Amatie 12

Vo'osgo daarɛ yelle

(Amarkɩ 2:23-28, Aluki 6:1-5)

1Wakat-ẽŋa, Azezi la a karẽnbiisi la daan dolɩ la vatɔ pʋam, Zifdõma vo'osgo daarɛ tɔlla. Tɩ a karẽnbiisi kɔm dõnna, tɩ ba kɔ si wẽena ɔbra. 2Tɩ Farisi dõma yẽ, yele Azezi yetɩ: «Bɩsɛ, fʋ karẽnbiisi la ɩtɩ la sɛla n sisri vo'osgo daarɛ.» 3Tɩ Azezi lerge ba yetɩ: «Yãma ka karẽŋɛ Adavidi la a nẽrba la kɔm n yʋʋn dõnnɩ tɩ ba ẽŋɛ se'em na? 4A yʋʋn kẽ la Nawẽnnɛ deego la pʋam dɩkɛ borborɩ sɛba tɩ ba bĩŋe bɔ Nawẽnnɛ na obe, dee bɔ a nẽrba la. La sisri mɛ, nẽra nẽra ka obrɩ ba, sãn dagna kãabgɔ kẽma la mã'a. 5Bɩɩ yãma ka karẽŋɛ lɔɔ gõŋɔ la pʋam n yetɩ, vo'osgo daarɛ, kãabgɔ kẽma la n tõnnɩ Wẽnde-kãtɛ la pʋam na sã'anɩ vo'osgo daarɛ sisgo la mɛ tɩ taalɛ ka bɔna? 6Mam yetɩ ya mɛ tɩ nẽra n gãnnɩ Wẽnde-kãtɛ la n boe kalam. 7La gʋlsɛ tɩ Nawẽnnɛ yetɩ: ‹Mam boorɩ tɩ nẽrsaalba zɔta la taaba ninbãalga, dee dagɩ tɩ ba dɩkɛ ba bõnɔ kãabra bɔ'ɔra mam.› Yãma sãn bãŋɛ nɩ yetɔg-ẽna wã võorɛ, ya kãn yele nɩ sɛba n ka tõm be'em tɩ ba tuuge ya. 8Se'ere n soe la, Nẽrsaala Dayʋa la n soe vo'osgo daarɛ.»

Bʋraa nu'ugo n ki, tɩ Azezi botɩ a yẽ ĩmã'asʋm

(Amarkɩ 3:1-6, Aluki 6:6-11)

9Azezi fõrgɛ bilam sẽŋɛ la ba wẽndeem. 10Tɩ bʋraa ayɩla daan bɔna mĩ, tɩ a nu'ugo ki. Tɩ Farisi dõma bɔɔra tɩ ba dõrɛ Azezi, soke ẽ yetɩ: «Sore boe tɩ ba botɩ nẽra yẽ ĩmã'asʋm vo'osgo daarɛ?» 11Tɩ Azezi lerge ba yetɩ: «Nẽr-kãna n boe yãma pʋam wʋn tara pesgo, tɩ a lui boko pʋam vo'osgo daarɛ, tɩ a kãn yõkɛ ẽ tɩ a dooge? 12Nẽrsaala tarɩ yõorɔ mɛ gãnna pesgo zozo'e. Bɛla, sore boe mɛ tɩ nẽra ẽŋɛ sõŋa vo'osgo daarɛ.» 13La Azezi yele bʋraa la yetɩ: «Tẽegɛ fʋ nu'ugo la.» Tɩ a tẽegɛ, tɩ a nu'ugo la ãna sõŋa wʋ nu'ugo ayẽma la. 14Tɩ Farisi dõma la yese yẽŋa ka bãm bãma n wʋn ẽŋɛ se'em kʋ Azezi.

Azezi de la Nawẽnnɛ tõntõnna

15Tɩ Azezi bãŋɛ bɛla, fõrgɛ bilam. Tɩ nẽrba zozo'e doose ẽ. Tɩ a botɩ bã'adõma wuu yẽ ĩmã'asʋm. 16Dee kã'an ba yetɩ, ba da botɩ nẽra bãŋɛ. 17A ẽŋɛ la bɛla tɩ Nawẽnnɛ n yʋʋn botɩ a nõtɔ'ɔsa A'ezayi yele se'em na ẽŋɛ.

18A yʋʋn yetɩ:

«Mam tõntõnna tɩ mam looge n wãna:

Nẽr-sɛka tɩ mam nõŋɛ, a paagɛ la mam yɛm.

Mam wʋn basɛ tɩ m Sɩa pãŋa bɔna la ẽ,

tɩ a mõolɛ sɩra, la sɛla n masɛ mam yɛm bɔ buuri wuu.

19A kãn wẽ'era nõke'ene, la a kãn zɛbra.

La nẽra kãn wõm a kõa sorɔɔrɔ zuto.

20A kãn kɔ'ɔgɛ mõ-sɛka n kɔ'ɔgɛ la ba'asɛ.

La a kãn kĩŋe fɩtla gõngõŋɔ la n diti fẽfẽ la ba'asɛ,

halɩ tɩ la ka paagɛ wakat-sɛka tɩ a wʋn botɩ sɩra, la sɛla n masɛ to'oge zẽ'a wuu.

21Tɩ buuri la wuu wʋn te'ege ẽ.»

Azezi pãŋa gãnnɩ Asũtãana

(Amarkɩ 3:20-30, Aluki 11:14-23;6:43-45)

22Tɩ ba tarɩ nẽra ayɩla tɩ kʋlkã'arga dolɩ ẽ, tɩ a dɛna fʋa la muko wa'am Azezi zẽ'am, tɩ Azezi botɩ a yẽ ĩmã'asʋm, tɔgra dee yẽta.

23Tɩ la di'ige nẽr-kʋʋŋɔ la wuu, tɩ ba yetɩ: «Bʋra-ẽna wã kãn dɛna naba Adavidi yɩɩŋa la?» 24Tɩ Farisi dõma wõm bɛla, yele yetɩ: «Bʋra-ẽna tarɩ la Abelzebuli n de kʋlkã'arsɩ naba la pãŋa digra kʋlkã'arsɩ la.» 25Tɩ Azezi bãŋɛ ban tẽ'esrɩ se'em na, yele ba yetɩ: «So'olʋm sɛka woo nẽrba n welge wẽrgɛ zɛbra la taaba, so'olʋm na wʋn sã'am mɛ. La tẽn-sɛka woo, bɩɩ yi-sɛka woo nẽrba n welge zɛbra la taaba, a wʋn wõrgɛ mɛ. 26La Asũtãana sãn digra Asũtãana, a welge mɛ zɛbra la a mẽŋa. Bɛla, a so'olʋm na kãn tã'agɛ ze'ele. 27Yãma n yetɩ mam digri kʋlkã'arsɩ la Abelzebuli pãŋa la, yãma nẽrba tarɩ la ãne pãŋa digra kʋlkã'arsɩ? Bɛla, ya nẽrba la mẽŋa n wʋn pa'alɛ tɩ ya ka tarɩ bʋʋrɔ. 28La de la Nawẽnnɛ Sɩa pãŋa tɩ mam tarɩ digra kʋlkã'arsɩ, bɛla pa'alɛ tɩ Nawẽnnɛ n wa'am wa dita na'am ya tẽŋasʋka.

29Nẽra ka tã wʋn kẽ pãŋa dãana yire vaagɛ a lɔgrɔ, sãn dagna tɩ a dẽŋɛ lʋ pãŋa dãana la mɛ dee yãŋa vaagɛ a lɔgrɔ la.

30Sɛka n ka boe la mam, sisri mam mɛ. La sɛka n ka lagɩm na mam lagsra, a wɩrgrɩ mɛ. 31Bɛla n soe tɩ mam yele ya yetɩ, tõon-be'ero wuu, la pɔ'ɔrɛ yetɔga wuu tɩ nẽrsaalba ɩtɩ la, Nawẽnnɛ tã wʋn basɛ ba taalɛ. La sɛka n tɔgɛ pɔ'ɔgɛ Nawẽnnɛ Sɩa, a kãn basɛ ẽ taalɛ. 32La nẽr-sɛka n tɔgrɩ Nẽrsaala Dayʋa la tɔg-be'ero, a wʋn basɛ ẽ taalɛ. La sɛka n tɔgrɩ Nawẽnnɛ Sɩa la tɔg-be'ero, Nawẽnnɛ kãn malɩn basɛ ẽ taalɛ dũnia ẽna wã pʋam, la dũni-sɛka n sẽm na pʋam.

33Ya sãn yetɩ, tɩa ãn sõŋa, ya yetɩ a biɛ ãn sõŋa. Bɩɩ ya sãn yetɩ, tɩa de tɩ-be'ego, ya yetɩ a biɛ mẽ de la biɛ be'ero. Se'ere n soe la, tɩa biɛ n botɩ ba bãŋra ẽn de tɩ-sɛka. 34Yãma ãn wʋ kãmpẽesɩ buuri, yãma n de nẽr-bɛ'ɛsɩ wãna wã, ya wʋn ẽŋɛ la wãne tɔgɛ tɔg-sõma? Se'ere n soe la, sɛla n zo'oge sũure pʋam na tɩ nõorɛ tɔgrɩ. 35Nẽr-sõŋɔ tɔgrɩ la bõn-sõma tɩ a tarɩ a sũure pʋam. La nẽr-be'ego tɔgrɩ la bõn-be'ero tɩ a tarɩ a sũure pʋam. 36Mam yetɩ ya tɩ sarɩyadia daarɛ, nẽrsaalba wʋn ka tɔgɛ yetɔg-yaalsɩ tɩ ba tɔgɛ la wuu yelle Nawẽnnɛ nẽŋam. 37La de la fʋ yetɔga pʋam tɩ fʋ wʋn yẽ bʋʋrɔ, la, la de la fʋ yetɔga pʋam tɩ fʋ wʋn koŋe bʋʋrɔ.»

Nẽrba boorɩ tɩ ba yẽ bõn-yãlma

(Amarkɩ 8:11-12, Aluki 11:29-32)

38Azezi n tɔgɛ bɛla la, tɩ lɔɔ karẽnsãandõma, la Farisi dõma yele ẽ yetɩ: «Karẽnsãama, tõma boorɩ tɩ fʋ ẽŋɛ la bõn-yãlma n pa'alɛ tɩ fõn ze'ele la Nawẽnnɛ zẽ'am tɩ tɩ yẽ.» 39Tɩ a yele ba yetɩ: «Zamãan-ẽna wã nẽrba n de nẽr-bɛ'ɛsɩ, dee ka dɔla Nawẽnnɛ la sɩra la, boorɩ tɩ ba yẽ la bõn-yãlma n wʋn pa'alɛ Nawẽnnɛ pãŋa, la ba kãn yẽ bõn-yãlma, sãn dagna bõn-yãlm-sɛka n yʋʋn ẽŋɛ Nawẽnnɛ nõtɔ'ɔsa Azonaasɩ la. 40Wʋ Azonaasɩ n yʋʋn boe zũn-kãtɛ la pʋʋrʋm dabsa atã wʋntɛɛŋa la yʋ'ʋŋɔ la, bɛla Nẽrsaala Dayʋa la mẽ wʋn bɔna yɔɔgɔ pʋam na dabsa atã, wʋntɛɛŋa la yʋ'ʋŋɔ. 41Sarɩyadia daarɛ, Niniivi dõma wʋn isge zɛrgɛ zamãan-ẽna wã dõma mɛ ba tõon-be'ero la ĩyã. Se'ere n soe la, Azonaasɩ n yʋʋn mõolɛ Nawẽnnɛ yetɔga bɔ ba la, ba yʋʋn teege yɛm mɛ basɛ tõon-be'ero. La nẽra n gãnnɩ Azonaasɩ n boe kalam, dee tɩ yãma ka teege yɛm. 42La sarɩyadia daarɛ, na-pɔka la n yʋʋn yese wẽntulle gɔbga bɔba la, wʋn isge mɛ zɛrgɛ zamãan-ẽna wã nẽrba ba tõon-be'ero la ĩyã, se'ere n soe la, a daan ze'ele la zẽ'a n zãagɛ wa'am wa selse naba Asalomõ yɛm yetɔga. La nẽra n gãnnɩ Asalomõ n boe kalam, dee tɩ yãma ka sɛlsra ẽ.»

Kʋlkã'arga n yese dee leme makrɛ

(Aluki 11:24-26)

43Azezi le yetɩ: «Kʋlkã'arga sãn yese dee basɛ nẽra, a sẽŋɛ la pɔgẽntɩɩsɩ pʋam ka ɛɛra zẽ'a tɩ a vo'ose, la a sãn ka yẽ, 44a yetɩ mɛ tɩ: ‹Mam wʋn lebe la m yi-sɛka tɩ m yese dee basɛ la pʋam.› La a sãn lebe ka paagɛ yẽ tɩ deego la de la voore, pɩɩsɛ malgɛ ãna sõŋa, 45a wʋn lebe mɛ ka tarɩ kʋlkã'arsɩ bayopɔɩ n de wẽensɩ gãnna ẽŋa, wa'am wa kẽ bɔna mĩ. La nẽra la toogo wʋn gãnna kʋrʋm toogo la. La mẽ wʋn dɛna la bɛla bɔ zamãan-ẽna wã nẽr-bɛ'ɛsɩ la.»

Azezi ma, la a yɩbsɩ

(Amarkɩ 3:31-35, Aluki 8:19-21)

46Azezi daan ken tɔgra la nẽr-kʋʋŋɔ la, tɩ a ma, la a yɩbsɩ daan zɛ yẽŋa bɔɔra tɩ ba tɔgɛ la ẽ. 47Tɩ nẽra ayɩla yele ẽ yetɩ: «Fʋ ma, la fʋ yɩbsɩ n wãna n ze yẽŋa bɔɔra tɩ ba tɔgɛ la fɔ.» 48Tɩ Azezi yele sɛka n tɔgrɩ la ẽ na yetɩ: «Ãne n de mam ma, la ãndõma n de mam yɩbsɩ?» 49Dee tẽegɛ a nu'ugo pa'alɛ a karẽnbiisi la yetɩ: «Mam ma, la mam yɩbsɩ n wãna. 50Nẽr-sɛka woo n ɩtɩ mam Sɔ Nawẽnnɛ n boe saazuum n boorɩ se'em, ẽŋa n de mam yɩbga, la mam tã, la mam ma.»

अहिले सेलेक्ट गरिएको:

Amatie 12: gurDBL

हाइलाइट

शेयर गर्नुहोस्

कपी गर्नुहोस्

तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्

Farefare, Ninkaré बारे थप जान्नुहोस्

Amatie 12

बाट लोकप्रिय बाइबल पदहरू
{{chapter}
}

सुन्नुहोस् Amatie 12

बाइबल:

Farefare

भर्जन: Farefare, Ninkaré - gurDBL

Amatie 12

Amatie 12

बाट लोकप्रिय बाइबल पदहरू {{chapter}}

सुन्नुहोस् Amatie 12

बाइबल:

Farefare

भर्जन: Farefare, Ninkaré - gurDBL

Amatie 12

बाट लोकप्रिय बाइबल पदहरू
{{chapter}
}