Suluet 22
22
Ŋun a sarakiŋdya Abarayama lwukiŋdya na Yisaka a rubaŋga
1 #
Eb 11.17-19
A ko gwe sona i mukök na kine kulya, a Ŋun mori Abarayama, a luŋgi lepeŋ adi, Abarayama! A lepeŋ ruŋge adi, Nan malo.
2 #
2 Dek 3.1
A lepeŋ kulyani adi, Soŋinana ’du muŋdye pilili ilot lo ŋuro logon do nyanyar lo, logon a Yisaka, ko iti ta i jur lo Moria, ko wukiŋdye lepeŋ yu a rubaŋga lo ’yu ’yura i lele geleŋ lo merya logon nan mo tatakin do kulya kanyit lu. 3A Abarayama ŋine ŋien i ko ’bure kobubut, a toŋi kaine nanyit, a joŋgi teton kanyit murek anyen moraddu ko lepeŋ se ko ŋuro lonyit Yisaka; a tutukuŋdye kaden ’yuresi ti rubaŋga, a ŋine ŋien, a iti i pirit nagon Ŋun a takin nye nu. 4A i lor tomusala lonyit, a Abarayama ’bi ’yi konyen kanyit ki, a metaddi nu pirit pajo. 5A Abarayama kulyani ko teton kanyit kulo adi, Gwe ta ni leru ko kaine; nan se ko ŋuro kulo tu nyu i kwakwaddu, a yitwene bot kasu ni. 6A Abarayama ’dumuŋdye kaden ’yuresi ti rubaŋga kune, a ’dukukiŋdye ko ŋuro lonyit Yisaka i kwe, a nye joŋgi kimaŋ ko wale, a se liŋ murek iti tu. 7A Yisaka luŋgi monye lonyit Abarayama adi, Baba! A monye ruŋge adi, Nan malo ŋuro liŋ. A nye pipije adi, Mete, kimaŋ ko kaden makine, ama liya kilolor logon ’yura a rubaŋga? 8A Abarayama waddi adi, Ŋuro lio, Ŋun de ryeryekin mugun kilolor lo ’yura a rubaŋga. A se liŋ murek iti tu.
9 #
Yak 2.21
A se ko ’dure i pirit na takin Ŋun nye na, a Abaryama dibbe pirit ’yuret na rubaŋgajin nyu, a peddi kaden nyin, a toŋi ŋuro lonyit logon a Yisaka, a topirikiŋdye lepeŋ i pirit ’yuret i kaden loki. 10A Abaryama riöddi könin a ’dumuŋdye wale anyen ’duŋgö ŋuro lonyit. 11Ama a malaikatat lo MATAT luŋgi lepeŋ ki yu adi, Abarayama, Abarayama! A nye ruŋge adi, Nan malo. 12A nye kulyani adi, Ko tanyakin könin i ŋilo ŋuro, ma ’di ko konakiŋdya lepeŋ nene ŋo, kogwon soŋinana nan a den adi do a kugga ŋun, kogwon do a ko renyakin nan ŋuro ilot logon a pilili ilot lo ŋuro lo. 13A Abarayama ’bi ’yi konyen kanyit ki, a boboŋgi boboŋgi, mete, a lopijot gwe kanyit i mukök a moka oŋgwora ko kikwa, a Abarayama iti tu a morgi lu lopijot, a ’yuŋe a rubaŋga i pirit na ŋuro lonyit. 14Nyena a Abarayama gwije karin ti nu pirit a Yekowa-yiŋe, #22.14 Yekowa-yiŋe Karin nagon a Yekowa-yiŋe nyönyökö adi MATAT titiŋdu gwoso na kulyarikin tojo ko lo lor na adi, Titiki i mere lo MATAT.
15Köli a malaikatat lo MATAT luŋgi Abarayama ki yu daŋ tomurek, 16#Eb 6.13, 14adi, MATAT lo kulya adi, Nan a milyeju ’diŋdya mugun adi, ’Diri ’diri kogwon do a koŋdya na ŋo, a gwe a ko renyakiŋdya nan ŋuro ilot, logon a pilili ilot lo ŋuro lo, 17#Eb 11.12 nan mo ’diri ’bo ’boro do, a nan mo tuŋdije nyakwariat kulök gwoso kaser ti ki, ko gwoso sese na gwon i kijit na tör; a nyakwariat kulök mo ruddye köjinö ti merok kase, 18#Kon 3.25 a gweyajin lio ti Ŋutu ti kak mo, mo ’yi nan i ’boroja na se gwoso na ’boroji nan nyakwariat kulök na; kogwon do a yiŋga gworo lio. 19Nyena a Abaryama yitöni bot ko teton kanyit kulo yu, a se ŋine ŋien, a moraddi i pirit na geleŋ tojo Ber-seba; a Abarayama gwolore Ber-seba yu.
Nyakwariat ti Nakor
20A i mukök na kine kulya, a se takiŋdye Abarayama adi, Mete, Mileka Köti a yuŋwekiŋdyö luŋösur Nakor ŋwajik; 21Usa logon a kayu, a Buja gwe a loponi, ko Kemuele monye Aram; 22ko Kesede, ko Kajo, ko Piledasa, ko Yidelap, se ko Betuele.
23A Betuele yuŋuŋdye Rebeka. Kilo a ŋwajik budök logon Mileka a yuŋwekin Nakor luŋaser Abarayama. 24nene nakwan na Nakor nagon karin kanyit a Reuma na, Köti yuŋuŋdye Tebak, ko Gakam, ko Takasa, se ko Maka.
अहिले सेलेक्ट गरिएको:
Suluet 22: BBE
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bari Bible © United Bible Societies, 1979.