Awatokua 4
4
Pierre na Jean na gbe ti azo ti Kota Bongbi ti Fango Ngbanga
1Na ndembe so Pierre na Jean angba ti tene tënë na azo ni, awayango-sandaga na makonzi ti aturugu ti kota da ti Nzapa na *asadusien asi. 2Be ti ala aso mingi, ngbanga ti so Pierre na Jean ayeke fa ye na azo atene, Jésus azingo na kuâ awe. Tongaso, fade azo ayeke zingo nga na kuâ. 3Azo ni agbu ala, azia ala na da ti kanga ti ku na ndaperere, ngbanga ti so lâ akui awe. 4Me na popo ti azo so ama tënë ni, ambeni mingi ama na be si wungo ti azo ni aga nduru na saki oku.
5So ndo ahan awe, amakonzi ti azuife, *akangba na awafango-ndia abongbi tere na Jérusalem. 6Kota wayango-sandaga Hane ayeke daa, lo na Kaife, Jean, Alexandre na ambeni zo ti sewa ti kota wayango-sandaga ni. 7Ala zia *awatokua ni aluti na dawa ti ala si ala hunda ala, atene: “Na iri ti zo wa, wala na ngangu ti zo wa laa ala sara ye so?” 8Tongaso Yingo-Vuru asi Pierre si lo tene na ala: “Ala amakonzi ti azuife na akangba, 9a yeke hunda e laso ndali ti nzoni ye so e sara na koli so gere ti lo abuba, a yeke hunda nga e na lege so tere ti lo aga nzoni. 10Ala na azo ti Israel kue, alingbi ala hinga atene, Jésus Christ, zo ti Nazaret, lo so ala fâ lo na ndö ti keke ti kroa si Nzapa azingo lo na kuâ, ngangu ti iri ti lo laa asara si koli so aluti na popo ti ala na nzoni tere so. 11 Jésus so laa Mbeti ti Nzapa atene tënë ti lo, atene:
‘Têne so azo ti sarango da ake ni,
ni laa akiri aga ngangu têne ti gere ti da ni.’
12Zo alingbi ti soo kuâ na lege ti mbeni iri nde pepe, ngbanga ti so na ndö ti dunia kue, mbeni iri nde so Nzapa amu ni na azo titene e soo kuâ na lege ni ayeke daa pepe.”
13So azo ti fango ngbanga ni abaa Pierre na Jean ayeke tene tënë na mbeto pepe si ala hinga nga atene, ala yeke gi asenge zo so amanda mbeti pepe, li ti ala kue akpe. Ala hinga atene, akoli so ayeke ando na tere ti Jésus. 14So ala baa nga koli so gere ti lo aga nzoni, lo yeke luti na tere ti Pierre na Jean, ala wara mbeni tënë ti tene pepe. 15Tongaso azo ni amu yanga titene a sigigi na ala na ya ti *Kota Bongbi ti Fango Ngbanga ni. Na pekoni, azo ni ato nda ti leke tënë na popo ti ala, 16ala tene: “Fade e yeke sara nyen na azo so? Azo ti Jérusalem kue ahinga atene, na lege ti ala laa ye ti kpene so asi, e lingbi ti bere ni pepe. 17Me titene tënë so ahon yongoro na popo ti azo pepe, alingbi e suku na akoli so si ala kiri atene tënë ti iri ti Jésus na mbeni zo oko pepe.”
18Tongaso ala iri Pierre na Jean si ala ke na ala na kuru go, atene: “Ala kiri adi iri ti Jésus wala ala kiri afa ye na iri ti lo oko pepe.” 19Me Pierre na Jean akiri tënë na ala: “Ti ma yanga ti ala wala ti ma yanga ti Nzapa, so wa laa ayeke nzoni? Ala wani, ala gbu li ti ala na tënë so! 20Ti e, ye so e baa si e ma awe so, e lingbi ti kanga yanga ti e na ndö ni pepe.” 21Tongaso azo ti fango ngbanga ni akiri asuku na ala ngangu si na pekoni, ala zi ala. Ala baa so lege ti fâ ngbanga na li ti ala ayeke daa pepe, ngbanga ti so azo kue ayeke gonda Nzapa ndali ti ye so asi. 22Koli so tere ti lo aga nzoni na lege ti ye ti kpene so, ngu ti lo ahon baleosio.
Azo ti Jésus asambela Nzapa
23Na peko ti so a zi ala awe, Pierre na Jean akiri na popo ti amba ti ala si ala fa peko ti tënë so akota wayango-sandaga na *akangba atene na ala. 24 So amba ti ala ama tënë so, ala bongbi yanga oko si ala sambela Nzapa, atene: “Gbia, mo laa mo sara yayu na sese, kota ngu-ingo na aye so kue ayeke na ya ni! 25 Na lege ti Yingo-Vuru, mo zia tënë ti mo na yanga ti kotara ti e David, zo ti kua ti mo si lo tene:
‘Ngbanga ti nyen si amara nde
ayeke sara wusuwusu so?
Ngbanga ti nyen si azo ti amara
ayeke leke tënë na popo ti ala senge senge so?
26Agbia ti sese alondo ti tiri bira,
amakonzi ti akodro ama tere
ti ke *Kota Gbia na *Mesii ti lo.’
27 “Biani, Herode na Ponse Pilate, ala na azo ti amara nde na azo ti Israel abongbi tere na ya ti gbata so, ala leke tënë na tere ti Jésus, zo ti kua ti mo so ayeke nde si ayeke nzoni kue so, lo so mo mu lo ti ga Mesii. 28Tongaso ala sara ye so kue mo leke kozoni na be ti mo na lege ti ngangu ti mo. 29Fadeso, Kota Gbia, mo ma atënë so ala tene ti zia mbeto na be ti e. Mo mu na e ngangu ti fa tënë ti mo na mbeto pepe. 30Fa ngangu ti mo, tongaso si na iri ti Jésus, zo ti kua ti mo so ayeke nde si ayeke nzoni kue, kobela ti azo akai si aye ti kpene na aye ti dongo be aduti daa.” 31So ala hunzi sambela ni awe, ndo so ala bongbi daa so ayingi. Ala si na Yingo-Vuru si ala yeke fa tënë ti Nzapa na mbeto pepe.
Azo ti Jésus akangbi ye ti ala na popo ti ala
32 Azo so ama na be gbani gbani so, tënë ti be ti ala ayeke gi oko, ye so ala ye ayeke nga gi oko. Zo oko atene pepe, atene: “Ye ti mbi ayeke gi ti mbi!” Me ye so kue ala yeke na ni, ala yeke bongbi ni si aga ye ti ala kue. 33*Awatokua afa na ngangu mingi tënë ti zingongo ti *Kota Gbia Jésus na kuâ, Nzapa asara nzoni be mingi na ala kue. 34Zo ti mawa oko ayeke na popo ti ala pepe. Biani, azo so ayeke na yaka wala na da, ala ka yaka ni wala da ni si ala ga na nginza ni, 35ala zia ni na gbe ti awatokua. Na pekoni, awatokua akangbi nginza ni na popo ti azo ni, zo oko oko awara ye alingbi na ye so atia lo. 36Mbeni koli ayeke daa so iri ti lo Joseph, awatokua airi lo Barnabas – nda ni atene “wamungo-wango” –, lo yeke mbeni zo ti mara ti Lévi si a du lo na Shipre. 37Lo ka mbeni yaka ti lo, lo ga na nginza ni si lo zia na gbe ti awatokua.
अहिले सेलेक्ट गरिएको:
Awatokua 4: MNF2010
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© La Société Biblique de Centrafrique 2010