इजकिएल 4
4
यरूशलेमलाई घेरा हालेको उदाहरण
1“हे मानिसको छोरो, एउटा इँटका पाटा लिएर त्यो तेरो सामु राख्, र त्यसमा यरूशलेमको फोटो खिच्। 2तब त्यसका चारैतिर घेरा हाल्। त्यसको विरुद्धमा घेरा-मचान बना, र त्यसको सामुन्ने छाउनी लगा, र वरिपरि त्यसलाई भत्काउने मूढ़ाहरू राख्। 3तब एउटा फलामे भाँड़ो लिएर सहर र तेरो बीचमा एउटा फलामको पर्खालझैँ त्यो खड़ा गर् अनि तेरो मोहड़ा सहरतिर फर्का। त्यो घेरा लाएको अवस्थामा हुनेछ, र तैंले त्यसलाई घेरा हालेर ली। इस्राएलका घरानाको निम्ति यो एउटा चिन्ह हुनेछ।
4“त्यसपछि तँ देब्रेतिर कोल्टे परेर सुत्, र इस्राएलका घरानाको पाप आफूमाथि राखिदे। जति समयसम्म तँ यसरी कोल्टे परिरहन्छस्, त्यति दिनसम्म तैंले तिनीहरूको पाप भोग्नेछस्। 5तिनीहरूको पापका वर्षको संख्याकै बराबर तेरो लागि दिनको संख्या तोकेको छु, अर्थात् तीन सय नब्बे दिन। त्यतिञ्जेलसम्म तैंले इस्राएलका घरानाको पाप भोग्नेछस्।
6“ती दिन पूरा भइसकेपछि फेरि दाहिनेतिर कोल्टे पर् र यहूदाका घरानाको पाप भोग्। यस पल्ट मैले चालीस दिन तेरो निम्ति तोकेको छु, प्रत्येक वर्षको लागि एक दिन। 7तेरो पाखुरा नाङ्गै राखेर तैंले आफ्नो मोहड़ा यरूशलेमको घेरातर्फ फर्काएर राख्, र त्यस सहरको विरुद्धमा अगमवाणी भन्। 8म तँलाई डोरीहरूले कसी राख्नेछु, यसरी तेरा घेराको दिन समाप्त नहोउञ्जेल तँ यताउता फर्कन सक्नेछैनस्।
9“त्यसपछि गहूँ, जौ, सिमी, दाल, कोदो र कठिया लिएर एउटै भाँड़ामा हालेर तेरो लागि रोटी पका। जति दिनसम्म तँ कोल्टे परेर रहन्छस्, त्यति दिनसम्म, अर्थात् तीन सय नब्बे दिनसम्म तैंले त्यो खानू। 10तैंले खाने भोजनचाहिँ तौलअनुसार हुनेछ, दिनमा बीस शेकेल#4:10 अर्थात् करीब 0.2 किलोग्राम। दिनको तोकिएको बेलामा तैंले खानू। 11पानी पनि तैंले तौलेर पिउनू। दिनको तोकिएको बेलामा एक माना खानू। 12जौका फुरौलाजस्तै बनाएर तैंले खानू। मानिसहरूकै आँखाको सामुन्ने मानिसको दिसालाई दाउराको रूपमा प्रयोग गरेर त्यो पकाउनू।” 13परमप्रभुले भन्नुभयो, “इस्राएलीहरूलाई जुन-जुन जातिकहाँ म धपाउनेछु, उनीहरूका बीचमा तिनीहरूले यसरी नै दूषित भोजन खानेछन्।”
14तब मैले भनें, “हे परमप्रभु परमेश्वर, त्यसो नहोस्। मैले त आफूलाई कहिल्यै अशुद्ध पारेको छैनँ। युवावस्थादेखि अहिलेसम्म कहिल्यै आफै मरेको थोक अथवा पशुले फहराएको कुरा वा अपवित्र मासु मैले खाएको छैनँ।”
15तब उहाँले मलाई भन्नुभयो, “हुन्छ, म तँलाई मानिसहरूका दिसाको सट्टा गोबर प्रयोग गरेर तेरो रोटी पकाउन दिनेछु।
16उहाँले मलाई भन्नुभयो, “ए मानिसको छोरो, म यरूशलेमबाट अन्नको मूल बन्द गरिदिनेछु। जोखी-जोखीकन चिन्तित भई तिनीहरूले रोटी खानेछन्, र जोखी-जोखीकन डराउँदै पानी पिउनेछन्। 17किनकि तिनीहरूमा रोटी र पानीको अभाव हुनेछ। एउटाले अर्कालाई देख्दा तिनीहरू हताश हुनेछन्, र आफ्नो पापले गर्दा तिनीहरू सुक्दैजानेछन्।
अहिले सेलेक्ट गरिएको:
इजकिएल 4: NNRV
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Nepali New Revised Version © Nepal Bible Society 1997, 2006, 2009, 2012