یوحنا 5
5
عیسی حاوضونگ باشیندا بیر مِریضی شِفا بِریَر
1بیرآز واقتدان سُنگ یَهودیلِرینگ بیر بایرامی بُلدی و عیسی مونونگ اوچین اورشلیمه گیتدی. 2اورشلیمده قُیون دِروِزه‌سینینگ یانیندا بیر حاوض باردی. بو حاوضونگ عِبرانیچا آدی بِیت‌حِسدا بُلوپ، اُنونگ تُوِرِگینده بَش اِیوانی باردی. 3بو اِیوانلاردا قاتی کَن مِریضلِر، کُرلِر، آغساقلار و فِلِجلِر یاتیردیلار. [اُلار سووونگ چایقانماغینا قاراشیاردیلار. 4واقتال-واقتال خودایینگ بیر پِریشده‌سی شُل حاوضا گیریپ، سووی چایقایاردی. سو چایقانان واقتیندا اَوَّلکی بُلوپ سووا گیرِن اُز مِریضچیلیکدِن شِفا تاپیاردی.]
5شُل یِرده اُتوز سِکیز ییل بَری دِرد چِکیپ یاتان بیر مِریض باردی. 6عیسی مِریضی گُروپ، اُنونگ اِنچِمه ییلدان بَری بو دِردی چِکیَندیگینی بیلدی. شُنونگ اوچین اُندان: «شِفا آلماق ایسلِیَرسینگمی؟» دییّپ سُرادی. 7مِریض: «اِی آقا، سو چایقانان واقتی مِنی حاوضا سالجاق هیچ کیمیم یُق. مِن باریانچام، باشغا بیری مِندِن اُنگ حاوضا گیریَر» دییّپ جُغاپ بِردی. 8عیسی اُنگا: «تور، دوشِگینگی آل-دا، یُری!» دییدی. 9یانگقی آدام دِرِّو شِفا تاپیپ، دوشِگینی آلدی-دا، یُریپ باشلادی.
بو واقا سَبَّت گونی بُلوپ گِچدی. 10مونونگ اوچین یَهودی باشلیغلاری شِفا تاپان آداما: «بو گون سَبَّت گونی، سانگا دوشِگینگی گُتِرمِک قاداغان» دییدیلِر. 11اِمّا شِفا تاپان آدام اُلارا: «مِنی شِفا بِرِن آدام مانگا: ”دوشِگینگی آل-دا، یُری“ دییدی» دییّپ جُغاپ بِردی. 12اُندان: «سانگا: ”دوشِگینگی آل-دا، یُری“ دییِن آدام کیم؟» دییّپ سُرادیلار. 13یُنه شِفا تاپان آدام اُنونگ کیمدیگینی بیلمِیَردی، سِبَبی عیسی شُل یِردَکی جِماغاتینگ آراسینا گیریپ گیدیپدی.
14موندان سُنگرا عیسی عیباداتخانادا اُل آدامی گُردی: «اینه، شِفا تاپدینگ، موندان بِیلَک گونَه اِتمه، یُغسام باشینگا موندان بِتِر گونلِر گِلِر» دییدی. 15شِیلِلیکده، یانگقی آدام باریپ، اُزونی شِفا بِرِنینگ عیسادیغینی یَهودی باشلیغلارینا آیتدی.
یاشاییش بِریَن اُغول
16بو ایشی سَبَّت گونی اِدِندیگی اوچین، یَهودی باشلیغلاری عیسانی اِذیِت بِرمَگه باشلادیلار. 17اِمّا عیسی اُلارا: «مِنینگ آتام شو گونه چِنلی ایشلَپ گِلیَر، مِن هِم ایشلِیَرین» دییّپ جُغاپ بِردی. 18شو سِبَپدِن یَهودی باشلیغلاری اُنگکودِن-ده بِتِر غاضابلانیپ، اُنی اُلدورمِگینگ فیکرنه دوشدولِر. سِبَبی اُل دینگه سَبَّت گونونی پُزماق بیلِن قاناغاتلِنمَن، اُندان باشغا، خودایا آتام دییّپ، اُزونی خودایا دِنگِیَردی.
19عیسی اُلارا شِیله جُغاپ بِردی: «سیزه دُغروسینی آیدیارین، آتاسینینگ اِدِن زاتلارینی گُرمِسه، اُغول اُز-اُزوندِن هیچ زات اِدیپ بیلمِز. آتاسی نَمه اِتسه، اُغول-دا شُنی اِدیَندیر. 20چونکی آتا اُغلی سُییَر، هِمّه اِدیَن زاتلارینی اُنگا گُرکِزیَر. هاووا، اُل اُغلا موندان هِم بِییک ایشلِری گُرکِزِر، شُندا هِمَّه‌نگیز مونگا حایران قالارسینگیز. 21آتانینگ اُلولِری دیرِلدیشی یالی، اُغول-دا ایسلَن آدامی دیرِلدِر. 22آتا هیچ کیمینگ اوستوندِن حُکوم چیقاریان دَلدیر، اُل هِمّه قاضیلیغی اُغلا تابشیراندیر. 23شِیلِلیکده، آتا حُرمات قُییانلار اُغلا-دا حُرمات قُیمالی بُلارلار. اُغلا حُرمات قُیمایان آدام اُنی ایبِرِن آتا-دا حُرمات قُییان دَلدیر.
24«سیزه دُغروسینی آیدیارین، مِنینگ سُزلِریمی دینگلَپ، مِنی ایبِرِنه ایمان گِتیرِن آدام اِبِدی یاشایشا اِیه بُلیاندیر، اُل آصلا مَحکوم بُلماز. اُل اُلومدِن یاشایشا گِچِندیر. 25مِن سیزه دُغروسینی آیدیارین، خودایینگ اُغلونینگ سِسینی اُلولِرینگ-ده، اِشیتجِک واقتی گِلِر، بو واقت ایندی گِلدی. اُنونگ سِسینی اِشیدِنلِر یاشار. 26چونکی آتانینگ یاشاییش بِریپ بیلشی یالی، اُل اُغلا-دا یاشاییش بِرمِک ایختییارینی بِردی. 27اُنونگ اینسان اُغلودیغی اوچین، اُنگا قاضیلیق اِتمِک ایختییارینی-دا بِردی. 28مونگا گِنگ قالمانگ، سِبَبی قابرداقیلارینگ هِمّه‌سینینگ اُنونگ سِسینی اِشیتجِک واقتی گِلِر. 29یاخشیلیق اِدِنلِر یاشاماق اوچین، یامانلیق اِدِنلِر بُلسا مَحکوم بُلماق اوچین دیرِلِر.
عیسی بِرلِن شاهاتلیقلار
30«مِن اُز-اُزومدِن هیچ زات اِدیپ بیلمِیَرین. آتامدان نَمه اِشیتسِم، شُنونگ یالی حُکوم چیقاریارین. مِنینگ قاضیلیغیم حاقدیر، سِبَبی مِن اُز ایسلِگیمَه گُرَه قاضیلیق اِتمِیَرین، مِنی ایبِرِنینگ ایسلِگینی بِرجای اِدیَرین.
31«اِگِر مِن اُزوم حاقدا شاهاتلیق اِتسِم، اُندا بو شاهاتلیغیم حاقیقی بُلماز. 32مِن حاقدا شاهاتلیق اِدیَن باشغا بیری بار. اُنونگ اُزوم حاقدَکی شاهاتلیغینینگ دُغرودیغینی مِن بیلیَرین. 33سیز یحیانینگ یانینا آداملار یُلّادینگیز، اُل هِم حاقیقاتا شاهاتلیق اِتدی. 34اِمّا مِن اینسان شاهاتلیغینا مَحتَج بُلماسام-دا، مونی سیزینگ نِجات تاپماغینگیز اوچین آیدیارین. 35یحیی نور سِچیَن ایشیق یالیدی. سیز آز سالیم هِم بُلسا، اُنونگ نوروندا شاتلیق ایسلِدینگیز. 36اِمّا مِنینگ یحیانینگقیدان-دا خاص بِییک شاهاتلیغیم بار، سِبَبی بِرجای اِتمِگیم اوچین آتانینگ اُزومه تابشیران ایشلِری، یَعنی شو اِدیَن ایشلِریم مِنی آتانینگ ایبِرِندیگینه شاهاتلیق اِدیَر. 37مِنی ایبِرِن آتانینگ اُزی هِم مِن حاقدا شاهاتلیق اِتدی. یُنه سیز اُنونگ نه سِسینی اِشیتدینگیز، نه-ده یوزونی گُردونگیز. 38قالبینگیزدا اُنونگ سُزلِری یُق، سِبَبی سیز اُنونگ ایبِرِنینه ایمان گِتیرمِیَرسینگیز. 39سیز اِبِدی یاشاییش مُقادِّس یازغیلاردادیر دییّپ گومَن اِدیپ، اُلاری ایخلاص بیلِن اُورِنیَرسینگیز. اُلار بُلسا مِن حاقدا شاهاتلیق اِدیَرلِر. 40اِمّا سیز یاشایشا اِیه بُلار یالی، مانگا گِلمِک ایسلِمِیَرسینگیز.
41«مِن اینسانلاردان اُوگی آغتارمایارین. 42اِمّا مِن سیزی تانییارین، سیزینگ قالبینگیزدا خودایینگ سُیگوسی یُق. 43مِن آتامینگ آدیندان گِلدیم، سیز بُلسا مِنی قابول اِتمِیَرسینگیز. یُنه باشغا بیری اُز آدیندان گِلَیسه، سیز اُنی قابول اِدِرسینگیز. 44سیز بیری-بیرینگیزدِن اُوگولِر قابول اِدیَرسینگیز، اِمّا یِکه خودایینگ اُوگوسینی قازانماغا چالیشمایارسینگیز. اُنسُنگ نَدیپ سیزده ایمان بُلسون؟ 45آتانینگ اُوونده مِن سیزی عاییپلارین دییّپ گومَن اِتمَنگ. سیزی عاییپلایان اُز اومید باغلایان موسانگیزدیر. 46سیز موسی اینانسادینگیز، اُندا مانگا-دا ایناناردینگیز، سِبَبی اُل مِن حاقدا یازدی. 47اُنونگ یازانلارینا اینانمایان بُلسانگیز، اُندا مِنینگ آیدیانلاریما نَهیلی اینانجاقسینگیز؟»
अहिले सेलेक्ट गरिएको:
یوحنا 5: TUKIR
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© Turkmen Truth