Jean 14
14
1Aridjé mèsè sangesè ang, sésè woidjé mèsè té ke Allah, woidjé mèsè té sem to.
2Mè kei té lo Bòi loou kisi baya baya to. Tokou to ban ang, baa ma mpa maresè leo, mbata mao ta da loou karesè.
3Tokou ma mao nda loou maresè, ma ma tél ta kotosè rom té, mbata loou ke ma méh kendé, sésè asidjé kéh nou to.
4Sésè egeridjé loou ke ma mao, ke sésè egeridjé deoè.
5Thomas pa arè, Mbaibé Seigneur, loou ke i ao kendé, djèdjè ngeré lé ang, djèdjè dja geré deoè to di wa?
6Jésus pa arè, Mam nto deo, ke tar ke tokoro, ke tébe. Doou kada ao rò Bòi Allah té ang, sè deo té lom ndja.
7Tokou sésè egeremdjé leo, a egeridjé Bòi to. Gè té loshénè, sésè egerèdjé ke woèdjé mbä.
8Philippe pa arè, Mbaibé Seigneur, etòdjoudjè Bòi Allah, a yèn asedjè.
9Jésus pa arè, Ma misi sei eo nya, a nai egerem ang bai wa, Philippe? Doou ke wom, wo Bòi Allah mbä. Mbata di a epana, Etòdjoudjè Bòi Allah wa?
10I wo ang ke ma méh mè Bòi Allah té, ke Bòi Allah éh mem té wa? Tar ka ma mpa maresè, ma mpa tar ke mem té ndja ang, Bòi ke éh mem té nè nda koula la.
11Woidjé tar lom ke ma méh mè Bòi Allah té, ke Bòi Allah éh mem té, aséh woidjé tar lom mbata kouladjé nèn.
12Tokoro, tokoro, ma mpa maresè, doou ke wo mèa té sem, koula ke mam nda nè na da tokou ban tò, nè na da koula nya wota, mbata mao rò Bòi Allah té.
13Né ke sésè a doudjidjé ke rim, ma ma da né nèn, baa ta kare Bòi Allah a kinga piti mè Ngonè té.
14Tokou sésè a doudjidjé mare né ke rim, ma ma da né nèn.
15Tokou sésè ndikimdjé, sésè a ngemidjé tar ke ma mpa.
16Ma ma doudjou Bòi Allah, ke nè na karesè mare ndjè moso tar, mbata kare nè nisi kesè ke ndò ke ndò.
17Nè nto Ndil tar ke tokoro, ke dooudjé ke nange nèn ase ta tèè ang, mbata dèdè doè aséh ngerè ang. Sésè egerèdjé, mbata nè nisi kesè a na kéh mèsè té.
18Ma ma kïyasè to dangetédjé ang. Ma ma tél ròsè té bai.
19Nai ngadji, dooudjé ke nange nèn a kom ang nga, a sésè a komdjé. Mbata ma méh ke tébe, sésè a kéhdjé ke tébe tò.
20Ndè té nou, sésè a geridjé ma méh mè Bòi té, ke sésè éhdjé mem té, ke ma méh mèsè té.
21Doou ke éh ke tar ke ma mpa, a ngem, yèn to nè ke ndikim, Doou ke ndikim, Bai a ndikè, ke ma ma ndikè, ke ma ma tòdjè rom ndja.
22Judas, ke to Iscariot ang, pa arè, Mbaibé Seigneur, tar nèn a téh to di wa, baa a tòdjoudjè ròi ndja, a etòdjou ròi dooudjé ke nange nèn ang wa?
23Jésus tél pa arè, Tokou doou ndikim, nè na ngem tar lom, Bòi a ndikè, ke djèdjè dja dé da loou kisi lodjè mèa té.
24Doou ke ndikim ang, ngem tar lom ang. Tar ke sésè woidjé to ngäm ang, to ngä Bòi Allah ke oulam.
25Tar nèn ma mpa maresè mbä, tokou mam nai kesè.
26Ndjè moso tar, Ndil ke madji toï, nè ke Bòi Allah a koulè ke rim, nè na tòdjousè né toï, ke na kolè mèsè do tar té toï ke ma mpa maresè leo.
27Ma mïya mè woul kesè. Ma maresè mè woul lom, ma maresè tokou dooudjé ke nange nèn ang. Aridjé mèsè sangesè ang, ke bel da mèsè ang.
28Sésè woidjé leo ma mpa maresè, ma mao, a ma ma tél ròsè té. Tokou sésè ndikimdjé, a kisidjé ke rònèl, mbata mao rò Bòi Allah té, mbata Bòi Allah boui wotam.
29Loshénè ma mpa maresè mbä dongor né téh, mbata tokou né téh, sésè asidjé ta ko mèsè té.
30Ma ma pa tar nya karesè ang nga, mbata mbai ke nange nèn ao dé, né la kada éh rom té ang.
31Mbata dooudjé ke nange nèn ase geré mam ndiki Bòi Allah, mam nda deo kadaba tokou Bòi Allah pa tar arem. Ïdjé tarr, aredjè djao.
अहिले सेलेक्ट गरिएको:
Jean 14: KL1960
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 1960, 2018.
To learn more or sign up for email updates about the mission of BFBS, click here: