Juan 8
8
1Temed si Jesus, timnungul kanya duꞌun it Mungsuꞌ it Olibo. 2Pagꞌeyag it aldaw, nagpaꞌuliꞌ naga kanya duꞌun it Templo. Minlep siꞌ duꞌut kanya i muꞌsang mga taw duꞌun. Miyadung si Jesus bawnga tiyulduꞌan ya siꞌ sira. 3Iyan magpanulduꞌ na si Jesus, may miyabut nga mga manigpaꞌyag it urdin baw mga Pariseo. May taban nira nga nadakep nira nga pagꞌaꞌasawaen nga babay nga may lalaki ya. Piyatindeg niray babay ngayti duꞌut adapan nira, 4baw maat nira it ki Jesus, “Manigtulduꞌ, babay ngaytu, nadakep nga may lalaki ya. 5Ta it ipiyagꞌurdin ni Moises duꞌut mga kaꞌurdinan nga buntalan it batu it seked matay i mga magbuwat it subung nat kanya ngaytung binwat, ta kayti, unuy masugid mu?” 6Atkayti i ingkut nira ka eget na nirat sigapul it ki Jesus ngayti, isaꞌun may makadimanda nira nga kuntraꞌ it kanya.
Temed ega timnubag si Jesus. Rimnungguk ga kanya bawnga simnurat duꞌun it lugtaꞌ it tutulduꞌ ya. 7Mga magꞌingkut ngaytit ki Jesus, sigi-sigi nga ingkut nira. Ta it atkayti, timnindeg si Jesus bawnga miyampang, nga magꞌaat, “In siyu manggid it imyu i egay kakasalaꞌan, iyan i mapakay nga muꞌna nga muntal it kanya it batu.” 8Pagkaꞌampang ya kayti, kimnantud kanya ka simnurat siꞌ duꞌut lugtaꞌ.
9Pagkagneg it mga magꞌingkut ngaytit ki Jesus, namagtekas-tekas na sira. Uꞌnay mga magugurang, bawnga mga mangaꞌwaꞌen seked ega nay naꞌped it kanira duꞌun, si Jesus mana baw babay ngayti nga magtitindeg naga duꞌut adapan it katataawan. 10Lintegan kanya ni Jesus baw iningkut, “Namagpaꞌunu nayan sira? Unu, egay rimiga it imu?”
11Katubag i babay ngayti, maat ya, “Ta ega, Agalen.”
“Ta maski aku,” maat ni Jesus, “ega rigaen ku ikaw. Mapanaw ka na baw pedkanan mu nay buwat it kasalaꞌan.”
Ega tiyanggap it mga Pariseo i pamatuud ni Jesus pasar it sadili ya
12Pagsaꞌup siꞌ ni Jesus it mampang duꞌun it mga taw, maat ya, “Aku ngaytu i bilang tidaw nga magbegay it eyag kat pikiran it mga taw situt sinirungat langit. Iyan sumunud it aken, ega na subung it magpanaw it delemen, sabap pagꞌeꞌyagan na kanyat tidaw ngaytu nga magbegay it kaꞌgenan nga egay kaskedan.”
13Inaat kanya it mga Pariseo nga duꞌun mamagpagneg, “Sadi-sadili mu i pamatuud mu ngayat bilug mu. Ega mapakay yan nga pakimatuudun i pamatuud mu ngayan.”
14Katubag si Jesus it kanira, maat ya, “Maski maat mi sadi-sadili ku i pamatuud ku it bilug ku, temed matuud tuy pagꞌaaten ku ngaytu, sabap urut ku in ari giyaringan ku baw in ari aduꞌunan ku. Temed kamu, ega magkaꞌrutan mi in ari giyaringan ku baw in ari aduꞌunan ku. 15Magꞌukuman kamu uyun kat pangukuman it taw, temed aku, egay pagꞌukumanan ku nga maski siyu. 16Temed maski mukuman aku, tamaꞌ naga i iꞌukuman ku, sabap ega lamang aku i magbetangan it ukuman, in daꞌga duwa kami nagat Amaꞌ ku nga nagtaꞌeg it aken it paꞌasitu. 17Magsusurat naga duꞌut siyubli-subli mi nga mga kaꞌurdinan nga magꞌaat duꞌun, in nagsubung i pamatuud it duwa na nga magpanistigu, kaꞌilangan pakimatuudun. 18Ta aku i esa, ka magpamatuud aku pasar it sadili ku. Yay ikadwa nga magpamatuud gasiꞌ, Amaꞌ ku nga nagtaꞌeg it aken.”
19Pagkagneg it mga taw ngayti, miningkut sira nga magꞌaat, “Ay ari bayan i Amaꞌ mu ngayan? Ari pagꞌaꞌanuꞌan ya?”
Tumubag si Jesus, maat ya, “Yay matuud, it ega naga kilala mi aku, simpri ega naga kilala mi i Amaꞌ ku. In beteꞌ magkakilalaan mi na aku, simpri makilalaan mi naga gasiꞌ kanya.” 20Mga itu ngaytu, inampang ni Jesus iyan magpanulduꞌ kanya duꞌun it esang bagiꞌ it Templo nga duꞌun manggid it adeꞌdeng it mga berebtangan it bilang ipagbegay it mga taw duꞌun it Ampuꞌang Diyus. Temed ega naga diyakep kanya it maski siyu, ka ega paꞌ naꞌbut i ipiyabetang-betang nga timpu.
Ipiyagrapar ni Jesus nga mga ega magpamayaꞌ it kanya, daꞌsira kaꞌaduꞌut kagayenan ya nga duꞌun it langit
21Saꞌup siꞌ nga inaat ni Jesus it mga katataawan, “Talagang limꞌid aku. Tulusun mi yan aku it temegel, temed matay kamu lamang it ega napasinsiya i kasalaꞌan mi. Daꞌkamu talaga kaꞌaduꞌun it aduꞌunan ku.”
22Pagkagneg nira, namagrunding na sira, nga magꞌaat, “Barang sayan mangeget kanya. Yay paꞌaaten ya ngayang daꞌta kapaꞌaduꞌun it aduꞌunan ya ngayti.”
23Maat paꞌ ni Jesus, “Kamu, taga denaꞌ. Aken, taga langit aku. Mamagtatakenaꞌ kamu situt banwa ngaytu. Aken, ega. Aypaꞌ ega surubung i kat nakem tami. 24Aypaꞌ matuud tuy ipagꞌaat ku ngaytut imyu, nga matay kamu it ega napasinsiya i kasalaꞌan mi. Basta ega pakimatuudun mi i pamatuud ku nga in siyu aku talaga, simpri matay kamu it ega napasinsiya i kasalaꞌan mi.”
25“Tay, siyu ka baytu?” ingkut siꞌ it mga taw ngayti.
“Ta daꞌga baꞌ ipagsugid ku nat imyu it kaꞌlay ngaytu in siyu aku nga matuud?” tubag ni Jesus it kanira. 26“Talagang dakulay maꞌaat ku baw mabetanganan kut ukuman kuntraꞌ it imyu. Temed it matuud i pagꞌaaten it nagtaꞌeg it aken baw in unuy magkagnegan ku nga pagꞌaaten ya, iyan i ipagsugid ku situt banwa ngaytu.”
27Ega nasepsepan it mga taw ngayti nga pagpaꞌiguꞌan ni Jesus, Amaꞌ ya. 28Aypaꞌ maat siꞌ ni Jesus it kanira, “Basta makapatindeg mi na i krus nga pagraransangan it kanya nga Taga Langit nga Ipiyanganak it Taw, sikayan payan matantuwan mi nga talagang matuud i ipagsugid ku nga in siyu aku. Maꞌrutan mi nga egaytuy pagbuwaten ku nga kat sadili ku na lamang, in daꞌga pagꞌampangen ku, iyan nga ipagtulduꞌ it aken it Amaꞌ ku. 29Pirmi nga iba ku i nagtaꞌeg it aken. Ega pagpablagan ya aku, sabap it iyan i pirmi ku nga pagbuwaten, iyan nga magkasagyaan ya.” 30Dakel i namayaꞌ nga nakagneg ngaytit kanya.
Mga Judio nga ega magpamayaꞌ it ki Jesus, maski tungtung-inapuꞌ sira ni Abraham, subuk si Satanas nay giyaringan nira
31Inaat ni Jesus i mga Judio ngayti nga namayaꞌ it kanya, “In pasigi pagsunud mit mga ipagtulduꞌ ku ngaytu, yay matuud, alagad ku nayan kamu. 32Makilalaan mi nayang banar i kamatuudan, baw iyan kamatuudan ngaytu, itu na i paliꞌwan it imyu.”
33“Mga tungtung-inapuꞌ kami naga ni Abraham,” maat i tubag it mga Judio ngayti, “baw egay magkatanudan namen nga naꞌuripen kami it maski siyu. Ta unuka magkaꞌaat mu nga ipaliꞌwan kami?”
34Maat siꞌ i tubag ni Jesus it kanira, “Matuud tuy ipagꞌaat ku ngaytut imyu, nga uripen it kasalaꞌan i in siyu-siyu nga magpasigi paꞌ nga muwat it kasalaꞌan. 35Taw nga uripen lamang, talagang egay kasiguruwan ya nga maneꞌteꞌ kanya kat pamalay-balay it agalen ya it seked kaꞌnu-kaꞌnung timpu. Temed iyan anak it agalen ngaytu, maneꞌteꞌ duꞌun it egay kaskedan. 36Basta aku, nga Anak ngaytu nga paꞌaaten, i paliꞌwan it imyu kat pagkaꞌuripen mi, siguradung liꞌwan kamu nayan nga matuud. 37Talagang urut ku nga mga tungtung-inapuꞌ kamu naga ni Abraham. Temed paribasay lamwat kamu, nga ega pagꞌintindiyen mi i mga ipagpanulduꞌ ku ngaytu, pagpaꞌresan mi aku nga maꞌimatay. 38Ipagsugid ku i mga naltegan ku duꞌut Amaꞌ ku. Atkayan nagay imyu, pagbuwaten mi i in unu-unu nga nagnegan mi duꞌut amaꞌ mi.”
39Timnubag siꞌ i mga Judio ngayti, maat nira, “Si Abraham bay amaꞌ namen.”
“Ta in amaꞌ mi si Abraham,” maat ni Jesus ngayti, “ta unuka pagpasyangan mi i mga buwat yat kanya? 40Ka ungaytu ga, masyaduy kuꞌimatay mit aken, it ipagsugid ku lamang i kamatuudan nga nagnegan ku duꞌut Ampuꞌang Diyus. Ega yan atkayan i ki Abraham nga buwat. 41Iyan mga pagbuwaten mi, subung naga it buwat it amaꞌ mi.”
“Ega naga kami i lupaw,” maat siꞌ i tubag nira. “Ampuꞌang Diyus naga i Amaꞌ namen.”
42“Ta in atkayan,” maat siꞌ ni Jesus ngayti, “in talagang mga anak kamu it Ampuꞌang Diyus, kaꞌilangan maꞌalen mi aku, sabap duꞌun it Ampuꞌang Diyus i giyaringan ku. Garing duꞌut kanya, naꞌasitu aku nat imyu. Ega naꞌasitu aku kat kaꞌirgan ku na lamang, in daꞌga matuud nga tiyaꞌeg ya aku. 43Unuka ega magkasepsepan mi i pagꞌaaten ku? Sabap siguru it ega kutanggapen mi i ipagpangadal ku ngaytu. 44Munugat si Satanas i amaꞌ mi. In unuy ireg ya, iyan i pagkubwaten mi. Yay matuud, mangingimatay kanyat taw garing paꞌ it tagnaꞌ baw kalaban it kamatuudan, ka ega talaga maparagan duꞌut kanya i kamatuudan ngaytu seked it kaꞌnu-kaꞌnu. In magꞌambut kanya, ta it yan nagay adat ya, sabap talagang maꞌambut kanya baw puꞌun kanyat kaꞌambutan. 45Temed paribasay kamatuudan i ipagsugid ku, aypaꞌ ka ega pagpamayaꞌnen mi aku! 46Ka siyu it imyu i magkamatuud nga nagkasalaꞌan aku? In talagang kamatuudan i pagꞌaaten ku, unuka ega pagpamayaꞌnen mi aku? 47Iyan kat Ampuꞌang Diyus nga mga taw, talagang magpagneg sira it ampang ya. Temed daꞌkamuy imyu kat Ampuꞌang Diyus. Aypaꞌ ka daꞌkamu magpagneg it ampang ya ngaytu.”
Magpamatuud siꞌ si Jesus pasar it sadili ya, nga magꞌaat, garing it tagnaꞌ pang tagnaꞌ may kanya nang lagi.
48Inaat siꞌ si Jesus it mga Judio ngayti, “Daꞌga baꞌ matuud i pagꞌaaten namen nga Samaritano#8:48 Mga Samaritano, pagsindiren it mga Judio. Aypaꞌ ireg sugiden it ampang nira nga, “Samaritano ka”, “sisindiren ka gasiꞌ i imu nga subuk mga Samaritano.” ka, baw pagpapulpugun ka it maraꞌe-raꞌet?”
49“Daꞌku baytu pagpapulpugun it maraꞌe-raꞌet,” maat ni Jesus ngayti. “Paggalangen ku talagay Amaꞌ ku, temed kamu, egay galang mit aken. 50Egaytu magtulus aku it sadili kung kabantugan. Amaꞌ ku i baalaꞌ kayan. Kanya i magpanindeg it aken baw magꞌukuman it imyu. 51Kamatuudan tuy pagꞌaaten ku ngaytu, nga in siyu-siyu nga magpangaꞌgenan uyun kat mga ipagtulduꞌ ku ngaytu, ega na labayen yay kamataynen.”
52Inaat siꞌ kanya it mga Judio ngayti, “Daꞌga baꞌ maꞌyag na nga magpulpug ka! Ka naꞌlay nang natay si Abraham baw mga prupitaꞌ. Ta unuka magkaꞌaat mu nga ega matay it seked kaꞌnu-kaꞌnu i in siyu-siyu nga magpangaꞌgenan uyun kat mga ipagtulduꞌ mu? 53Unu, mabantug ka paꞌ it amaꞌ namen ngaytu nga si Abraham? Natay na kanya, subung naga i mga prupitaꞌ. Unu baytuy tanud, in siyu na?”
54Tumubag siꞌ si Jesus, maat ya, “In sadili ku i pagbantugun ku, talagang egay kapulusan kayan. Temed iyan Amaꞌ ku, kanya naga nga pagꞌaaten mi nga Ampuꞌang Diyus mi, kanya bay magpabantug it aken. 55Talagang ega magkakilalaan mi kanya. Temed aku, kilalang-kilala ku kanya. Ka in aaten ku nga ega kilala ku kanya, maꞌambut aku nga subung it imyu nga maꞌambut. Temed iyan i matuud it kilala ku kanya. Pagsunudun baw pagpanindegan ku i kumpur pagꞌaaten ya. 56Nakasagyay amaꞌ mi nga si Abraham iyan naꞌrutan ya nga maltegan yay aldaw it pamaꞌasitu ku. Talagang naltegan ya, aypaꞌ ka nakasagya kanya.”#8:56 Simpri ega naga duꞌun si Abraham it pagsakit ni Jesus, ka naꞌlay nang patay, subrat duwang ribung taꞌun bawnga simnakit si Jesus ngayti. Siguru yay ireg yang sugiden, nakasagya si Abraham iyan naꞌrutan ya nga may mabut kat mga tungtung-inapuꞌ ya nga isiyanggup it Ampuꞌang Diyus, nga si Cristo i paꞌaaten. Aypaꞌ iyan simnakit nay anak ya nga si Isaac it maski gurang na sirang banar, naꞌrutan yang siguradu nga tumanen it Ampuꞌang Diyus i kumpur isiyanggup ya. Aypaꞌ ka nakasagya kanya.
57Sabap siꞌ it iti ngayting inampang ni Jesus, inaat siꞌ kanyat mga Judio, “Ega pay limang pulung idad mu! Ta unuy ikiyalteg mut ki Abraham?”
58Katubag siꞌ si Jesus, maat ya, “Ituy kamatuudan nga isugid kut imyu, parabir ipiyanganak si Abraham, may aku nang lagi.” 59Pagkagneg nira kayti, nagsigkuꞌmit nay mga Judio ngaytit batu ka batuun na kanya. Temed nagpalingeb-palingeb na si Jesus duꞌut katataawan ka nanliꞌwan na duꞌun it Templo ngayti.
अहिले सेलेक्ट गरिएको:
Juan 8: TBWONT
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 1992, Wycliffe Bible Translators, Inc. All rights reserved.