Luc 9
9
Jésus atokua adisiple baleoko na use
(Matt 10.5-15; Marc 6.7-13)
1Jésus abongbi adisiple baleoko na use si lo mu na ala ngangu na komandema ti tumba na asioni yingo kue nga ti kai na akobela. 2Na pekoni, lo tokua ala ti fa tënë ti kodro-gbia ti Nzapa, ti kai nga akobela na tere ti azo. 3 Lo tene na ala: “Na guengo ti ala, ala mu mbeni ye oko pepe: ataa keke, wala bozo, wala kobe, wala nginza; ala mu nga bongo use pepe. 4Da so kue a yeke yamba ala na ya ni, ala ngba daa ngbii asi na lango ti guengo ti ala. 5Ndo so kue azo ayeke yamba ala daa pepe, ala sigigi na ya ti gbata ti azo ni, ala pika sese ti gbe ti gere ti ala, ti fa sioni ti azo ni na le ti ala wani.” 6Adisiple ague, atambula na ya ti akete kodro oko oko kue ti fa Nzoni Tënë, ala kai nga akobela na tere ti azo na ndo so kue ala hon daa.
Be ti Herode agi lo
(Matt 14.1-12; Marc 6.14-29)
7 Herode so ayeke govoronere ama tënë ti aye so kue ayeke si so. Lo gi li ti lo daa gbaa, ngbanga ti so ambeni zo ayeke tene, Jean laa azingo na kuâ; 8ambeni atene, Élie laa akiri asigigi so; ambeni atene, mbeni wayanga-Nzapa ti ando so laa si akiri azingo na kuâ. 9Me Herode atene: “Jean? Mbi wani laa mbi mu yanga titene a fâ go ti lo. Me lo so lo yeke zo wa si mbi yeke ma mara ti tënë tongaso na ndö ti lo so?” Nilaa, Herode ayeke gi lege ti baa Jésus.
Jésus amu kobe na azo saki oku
(Matt 14.13-21; Marc 6.30-44; Jean 6.1-14)
10So *awatokua ni akiri awe, ala fa na Jésus peko ti aye so kue ala sara. Lo mu ala si lo na ala agboto tere ti ala, ague na mbage ti mbeni kodro so iri ni Betsaida. 11Gba ti azo ama tënë ni si ala mu peko ti lo. Jésus ayamba ala, lo fa tënë ti kodro-gbia ti Nzapa na ala si lo kai kobela ti ala so tere ti ala ayeke so. 12So lâ ayeke kui, *awatokua baleoko na use aga nduru na tere ti lo si ala tene na lo: “Zia lege na azo so ti gue na ya ti akodro na akete kodro ti yanga ti yaka so ayeke nduru ge titene ala gi ndo ti lango daa si ala wara kobe ti tengo ni, ngbanga ti so e yeke na ndo so na ya ti ngonda.” 13Me Jésus atene na ala: “Ala wani amu na ala kobe, ala te!” Ala kiri tënë na lo: “E yeke gi na mapa oku na asusu use. Mo ye e gue, e vo kobe ti tengo ni ndali ti azo so kue so?” 14Wungo ti azo ni kue ayeke nduru na saki oku. Jésus atene na adisiple ti lo: “Ala tene na azo ni ti bongbi tere ti ala baleoku baleoku si aduti.” 15Ala sara ye ni tongana ti so lo tene si azo ni kue aduti. 16Jésus amu mapa oku na asusu use so, lo yo le ti lo na nduzu, lo mu singila na Nzapa, lo fâ ya ni, lo mu na adisiple ti lo ti kangbi ni na gba ti azo ni. 17 Ala kue ate ni ya ti ala asi. Na pekoni, ala bongbi tanga ti anduru ni asi sakpa baleoko na use.
Pierre atene, Jésus ayeke Mesii
(Matt 16.13-19; Marc 8.27-29)
18Mbeni lâ, Jésus agboto tere ti lo, lo gue na mbeni ndo si lo yeke sambela; adisiple ti lo ayeke na tere ti lo. Lo hunda ala, lo tene: “Gba ti azo so ayeke tene mbi yeke zo wa?” 19 Ala kiri tënë, atene: “Ambeni atene, mo yeke Jean-Baptiste; ambeni atene, mo yeke Élie si ambeni atene nga, mo yeke mbeni wayanga-Nzapa ti ando so azingo na kuâ.” 20 Lo hunda ala, lo tene: “Me ti ala, ala tene mbi yeke zo wa?” Pierre akiri tënë na lo: “Mo yeke *Mesii so alondo na Nzapa.”
Jésus afa tënë ti kuâ ti lo na ti zingongo ti lo na kuâ
(Matt 16.20-28; Marc 8.30–9.1)
21Jésus asuku na ala ngangu titene ala tene tënë ni na zo oko pepe. 22Lo tene: “Alingbi *Molenge ti Zo abaa pasi mingi. *Akangba, akota wayango-sandaga na awafango-ndia ayeke ke lo, ala yeke fâ lo si na lango ota ni, lo yeke zingo na kuâ.”
23 Na pekoni, Jésus atene na ala kue, atene: “Tongana mbeni zo aye ti mu peko ti mbi, ayeke nzoni lo zia ti gbu li na ndö ti lo wani, lo yo keke ti kroa ti lo lakue si lo mu peko ti mbi. 24 Biani, zo so aye ti soo fini ti lo, fade lo yeke girisa ni; me zo so ayeke girisa fini ti lo ndali ti mbi, fade lo yeke soo ni. 25Tongana zo awara aye ti dunia so kue si lo girisa fini ti lo, wala gigi ti lo abuba, nyen laa lo yeke wara na peko ni? 26Tongana mbeni zo asara kamene ti mbi na ti atënë ti mbi, fade Molenge ti Zo ayeke sara nga kamene ti lo na lango so lo yeke ga na ya ti gonda ti lo, gonda ti Babâ ti lo nga na ti *a-ange so ayeke nde si ayeke nzoni kue. 27Mbi tene na ala taa-tënë: fade ambeni zo na popo ti ala so ayeke ge so ayeke kui pepe ngbii ala baa kodro-gbia ti Nzapa.”
Adisiple abaa Jésus na ya ti gonda ti lo
(Matt 17.1-8; Marc 9.2-8)
28Nduru na lango miombe na peko ti tënë so, Jésus amu Pierre, Jean na Jacques na tere ti lo si lo na ala ague na li ti hoto ti sambela. 29So lo yeke sambela, le ti lo aga nde si bongo ti lo avuru aza tongana wâ ti bekpa. 30Andaa akoli use ayeke fade na ndo so, ala yeke tene tënë na lo: Moïse na Élie laa. 31Adisiple abaa ala na ya ti gonda so alondo na Nzapa. Ala yeke tene tënë na ndö ti kuâ so lo yeke gue ti kui na Jérusalem ti hunzi na kua ti lo. 32 Andaa Pierre na amba ti lo akui fade na lango; me so ala zingo awe, ala baa gonda ti Jésus si ala baa nga akoli use so lo na ala ayeke luti. 33So akoli use so alondo na tere ti Jésus ti hon, Pierre atene na lo: “Wafango ye, ayeke nzoni e ngba na ndo so. E leke agbefa ota: oko ti mo, oko ti Moïse, oko ti Élie.” Me lo hinga nda ti tënë so lo yeke tene so pepe. 34So lo ngba ti tene tënë ni, mbeni mbinda asi amu ndö ti ala kue. Mbeto agbu adisiple na ndembe so ala baa, ala yeke li na ya ti mbinda ni. 35 Na ya ti mbinda ni, mbeni go atene: “So ayeke Molenge ti mbi so mbi soro lo. Ala ma yanga ti lo!” 36Na peko ti tënë so ala ma so, Jésus angba gi lo oko. Adisiple azi yanga oko pepe si na ya ti alango ni so ala tene tënë ti aye so ala baa ni so na zo oko pepe.
Jésus atumba sioni yingo na ya ti mbeni molenge
(Matt 17.14-18; Marc 9.14-27)
37Lango oko na pekoni, na ndembe so ala londo na li ti hoto ni si ala zu awe, gba ti azo aga atengbi na Jésus. 38Mbeni koli na popo ti azo ni adekongo, atene: “Wafango-ye, mbi gbu gere ti mo, bi le ti mo na ndö ti molenge ti mbi, ngbanga ti so gi oko molenge ti mbi laa. 39Lakue tongana sioni yingo agbu lo, lo yeke dekongo, sioni yingo ni ayeke yingi lo mingi, asara si *furu ayeke sigigi na yanga ti lo; sigingo ti sioni yingo ni na ya ti molenge ni ayeke ngangu. Tongana lo ga ti sigigi, andaa molenge ni awoko kue awe. 40Mbi hunda na adisiple ti mo ti tumba sioni yingo ni, me ala ha gbaa.” 41Jésus akiri tënë: “Ala azo ti fadeso, ala yeke na mabe pepe, ala yeke azo ti kirikiri! Mbi yeke ngba ti duti na tere ti ala ngbii asi lawa? Mbi yeke ngba ti kanga be ti mbi na ala ngbii asi lawa? Ga na molenge ti mo na ndo so.” 42So molenge ni asi, sioni yingo ni abi lo na sese si ayeke yingi lo ngangu. Me Jésus asuku ngangu na sioni yingo ni; lo sara si tere ti molenge ni akiri aga nzoni si lo kiri na lo na babâ ti lo. 43Li ti azo kue akpe ndali ti so ala baa atene, Nzapa ayeke kota.
Jésus akiri atene tënë ti kuâ ti lo
(Matt 17.22-23; Marc 9.30-32)
So azo ni angba ti gonda aye so kue Jésus asara, lo tene na adisiple ti lo: 44“Ala ma tënë so mbi yeke tene na ala so nzoni! Fade a yeke zia *Molenge ti Zo na maboko ti azo.” 45Me adisiple ama ya ti tënë ni so pepe; nda ni ahonde na ala si ala ma ya ni pepe, me ala sara mbeto ti hunda nda ni na lo.
Zo wa laa ayeke kota zo ahon amba ti lo?
(Matt 18.1-5; Marc 9.33-37)
46 Adisiple ato nda ti *bingbi tënë na popo ti ala, atene: “Na popo ti e, zo wa laa ayeke kota zo ahon amba ti lo?” 47Me Jésus ahinga tënë so ala yeke tene na be ti ala. Tongaso lo iri mbeni kete molenge, lo zia lo na tere ti lo; 48 lo tene na ala: “Zo so ayamba kete molenge so na iri ti mbi, andaa mbi laa lo yamba mbi; zo so ayamba mbi, andaa lo yamba nga lo so atokua mbi. Zo so ayeke kete kete na popo ti ala, andaa lo laa lo yeke kota ahon ala kue.”
Zo so ake ala pepe, andaa lo yeke zo ti ala
(Marc 9.38-40)
49Jean amu tënë si atene na lo: “Kota zo, e baa mbeni zo ayeke tumba asioni yingo na iri ti mo si e ye ti kanga lege na lo, ngbanga ti so lo mu peko ti mo tongana e pepe.” 50Jésus atene na ala: “Ala kanga lege na lo pepe, ngbanga ti so zo so ake ala pepe, andaa lo yeke zo ti ala.”
Azo ti mbeni kete kodro ti Samarii ake ti yamba Jésus
51So ngoi titene a mu Jésus ti gue na lo na yayu aga nduru awe, lo ye gi ti mu lege ti gue na Jérusalem. 52Lo tokua ambeni zo titene ala hon kozoni na lo. Azo ni amu lege ague si ala li na ya ti mbeni kete kodro ti Samarii, ti leke ndo ti ku na lo. 53Me azo ti kodro ni ake ti yamba lo ngbanga ti so lo yeke gue na Jérusalem. 54 So adisiple ti lo, Jacques na Jean abaa tongaso, ala tene na lo: “*Kota Gbia, mo ye e hunda wâ ti nduzu ati na ndö ti ala si agbi ala kue?”
55Me Jésus abi le ti lo, lo baa ala, lo suku na ala 56si ala gue na mbeni kodro nde.
Azo so aye ti mu peko ti Jésus
(Matt 8.19-22)
57So ala yeke na lege ti guengo ni, mbeni zo atene na Jésus: “Fade mbi yeke mu peko ti mo na ndo so kue mo yeke gue daa.” 58Jésus atene na lo: “Anyama ti gbungo kondo ayeke na adu ti ala ti lango na ya ni; andeke ti nduzu ayeke na da ti lango ti ala. Me *Molenge ti Zo ayeke na mbeni ndo ti ziango li ti lo daa pepe.”
59Lo tene na mbeni zo ni, lo tene: “Mu peko ti mbi!” Me zo ni akiri tënë na lo: “Zia mbi gue, mbi lu kuâ ti babâ ti mbi si.” 60Jésus atene na lo: “Zia akuâ alu akuâ ti ala; me ti mo, mo gue, mo fa na azo tënë ti kodro-gbia ti Nzapa.”
61 Mbeni akiri atene na lo: “Fade mbi yeke mu peko ti mo, me mo zia mbi gue, mbi bara asewa ti mbi si.” 62Me Jésus atene na lo: “Zo so agbu masini ti fango na yaka si lo baa ndo na peko, lo lingbi ti ga zo ti *Kodro-gbia ti Nzapa pepe.”
अहिले सेलेक्ट गरिएको:
Luc 9: MNF2010
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© La Société Biblique de Centrafrique 2010