Génesis 9
9
Pa vatpeya'shelh pa Dios pa Noê
1Pa Dios yit'eshem pa is pa Noê shi' papi lhcles, navôque lhclishay: “Acaatjatelh papi acloj acleselh pa amelhch'een na cotsjaat.*xc* 2Lhacôm'a nava yaquisetes yiey na cotsjaat pa lhts'anaanjateshelh jayu pa t'ajovayi yiey ajuyishelh. Lhacôm'a nava ajôclôs navan yi'shi' na lhaviim yiey na cotsjaat shi' shta nava yiey na uj yinôôt, t'ashelhc'oya pa unajelh. 3Isjop ca atujelh lhacôm'a nava yaquisetes shi' nava aacjuy lhay navan t'acônelh. Yivaatsha jajutelh'ay. 4Taj ti caaj na ve'lha ti ya aj na ca atujelh pa t'asjaan mônlhashi pa lhavoyey, lhayaash cava vatvoyey ti yi'shi' pa vatmônlhajayash.*xd* 5Yivaatsha jayalh'ôcji jayu lhacôm'a pa nivacle shi' shta pa yaquiset pava lhavoyey pa ave'lhaaelh'e ts'ivee. Pa jayalh'ôcji jayu ve'lha ts'ivee napi nivacle pa lhamônlhajayash pa lhavelh.
6“Ca nicaajtaj papu ca niclôntaj pa
ve'lha nivacle,*xe*
pa vooy peelh nivacle niclôn jayu vitsha,
tôlh'ejop pa nivacle ti chiyisnatesh ti
yijônlhach'e pa Dios lhavaatsha.*xf*
7Taj avaatsheelh, ¡acaatjatelh
papi acloj acleselh
pa amelhch'een na cotsjaat papi lhech!”*xg*
8Pa Dios yit'esha shta pa Noê shi' papi lhcles: 9“A'va, yivaatsha jacaatjat jayu ca shtavatpeya'esh avaatsheelh shi' shta papi amc'oya tôlhelh'a jayu, 10pa shi' shta lhacôm'a nava yaquisetes navan yielh'ajop ti lhtayelhshi lha vatôvjatshi: nava ajôclôs, nava yaquisetes nitôyecla shi' nava tôyic shi' lhacôm'a nava yaquisetes yiey na cotsjaat. 11Na c'apejiyinshelh avaatsheelh tan jayu ca anvaych'aclajelh: tan jayu ca t'ôyisheey ca yivômjatesha'ne napi nivacle shi' nava yaquisetes pa uj tsha'nu. Tan jayu ca ninam t'ôyish'e pa uj tsha'nu ca nivômjat na cotsjaat. 12Anôque janôôclhanitsha nan c'apejiyinshelh pa jasnatshelh'am jayu yinjôt avaatsheelh shi' lhacôm'a nava yaquisetes: 13apis ti janshi' lha yifasch'aclich nava vôsey yiey na cotsjaat. 14Yivaatsha ca janchentaj pava vôsey yiey na cotsjaat, lha yifasch'aclich pa chinvaney'e jayu pava lhech. 15Pa lhecheesh pa nivoych'e yicachi' jayu ca shtavatpeya'esh ti jasnatshelh'am avaaatsheelh shi' lhacôm'a nava yaquisetes, ti tan jayu ca ve'lheesh ca ninam shta pa uj tsha'nu ca nivancalhif'e. 16Lha fasch'aclich ca nôôvtajshi nava vôsey, pa ja'van jayu pa jaychavalhch'e jayu shta nan shtavatpeya'esh nan jasnatesh ti yajateeshem jayu pa nivacle shi' lhacôm'a pava yaquisetes yiey na cotsjaat. 17Lhech anôque nôôclheesha na shtavatpeya'esh ti yivaatsha jasnatshem ti lhacôm'a'esh pa nivacle shi' pa yaquiset ti yiey na cotsjaat.” Nôque yit'eshem pa Dios pa Noê.
Pa Noê shi' papi lhcles
18Pa Sem, pa Cam shi' pa Jafet capuque lhcles pa Noê papin tayelhshi lhpa vatôvjatshi. Pa Cam lhô'sesh pa Canaán. 19Papucôyi pu'jana lhcles pa Noê, pa shi' papi tô'lha pa lhech papuque tavtsatey'e na cotsjaat. 20Pa Noê vatcôvjiyanjayash lhavo'esh, lhavaatsha vatjutsa'esh ti yicôvjiyan pava ôtjayetas. 21Caaj pa nalhu pa yiyô'ji pa Noê pa ôtjayetas t'i' pa yetsejesh. Pa lhech nat'ôcji pan yie' pa lhatsha'nuvo taj ti tsi'shaan. 22C'oya ti yi'van pa Cam, ja't'ajesha lhtata pa Canaán, pa lhtata ti tsishaan pa yicheyjop papi lhavelhavot pa nifaclem. 23Pa lhech'e pa Sem shi' pa Jafet t'acum'e ts'ivee pa lhclo'vat, pa yan'e lhfatatsiy, ti yip'ooj'e pa lhtata pan tsi'shaan. Ca ya aj ca nivan pa lhtata ti tsi'shaan, t'ôyiyey lhavc'oya ti yichey pa vena yovalhshi.
24Pa Noê ti nôjesh'apee pa t'etsje pa yitô'ya pa lhfanishesh pa taôvclajesh lhaôs, 25pa yit'esha:
“¡Chiypôfiyu jayu na Canaán!
¡Ya'shesh jayu ti lhcavo'esh naapi
napu' lhavelhavot!”
26Ve'lheesh yit'esh'in shta pa Noê:
“Vooy pa Lhcaanvacle yi'Dios yiisiyanem na Sem,
pa vooy na Canaán lhcavoesh jayu.
27Pa Dios yivashanem na Jafet ca na'shem
ca nôv'e';
pa yie'in pava t'ichavtes na Sem,
pa vooy na Canaán pa lhcavoaesh.”
28Ti nôjeshch'e pa uj tsha'nu pa Noê pa ve'lheesh mônlha shta trescientos cincuenta pava lhnincôpes: 29pa lhavaatsha vaf ti novecientos cincuenta pava lhnincôpes.
Papi lhcles pa Noê
(1 Cr 1.5-23)
अहिले सेलेक्ट गरिएको:
Génesis 9: NIVA
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Nivacle Bible © Sociedades Bíblicas Unidas, 1994.