Luk 22
22
I dad to mngabal kfagu mati ku Dyisas
(Matyu 26:1-5; Mark 14:1-2; Dyan 11:45-53)
1Di bang én, mdadong nan i fista dnagit Duh Kaglius, dunan gal kakaan dad Dyu i fan landè falnok. 2Na i dad ulu i dad bà di Dwata na i dad tamdò i flalò blé Dwata fagu di ku Mosis, mngabal ale kfagu mati ku Dyisas di landè to gmadè dun du likò ale i dad to.
I nimò Dyudas
(Matyu 26:14-16; Mark 14:10-11)
3Di bang ani, fusuk Satanas di nawa satu di dad sfalò lwe gal mlalò ku Dyisas dnagit ku Dyudas Iskariyot. 4Na salu kenen di dad ulu i dad bà di Dwata na i dad ganlal gal mantay i Bong Gumnè Dwata du stulen ku tan i kiboan mangkal ku Dyisas. 5Na too ale lehew, na makang ale mlé filak di ku Dyudas. 6Na mayè kenen tmabeng dale, na tambù kenen mngabal kfagu mlé ku Dyisas di agotla di là dee to mite dun.
I sangal kakaan ale Dyisas di Duh Kaglius
(Matyu 26:17-25; Mark 14:12-21; Dyan 13:21-30)
7Na takel nan i duh i Fista i Kakaan Fan Landè Falnok Dun, i duh ktatêla i tingà bilibili galla uten kifu di Duh Kaglius. 8Taman dek Dyisas ale Fiter na Dyan, manan, “Mdà gamu. Fatlagadyu i kakaanito di Duh Kaglius.”
9Na snalekla kenen, manla, “Nè kayeam gufatlagadmi dun?”
10Na manan, “Salu gamu di syudad, na di kfusukyu nun gsitongyu lagi déén mebe i namu nun yéél. Lalòyu kenen di gumnè gumyakan. 11Na manyu di to mfun i gumnè, ‘Nun snalek i To Tamdò ku tanè i sibay fakay gukmaanan di flabi Duh Kaglius deme i dad gal mlalò kenen.’ 12Na tdoan gamu kadang satu bong sibay di tah, na kdee klidùyu déén. Na déén gufatlagadyu knaanito.”
13Na salu i lwe dek Dyisas ditù, na kdee i manan gdohò. Na fnatlagadla i knaan Duh Kaglius.
I kfafaldam Dyisas i kfatin fagu di fan na ninum
(Matyu 26:26-30; Mark 14:22-26; 1 Korintu 11:23-25)
14Kakel i bangan, sudeng Dyisas na i dad galan dek du kmaan. 15Na man Dyisas di dale, “Too mdà di nawagu kmaan di safédyu i knaan di Duh Kaglius ani, di làgu fa magu di kaflayam, 16du tulengu gamu i kaglutan, talà agu lêman makuf di kakaan i Duh Kaglius, silang ku tagdohò i gumtatekan di kagot Dwata.”
17Kafnge én, nwean i ninum, na dmasal mlé fye di Dwata, na manan di dademen, “Nwèyu ani na sansinumyu. 18Tulengu gamu, silang agu lêman minum i ninum#22:18 I ninum ani dunan satu bung binu nimò mdà di yéél i bunge grép. ani, ku takel i kagot Dwata.”
19Na nwean i fan, na mlé fye di Dwata, na snatngaan, na blén di dad to gal mlalò kenen, manan, “Ani i lawehgu blégu di fati duenan gamu. Galyu knaan gambet ani du fye gufaldamyu deg.”
20Na salngad i ninum kafngela kmaan, manan, “Ninum ani, ilè i falami dalan#22:20 Satu kubad i talù ani, dunan: i falami kasfakang. tanimò Dwata salu di kenen fagu di litègu fafalohgu duenan gamu.
21“Kabay neyeyu i to mangkal deg, sudeng dini di gukmaanito ani. 22Too glut, agu i dnagit Tingà To, salu di fati fagu di knayè Dwata, bay magakdo kadang i to mangkal deg.”
23Na tambù ale sasalek ku simto di dale i fan mangkal kenen.
I kasdal gablà ku simto i too mdatah
24Na baling sbulaw i dad gal mlalò ku Dyisas ku simto di dale i mdatah. 25Na man Dyisas di dale, “I dad harì dini di tah tanà, toola bankut i dad to mdanà di dale, bay knean kayè i dad ganlal ani ku én gal katlo i dad to dale, dunan i dad gal tmabeng.#22:25 Satu kubad ani mdà di talù Grik, dunan: bay knean én gal katlo dale dunan i dad to gal guftabeng. 26Kabay ise én i fye nimòyu gamu, bay én fye nimòyu, ku simto i mdatah di gamu, fye ku too kenen fdanà, na ku simto nun glal, fye ku fkahan di nawan ktabengan i dademen. 27Simto i too mdatah, i to sudeng du kmaan, ku demen i to malel i knaanan? I tagnè mdatah, i to sudeng, bay agu i amuyu, fdanàgu i ktogu tmabeng gamu.
28“Gamu sa i tagnè magin deg di dad tilew gnagugu, 29na i Màgu, banlén agu glal magot, na salngad én, banléta gamu glal magot, 30du fye kmaan gamu na minum gamu di safédgu kadang di kagotgu, na sudeng gamu di gusudeng i dad ganlal du nukumyu dad bel i sfalò lwe dad ngà Israél.”
I kafgadè Dyisas i kbalew Fiter
(Matyu 26:31-35; Mark 14:27-31; Dyan 13:36-38)
31Na man Dyisas di ku Simon Fiter, “E Simon, tambal Satanas du kayean too gamu tnilew du neye ku simto di gamu landè kafaglut di deg.#22:31 Satu kubad ani dunan: tambal Satanas du kayean gamu tnaaf salngad i fali. 32Kabay tadmasal agu ge, Simon, fye là fisan i kafaglutam. Na ku tasamfulê ge di deg, tangalam nawa i dad flanekam.”
33Na man Fiter, “Amu, tagatlagad agu magin ge balù bnilanggù agu demen fnati.”
34Na man Dyisas, “Tulenta ge, Fiter, di là fa kamleet i anuk butang ani, tmulen ge tlu dulê i laam agu dilè.”
35Kafnge én, snalek Dyisas i kdeela, manan, “Di muna di kdekgu gamu i landè nebeyu filak ku demen kuyut, na landè tlas talumfà, nun kè gukulangyu?”
Na manla, “Landè sa!”
36Na manan, “Kabay ani tamahal, du ku nun filakyu, nebeyu, na nebeyu kuyut. Na ku landè sundang satu di gamu, fye ku fablin saulan tahà sigal fye nun bayadan dun, du ani bang i kalimayu.#22:36 Neye 22:49-50 37Du tulengu gamu, gdohò gsulat di Tnalù Dwata gablà di deg, manan, ‘Fakufla kenen di dad to gamsalà,’ du là fakay ku là gdohò i tagsulat gablà di deg ani.”
38Na man i dad gal mlalò kenen, “Amu, neyem, talwe sundangmi.” Na man Dyisas di dale, “Tong nan.”
I kdasal Dyisas di Gétsémani
(Matyu 26:36-46; Mark 14:32-42)
39Na mdà Dyisas salu di bulul dnagit Olib, salngad i tagnè galan nimò. Na magin kenen i dad gal mlalò kenen. 40Kakella déén, manan dale, “Dmasal gamu, du fye là gamu gfisan di tilew.”
41Na fawag Dyisas di dale i kawag gnumah tnudà batu, na lkuad kenen du dmasal, 42manan, “E Mà, ku fakay di ge nweam di deg i kaflayam fangu nagu ani. Kabay nimoam i ge knayè, ise deg.” 43Na nun kasaligan mdà di langit msut di kenen du tamgal i nawan. 44Na too sè kliduan, taman too kenen fgal dmasal. Na i tun mbaling gambet malbang tdak i litè tamdak di tanà.
45Di ktadagan kafngen dmasal, samfulê kenen di dad gal mlalò kenen faginan gine, na teenan ale kudang, du too ale mlungay mdà di bong klidùla. 46Na snalek ale Dyisas, manan, “Tan duenyu kudang? Mték gamu na dmasal, du fye là gamu gfisan i tilew.”
I kakfè ku Dyisas
(Matyu 26:47-56; Mark 14:43-50; Dyan 18:3-11)
47Di laman fa talù, nun kel dee dad to. Na i mebe dale, dunan Dyudas, satu di dad sfalò lwe gal mlalò ku Dyisas. Fdadong kenen du nalakan i baweh Dyisas. 48Kabay man Dyisas di kenen, “Dyudas, nangkalam kè i Tingà To fagu di alak?”
49Na i dad to magin ku Dyisas, kantola teen i fan kel, manla, “Amu, nun sa sundangmi. Mayè ge ku tnibemi ale?”
50Na satu di dale, tniben i lifan i gumdatah dad bà di Dwata, na masfek i bali klingen gsen di kwanan. 51Kabay man Dyisas, “Tong nan!” Na nagotan klinge i lifan, na fanguléan.
52Kafnge én, talù Dyisas di dad to fan kamfè kenen, dunan dad ulu i dad bà di Dwata, dad ganlal gal mantay i Bong Gumnè Dwata, na dad tua gal mebe i dad Dyu, na manan, “Kan, to tmaku agu kè, du mebe gamu sundang na bunal di kakfèyu deg? 53Klit duh déén agu di safédyu di Bong Gumnè Dwata, na làyu agu kanfè. Kabay ani sa i bang faloh di gamu dmohò i knayè Satanas, i ulu magot i gukmifun.”
I kbalew Fiter
(Matyu 26:57-58, 69-75; Mark 14:53-54, 66-72; Dyan 18:12-18, 25-27)
54Kmanan ani, kanfèla Dyisas, na nebela kenen salu di gumnè i gumdatah i dad bà di Dwata. Na mlalò Fiter dale, bay fawag di fulé. 55Kakella ditù mto i dad mantay i lifoh di gutngà nasel i gumnè. Na Fiter fasbool di dad to sudeng samlibut i lifoh. 56Na nun satu libun gal dek i gumdatah i dad bà di Dwata, teenan Fiter sudeng déén du magtuyal kenen i dinè lifoh. Na toon kenen neye, na manan, “I to ani satu gal magin ku Dyisas!”
57Kabay malew Fiter, manan, “Libun, làgu kenen dilè.”
58Na di là mlo, lêman nun to dmilè kenen, na manan, “Ge i satu dademen!”
Kabay man Fiter, “Ise deg sa.”
59Kafnge én, nun kè satu uras i klon nun lêman satu to talù, manan, “Too sa, i to ani gal magin ku Dyisas du mdà kenen di Galili.”
60Kabay tmimel Fiter, manan, “Làgu gadè i manam.”
Na di slengan talù, kamleet i anuk. 61Na falê Dyisas meye di ku Fiter, na gafaldam Fiter i gman Dyisas, “Di là fa kamleet i anuk kadang butang ani, tatmulen ge tlu dulê laam agu dilè.” 62Na taman lamwà kenen na too mngel.
63Na i dad to mantay ku Dyisas, toola kenen snilo na fatduk. 64Na snafangla i matan, na manla, “Manam sa kun, ku simto smamfak ge.” 65Na dee fa dademe sasè manla di kafyàla kenen.
I kebe ku Dyisas di muna i dad ganlal i dad Dyu
(Matyu 26:59-66; Mark 14:55-64; Dyan 18:19-24)
66Na di kwalan, stifun i dad tua gal mebe i dad Dyu, mdà di dad ulu i dad bà di Dwata, na i dad tamdò i dad flalò blé Dwata fagu di ku Mosis, na nebela Dyisas di munala. 67Na manla, “Ku ge Krayst, i Mgalék Dwata, tulenam gami.”
Kabay manan di dale, “Balù ku tulengu gamu, knean là gamu faglut. 68Na ku snalekgu gamu, làyu agu tnimel. 69Kabay mdà ani, agu i dnagit Tingà To, déén gusudenggu di kwanan i mdatah ganlal, Dwata Too Mtulus.” 70Na smalek kdeela, manla, “Tay, Tingà ge Dwata kè?”
Na tmimel kenen, manan, “Tagmanyu sa.”
71Na manla, “Landè kamuito smalek i dademe to gablà di salaan, du talingeito i manan!”
अहिले सेलेक्ट गरिएको:
Luk 22: ITD
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2014, Wycliffe Bible Translators, Inc. All rights reserved.