فِي بَيْتَهْ وَ طَهَّرَاهُمْ. وَ إِبْرَاهِيمْ عِنْدَهْ 99 سَنَةْ وَ إِسْمَاعِيلْ وِلَيْدَهْ عِنْدَهْ 13 سَنَةْ وَكِتْ طَهَّرَوْهُمْ. وَ فِي نَفْس الْيَوْم، إِبْرَاهِيمْ وَ وِلَيْدَهْ إِسْمَاعِيلْ كُلَ طَهَّرَوْهُمْ. وَ النَّاسْ الْوِلْدَوْهُمْ فِي بَيْتَهْ وَ الْعَبِيدْ الشَّرَاهُمْ مِنْ عِيَالْ الْأَجَانِبْ، كُلُّهُمْ طَهَّرَوْهُمْ مَعَ إِبْرَاهِيمْ.

सुन्नुहोस् تكوين 17