MATHIU 1
1
Jisu Pa le Pungai
(Luk. 3:23-38)
1Abraham le David a pasalnai Jisu Khrista hongkanthuina pa le puthui rabu ha hi ani.
2Abraham hi Isak a pa ani. Isak a nai Jakob. Jakob a nai Juda le anaipangai. 3Juda le a numei Tamar an nai Parez le Zera anni, Parez a nai Hazron, Hazron a nai Ram. 4Ram a nai Amminadab. Amminadab a nai Nashon, Nashon a nai Salmon. 5Salmon le a numei Rahab a nai Boaz, Boaz le a numei Ruth a nai Obed, Obed a nai Jese. 6Hale Jese a nai Reng David ha ani, David a nai Solomon, a nulamko Uria ani. 7Solomon a nai Rehoboam, Rehoboam a nai Abija, Abija a nai Asa. 8Asa a nai Jehoshaphat, Jehoshaphat a nai Jehoram, Jehoram a nai Uzzia. 9Uzzia a nai Jotham, Jotham a nai Ahaz, Ahaz a nai Hezekia, 10Hezekia a nai Manasse, Manasse a nai Amon, Amon a nai Josia. 11Josia a nai Jekonia le anaipangai hi Babilon ram ma ral ringa an churra an om lai nai chang anni.
12Babilon ram ma ral ringa an tuang suapha, Jekonia a nai Shealtiel, Shealtiel a nai Zerubabel. 13Zerubabel a nai Abiud, Abiud a nai Eliakim, Eliakim a nai Azor. 14Azor a nai Zadok, Zadok a nai Akim, Akim a nai Eliud. 15Eliud a nai Eleazar, Eleazar a nai Matthan, Matthan a nai Jakob, 16Jakob a nai Josep Meri a lompa, “Khrista” om anti Jisu a nu ha Meri ani.
17Hingahin Abraham tenna David tungkhan vonchoi rui mirual hi somleimanli ani, David tenna Babilon ram ma ral ringa antuanglim mirual hi somleimanli ani, Babilon ram ma ral ringa antuanglai tenna Khrista ahongkhan mirual hi somleimanli ani.
Jisu Naichangna
(Luk. 2:1-7)
18Jisu Khrista hingahin nai a hong chang, a nu Mari ha Josep ranga anluikhappe, tak-ha mun an kan chun mak ma Thavang Thiang tenna nai a von tihi an lui jet. 19Alompa Josep ha mi dik khat ani jarra thangsiat suak rang hi dei mak a rukchian na makrang alui ngaidon. 20Ha ang han a lung sunga a ngaidon lai Puma thaneithiang ning a manga ama jiang alui hongkandoa a ti “David a pasalnai Josep, Mari na lomnu manchang ranga chit maro, ajarko, anaivon hi Thavang Thiang tenna ani. 21A man pasalnai khat nei nati, a ming ha nang in Jisu tinanti, ajarko, a man a mingai ha an siatna tenna hongsanring nati.”
22Hiva rakip hi suak na rang le tungtheina ranga Puma tashanthei ning alui ri ani: 23“Enru, dongmathiang khat in chungrik om na ta pasalnai khat nei nati, a ming ha anmani ning Immanuel,” tinanti hiva hi, “Pathian ning ana om pui tina ani.”
24Josep a jal tenna a hongthuipha, Puma thaneithiang chong be nuk jui a a man Mari ha a lomnu a manchang jui. 25Tak-ha a man a phut na pasalnai ha a nei maje, mun lui kan chunpuimak, naite ha Josep ning a ming Jisu tia alui phua.
अहिले सेलेक्ट गरिएको:
MATHIU 1: AIMOLBSI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.