Matthieu 5
5
1Tokou Jésus wo dooudjé ke baya bayan lé, nè nal do tokou err té. Tokou nè nisi nange ndjè kao gè tédjé dé rè té.
2Nè nteï tè ntòdjou tar ndjè kao gè tédjé, mpana,
3Madji éh kedè, dèdè ke nto dangetédjé deo ndil té,
mbata béh kö ke dara to mbata lodè.
4Madji éh kedè, dèdè ke nnò ke ongou,
mbata dèdè da kisi ke mè woul.
5Madji éh kedè, dèdè ke mèdè to dèkèkè,
mbata dèdè da kinga nange nèn to né ndouba.
6Madji éh kedè, dèdè ke boo ke kounda dadè mbata tar ke
gaté gaté, mbata mèdè a ndan.
7Madji éh kedè, dèdè ke nda mè madji,
mbata dèdè da kinga mè madji.
8Madji éh kedè, dèdè ke mèdè ndaa kaï,
mbata dèdè da ko Allah.
9Madji éh kedè, dèdè ke nto ndjè moso tar,
mbata dabardè ngandjé lo Allah.
10Madji éh kedè, dèdè ke ngädè ke tar mbata tar ke gaté gaté,
mbata béh kö ke dara to mbata lodè.
11Madji éh kesè tokou dooudjé tadjisè ke ngäsè ke tar,
ke ngange tar ngem ke madjang dang dang dòsè té mbata tar lom.
12Ekoukidjé, isidjé ke rònèl nya, mbata kouka losè éh dara tokou bo, mbata tokou ban dooudjé ngà prophètedjé ke tar ke éh dongor kèté aresè.
13Sésè etoidjé to katé ke nange nèn, a tokou katé nèl ang a da karè ntél nèl to di wa? Nè nto madji mbata né kada ang, a ta kongou koro ke ta kare dooudjé mbòï ke gòldè.
14Sésè etoidjé to lokarè ke nange nèn. Béh ke dò err té a kiyaa rè pi.
15Dooudjé ounda pourou lampe té ta kounda kö karè té ang, dounda dò kake té ke tarr ta kare ndokoo dèdè toï ke mè kei té.
16Aridjé lokarè losè ndokoo kem dooudjé té, baa ta karedè do koula ke madji losè, ke ta kòsou gadji Bòsésè ke éh dara.
17Edjidjé ang ke mam ndé ta toudjou tar ndedji aséh prophètedjé, mam ndé ta toudjoudè ang, a ta karedè ndé to tar ke tokoro.
18Mbata tokoro ma mpa maresè, sar dara ke nange nèn ndai ang bai, ngon tar maketourou aséh tar dang dang lo tar ndedji ndai ba kada ang, sar né toï a dé baa.
19Tokou ban, doou ke mbeté tar ndedji ke ngadji ngadji, ke tòdjou dooudjé ban tò, da barè yéh ke ngadji ngadjiba mè béh kö té ke dara, a doou ke ngemdè ke tòdjoudè dooudjé, da barè yéh ke boui mè béh kö té ke dara.
20Mbata ma mpa maresè, tokou gaté gaté losè ndai yéh ke ngà ndjè da maketourou ndedjidjé ke Pharisiendjé ang, sésè a téhdjé mè béh kö té ke dara ndò kada ang.
21Sésè woidjé ke dèdè mpa dare dooudjé ke leo, Ase kare i tòl doou ang. Doou ke tòl doou ase téh loou saria té.
22A ma mpa maresè, dooudjé kada kada toï ke ongou dadè ke ngoködè, dase téh loou saria té. Doou ke tadji ngoköè ase téh rò ndjè gange sariadjé té, ke nè ke mpana, I mbe, nase kao loou kem pourou té.
23Tokou ban, tokou i ao ke né kare ba dò bann té, tokou i edji mei té ke ngoköi éh ke tar dòi té,
24Iya né kare ba loi nò bann té, ao moso tar ke ngoköi dongor, gè té edé ta kare né kare ba loi.
25Moso tar ke ndjè toula dòi loshénè loshénè tokou i ao sa deo ta kao loou saria té, na dòmadjang a nè na kilai dji ndjè gange saria té, ke ndjè gange saria a kilai dji ndjè pourou té, ke a kilai kei koula té.
26Tokoro ma mpa mari, i a téh daka ndò kada ang, nderèng i a kouka ngon narè ke to dòbon baa.
27Sésè woidjé ke dèdè mpa leo, Ase kare i da kaiya ang.
28A ma mpa maresè, dooudjé kada kada toï ke aa dène ke boo ke ta to sa, nè nda kaiya sa mèa té mbä.
29Tokou kemi ke kòl eri ta kari da madjang, etò kemi ke dang, ilè deo eo sei, to madji wota mbata loi tokou barkem ròi kada a nai, wota ta kare dila ròi toï loou kem pourou té.
30Tokou dji ke kòl eri ta kari da madjang, egangè, ilè deo eo sei, to madji wota mbata loi tokou barkem ròi kada a nai, wota ta kare ròi toï ao loou kem pourou té.
31Dèdè mpa leo tò, Doou ke touba dènè la, ase kare nè narè maketourou tar touba dènè.
32A ma mpa maresè, dooudjé kada kada toï ke touba dènè lodè, tokou to tar to loou to madjang ang, dèdè ndadè to dènè kaiya. Doou ke taa dènè ke ntoubè mbä, nè nda kaiya.
33Sésè woidjé mare bai ke dèdè mpa dare dooudjé leo, Ase kare i oubou yo ke ngem ang, a ase kare i ouka are Mbaibé Seigneur tar koubou yo loi.
34A ma mpa maresè, oubidjé yo kada ang, ke ri dara ang mbata nè nto ngèndé gange tar lo Allah.
35Aséh ke ri nange ang mbata nè nto né kongou gòlè, aséh ke ri Jérusalem ang mbata nè nto béh lo tokou Mbaibé.
36Oubou yo dòi té ang, mbata i ase da bi dòi kare poutou aséh ndoul kada ang.
37Ase kare tar ke sésè epaidjé to tar aä aséh eë, mare tar wota yéh ke nèn to lo ndjè kembaa.
38Sésè woidjé ke dèdè mpa leo, Kem mbata kem, ngange mbata ngange.
39A ma mpa maresè, mbetidjé doou ke madjang ang. A tokou doou kada oundai kambòri ke kòl, etourou marè arè tò.
40Tokou mare doou kada ndiki ta kao sei loou gange tar té ta taa koubou ke tarr loi, arè koubou ke bo loi tò.
41Tokou doou kada waai ke singa ta kao deo bo kourou deo kada, ao sa kourou deo djo.
42Are doou né ke nè ndoudji, mbeté né ke doou ndiki ta tounai ang.
43Sésè woidjé ke dèdè mpa leo, Ase kare i ndiki doou ke ndjè nin kei mari ke ta mbeté ndjè kembaa loi.
44A ma mpa maresè, ndikidjé ndjè kembaadjé losè, edoudjidjé Allah mbata dèdè ke ngäsè ke tar.
45Baa ta kare sésè edéidjé ngandjé lo Bòsésè ke éh dara. Mbata nè nare kade la téh dò ndjè ke madjang, ke dò ndjè ke madji tò. Nè noula ndi dò ndjè ke gaté gaté, ke dò ndjè ke gatang tò.
46Mbata tokou sésè ndikidjé dèdè ke ndikisè, nè kouka losè to deo di té wa? Ndjè taa narè lʼimpôtdjé da tokou ban tò ang wa?
47Tokou sésè edaidjé laphia ngakösè kadaba, sésè edaidjé né ke madji wota ke maredjé da wa? Dooudjé ke to Gentildjé da tokou ban tò ang wa?
48Tokou ban, ase kare sésè edéidjé madji toï deo kadaba tokou Bòsésè ke dara to madji toï.
अहिले सेलेक्ट गरिएको:
Matthieu 5: KL1960
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 1960, 2018.
To learn more or sign up for email updates about the mission of BFBS, click here: