Lúkas 22
22
Judas Iskariyotis ahegbeteviye ginetni adahan gikamaykiswitni Jesus
Mt 26.14; Mk 14.10
1Misekwe aynesa hawkri adahan judeyenevwi gifetrakis adahan igkis axnes muwtoh arih akak bugut miyegbiye adahan kiyene ku samah minikwak Uhokri umahkise muwtohyan gidukwenavrikkis gihiyegavu.
2Neras muwveg kiyatyevwi gikakkis neras kannuhekevutnevwi amin amekene Moís gikumadukan igkis ivegminenes gihiyekemnikis adahan mmahpa igkis umahkise Kiyavwiye Jesus monye. Igkis avise ku nawenetke hiyeg fetyavu ayge hahayruke gikakkisnek givatra.
3Ayteke ner wavitye gikivarakis Satanas ig kawihe pahavwi gaytakkis Kiyavwiye Jesus giwatnivwi kewye Judas Iskariyotis.
4Ayteke nikwe ig Judas Iskariyotis tivik ta gimkatkis neras muwveg kiyatyevwi gikakkis neras avuriwnevwi Uhokri Givin. Ig danuh atere, ig kinetihwe gikakkis adahan ig kamaykiswiye Kiyavwiye Jesus ta gitkis.
5Igkis timapni hene, igkis batek ginaktinkis ka aynsima. Igkis awna git:
— Ku pis kamaykise Jesus wotuh, usuh katiwnihpi adahan ini.
6Igme kaytwa giwnkis:
— Ihi. In kabay nutuh.
Ayteke nikwe ig gihavumpi Kiyavwiye Jesus adahan ig hiyap ku aysaw gihawkan danuh kabayntiwa adahan ig kamaykiswig avawyewa ariw hiyeg.
Iwetrit ahegbet adahan Jesus fetya gikakkis giwatnivwi
Mt 26.17; Mk 14.12
7Ayteke ariwnteke ini, danuh ahawkanavrik adahan ini fet adahan hiyeg axnes bugut miyegbiye. Abet pitatye hawkri abet ini fet ignes judeyenevwi umah muwtohyan adahan kiyene ku samah minikwak Uhokri umahkise muwtohyan gidukwenavrikkis gihiyegavu.
8Ayge nikwe ig Kiyavwiye Jesus awna ta gitkis Pedru gikak Joawh. Giwn:
— Ataknabay ahegbeta pahavwi muwtoh adahan waxniwiy abet ufetrawiy.
9Igkisme ayavgi:
— Kiyavwiye, kineyva pimawkan adahan usuh ahegbetin?
10Igme kaytwa giwnkis:
— Ku aysaw yis parakanten avitit paytwempu Jerusalém, ayge pahavwi awayg patiptak yikaknek. Ig hiyuwe akak kaggap un atiy. Makekwepnay gihavu. Ku kiney ig paraknek arikut payt, yis parak aterewata. 11Awnanabay ta git payt akivara ku yikannuhten awna: “Kineyva xam adahan nah fetya axne muwtoh arih gikakkis nukannuhnivwi?” 12Ayge nikwe igme akka yitnek pahayku xam nopsadnene aynte payt avahnap inuteknene. Arikna ayge madikte ahegbet kuwis. Ahekbetanabay umanawiy ayge adahan wixwiy fetya.
13Igkis piyananene timapni hene, igkis tivik ta avitit paytwempu. Igkis danuh atere, igkis uti madikte ku samah Kiyavwiye Jesus akkamnih gitkis. Ayge nikwe igkis ahegbete madikte adahan igkis fetya axnes muwtoh arih. Pisenwa igkis diyuhe ta git Kiyavwiye Jesus.
Jesus kiyekiswa gitkis giwatnivwi
Mt 26.26; Mk 14.22; 1Ko 11.23
14Ayteke ariwnteke ini ku aysaw ahawkanavrik danuh, igkis atere fetya. Ig Kiyavwiye Jesus bat ahumwa axtet gikakkis giwatnivwi.
15Ayge ig awna gitkis:
— Kennesa kuri adahan nah hiyapkiska mbeyne nutuh. Kibeyne, avit in danuh nutuh, nah kahawkan fetya ay yiyak. Nah ka aynsima axkere inin muwtoh arih yikak ku avim inin. 16Ig muwtoh arakak nudahan. Ku samah ig umehpika gidukwenavrikkis amekenegben marihwa igkis isahptaw, hawata nah umehpikanek. Avim ini nah inyewa keh hiyeg isahptaw. Awetuvye nah ax muwtoh arih yikak akiw he ku aysaw madikte ini arakak danuh nikwe nah axnek inyewa axka aynte amun Uhokri gikumadukan. Henewatbaki in.
17Ayteke ig iwe pohow higeptet. Ig kabayha Uhokri. Ig awna gitkis:
— Amavanay inin win. Mpuse pahavwimpi higap niwntak. 18Kuri nah ka takunima higap win ay amadga inin akiw. Awetuvye nah higap win ay he ku aysaw Uhokri gikumadukan danuh. Henewatbaki in.
19Ayteke ig iwe pahak bugut. Ig kabayha Uhokri. Ig sigkebdih ini bugut ig ibekhepni ta givuwiwkis giwatnivwi. Ig awna gitkis:
— Inin bugut in nihuh ku pariye nah sigkebdihkis yidahanek. Han pitatit yisme axnek bugut ke ininbe kiberevut adahan yis nukiyetninek.
20Ayteke ariwnteke ini pisenwa gaxnikis madikte gimanakis, ig iwe nor higeptet. Ig keh nikak hawata ku samah ig keh akak bugut. Ig awna gitkis:
— Nor higeptet eg Uhokri gahegbetawni nukunewa yidahan. Mmanawa ig Uhokri ahegbete ginetni nukunewa akiw gikakkis hiyeg adahan ku samah ignes humaw gihiyegavu. Nahme sukase numiguhnek yidahan kahadbe ini gahegbetawni in humaw.
Jesus akka ku pariye gikamaykiswitni
Mt 26.21; Mk 14.18; Jo 13.18
21Ayteke ig Kiyavwiye Jesus awna:
— Pahavwi yaytak ay, giwak payak akak nudahan ay aduhyamadga axtet, igi kamaykiswenek ta gitkis nuvetunyavu. 22Nah, ku pariye wageswe awayg amadgaya inin, nah umahkiswanek ku samah Uhokri ikiswanaw nudahan. Amawka ku nah miya, heneme ner ku pariye nuwmasepten igi hiyap mbeyne ka aynsimanek nuvatra.
23Igkis giwatnivwi timapni hene, igkis kinetihwa pawtak amin ku pariyeva kehpiye ini gikak Kiyavwiye Jesus hene.
Ka ba yi ikaw gavitminema pahavwi
Mt 20.25; Mk 10.42; Ro 12.3,10,16; Ef 4.2; Fil 2.3; Tiy 4.6; 1Ped 5.3
24Hawata akiw igkis kavusa mavihpak amin ku pariye gaytakkis pi kiyatenene giwkis.
25Ig Kiyavwiye Jesus hiyapni hene, ig awna gitkis:
— Ka yi muwaka ikaw gavitminema pahavwi. Ikivarat amadgayavu inin igkis ikaw gavitminkis gihiyegavukis. Igkis kabukhewvi gitkis. Heneme igkis kanumkiswa “hiyeg gamnihtenkis”. 26Yisme ka henema. Yidahan nawenyewa. Yisme yidahan ku pariye yaytak yavitmin madikte amawka ku ig ka kabukhaw yit. Amawka ku ig ikaw ke wotbe igwa yibukbe. Ku pahavwi kumadukene amawka ku ig ikaw ke wotbe igwa kumadukakibe. 27Uyay akka nutuh. Pariyeva pi kiyate giwtrikkis hiyeg? Ba pahavwi ku pariye betnene ahumwa gaxten ig axne ayge? Ba kawk ba ner gibuk ku pariye ewkne gimana git? Nah akkite yit ku pariye gaytakkis pi kiyate. Ner ku pariye betnene ahumwa gaxten igi pi kiyate giwtrikkis hiyeg ay amadga inin. Nahme nah ka ikaw kema ner kiyatyema. Nah ikaw kewa pahavwi ibuktibe ay yibet. Amawka ku yis ikaw hawata ke nahbe. 28Yis kibeynevwi nuhiyegavu yis dehewnene kabayntiwa abet mbeyne payak nukakuh. Nikwe aysawnemenek yis hiya ka aynsima kabaykanek. 29Ku samah Niguh iki kumadukaki nutuh, nah hawata nah iki yitnek. 30Avim ini yis axnek payak nukakuh yis higapnek payak nukakuh aynte ku kiney nukumadukan. Hawata yis batnek amadga yevwi kiyatyo adahan yis hiyekne gikakkis madikte izhaewyenevwi.
Jesus akki git Pedru ku igme wihwevye giw
Mt 26.31; Mk 14.27; Jo 13.36
31Ayteke ig Kiyavwiye Jesus awna git Pedru. Giwn:
— Simawh, Simawh, ayipa ikepka kumadukaki git wavitye gikivarakis Satanas adahan ig yihikekten. Ig kiyimwihyi ka aynsimanek adahan yivekiswitni nuwhu hawata ke pahavwi awaygbe ku pariye sassah amutri ayak amadga huw adahan pekkiswiye gumar. 32Henneme nah kuwis piriyepkaw pidahan adahan pis ka tuguhkis pikamaxwan. Kuwewanek ku aysaw pis diyuh nutuh akiw ikinaba pikebyuvwi gawaygikis.
33Igme Pedru kaytwa giwn:
— Kiyavwiye, nah ka isahkiswekere piw. Hiyawa pis kamaxwika, heneme nah ahegbet adahan nah kamaykiswa payak pikak. Hiyawa pis umehpika, heneme nah ahegbet adahan nah umahkiswa payak pikak.
34Igme awna git:
— Pedru, ku avim inin mitipka pis wihwe nuwhunek. Avit takarak awna pahaywowa gawnan pisme ayipa wihwe nuwhunek mpamavut. Avim ini pis awnanek ku pis ka hiyakun. Henewatbaki in.
Ahekbetawnabay adahan nutepkemni yiw
35Ayteke ig Kiyavwiye Jesus awna gitkis madikte giwatnivwi. Giwn:
— Ku samah nah awahkiswey kuhwekwa adahan yis ekkene nuwnuh ta gitkis hiyeg, nah awahkiswey makakura, masakola, makaswatni. Avim ini ba ay arikna muweke yit?
Igkisme kaytwa giwn:
— Kawa, Kiyavwiye. Yuma ariknawnema muwekne wotuh.
36Igme awna gitkis:
— Kurime ka henema akiw. Ku pariye kakakura ba kasakola amawka ig iwe gikakura ig iwe gisakola. Ku pariye yuma giwana amawka ig piyuk pahak gisimsa adahan ig isimne giwana akak egu gisimsawen. 37Mmanawa kuwis ahawkanavrik danuh adahan nah ikaka ke wotbe nah kakehniyebe. Uhokri gannasan kinetihwa numinuh minikwak ku in danuh nutuh. Henewatmeki in danuhnek. Mmanawa madikte ku pariye Uhokri gannasan nudahan in kaba makisu.
38Igkisme timapni hene, igkis awna:
— Kiyavwiye, mmukna gukebikis iwan ay.
Igme kaytwa giwnkis:
— Ikeyvi.
Jesus giviryepkawni ayge Jetsêmani
Mt 26.36; Mk 14.32
39Pisenwa nikwe ig pese ayteke, ig tivik ta avitit ini waxri imuhgivitnene kewye Olivegvit ku samah inpawa ig keh. Igkisme gikannuhnivwi tivike gihapti.
40Ig danuh atere, ig awna gitkis:
— Piriyepkawnabay marihwa yis ka isaksaw arit mbayka.
41Ayteke ig wewkiswe atakesa barew aviyukan. Ig paberetusaw ig piriyepkaw git Uhokri.
42Ig awna:
— Niguh, ku pis mpithekere ini mbeyne nudahan, uya amnihun mpithin nudahan. Heneme ku pimawkanwa in danuh nutuh, ka sam in danuh nutuh. Nah ka kehkere nudahan nubetki. Heneme nah kehkere pidahanwa pibetki.
43Pahaye adahan pahavwi ahj hiyapkiswe git atere, ig ikene gawaygi git.
44Igme Kiyavwiye Jesus wakaymni mpiynevevye. Ig hiyapni hene, ig piriyepkaw pi kihawnate akiw. Ig piriyepkaw ba ahawnavevye he giwnravwi suke ke migatbe suruhpiyebe ta waykborit.
45Ayteke pisenwa giviryepkawni ig kannikew, ig diyuhe ta gitkis gikannuhnivwi. Ig utevgikis himekweke awaku igkis barukiswe mpiynevevye.
46Ig hiyapni hene, ig awna gitkis:
— Mmahpaki yivewkan yis himekbet? Kannikawnay. Piriyepkawnabay marihwa yis ka isaksaw arit mbayka.
Jesus kamaxwika
Mt 26.47; Mk 14.43; Jo 18.3
47Ku samah ig awnempiye inakni iwit, pahabu hiyeg danuh atere. Ner pahavwi gaytakkis giwatnivwi kewye Judas Iskariyotis ig wew pitatyempi gavitkis. Ig danuh atere, ig mpiye danukwa ta gihumwat Kiyavwiye Jesus adahan ig gayhpoketni.
48Ig Kiyavwiye Jesus hiyapni hene, ig wakaymni. Ig awna git:
— Judas, mmah akak ayhpokaki pis nukamaykiswitni, nah ku pariye wageswe awayg amadgaya inin?
49Igkisme neras ku pariye aygnenevwi gikak Kiyavwiye Jesus igkis hiyapni hene, igkis hiyak ku pariye me danuhmet git. Ayge nikwe igkis awna git:
— Kiyavwiye, ba pis muwaka usuh iwi uwana adahan usuh kavetunsigkis?
Pedru ihuke pahavwi awayg gitaybi
Mt 26.51; Mk 14.47; Jo 18.10
50Aynewa pahavwi gaytakkis huwivwihe pahavwi ibukti gidahan ner muwvegviyene gikivarakis. Ig hiwhe gitaybi kihehaptak.
51Ig Kiyavwiye Jesus hiyapni hene, ig awna git:
— Ka ba kehni hene.
Ayteke ig daxe gitaybi adukwen, in humaw akiw.
52Ayteke ig awna gitkis neras muwveg kiyatyevwi gikakkis neras avuriwnevwi Uhokri Givin, neras judeyenevwi giwewkistenkis ku pariye gikamaxwitni atere. Giwn:
— Mmahkay yis ayta akak madikte yiwana akak madikte yasuga? Mmahkay yis ayta nukamaxwitni ayamaw ke wotbe nah amepyebe? 53Takunipti nah ayge yikak yikannuhten ariku Uhokri Givin. Heneme yis ka kiboka kamaxun ayge. Ka sam. Kuwis yihawkanavrik danuh adahan yis keh nukakuh ku samah amisnavye akivara gimawkan.
54Ayteke nikwe igkis kamaxe Kiyavwiye Jesus igkis waxwevgi ta givinekut ner muwvegviyene gikivarakis. Ig Pedru hiyapni hene, ig makeke gihavu butte heneme ig piyawakte giw aynesa.
Pedru wihwa giw Jesus
Mt 26.69; Mk 14.66; Jo 18.15
55Igkis danuh atere givinekut ner muwvegviyene gikivarakis, neras hiyeg hamehe tiket aynte givinbuk. Igkis bat atere ahumwa egu tiket. Ig Pedru hiyapni hene, ig bat aterewata payak gikakkis.
56Ayteke pahavu tino bukitwiyo hiyavgi ayge betnene abet tiket abutni. Eg ivegkak gikak, eg awna:
— Ner awayg hawata wew gikak Jesus.
57Igme wihwe giw. Ig awna gut:
— Kiyavuno, nah kawa hiyakgiwa ner awayg.
58Ayteke ariwnteke ini pahavwi hiyeg akiw hiyavgi atere. Ig awna git:
— Pisnewa gaytakkis Jesus gikannuhnivwi.
Igme kaytwa giwn:
— Ka nahnema.
59Ayteke ariwnteke ini ayiptenesa akiw, pahavwiwa awayg awna akiw:
— Henewa. Ner awayg Jesus gikannuhni. Mmanawa ig hiyeg galileyene hawata ke Jesusbe.
60Igme Pedru timapni hene, ig awna git:
— Nah ka hiyakwa inakni iwit ku kamin pis awna.
Nikwenewa ku samah ig awnempiye inakni iwit, pahavwi takarak awna.
61Avimnewa ini ig Kiyavwiye Jesus iveganaw ta gimkanit Pedru. Igme Pedru hiyapni hene, ig kiye inakni ku pariye Kiyavwiye Jesus giwn kuhwekwa ta git amin: “Avit takarak awna pahaywowa gawnanek, pisme ayipa wihwe nuwhunek mpamavut.”
62Ig kiye inakni giwn nikwe, ig pese ayteke. Ig kiyemina gitaraksan mpiynevevye. Ig biyuk gikan. Ig tihene ayge.
Hiyeg biwh Jesus
Mt 26.67; Mk 14.65
63Avimwata ini neras hiyeg ku pariye Kiyavwiye Jesus ay giwakukis, igkis biptevgi igkis hiyaraptihpig.
64Ayteke igkis wanakotevgi igkis biwhbokevgi. Igkis awna git:
— Ku pis Uhokri gawneve, asa akka wot ku pariye pibiwhatepten.
65Ayteke igkis awna arakembet iwit akiw adahan gimiythetni.
Jesus ay givetun muwvegviyene gikivarakis
Mt 26.57; Mk 14.55; Jo 18.12
66Hewke nikwe hawkanawa madikte judeyenevwi giwewkistenkis igkis keh givahdukawnikis. Igkis pahadguhwe payak gikakkis neras muwveg kiyatyevwi gikakkis neras kannuhekevutnevwi amin amekene Moís gikumadukan. Ayteke igkis waxwase Kiyavwiye Jesus ta givetunatkis. Ig danuh atere, igkis awna git:
67— Ku pis Cristo, ku pis Uhokri gikanyan adahan ukumaduketni, asa akkaw wotuh.
Igme kaytwa giwnkis:
— Ku nah akkaw yit, yisme ka iha inakni nuwnuh. 68Wake nah ayavyibe amin inakniwata, yis kawnata kaytwakam. 69Kuri yis batebdedbi adahan yis hiyekne nukakuh. Heneme kuri aytakihan nah ku pariye wageswe awayg amadgaya inin, nah batnek ayge gihumwa Uhokri detye ay amun ini iwetrit ku pariye kane nikiytanisima kihehaptak. Avim ini nahme hiyekne yikaknek nikwe.
70Igkisme timapni hene, igkis awna payakmin:
— Mmah pisnewa Uhokri gikamkayh nikwe?
Igme kaytwa giwnkis:
— Nahnewa ku samah yis awna.
71Igkis timapni hene, igkis awna:
— Pariyeki umawkanwiy akiw? Wixwiy ka muwaka hiyeg akka wotwiy ariknawnema Jesus gitaraksan akiw. Kuwis ig tarakse ay wowtrikwiy. Ig makukse Uhokri ay wowtrikwiy. Uyay katiwnise ini gitaraksan git.
अहिले सेलेक्ट गरिएको:
Lúkas 22: pluPB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2018, Wycliffe Bible Translators, Inc. All rights reserved.