Luc 21
21
1Jésus oun kèmè ke tarr, nè no ndjè né kingadjé ke ila né kare ba mè sandoukou narè té.
2Nè no dènè ndouba kada ke to dangeté, nila ngan narè ke ngadji djo.
3Jésus pana, Tokoro ma mpa maresè, dènè ndouba nèn ila narè mè té nya wota dèdè toï.
4Mbata dèdè toï dila mè té sè narè ke to né kare ba kemdè té, dènè nèn ila né dangeté la ke to né toï ke ka ndoko mourou la.
5Tokou mare dooudjé pa tar lo tokou kei Allah, ke nda madji ke err ke koura ke né kare Allah ba, Jésus pana,
6Tar lo né nèn ke sésè woidjé, ndò a dé ke err kada nèn a to do marè té ang, toï a koso nange.
7Dèdè ndoudjè, Ndjè tòdjou tar, ndò ke da nèn a dé wa? Né di wa a dé to né tòdjou tokou nèn ao dé ngosiba ta téh wa?
8Jésus pana, Ngemidjé madji baa doou kada eresè ang, mbata maredjé tokou baya a dé ke rim, pana, Mam nto Christ, ke, Ndò dé ngosiba. Abidjé godè té ang.
9Tokou sésè woidjé dòò to, ke woidjé tar dòòna, edaidjé bel ang, mbata to tar lo né nèn ta kare dé dongor, a gelè nai dé loshénè loshénè ang.
10Bana nè mpa naredè, Gel dooudjé a kï ta mbeté mare gel dooudjé, ke mè béh kö a kï ta mbeté mare béh kö.
11Dò nange a yè, ke boo biriri ke tokou rò too a koso loou té ke dang dang. Mare né ta kare bel nya ke tokou né tòdjou ke dara a dé.
12A dongor né nèn toï, dèdè da kwaasè, da ngäsè ke tar nya. Dèdè da kilasè dji dooudjé té ke mè kei Allah té, ke kei koula té, dèdè da kao kesè no mbaibédjé té ke mbaidjé mbata rim ndja.
13Yèn a to ndò ke ta karesè ta pa tar nadji.
14Tokou ban ke dongor, ngemidjé mèsè ta kedji do tar té ang, tar ke sésè a téhdjé né.
15Mbata ma ma karesè ta ke kemkarè, ke ndjè kembaadjé losè toï a kase mbeté aséh maitar dè té ang.
16Bòsésè ke kösésè ke ngakösè ke noudjoudjé losè, ke bokoradjé losè ndja a ndokosè, dèdè da tòl maredjé horosè té.
17Dèdè toï da mbetésè mbata rim ndja.
18A bi dòsè kada a kòrou nai ang.
19Deo kwaa ngeng losè, sésè a kingaidjé tébe losè.
20Tokou sésè woidjé ndjè pouroudjé kiri Jérusalem toï, tokou ban egeridjé ndò toudjou la dé ngosiba.
21Bana ase kare dèdè ke disi Judée té daïngòrou do tokou err té. Ase kare dèdè ke disi mè béh té dao daka, ke ase kare dèdè ke disi mè ndoo té ntél mè béh té ang.
22Mbata ndè tén to ndò kouka saria, ta kare né toï ke nda mè maketourou té dé to tar ke tokoro.
23Madjang éh ke dènèdjé ke waa sem, ke dèdè ke ngandè il mba ndò té ke nou. Mbata tar ongou nya a to do nange té nèn, ke saria nya a koso do dooudjé té nèn.
24Tokou kiaa a tòldè, ke da kwaadè to beredjé, ke da kao kedè mare béh té ke dang dang toï. Gentildjé a mbòï béh Jérusalem sar ndò lo Gentildjé asenga.
25Né tòdjou a to mè kade té, ke nnè, ke ndètélendè. Né ongou a to horo gel dooudjé té ke nange nèn, mbata dòdè a tourou mbata bar lo tokou man ke mbata man ke ï.
26Dooudjé a dé tokou lo yo mbata bel dadè, mbata dèdè ngebe né ke ao dé dò nange té nèn, mbata singa ke ngem dara a yè.
27Gè té nèn, dèdè da ko Ngon lo doou ao dé ke ndi ke il, ndé ke singa ke ndokoo ke nya.
28Tokou né nèn toï ounkotè ta dé, aaidjé loou ke tarr, Ounidjé dòsè ke tarr mbata kadji losè ao dé ngosiba.
29Nè mpa tar gousou naredè, Woidjé kake toungoutisa ke mare kake toï.
30Tokou kamdè ao oundjou, sésè woidjé ke egeridjé nai loou nounga dé ngosiba.
31Tokou ban tò, tokou sésè woidjé né nèn ao dé, sésè egeridjé béh ko lo Allah éh ngosiba.
32Tokoro ma mpa maresè, gel dooudjé nèn a kwoei ang sar né toï a dé ban.
33Dara ke nange a ndai, a tar lom a ndai ang.
34Ngemidjé tar losè madji, ta kare mèsè dousou ke né ke da rò ndiki ang, ke koto dasè ang, ke koula ta da né ke to ke nange nèn ang, mbata ndò té ke nou a dé dòsè té loshénè loshénè tokou lo koulaa ke ouba da.
35Mbata né nèn a dé dò dooudjé té toï ke isi dò nange té nèn toï.
36Ngemidjé ke ndò ke ndò, edoudjidjé Allah mbata kare singa losè ase ta karesè ta kaïn nèn toï ke ao dé, ke ta karr no Ngon lo doou té.
37Ndò toï Jésus ao tòdjou tar mè tokou kei Allah té. A ke tilti nè ntéh daka, nao nto dò err té ke ria na Olivier.
38Dooudjé toï dé rè té mè tokou kei Allah té ke sindò ta ko tar la.
अहिले सेलेक्ट गरिएको:
Luc 21: KL1960
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 1960, 2018.
To learn more or sign up for email updates about the mission of BFBS, click here: