Lúkas 23
23
Jesus ay givetun Pilatus
Mt 27.1,11; Mk 15.1; Jo 18.28
1Ayteke nikwe igkis kannikawbet igkis waxwe Kiyavwiye Jesus ta givetunat ner hiyaptigi romayene ig Pilatus.
2Igkis danuh atere, igkis kavusa kamiyevgi git Pilatus. Igkis awna git:
— Ig ner awayg mbeyhene uhiyegavu judeyenevwi gihiyekemnikis. Ig awna gitkis adahan igkis ka katiwnih ikivarat. Ig ikewne ke wotbe igwa ukivarabe, ke wotbe ig Cristobe, ig Uhokri gikanyan adahan ukumaduketni.
3Igme Pilatus timapni hene, ig aya Kiyavwiye Jesus:
— Mmah pis judeyenevwi gikivarakis?
Igme kaytwa giwn:
— Henewa ku samah pis awna.
4 Pisenwa gawnan inakni iwit, ig Pilatus awna gitkis neras muwveg kiyatyevwi ayge gikakkis neras hiyeg pahabunene. Giwn:
— Nah ka uti mbaynema gikehni.
5Igkisme kaytwa giwn akak dagawnka. Igkis awna:
— Ig Jesus matekbetene hiyeg gihiyekemnikis muwapuw Judeyamnaw muwapuw Galileyamnaw he ig danuh atan avitit inin paytwempu.
6Igme Pilatus timapni hene, ig ayavgikis:
— Mmah ner Jesus, mmah ig hiyeg galileyene?
7Igkisme kaytwa giwn:
— Ihi. Ignewa.
Ig Pilatus timapni hene, ig awna:
— Ignewa kiyavwiye Erodis kumaduka hiyeg galileyenevwi. Nah awahkiste Jesus atere gimin adahan igme hiyak gikak.
Ayteke nikwe ig awahkiswig atere gimin Erodis. Avim ini hawkri ig Erodis ayge avit ini paytwempu Jerusalém.
Jesus ay givetun Erodis
8 Ayteke nikwe ig Kiyavwiye Jesus waxwepka atere git. Ig Erodis hiyapni hene, ig bateke gimin. Kibite hawkri kuwis ig hiyepkerevgi mmanawa ig kinetni gak ig givewkankam ig kehkis annut git adahan areketni gidatni.
9Ayge nikwe ig ayaptig akak kibite ayapka. Igme Kiyavwiye Jesus ka kaytwa giwn.
10Amun ini neras muwveg kiyatyevwi gikakkis neras kannuhekevutnevwi gimin amekene Moís gikumadukan igkis tabirbet ayge gimun Erodis, igkis kamiye Kiyavwiye Jesus akak madikte gihawnakis.
11Ayteke nikwe ig Erodis gikakkis gisuwtatavu igkis miyathevgi igkis hiyaraptihpig. Pisenwa ig kadagmankisevgi akak barewye dagam ke wotbe ig ikivaratbe ig awahkiswig diyuhe ta git Pilatus.
12Avim ini hawkri ig Erodis kavuse pasamrak gikak Pilatus. Avit ini igkis ka pasamrak, heneme avim ini igkis kavusa pasamrak.
Jesus daddahkiswika
Mt 27.15; Mk 15.6; Jo 18.39
13Ayteke ariwnteke ini ig Pilatus watihe neras muwveg kiyatyevwi adahan igkis ayta git payak gikakkis neras judeyenevwi giwewkistenkis gikakkis madikte hiyeg.
14Igkis danuh atere, ig awna gitkis:
— Yis waxwe ner awayg nutuh, yis awna nutuh ku ig mbeyhene hiyeg gihiyekemnikis adahan igkis suguh ikivarat. Nah kuwis ayaptig baki inyewatma ig keh hene. Nutuh ig ka keh ariknawnema mbayka ku kamin yis kinetihwa nutuh. 15Ig kiyavwiye Erodis kawnata uti mbaynema gikehni. Inneki keh ig diyuhkiswig nutuh. Ka ik adahan nah umahkisgi. 16Nikwe nuvewkan nah biwhkiswig. Ayteke pisenwa nah isahkiswig.
17Ig Pilatus awna inakni mmanawa mpuse fet ig gibetki isahkis pahavwi awayg ku pariye paraksepkare ayge.
18Igkisme neras hiyeg timapni hene, madikte igkis kabiman. Igkis awna:
— Kawa! Ka isahkisgi! Isahkis Bahabas udahan!
Henebaki igkis kabiman.
19Ig Bahabas ig pahavwi ku pariye padekwika arikut parakseket avatra ku samah ig hahayruke gikak ikivarat ayge avit ini paytwempu, ig umehe pahavwi.
20Igme Pilatus isahkiskere Kiyavwiye Jesus. Ig kavusa kinetihwa gikakkis neras hiyeg 21heneme igkis kabiman, igkis awna:
— Daddahkiswinig udahan! Daddahkiswinig udahan!
22Igme awna gitkis amamnavut:
— Mmahki? Pariye mbayka gikehni? Ka kis adahan nah umahkisgi. Ig yuma mbaynema gikehni. Nah biwhkiswig. Ayteke pisenwa nah isahkiswig.
23Igkisme timapni hene, igkis kabiman kihhaw:
— Daddahkiswinig!
Pilatus matiwniswa
Mt 23.8; 1Ped 5.3
Ig timapni hene, ayge nikwe ig matiwniswe.
24Ig awna:
— Henewa nikwe ku samah gimawkankis.
25Ayteke ig isahkisase ner gayapnikis git, ner ku pariye paraksepkare avatra ig hahayruke gikak ikivarat ig umehe pahavwi. Heneme ig ike Kiyavwiye Jesus ta giwakuritkis gisuwtatavu adahan igkisme keh gikak ku samah neras hiyeg gimawkankis.
Simawh ayava Jesus hiyuh giyakni
Mt 27.32; Mk 15.21; Jo 19.17
26Ayteke nikwe igkis gisuwtatavu tivikevgi avititak ini paytwempu. Avigkume ahin igkis patipteke gikak pahavwi awayg sireneyene kewye Simawh. Ig gaytni powketeke. Igkis hiyapni hene, igkis mpiksaptihpig adahan ig wew gihavu Kiyavwiye Jesus adahan gayavetni hiyuhne giyakni. Igkis ike giyakni ta giteyapminat Simawh. Ayteke pisenwa igkis tivikwiyes akiw.
Tinogben tih giharit Jesus
Lk 21.20
27Ka aynsima hiyeg kabubuknene kuruw gihavu. Ka aynsima tinogben ayge. Egkis tihanokwiyos, egkis kadniyos giharit ka aynsima.
28Igme Kiyavwiye Jesus hiyapni hene, ig iveganaw gumkatkis ig awna gutkis:
— Yis tinogben jerusalémyano, ka ba yi muwaka tih nuharit. Hiyawa yis tih heneme tihnay yiharitwa, giharitkis yikamkayh hawata. 29Mmanawa awah hawkri nehmnik. Avim ini hawkri hiyeg awnanek: “Noras ku pariye ka kehti bakimni egnes ka aynsima gubunugakis. Noras ku pariye yumanano gusarayhnikis gukamayhkis amadgat wayk, yumanano gusukkisnikis egnes ka aynsima gubunugakis. Mmanawa ka aynsima mbeyne ay.” 30Avim ini ignes hiyeg avisnek mpiynevevye he igkis awna ta arit waxri imuwadnene: “Uya tuguh ta uvitit. Ayam usuh.” 31Henewa awah hawkri nehmnik mmanawa ku yis hiyap hiyeg keh mbeye hawkri nukakuh hene, yikakata akiw?
Ig Kiyavwiye Jesus awna inakni, ig tivikwiye akiw.
Jesus daddahka aminat giyakni
Mt 27.33; Mk 15.22; Jo 19.18
32Ayge piyana gikebikis awaykemni kakehniye igkis waxwepka payak gikak Kiyavwiye Jesus adahan igkis umahavepka payak gikak.
33Ayteke igkis danuh ta avitit paha waxri imuhgivitnene kewye “Waxri Hiyeg Gaptiwvitwiye”. Ayge igkis deddehe Kiyavwiye Jesus ta aminat giyakni. Ayteke igkis deddehe neras piyananene kakehniyevwi aminat giyaknikiswa hawata. Pisenwa igkis tabirase giyaknikis ayge gihumwa Kiyavwiye Jesus, pahavwi tabirasaka kihehaptak, pahavwime patuwanaptak.
34Avim ini ig Kiyavwiye Jesus piriyepkaw. Ig awna:
— Pa, uya bayahmina neras ariw inin gitaraksankis. Igkis ka hiyak ku pariye gikehnikis ku avim inin.
Ayteke neras suwtat pisenwa gidaddahnikis, igkis arehwa akak tip adahan hiyap ku pariye kabunuganen igi darih Kiyavwiye Jesus gikawihni. Hene igkis ibekhevyes gikawihni pawtak.
Jesus mahivwihka ayge aminat giyakni
Mt 27.39; Mk 15.29
35Madikte hiyeg tabirbet ayge igkis misekwe ivegbet ta gimkat. Neras judeyenevwi giwewkistenkis igkis ayge gibetkis. Ayge igkis mahivwihpig. Igkis kinetihwa pawtak. Igkis awna:
— Kuwis ig amnihe nawenyevwi hiyeg. Ku ig igyewa Uhokri gikanyan adahan ukumaduketniwiy, hiyawa ig amnih givit hawata.
36Neras suwtat ayge igkis hawata mahivwihpig. Igkis danukwa kennesa git, igkis akeke win suwiyweye ta gimkanit. 37Igkis awna git:
— Ku pis igyewa judeyenevwi gikivarakis, asa amnih pivit.
38Ayge amin giyakni avitmin gitew pahak kagta daddahka atere. Amadga ini kagta awna: “Ig judeyenevwi gikivarakis.”
Jesus bayahmina pahavwi kakehniye ayge amin giyakni
Mt 27.44; Mk 15.32
39Pahavwi gaytakkis neras kakehniyevwi ku pariye daddahka ayge ig hawata ig mahivwihpig. Ig awna git:
— Mmah pis ka Uhokri gikanyanma adahan ukumaduketni? Asa amnih pivit marihwa pis amnih usuh hawata.
40Igme ner kakehniye pahavwiwa akiw ig timapni ner awayg giwn hene, ig himehpig. Ig awna git:
— Mmahki pis awna inakni hene? Mmah pis ka avis gibohri Uhokri? Wis ikaksaka adahan miyaka hawata ke igbe. 41Wis kis adahan miyarap adahan katiwnihpiye utaraksan. Igme ner yuma mbaynema gikehni.
42Ayteke ig awna ta git Kiyavwiye Jesus. Giwn:
— Kiyavwiye Jesus, kiyenanuhba aysawnemenek ku aysaw pis ayta kumaduka.
43Igme kaytwa giwn:
— Ku avim inin pis misakwa numunuh abet kabayka aynte giwetrikis hiyeg kibeynevwi miyaravye. Ihanaba inakni nuwnuh. Henewatbaki in.
Jesus miyap
Mt 27.45; Mk 15.33; Jo 19.28
44Ayteke puwipka danuh. Pahaye adahan kamuw abutni ka kabutni akiw. Hawkri misanpi muwapuw he daraka kamuw in kavusa kabutni akiw.
45Nikwenewa avim ini, ini kamis amaptenten Uhokri giwskeki pi kiyatenene ku pariye ariku Uhokri Givin in sigke pabakak. In woke ahin ta arikut ini Uhokri giwskeki.
46Nikwenewa ig Kiyavwiye Jesus kabiman akak gihawna. Ig awna:
— Pa, nah iki nanmapuh ta piwakurit kuri.
Pisenwa gawnan inakni, giyakek madike. Ig miyap.
47Ayteke pahavwi romayene suwtat gikivarakis ig hiyapni madikte ku pariye danuh avim ini, ig kabayha Uhokri. Ig awna:
— Inyewa ner awayg kibeyne hiyeg.
48Hawata akiw madikte neras hiyepnevwi ku pariye pahadguvu ayge igkis hiyapni madikte hene, igkis biwhe gidukkis awaku giwakemnikis. Hene igkis tivik ta givinwatkis.
49Igkisme neras gidahewekten gukakkis noras kiyavunogben ku pariye danuhpanovwi payak gikak avititak Galileyamnaw egkis tabirbet piyawakte aynesa. Egkis hiyap madikte.
Jesus avuhpika
Mt 27.57; Mk 15.42; Jo 19.38
50Ayge pahavwi awayg giw José. Ig kibeyne hiyeg, waditye hiyeg. Ig pahavwi gaytakkis neras judeyenevwi giwewkistenkis, 51heneme gihiyekemni ka pakekuma akak ku samah igkis kehe gikak Kiyavwiye Jesus ku samah igkis ahegbete ginetnikis adahan giwmasepten. Ig José ig ariwntak paytwempu Arimateya ayge avit Judeyamnaw. Ig wahepnenekwa Uhokri gikumadukan ku aysaw in danuh.
52Ig José hiyapni hene ku samah ayipa Kiyavwiye Jesus gimiremni, ig awna:
— Nah avuhpigte.
Ig tivik ta gimkat Pilatus. Ig danuh atere, ig awna git:
— Kiyavwiye, uya amnihun isaksan adahan nah atere iweviye Jesus givit.
Igme Pilatus kaytwa giwn:
— Hiyawa pis iwepni.
53Ig José timapni hene, ig tivik. Ig danuh atere, ig wiwhe Kiyavwiye Jesus givit aminatak giyakni. Ayteke ig wanakminevgi akak pahak dagam seyne barewbetye. Pisenwa ig sarayhe givit arikut pahayku imewti ariku tip amiyokni ku pariye kote kawihkante.
54Ig keh hene abet ini hawkri adahan ahegbetewvye adahan mayekne abet samdi.
55Noras tinogben ku pariye danuhpanovwi payak gikak Kiyavwiye Jesus avititak Galileyamnaw egkis hiyapni hene, egkis wew gihavu José butte. Egkis hiyap Kiyavwiye Jesus gimew egkis hiyap ku samah givit sarayhpika ta arikut ini gimew.
56Ayteke ariwnteke ini egkis diyuhe guvinekutkis. Ayge egkis ahegbete imihgi akak pomad adahan gimihetni Kiyavwiye Jesus adahan ku samah gavuhpiki. Pisenwa egkis mayeke abet samdi ku samah amekene Moís gikumadukan awna.
अहिले सेलेक्ट गरिएको:
Lúkas 23: pluPB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2018, Wycliffe Bible Translators, Inc. All rights reserved.