Luk 17
17
I kgebe di salà
(Matyu 18:6-7, 21-22; Mark 9:42)
1Kafnge én, talù Dyisas di dad mlalò kenen, manan, “Too glut nun dee kel gamgebe i dad to di salà, bay magakdo i to gumdà i dademela dad to gamsalà, du too kenen fanlayam kadang. 2Fye fa ku mgikat i lialan i bong giling batu, na bat kenen di mahin, di laan fa mgebe di salà balù satu di dad to mdanà. 3Taman too gamu fgeye!
“Ku gamsalà i dademem, nngakam, na ku msal kenen, nlifetam i salaan. 4Balù ku fitu dulê kenen gamsalà di ge di sduh, na ku fitu dulê salu di ge, na manan, ‘Msal agu di salàgu di ge, begam nlifet,’ na nlifetam sa.”
I bong gnagan i tukay kafaglut
5Na talù i dad galan dek di ku Dyisas, manla, “Amu, tananuam i kafaglutmi.” 6Na man i Amu, “Balù ku tukay i kafaglutyu salngad kalbong i satu too tukay bnê mustasa, gaganyu man di bong kayu ani, ‘Magdot ge, na tmabò ge ditù di mahin!’ na nimenan gamu sa.”
I nimò i dad lifan
7Fadlug Dyisas talù, manan, “Ku nun satu di gamu nun lifanan dmaru ku demen mifat i bilibili, na ku kel kenen fdu di gumimoan, tan i manyu di kenen? Nlakam kenen kè gasil sudeng na kmaan? Là. 8Én galyu man di kenen, ‘Mimò ge knaangu flabi, na mili ge du munung deg klogu kmaan na minum, na kafnge én, ge nan kmaan na minum.’ 9Mlé gamu fye dé di lifanyu, du nimenan i dad dekyu? Là sa, du én i kenen nimò. 10Salngad én gamu, ku tagimòyu i kdee dek Dwata gamu, manyu, ‘Gami dad lifan too mdanà, na alò én nimòmi i gami alel nimò.’ ”
I sfalò to tanfig fangulê Dyisas
11Na di kagu Dyisas salu di Dyérusalém magu kenen di bleng i dad banwe Samériya na Galili. 12Na di kakelan di satu banwe, nun sfalò lagi tanfig smitong kenen, bay tadag ale di gumawagan, 13na tamlo ale, manla, “E Dyisas, Amu, begam gami kando!”
14Na di kite Dyisas dale, manan, “Mdà gamu. Fiteyu i lawehyu di dad bà di Dwata.”
Na di dalanla salu ditù, tamgulê ale.
15Na di kite i satu tamgulê kenen, samfulê kenen di ku Dyisas, na toon falbong i taluan dmayen Dwata. 16Na lkuad kenen di muna Dyisas du too mlé fye di kenen. Na lagi ani ise kenen Dyu, bay to mdà di Samériya.
17Na man Dyisas, “Sfalò lagi tamgulê. Tanè i syem? 18Landè dademe dé samfulê dmayen Dwata, alò i to ani mdà di mahal banwe?” 19Na talù Dyisas di to én, manan, “Tadag ge na fles ge. Mdà di kafaglutam tamgulê ge.”
I kakel i kagot Dwata
(Matyu 24:23-28, 37-41)
20Na nun dad Farisi smalek ku Dyisas kilen i kakel i kagot Dwata. Tmimel Dyisas, manan, “I kakel kagot Dwata, laito teen dun, 21na landè to fakay mangman, ‘Neyeyu tadini kagot Dwata,’ ku demen ‘E tadéén sa,’ du i kagot Dwata déén di lam nawa i dad to.”
22Na kafnge én, talù Dyisas di dad mlalò kenen, manan, “Nun duh kadang, tooyu kayè ku teenyu i kasfulêgu, agu i dnagit Tingà To, bay là, du ise fa bangan. 23Na nun dad to kadang, manla di gamu, ‘Neyeyu ditù kenen,’ ku demen, ‘Dini kenen,’ bay nangyu ale lalò, 24du i kasfulêgu, agu i dnagit Tingà To, gambet i silà magtuyal i klamang langit mdà di gusut i duh kel di gusdafan. 25Kabay di là fa kel i duh atù, funagu tnayud i dee kaflayam na knagol agu i dad to di bang ani.
26“I kagkah i dad to di kasfulê i dnagit Tingà To, salngad i kagkah dad to di bang Nowa. 27Kmaan ale na minum, na mwè yaan, na fwèla yaan dad ngàla kel di duh kfusuk Nowa di bong awengan. Na kel i dunuk mlimas i kdee dad to di bang én.
28“Salngad kagkah i dad to di bang Lat. Fadlug ale kmaan, minum, sbayad, mla, na fdak dad gumnè, 29bay di duh ktagak Lat i banwe Sodom, i kdee dad to gtagak déén mti mati mdà di kfulen Dwata i lifoh na sandawà mdà di langit.
30“Gambet ani kagkah i dad to kadang di kasfulêgu, agu i dnagit Tingà To. 31Di duh én, ku nun to déén di lwà, nang fusuk di gumnean du mwè i knunan. Na i to mimò di nligon, fye ku nang kenen mulê. 32Fandamyu i mkel di yaan Lat, du mbaling kenen kahì di kfaléan di banwe tnagakla. 33I dad to fabtas i nawala, knean mati. Kabay i dad to fabtas i klalòla deg balù mati, nun nawala landè sen. 34Tulengu gamu, di butang kakelgu kadang, nun lwe to sadfél milè, na satu nwè, bay satu mtagak. 35Nun lwe libun gmiling, na satu nwè, bay satu mtagak. ( 36Nun lwe to di nligo, na satu nwè, bay satu mtagak.)”
37Na smalek i dad gal mlalò kenen, manla, “Amu, tanè gumgimò ani?”
Na tmimel Dyisas fagu di fléd, manan, “Ku nè gugilè i mati, déén sa gustifun i dad wak du knaanla.”
अहिले सेलेक्ट गरिएको:
Luk 17: ITD
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2014, Wycliffe Bible Translators, Inc. All rights reserved.