Luc 18
18
Toli ti wali-mua na wafango-ngbanga
1Jésus atene na ala mbeni toli ti fa na ala atene, ayeke nzoni ala sambela lakue, be ti ala awoko pepe. 2Lo tene na ala: “Ando, na ya ti mbeni gbata, mbeni wafango-ngbanga ayeke daa so ayeke kpe mbeto ti Nzapa pepe si lo yeke kpe nga mbeto ti azo pepe. 3Mbeni wali-mua ayeke na ya ti gbata ni. Lo ga lo baa wafango-ngbanga ni si lo tene na lo: ‘Fâ ya ti ngbanga so na popo ti mbi na wato ti mbi.’ 4Wafango-ngbanga ni ake lege mingi. Na pekoni, lo tene na be ti lo, lo tene: ‘Ataa so mbi yeke kpe mbeto ti Nzapa pepe si mbi yeke kpe nga mbeto ti azo pepe, 5ngbanga ti so wali-mua so ayeke zia mbi ti duti kpoo pepe, fade mbi yeke fâ ya ti ngbanga ti lo hio si lo ngba lakue ti ga ti so li ti mbi pepe.’ ” 6*Kota Gbia akiri atene: “Ala ma tënë so sioni wafango-ngbanga so atene so nzoni! 7Azo so Nzapa asoro ala si ala yeke toto na lo bi na lâ so, fade lo yeke fâ ya ti ngbanga ti ala pepe? Fade lo yeke ku ngbii si lo mu maboko na ala? 8Mbi tene na ala: fade lo yeke fâ ya ti ngbanga ti ala hio. Me tongana *Molenge ti Zo aga ande, fade lo yeke wara azo ti mabe na ndö ti sese so?”
Toli ti farizien na zo ti rongo nginza ti lapo
9Jésus akiri atene toli so na azo so abaa tere ti ala tongana azo ti mbirimbiri si ala yeke baa amba ti ala tongana ambumbuse zo, lo tene: 10“Azo use ague na ya ti kota da ti Nzapa ti sambela. Oko ayeke *farizien si mbeni ayeke zo ti rongo nginza ti lapo. 11Farizien ni aluti ti lo lutingo si lo yeke sambela na ya ti be ti lo, lo tene: ‘Mbi mu singila na mo, Nzapa, ngbanga ti so mbi yeke tongana tanga ti azo kue pepe. Ala yeke ti ala azo ti nzi, azo ti kirikiri, azo ti gingo awali wala akoli ti azo. Mbi yeke nga tongana zo ti rongo nginza ti lapo so pepe. 12Fani use na ya ti yenga oko, mbi yeke ke kobe ti sambela; ye so kue mbi yeke wara, mbi yeke mu *dime ni na mo.’ 13Me zo ti rongo nginza ti lapo angba ti lo yongoro kâ; lo mu nga le ti lo na nduzu pepe. Me lo zia maboko ti lo na ndö ti go ti lo, lo tene: ‘Nzapa, baa mawa ti mbi, mbi so mbi yeke zo ti siokpari so.’ 14 Mbi tene na ala: so lo ga ti kiri na da ti lo, lo ga mbirimbiri na le ti Nzapa awe, me farizien ni pepe. Biani, zo so asara tere ti lo tongana kota zo, fade a yeke sara si lo ga kete zo; zo so asara tere ti lo tongana kete zo, fade a yeke sara si lo ga kota zo.”
Jésus asara tufa na ndö ti akete molenge
(Matt 19.13-15; Marc 10.13-16)
15Azo amu nga akete molenge so angba ti nyon me, aga na ala na Jésus titene lo ndu ala. So adisiple abaa tongaso, ala suku ngangu na azo ni. 16Me Jésus airi akete molenge ni ti ga nduru na tere ti lo si lo tene: “Ala zia akete molenge aga na mbi! Ala kanga lege na ala pepe, ngbanga ti so *Kodro-gbia ti Nzapa ayeke ndali ti azo so ayeke tongana amolenge so. 17Mbi tene na ala taa-tënë: zo so ayamba Kodro-gbia ti Nzapa tongana molenge pepe, lo yeke li ande na ya ni oko pepe.”
Zo ti mosoro
(Matt 19.16-30; Marc 10.17-31)
18Mbeni makonzi ti azuife ahunda Jésus, atene: “Nzoni wafango-ye, nyen laa mbi lingbi ti sara ti wara fini so angba lakue lakue?” 19Jésus atene na lo: “Ngbanga ti nyen si mo iri mbi zo ti nzoni? Zo ti nzoni ayeke daa pepe, gi Nzapa oko. 20 Mo hinga atënë ti ndia so atene: ‘Alingbi mo gi wali wala koli ti zo pepe; alingbi mo fâ zo pepe; alingbi mo nzi pepe; alingbi mo tene mvene na le ti ngbanga pepe; alingbi mo ne babâ ti mo na mama ti mo.’ ” 21Koli ni akiri tënë, atene: “Mbi to nda ti sara ye so kue gi na ndembe so mbi de molenge.” 22So Jésus ama tënë so, lo tene na lo: “Mbeni ye oko angba na mo ti sarango ni: mo ka aye ti mo kue, mo kangbi nginza ni na awayere si fade mo yeke wara mosoro na yayu. Na pekoni, mo ga, mo mu peko ti mbi.” 23Me so lo ma tënë so, vundu agbu be ti lo, ngbanga ti so lo yeke na mosoro mingi. 24So Jésus abaa so lo yeke na vundu, lo tene: “Ayeke ngangu na azo ti mosoro ti li na ya ti *Kodro-gbia ti Nzapa! 25Lingo ti zo ti mosoro na ya ti Kodro-gbia ti Nzapa ayeke ngangu ahon lingo ti *zambala na ya ti du ti sua.” 26Azo so ama tënë so, ala tene: “So ye ni ayeke tongaso, zo wa laa alingbi ti soo kuâ, zo wa?” 27Jésus akiri tënë na ala, atene: “Ye so azo alingbi ti sara ni pepe, Nzapa alingbi ti sara ni.” 28Pierre atene: “Baa, e zia aye ti e kue si e mu peko ti mo!” 29Jésus atene na ala: “Mbi tene na ala taa-tënë: zo so azia da ti lo, wali ti lo, a-ita ti lo, babâ ti lo, mama ti lo wala amolenge ti lo ndali ti Kodro-gbia ti Nzapa, 30fade lo yeke wara aye mingi na ngoi so si na ya ti ngoi so ayeke ga, lo yeke wara fini so angba lakue lakue.”
Jésus akiri atene tënë ti kuâ ti lo na ti zingongo ti lo na kuâ
(Matt 20.17-19; Marc 10.32-34)
31Jésus amu adisiple baleoko na use na tere ti lo si lo tene na ala: “Ala ma! E yeke gue na Jérusalem. Kâ, aye so kue awayanga-Nzapa asu tënë ni na mbeti na ndö ti *Molenge ti Zo, fade aye ni ayeke si alingbi na ni. 32Biani, fade a yeke zia lo na maboko ti azo ti mara nde, ala yeke he lo na ngia, ala yeke zonga lo, ala yeke tuku ngu ti yanga ti ala na tere ti lo. 33Ala yeke pika lo na fimbo si ala yeke fâ lo. Na lango ota ni, lo yeke zingo na kuâ.” 34Me adisiple ama ya ti tënë so oko pepe, nda ni ahonde na ala; ala hinga nda ti tënë so Jésus atene so pepe.
Jésus azi le ti mbeni waziba
(Matt 20.29-34; Marc 10.46-52)
35So Jésus asi nduru na Jéricho, mbeni waziba aduti na tere ti lege si lo yeke iri ye na maboko ti azo. 36So lo ma go ti gba ti azo so ayeke hon, lo hunda ndo, lo tene: “So nyen laa?” 37Azo atene na lo: “Jésus, zo ti Nazaret laa ayeke hon so.” 38Lo dekongo, lo tene: “Jésus, Molenge ti David, baa mawa ti mbi!” 39Azo so ayeke tambula na li ni asuku na lo titene lo kanga yanga ti lo; me lo kiri lo dekongo ngangu ahon ti kozoni, lo tene: “Molenge ti David, baa mawa ti mbi!” 40Jésus aluti si lo mu yanga titene ala mu lo, aga na lo. So lo ga nduru awe, Jésus ahunda lo, atene: 41“Mo ye mbi sara nyen na mo?” Lo kiri tënë, lo tene: “Kota Gbia, sara si mbi kiri mbi baa ndo.” 42Jésus atene na lo: “Baa ndo! Mabe ti mo asoo mo awe!” 43Gi hio tongaso, le ti lo azi si lo mu peko ti Jésus, lo yeke gonda Nzapa. Azo so kue abaa ye ni ayeke gonda nga Nzapa.
अहिले सेलेक्ट गरिएको:
Luc 18: MNF2010
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© La Société Biblique de Centrafrique 2010