Genesis 4
4
Nabetangan it mga anak na Adan
1Ta, paribasay nagꞌasawa na Adan, duwa ni Eva, ega naꞌlay bawnga dimnarugmatiꞌ na si Eva ngayti. Sumakit i beteng ya ngayti, lalaki. Piyangaranan yat ki Cain ka maat ya, “Nanganak akut lalaki kat ildaw it AMPUꞌANG DIYUS.” 2Pagpanganak nira siꞌ, lalaki naga. Si Abel i ipiyangaran.
Pagdakulaꞌ it duwa ngayti, si Abel, manigꞌeper it mga ayep nira. Si Cain, yay kanyang naꞌirgan, manigꞌuma. 3Iyan naꞌlay na, nagbuwat si Cain it pasalamat ya duꞌun it AMPUꞌANG DIYUS. Giyamit ya, garing na kat mga luwak ya. 4Ki Abel, nagbuwat gasiꞌ. Anak nat mga pagꞌeperan ya ngayti i pinsiꞌan ya. Tabaꞌ, nga piyakamagayeng bagiꞌ kat bilug it ramu-ramu, i giyamit ya. Nasagyaan it AMPUꞌANG DIYUS si Abel baw kanya ngayti nga pasalamat. 5Temed si Cain ngayti baw kanyang pasalamat, ega siyagyaan it AMPUꞌANG DIYUS. Egay beken, miniseg na si Cain, namales nay rupa ya.
6Piyakisugidan it AMPUꞌANG DIYUS si Cain. Maat ya, “Unuy magkaꞌisgan mu, Cain, baw unuy pagpamalesan it rupa mu? 7In beteꞌ magayen i pagbuwaten mu, daꞌga baꞌ sagyaan ku gasiꞌ ikaw? Temed in ega ireg mu nga muwat it magayen, magꞌindadangep it kasalaꞌan. Sabap kasalaꞌan, subuk ramu-ramu nga magꞌaꞌapaꞌ nga kuturikeb it imu. Talagang pagtiꞌsen ya ikaw. Temed kaꞌilangan paꞌere-eres ka nga indaꞌegen mu kanya.”
8Ta may esang aldaw nga diyaran ni Cain i ariꞌ ya nga si Abel it nagpaꞌuma. Ta napanaw na sira. Iyan duꞌun na sirat uma, egay beken inimatay ya na.
9Ega naꞌlay inaat it AMPUꞌANG DIYUS si Cain ngayti, “Ari na si Abel nga ariꞌ mu?”
Maat i tubag ni Cain, “Bilaꞌ, taꞌway, adimaat akuy manigꞌarigrat ariꞌ ku ngayan!”
10Temed maat it AMPUꞌANG DIYUS it kanya, “Unuka atkayan i binwat mu? Isugid tat imu, iyan duguꞌ it sulsug mu nga timnuruꞌ duꞌun it lugtaꞌ, subuk magꞌesang, nga magpangabang it aken nga belsen ta ikaw. 11Kayti, sumpaan ka naytu. Panyaꞌ nat imu i magꞌarigra it urumaan ngaytu, sabap it piyaturuꞌan mut duguꞌ it ariꞌ mu i lugtaꞌ ngaytu. 12Garing kayti, maski magpaꞌres ka it panguma-uma mu, talagang ega manggayen. Magluꞌug-luꞌug nay baraꞌan mu.”
13Maat i tubag ni Cain it AMPUꞌANG DIYUS, “Abaa, dakulaꞌ nang banar i tiksaꞌ mut aken. Subuk ega na makayaan ku. 14Ka ungaytu, pagꞌimugawun mu na aku situt lugtaꞌ ngaytung urumaan, baw ega na mapakay nga kat adapan mu paꞌ aku. Magbaraꞌ aku na ngaytung lemelꞌag. Barang bilaꞌ it atkaytu nay kabetangan ku, siyu-siyuy kaparag it aken, imatayen aku na.”
15Ta it atkayti, miyampang siꞌ i AMPUꞌANG DIYUS. Maat ya, “Ega naga yan atkayan, ka in siyu-siyuy mimatay it imu, pitung dubli i keseg it panriga kut kanya it imu ngaytung panriga.” Egay beken, miyarkaꞌan it AMPUꞌANG DIYUS si Cain, imandaꞌan isaꞌun ega salyaen kanyat in siyu-siyuy makaparag. 16Nagliꞌid na si Cain kat adapan it AMPUꞌANG DIYUS baw napanaw na kanya. Duꞌun nay tiyaꞌidan yat banwa nga Nod, nga ayun kat lebatan it Eden.
Pagpanganak it ki Set
25Nagbeteng siꞌ si Eva ngayti nga asawa ni Adan, sumakit lalaki. Piyangaranan ya, si Set,#4:25 Ireg sugiden it ngaran ngaytu, ganti. ka maat ya, “Binggayan aku nagat Ampuꞌang Diyus it anak nga lalaki nga ganti ni Abel nga inimatay it akaꞌ ya nga si Cain.”#4:25 Siging panganak na Adan it babay, lalaki (kapitulu 5:4), maski tulu lamang ngaytung kalalakiyan i siyangpit situt itung kapitulu. 26Pagpangasawa ni Set, nakaꞌanak it lalaki, piyangaranan yat ki Enos.
Garing duꞌun it iting timpu, nagpapuꞌun nay mga kaꞌanakan ngayti ni Set nga tumaꞌwag it AMPUꞌANG DIYUS nga pagsambaen nira na it mamagtingped.
अहिले सेलेक्ट गरिएको:
Genesis 4: TBWONT
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 1992, Wycliffe Bible Translators, Inc. All rights reserved.