Awatokua 21
21
Paul ague na Jérusalem
1So e na ala, e kangbi tere awe, e mu mangboko si e hon, e gue mbirimbiri na zoa ti Kos; lango oko na pekoni, e si na zoa ti Rode, e londo na Rode, e gue na gbata ti Patara. 2Kâ, e wara mbeni mangboko so ayeke gue na Fenisii; e ko na ya ni si e hon. 3E si nduru na zoa ti Shipre; e ngba na ya ti mangboko si e yeke baa zoa ni. E zia ni si e sua na mbage ti Mbongo ti gue na sese ti Sirii. E gue, e si na yanga ti ngu ti gbata ti Tir, ngbanga ti so mangboko ni aye ti zia kâ akungba so lo yo ni. 4E wara adisiple kâ si e na ala, e duti na ya ti yenga oko. Yingo-Vuru apusu ala ti tene na Paul ti gue na Jérusalem pepe. 5Me so lango ti e na ndo so ahunzi awe, e londo ti hon. Adisiple ni kue, ala na awali ti ala na amolenge ti ala ague, azia e na lege ngbii asi na yanga ti gbata ni. E kuku na yanga ti kota ngu-ingo ni si e sambela. 6Na peko ti so e kue, e bara tere awe, e ko na ya ti mangboko; ti ala, ala kiri na ndo ti ala. 7Na peko ti so e londo na Tir, tanga ti tambula ti e na le ti kota ngu-ingo ahunzi gi na gbata ti Petolemais. Kâ, e bara a-ita si e na ala e sara lango oko. 8 Na ndade ni, e kiri e hon, e tambula si e si na gbata ti Sezare. So e si kâ, e gue, e lango na da ti Philippe, zo ti fango Nzoni Tënë ti Christ. Lo yeke mbeni oko na popo ti azo mbarambara so a soro ala lani na Jérusalem. 9Lo yeke na amaseka-wali osio so ade ti mu koli pepe, ala yeke tene peko ti tënë ti yanga ti Nzapa. 10 So e sara lango mingi na ndo so, mbeni wayanga-Nzapa so iri ti lo Agabus alondo na Judée aga. 11Lo ga ti baa e. Lo mu kamba ti ndö ti bongo ti Paul, lo kanga gere ti lo na maboko ti lo na ni si lo tene: “Ala ma tënë so Yingo-Vuru atene: fade azuife ayeke kanga wa ti kamba so tongaso na Jérusalem si ala yeke zia lo na maboko ti azo so ahinga Nzapa pepe.” 12So e ma tënë so, e na a-ita, azo ti Christ ti Sezare, e voro Paul titene lo gue na Jérusalem pepe. 13Me lo kiri tënë, lo tene: “Ngbanga ti nyen laa ala yeke toto si ala yeke gi lege ti zi nzara ti tambula ni na be ti mbi so? Mbi yeke ti mbi nduru gi titene a kanga mbi pepe, me titene a fâ mbi na Jérusalem ndali ti iri ti *Kota Gbia Jésus!” 14So e ha lo gbaa titene lo ngba, e zia lo si e tene: “Ayeke nzoni Kota Gbia asara ye so be ti lo aye!”
15Na peko ti alango ni so, e leke tere ti e si e gue na Jérusalem. 16Ambeni disiple ti Sezare azia e na lege. Ala gue na e na ndo ti mbeni zo so iri ti lo Manason titene e lango na da ti lo; lo yeke zo ti Shipre si lo ga disiple aninga awe.
Paul ague ti baa Jacques
17So e si na Jérusalem awe, a-ita, azo ti Christ ayamba e na ngia. 18Na ndade ni, Paul ague na e na ndo ti Jacques. *Akangba ti *Eglize kue abongbi kâ. 19Paul abara ala si lo fa na ala na yanga ni, na yanga ni aye so Nzapa asara na lege ti lo na popo ti azo ti amara nde. 20So ala ma tënë ti lo awe, ala gonda Nzapa. Na pekoni, ala tene na Paul: “Ita, mo baa, azuife saki na saki ama na be si ala mu be ti ala kue ti bata *Ndia ti Moïse. 21Ambeni zo atene na ala, atene: mo yeke fa na azuife so ayeke na popo ti ambeni mara nde titene ala zia lege ti ye so Moïse afa. Mo tene nga na ala, mo tene, ala fâ amolenge ti ala na *ganza pepe si ala zia ti sara aye ti akotara ti azuife. 22Fade e yeke sara tongana nyen? Gbaa ala yeke ma ande atene, mo si ge awe. 23 Ayeke nzoni mo sara ye so e yeke hunda na mo: e yeke na azo osio ge so adeba yanga ti ala. 24Mu ala, mo gue na ala si mo na ala *asukula asioni ti ala, mo futa aye kue ndali ti ala, na pekoni ala lingbi ti kio kua ti li ti ala. Tongaso, fade azo kue ayeke hinga atene, atënë so azo atene na iri ti mo so ayeke taa-tënë pepe, me mo nga, mo yeke bata ndia ti Moïse. 25 Ti azo so ayeke azo ti amara nde si ala ma na be so, e tokua mbeti na ala awe. E fa na ala tënë so e leke: nyama so a ya na *sandaga na anzapa nde, ala te ni pepe, ala te mene pepe; anyama so a pete go ti ala petengo si ala kui so, ala te ni pepe, ala gi wali wala koli kirikiri pepe.”
26Tongaso Paul amu azo osio so si lo na ala ague ti sukula sioni na tere ti ala. Lango oko na pekoni, lo gue na ya ti kota da ti Nzapa si lo fa na azo lango so sukulango sioni ni ayeke hunzi na ni, so ti tene lango ti mungo sandaga na Nzapa ndali ti ala oko oko.
A gbu Paul na ya ti kota da ti Nzapa
27So lango mbarambara ni aga nduru ti hunzi awe, ambeni zuife ti sese ti Azii abaa Paul na ya ti kota da ti Nzapa. Ala pusu gba ti azo ti sara wusuwusu, ala gbu lo. 28Ala dekongo: “Azo ti Israel, ala ga hio si-oo! Lo laa, koli so ayeke fa ye na azo na ndo kue si fango ye ti lo ni ake azo ti Israel, ake *Ndia ti Moïse nga na kota da ti Nzapa so! Fadeso lo mu azo ti amara nde, lo li na ala na ya ti kota da ti Nzapa si lo sara titene da ni aga *sioni!” 29 Ala tene tënë so, ngbanga ti so ala baa Trofime, zo ti Efeze na tere ti Paul na ya ti gbata ni; ala baa ti ala atene, Paul ali na lo na ya ti kota da ti Nzapa ni awe.
30Wusuwusu amu ya ti gbata ni kue si gba ti azo alondo na ando nde nde akpe aga. Ala gbu Paul, agboto lo, asigigi na lo si ala kanga yanga ti da ni hio. 31Ala yeke gi lege ti fâ Paul, me tënë ti wusuwusu ni amu ya ti Jérusalem kue si ati na mê ti kota komanda ti aturugu ti Rome. 32Hio, lo mu ambeni kapita ti aturugu na ambeni turugu si ala kpe ague na tere ti azo ni. So ala baa kota komanda ti aturugu ni na aturugu ni, ala zia lege ti pikango Paul. 33Tongaso kota komanda ti aturugu ni ague nduru na tere ti Paul, lo mu yanga titene ala gbu lo, akanga lo na zingiri use. Na pekoni, lo hunda azo ni, lo tene: “Lo yeke zo wa? Nyen laa lo sara?” 34Me na popo ti azo ni, ambeni ayeke dekongo si ayeke tene ge nde, ambeni ayeke tene ti ala kâ nde. So wusuwusu ahon ndoni, lege titene kota komanda ti aturugu ni ahinga so mbirimbiri tënë ayeke daa pepe, lo mu yanga titene a mu Paul, ague na lo na ya ti gbagba ti aturugu. 35Na ndembe so Paul na ala asi na eskalie, aturugu ni ayo lo na nduzu, ngbanga ti so gba ti azo ayeke sara pasi na lo. 36Biani, azo ni kue amu peko ti lo si ala yeke dekongo, atene: “Fâ lo!”
Paul afa nda ti tënë ti lo
37So ala ye ti li na Paul na ya ti gbagba ni, lo tene na kota komanda ti aturugu ni, lo tene: “Lege ayeke daa titene mbi tene mbeni tënë na mo?” Kota komanda ni ahunda lo: “Mo hinga ti tene yanga ti greke? 38Mo, zo ti Ezipte so apusu azo ti sara wusuwusu biri biri si na pekoni mo mu azo ti fango zo saki osio, mo gue na ala na benyama so, mo laa pepe?” 39Paul akiri tënë, atene: “Mbi yeke zuife, a du mbi na Tarse, na sese ti Silisii. Mbi yeke zo ti mbeni kota gbata. Mbi gbu gere ti mo, mu na mbi lege ti tene tënë na azo ni.” 40Kota komanda ti aturugu ni ayeda. Paul aluti na ndö ti eskalie ni si lo sara maboko ti lo na azo ni, azo ni kue akai si ndo ade. Tongaso Paul atene na ala na yanga ti *arameen, atene:
अहिले सेलेक्ट गरिएको:
Awatokua 21: MNF2010
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© La Société Biblique de Centrafrique 2010