Cenisihs 28
28
1Aaisik tahsh okii antomaan Cekapoon, ekii antawenimaatc ciminohsenitc, miitahsh kaa'inaatc, “Keko wiitikemaahken ihkwe Kenan (Canaan) ahkiink wenciitc. 2Pasikwiin, weti ishaan Mesopohtemiya (Mesopotamia) cianta waapamatc otaawinink a'a Pehtyoel (Bethuel) kimihshoomis. Mii hsa weti keontinihkweweyan. Kimihshoomensh Lepan (Laban) otaanihsan hsa wiiwiwaahkan. 3Taka Kishemanitoo kaaMaawaci mashkawisiitc kika shawenimik, kika ishi'ik kaye cipaahtiinonitc keoniicaanihsiwatc, kiin itahsh kika otetemikook niipiwa' kaatahswewaanakisiwaatc. 4#Gen 17.4-8. Taka kaye kikashi shawenimik, i'i kaye kipiiwesiima' taapishkoo kaakii ishi shawenimaatc Eparahaaman (Abraham). Kiin hsa citipentaman o'o ahki kaataanotaman, Kishemanitoo kaakii miinaakopanen Eparahaaman,” okii'inaan. 5Aaisik tahsh okii ishinisha'waan Cekapoon Mesopohtemiyaank ci‑ishaanitc kaakii ishi'ayaanitc Lepanoon. Lepan kiiotete Pehtyoelwan kaakii nihtaa papaamikosinitc. Lepan kiiotawemaa Oripehkawan. Cekap a'a tahsh Iihswaa (Esau) iitok kiiomaamaawak Oripehkawan.
Iihswaa Kotak Ihkwewan Kiiwiiwitc
6Iihswaa tahsh okiih kihkentaan oteten Aaisikoon (Isaac) ekii ishinisha'waanitc Cekapoon (Jacob) Mesopohtemiyaank ciontinihkwewenitc weti. Okiih kihkentaan kaye ahpii kiihshawenimaanitc o'o ekii'inaanitc, “Keko wiitikemaahken ihkwe Kenan (Canaan) ahkiink wenciitc.” 7Okiih kihkentaan kaye Cekapoon ekii ishaanitc Mesopohtemiyaank (Mesopotamia) ekii na'ihtawaanitc oteteni, omaamaani kaye. 8Iihswaa tahsh okiih kihkentaan oteten Aaisikoon ekii na'enimaahsinik i'i ihkwewa' Kenan kaakii onciinitc. 9Kii‑ishaa tahsh Ishmeyalwan (Ishmael) eshi'ayaanitc ekii wiiwitc otaanihsini Mehalat (Mahalath) eshinihkaasonitc. Miihsh kiinankiinowa' wiiwa' aasha kaakiih tahshinitc. Osayensan tahsh Niipeyoht (Nebaioth) kii‑ishinihkaasowan. Ishmeyal iitok Eparahaaman (Abraham) kiiotete.
Cekap Opawaacikan Ehtashintenik
10Cekap (Jacob) tahsh i'imaa Piiarshiipa (Beersheba) kiionci maacaa ekii ishaatc weti Heran (Haran) ootenaank. 11Kiiani takohshin tahsh weti kapehshiwinink kaakiih kihtentaakwaninik eani pankihshimonitc kiisihsoon. Miitahsh i'imaa kaaishi kapehshitc ekii nipaatc. Ahsiniin tahsh peshik okii otaahpinaan ekii ahpihkwehshimotc ekii anwehshink. 12#Jhn 1.51. Miitahsh o'o kaaishi pawaaciketc; okii waapantaan inaantawaan o'omaa ahkiink ekii onci maaciiyaahkwakootenik piinihsh weti kihci kiishikonk ekii otihtaahkwakootenik. Miitahsh i'imaa inaantawaanink, Kishemanitoo otencalimini kaaishi ayahkwaantawenitc, kaaishi naaniihsaantawenitc kaye. 13#Gen 13.14,15. Inashke tahsh kaaTipenciketc kiiniipawi wakicaya'ii inaantawaanink ekii'ikotc, “Niin kaaTipenciketc, kaaoKishemanitoomitc Eparahaam (Abraham), kaaoKishemanitoomitc kaye Aaisik (Isaac). I'imaa hsa ahkiink kaashi pimihshinan, mii hsa 'i kaawii miininaan, iki kaye kipiiwesiimak. 14#Gen 12.3; 22.18. Iki hsa kipiiwesiimak aahpici tapaahtiinowak, citahshiwaatc taapishkoo kekoon kaapaashkinehsek o'omaa ahkiink. Misiwe hsa tashi misihteshkaawak, ninkaapii'anonk inahke, waapanonk kaye inahke, kiiwetinonk inahke, shaawanonk kaye inahke. Kiin hsa kaye kipiiwesiimak onci taonci shawentaakosiwak kahkina entahswewaanakisiwaatc pemaatisiwaatc. 15Ishi maamihkawin, niin kika wiiciiwin, kika kanawenimin kaye aanti piko eshaayan. Kika pikiiwewinin kaye o'omaa ahkiink, kaawiin kika nakanihsinoon. Kahkina hsa ninka ishihcike kaashi ahshotamawinaan,” okii'ikoon.
16Cekap tahsh kiihkoshkosi ekii ihkitotc, “Kekeht hsa kaaTipenciketc o'omaa ayaatok, kaawiin tahsh ninkiih kihkentansiin,” kii‑ihkito. 17Aahpici tahsh kiihsekisi ekii ihkitotc, “Aahpici o'omaa kohtaanentaakwan, miimaawiin o'oweni Kishemanitoo otaawin. Miimaawiin o'omaa eshi ishkwaantemiwank kihcikiishik,” kii‑ihkito.
18Cekap tahsh wiipa kikishep kiiwanishkaa, ekii otaahpinaatc ahsiniin kaakii ahpihkwehshimotc ekiih patahkinaatc ekii kihkinawaataapihkinikaaketc, miitahsh kaaishi siikinank aalip (olive) pimitewaapooni i'imaa wakicaya'ii. 19Miitahsh kaaishi wiintank i'imaa kaakii ishi'ayaatc ekii ishinihkaatank Pehtal (Bethel). I'i tahsh ootenaani Laas (Luz) kii‑ishinihkaatenikopan. 20Cekap tahsh kii‑ishi ahpimo ekii ihkitotc, “Kiishpin Kishemanitoo wiiciiwitc, kanawenimitc kaye o'omaa kaapimi ayaawak, miishitc miicim kemiiciwak, kikishkikanan kaye kekikishkamowak, 21weweni kaye naanaakaci'itc piinihsh ani ashe kiiwewak weti ninteten kaashi ayaanitc, miitahsh i'i kaaTipenciketc cioKishemanitoomiyaan. 22I'imaa tahsh kaakii ishi kihkinawaataapihkihshimak a'a ahsin, mii hsa imaa ketashi anami'ehtawak Kishemanitoo, ninka onci miinaa kaye peshik kekoonini entahso mitaahso kahkina kekoon kaamiishitc,”#28.22 Ninka onci miinaa kaye peshik kekoonini entahso mitaahso kahkina kekoon kaamiishitc: Mii 'owe kaaonci tootamank enihsitawinamank kaaTipenciketc eKishemanitoowitc shikwa kaye ekihciokimaawitc. kii‑ihkito.
अहिले सेलेक्ट गरिएको:
Cenisihs 28: OJBR
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Ojibwe Shorter Bible (Roman Script) © 2008 Canadian Bible Society