Pi zi tiki 13
13
1War Egipte par Abram a hala amai a Negev, ni gaiɗi munini, gaini wazagaini paŋ, Lot a na fu gaini lai.
Abram gaini Lot e ɓûrwi edi siɗi marɗi par
2Abram a na fu a ɗif zi farai gara, farani faraini viya, arzaŋni viya, orni viya lai. 3War Negev par a hala agwi agwi haa a Betel ta, haa won hlai n'a sumna ka woni avut, arbaɗi Betel gaiɗi Aï. 4Won hlai n'a rgasi ka gûwiŋ zi yi ɓaka gobi na woni ɗa, Abram a siiwa Alaw woni a yikaŋ ɓa: EPIƊ-ƊAI.
5Lot n'a na fu gaini Abram, ni lai a na fu gaini haakai, gaini adumai, gaini ɵaakai, gaini gumuni lai. 6Nagai e zi viya ta, faraiɗi a za viya ta lai, hlai a kiɗa a tikiɗi kir kai, hlai zi simi faraiɗi a tikiɗi kir kaalai. 7Kanaaniyakai gaiɗi Perizitekai lai e ɗi fu midini afti ni paŋ, nɵa, hiy a niya arbaɗi ɗai zi giɗimi farai na Abram gaiɗi na wiini Lot. 8Abram a miɗini wiini Lot: A pɗem buri hiy a za arba gaiku tuku kai, arbaɗi ɗaiŋa zi giɗimi gaiɗi na wiiku kaalai, tumu, mu ɗumu ɗai ktai. 9Afti gaini abaini paŋ ɗa aŋ si wuzaku na su, a pɗem ɓa, mu ɓurwumu edi siɗi marmu par, na ɓa ku hala war gal n'azumai sek ɗa, ta mu hala wiya war gal n'amai sek, na ɓa ku hala war gal n'amai sek, ta mu hala wiya war gal n'azumai sek lai. 10Lot a yima arni amai a tala hlai na plas na wulani Yurdan ɗa paŋ a na diina haa a Suwar ta, hlai ni ɗa a na ka maini zardeŋ na wiini EPIƊ-ƊAI nɵa, maini afti n'Egipte ɵa lai, wuzani hlai n'EPIƊ-ƊAI a tuura fuŋ n'abakai na Sodoma gaiɗi Gomora edi kai hai ɗa. 11Lot a vara hlai na plas na wulani Yurdan, a zogo piɗi futi na dawai par, e ɓûrwi edi siɗi marɗi par. 12Abram a sumna war Kanaan, Lot a sumna war fuŋ n'abakai na midini hlai na plas na Yurdan, a pa gumuni haa a Sodoma, 13na ɗai na warni e ɗi ɗai na maafanai gara, e zi tuwur na meefeŋ sini EPIƊ-ƊAI gara lai.
14Asakal na Lot a ɓurwa edi sini Abram par li, EPIƊ-ƊAI a miɗini wiini Abram: Buri nɵa yima arku amai won hlai na k'aŋ won na par, tala arku azumai sek, amai sek, piɗi futi na dawai par, piɗi futi na koskoi sek lai. 15Nɵa afti na ku talaŋ aŋ tuku na paŋ aga mu suŋku aŋ wiiku gaini pinzibaku lai haa kureɗ. 16Aga mu bunda pinzibaku viya maini kai kai na agoɗom nɵa haa dai dai na ɓa ɗif a kiɗa aŋ pɵa kai kai na agoɗom kai ɗa, a kiɗa a pɵa pinzibaku kaalai. 17Faka amai, gunasi afti pini mogoni gaini brukni lai, buri mu dara mu suŋku wiiku. 18Abram a zogosi gumuni, a sumna gobi ɵimani luwaŋai n'abakai z'alaw na Mamre, na gobi gaiɗi Hebron. A rga gûwiŋ zi yi ɓaka burini EPIƊ-ƊAI woni.
अहिले सेलेक्ट गरिएको:
Pi zi tiki 13: MUSGUM
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964