MATIUS 7
7
Owe pota pak atakam basakamtii atakam
(Luk. 6:32-38, 41-42)
1“Tanom owe apota pak atakam basakamtii bas. Allah tapota pak atakam basakamtii-ombar. 2Tare owe apota pak atakam asakamtiitakam, Allah tapota pakam emes taka asakamtiitem. Tare owe apota pak atakam daytu akoretakam, Allaham tapota pak atakam daytu aokoretem. 3Tare pano kope, tajoo ipit banamek bomon apormakam. Me, tabanamek bomon balok aapeta. Tanom era balok bapor apok aemmakam. Wama tamenem? 4Tabanamek bomon balok aapeta. Me, tare atakam tajoo ipit akoremakam, ‘Dere wobanamek pano baeremosomtam.’ Tare emes atakam bakore wama tamenem? 5Tare pir bae owe. Tabanamek bomon balok ato takamemosomay. Wanam tajoo ipit banamek panokope baereemosomtam, akot aportemarem.
6Akot pak, juuri batetam bas. Tabarmani akotnakam wo bipu bakoromtiitam bas. Are, era pak, bai bambi aipipirjartem, wanam sisi tara aofiromemteman.”
Atakam surga oup Taritipit bajanim atakam
(Luk. 11:9-13)
7“Atakam Allah ajanimay. Allah ere, era atakam ajanimtakam pak aemtamteman. Bandimarporay. Tararawa, era andimarportakam pak andimartaertemakam. Jimsap bakokomay. Allah ere, jimsap tara apaimtamteman. 8Me atakam ajanimemas owe takes era atakam ajanimemas pak ataeremas. Era andimaremas owe, andimarporemas pak andimartaeremas. Allah era jimsap bakokom owe, jimsap apaimtamum. 9Tare jii aptam owe, tajii amos atakam tara ajanimtan apaye, tare eka tajii batetam ape? 10Are enamo atakam tara ajanimtan apaye, tare amber tajii batetam ape? 11Emesare, tare takes jokoman owe. Tare ere, tajii akot pak batetam tamsam. Emesare, Taritipit Surga oup aapeta. Armat Ipitam akot pak atakam ajanimtas owe atetamtem.
12Tare, owe, asan akot, tara baem akot ajimakam apaye, tanom asan akot era owe aemomay. Me Musa aeapome Basakamtam Atakam atakam feam, Allah atakam bakoretam owe aeapomes atakam feam, ere emes atakam are.”
Sata jimsap atakam
(Luk. 13:24)
13“Tare sata jimsap ajiiay. Me neraka bokot jimsap, ere afo. Era bokotam basu. Era bokot ajaremas owe ere, tanane. 14Era jiine baemapaar asan bokot jimsap ere, sata. Era bokot ajaremas oweam ajirisememas. Era bokot andimartaeremas owe, tanane apok.”
Tare era pote atakam baememtam owe turuar atakam
(Luk. 6:43-44)
15“Tare Allah atakam bakoretam pote owe turuar. Are domba tamen tara ajinaomemteman. Me, ajak bomon ere jokomannak wasen ju uri tamen are. 16Tare ere, era owe aememas pak aportakam, tare are pote owe aportemakam. Owe, anggur eek, fa aptam wus kari bakomtaerpor ape? Are, wus eek juas ‘ara,’ fa aptam wus kari bakomtaerpor ape? 17Era akot wus akene takes, eek akot apem. Era kasu wus akene ere, eek pota apem. 18Emesare, akot wus akene, eek pota baemepeomtep asan apok. Kasu wus akeneam, eek akot baemepeomtep asan apok. 19Owe, wus, akot eek bape apok aportas, are era wus ambatiiemas. Ararawa, era wus jisimak akoromtukumemas. 20Emesare, tare era owe era aememas pak aportakam, are Allah atakam bakoretam pote owe aportemakam.”
“Tare demsam apoknak” atakam
(Luk. 13:25-27)
21“Wan owe atakam dera akoromemanis, ‘Tuhan! Tuhan!’ Emes atakam aesimemas. Me, era owe takes, Allah aobaomep owe baemeemem asan apok. Surga oup Daritipit atakam ji bae owe taka are. 22Era Ju Ajiire aemamesto, owe tananeam atakam Dera akoromtemanis, ‘Tuhan! Tuhan! Dare wojuas ajietaerom, wanam dare woatakam owe akoretamom, owe ajak bomon bii ambirimjisimom, jinim bae pak tanane aemom.’ Emes atakam aesimtemas. 23Derarawa, atakam era owe akoromtemin, ‘Tare demsam apoknak. Tare pota pak baemaar owe. Tanom doememey asan baemem bas. Tanom baesosay!’ Emes atakam aesimtemin.”
Tame baeapom ipit jamnuk atakam
(Luk. 6:47-49)
24“Wan owe deatakam jane ajiemas, wanam era atakam ji aemas. Era owe, bimak binip baso ipit taka emes tamen are. Era ipit tame aeapome, are fesis sekumkum ajiire andaejirimapomen. 25Terawa, andaen. Te eombwi daytinak aemesen. Kuur daytuam era tame ambaperemen. Era tame ere, bandaepakamtii apoken. Emesare, era tame fesis sekumkum bomon aememen. 26Wan oweam deatakam jane ajiemas. Era owe ere, era atakam ji bae apok aemas. Era owe, bimak binip apok ipitnak emes tamen are. Era ipit atame bisin ten bambi aeapomen. 27Terawa, andaen. Te eombwiam daytinak aemesen. Kuur daytuam era tame ajumen. Era tamerawa, andaepakamtiien. Are danaisnak aemansen.” Yesus emes atakam aesimen.
Yesus atakam fiak akore atakam
28Emesare, Yesus atakam akorekoromen. Era owe tananeam era aememtame atakam, jinim daytu aeesen. 29Me Yesus atakam aememtame ere, Are atakam fiaknak akoren. Era oweam emes aporesen. Are Yesus era owe aMusa Basakamtam Atakam baememtam owe emes tamen atakam baememtam apok aporesen.
अहिले सेलेक्ट गरिएको:
MATIUS 7: LAIASC
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
@LAI 1994