Matius 24
24
Yesus Jei enggam gunu, “Jena Uwa Sanbagirmana se maltisi.”
(Markus 13:1-2; Lukas 21:5-6)
1Yesus Jei Jena Uwa Sanbagirmanaiserem jebe safe gemer totintyerem, angtane Jei aa jei ne tikwebaatinennerem ga aa ge jalbili Jemnibe, ane Jena Uwa Sanbagirmana ga aane destaibene, ane jei enggam ga aa ge gubili, “Jena Uwa Sanbagirmanaiserem je waakensusu.” 2Yesus ga balbabili, “Aamke seyafter ke aas ima gaarabili? Ai bunarsus ims towas-towastababili, ton-giri daamfenna je afa fas jam falnteyan ton-giri afweraiserem jem sagabe. Ton-giri je seyafter je sege kwirwebitisi, ane onnap ga sege janbisi.”
Angtane kabwaktala uskambar sene domolsa.
(Markus 13:3-13; Lukas 21:7-19)
3Yesus ga gemer nwini taarentumu bosna ga Saitun jebe, angtane Jei aa jei ne tikwebaatinennerem jei jentowai ga aa ge jalbili Jemnibe. Ane ga aane tenebana, “Uwa gwanan ap se bilipmi, Aamei Ijes bilirim, ga fonggalabar se etamwesa? Ane ai bagal bwembwems asa domolsa, jega ai ga asa towaswebili nunu ga mes fal, nunu Aamei gamjon Ijem waraunuluserem, ane nunu umwef jepserem?”
4Yesus ga tamawolbaabili, “Aayai, ga samem-samem jega angtane nensa is jam ne afaf-afaftababiyen. 5Angtane unggwanfer jei sege forobisenye bosna Amanaiserem jeme, aamei ga isene afaf-afaftababisi, jei enggam jam gam gutenaram, ‘Aiba Mesiasam, Angtane Uwa Sanbagiri bunarsus aa Jes balam Jam baftanaf enggalfe angtane gam waakentababisif, aiba jesam.’ Ane jei angtane unggwanfersus ga sene afaf-afaftababisi. 6Ane aamei jam isa sarbabisneneiserem angtane im gwetmanabe jam sege erabasaram. Ane aamei gamjon ula ga isa sarbisi angtane im bijauwer aa jei ge nwinbenerem jei ga sege erabasa. Jengga aamei taterisi jeiserem safe gam isa sarbabisisi, ini imna is jam ge erebaamiyen. Seyafter jeiserem jei se etamwesa, jengga nunu umwef ogiri aaiserem jemna je gemerje jam folbayan. 7Negara afwer jei negara afweraiserem jebar sege erabasa, ane anggwabura afwer jei anggwabura afweraiserem jebar sege erabasa. Angtane wisi uskambarsus jepga sege folbamisi, aam temawer tumilgala onnap teneserem seyafter ga sege barwebisi. Ane ginirdusa gase gwesa ona nafis-nafsi seyafter gemerserem ogiri aaiserem jebe. 8Seyafter jeiserem ga jafner towaiwelaiserem tamtamtala angtanemana jeiserem, ga enggala wini tanna jam gerala gamserem jei sigini nabal-nabalsusu jena aa gemer gam enolaram.
9Jes jepserem angtane seyafter gemerserem aamei kakalmer ga isene nasbabisi, aam temawer aamei Ai As ijewera tebanaram. Ginanggwana imnaiserem jei ga isene tebabisi, ane angtane nafsiserem jemnip ga isene kitulsu. Jei aamei ga isene safsaftababisi, ane ga isene munbobisi. 10Jes jepserem angtane anesus Ai aa jei ne tebanaram, jei Ai Asene aftansu. Ane angtane jeiserem jelem afelen mesna jei jena kakalmer ga sene nasmisi, ane jebar jena ga sene detse angtane nafsiserem jemnibe enggalfe gam munbobif. 11Ane angtane akar-akarem gwelaiserem nabife unggwanfer ga sege forobisenye, ane enggam ga sege gubisi, ‘Ai Uwa Sanbagiri Jei amsam baftabitne’, jengga bunarsusfer Uwa Sanbagiri angtane jeiserem Jam baftabiyen. Ane jei angtane unggwanfer ga sene afaf-afaftababisi. 12Angtane gwanan galapserem jei kabwakfer naawena, jengga Ai seyafter Ajes nasbilirim jeiserem jei aa jep etamwesaram, angtane unggwanfer kabwakfersus gase naawesa. Ane jega jem temawer angtane unggwanfersus jei angtane nafsi jam ne nesiktababiyen. 13Jengga angtane Ai kanaufer As jei ne tebanaram jamere nunu Uwa Sanbagiri aa jep bilirim jep se falsa, angtane jeiserem jei abakef gwelaiserem ga sene domolsa. 14Angtane Ai Ajes baftabilirim, jei seyafter ga sege sofobisi, jamere ogiri aaiserem fwesa aa jep folbanaram jebo, ane angtane enggam ga sene balbabisi, ‘Au, aamei Uwa Sanbagirem angtanef sa etamwe!’ Aamei angtane seyafter gemerserem jam ijeba towas-towastababinennerem jamer taban, Ai gamjon ga As waraunsu ogiri aaiserem jebe.”
Kabwaksusu aa jei tamtamtababilirim
(Markus 13:14-23; Lukas 21:20-24)
15Yesus gamjon ga balbabili seyafter aa jei ge etamwebiliserem jem temawer, nalef Jei Jam foroyan. Jei enggam ga balbabili: “Angtane galap isa domolsa, jeiserem ga Nabi Daniel aa jes nasbilim. Jei Jena Uwa Sanbagirmanaiserem ga jep se fisa, angtane enggam ga sene jenbebuwena ‘Kabwaksusu jei tamtamtababiliserem’. ” (Aamei angtane aaiserem ijeya gerabistenaram, waakenfer isa sarbili!)
16Yesus gamjon ga balbabili, “Jes jepserem angtane ona Yudeya je aa jei ge nwinbenerem, jei otumup sege nunggirbese. 17Angtane jelem ja sitawer aaiserem, jei gamjon jam ge kabwiteyan jelem jenabe enggalfe galgala gam ne kitultaabonfe mwonawer. 18Ane angtane awelna makanap gwebiliserem jegme gemer. Jei gamjon fas jam warauyan enggalfe fene jam ne kitultefe.
19Jes jepserem jam aa jep etamwesaram, wini udanabaraiserem ane wini tanna momem taayiniserem, jei kabwaktala unggwandusa ga sene domolsa. 20Aamei sembayanga Uwa Sanbagirfe gamjon jam isa gwebabana, jega aamei ijama nunggiryen nunu Sabateme, afa nunu angtane jem ge wofobiyeneiserem. Nunu jeiserem ga aas: nunu gwere kabwakfer jem gam fertenerem, nunu arouwa uskambar aa jem gam nyenaram, ane deye wisimi aa jem gan gwebanaram. 21#Daniel 12:1Sembayanga ga jam isa gwebabana, aam temawer jes jepserem angtane tamtamsusu sene domolsa, gwanan jepserem jepyan. Gwanan jes galapserem Uwa Sanbagiri ogir aaiserem aa galap eyebalam, jamer namwer aas jepserem, tamtamsusu jes galserem je fas. Ane jeiserem jamer taban, gamjon jes galserem jam etamweyan jamer abak-abaksus. 22Jengga Uwa Sanbagiri mes toforolsini nunu jem tamtamuluserem. Afa Jam toforolsiyeneye, angtane seyafter gemerserem futu. Jei nunu jeiserem ga mes toforolsini, aam temawer Jei angtane Jelemanaiserem jes nesiktababili, angtane Jei aa jes destabaabilirim enggalfe Ai As jei ne tebafe.
23Jes jepserem afa angtane aamei enggam is jam sene balbabisirim, ‘Sa damta! Mesias, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif, Jei aare!’ afa angtane nafsi jei enggam jam sege gubisirim, ‘Jeiba jesam!’ angtane jeiserem ijama sarbabiyen! 24Taterisi jemnaiserem ijama tebabiyen, aam temawer angtane ol kapkaiserem jei sege forobisenye, ane ga sege gubisi enggame, ‘Aiba Mesiasam.’ Ane angtane akar-akarem nabif gwelaiserem jei mese ga sege forobisenye. Ane jei bwembwema teisyena ane bwembwema unggwandwasususerem ga sene eyebaabisi enggalfe angtane jem gam ne afaf-afaftababife, jega enggalf jei gam ne tikwebitif. Ane jei angtane Uwa Sanbagiri aa jes destabaabilirim, jei ga jes ne unggwasbaabif jam afaf-afaftababife. 25Ai As imsa sarbasi! Ai gwanan aamei isa mesam towas-towastababili, gwanan taterisi jeiserem nalefe jam falyan.
26Afa angtane jei enggam jam sege gubisirim, ‘Sa damta! Jeiba jesam, taman tetenabe’, aamei safnant jewer ipsama gwinaram! Afa angtane jei enggam jam sege gubisirim, ‘Jei aare, mwonap’, aamei angtane jeiserem safnant ijama sarbayan! 27Ai Tane Angtanemana, Ai Ase forosanya irsi jam bwertala gemerserem, winsi afwer jamer afwero. Angtane seyafter gemerserem jei Ai Asene damtasa. 28Jes galserem kwimala bunarsus gangge forobitye, jigala jam tereserem jebe. Seyafter Ai Ajes bilirim jeiserem ba bunarsus se etamwesa.”
Tane Angtanemana Jei se fortya.
(Markus 13:24-27; Lukas 21:25-28)
29Yesus gamjon ga balbabili, “Abakefyan nunu jem tamtamuluserem aa tabanwenaram, gwere je gwif se etamwesa, jem muar mese nafa fas. Ane matona winsiwer ga sege janbisinye, ane winsip seyafter gemerserem ga sege gin-ginwebisi. 30Jes jepserem bwembwema Tane Angtanemana, bwembwema Amna, jepga se gwereusa winsibe. Bwembwema Amna jeiserem jam aa jep gwereusaram, anggwabura ogiri seyafter jep gemerserem jei ga sege syebisi. Angtane jei Ai Tane Angtanemana, ga Asene damtasa. Ai winis sinsinibaner As iresanya. Baabeta Amna unggwandusa, ane nafa Amna unggwanfer. 31Trompet unggwandusa ga sene forolsa, ane Ai malaikata Amna gas baftabisi, ogiri seyafter gemerserem jewer ga sege sofobisi. Ane malaikata jeiserem angtane Uwa Sanbagiri aa jes destabaabilirim, angtane jeiserem ga sene dupdupbulsisi ogiri seyafter gemerserem jewer.”
Yesus angtanes towas-towastababili galap aa je etamwelaiserem jem temawer.
(Markus 13:28-31; Lukas 21:29-33)
32Yesus gamjon ga balbabili, “Au, ara ti sa gaarabi, ane taterisi Amna sa sarbisi! Afa tirni ikikini, ane ese jemna jam negma domolaram, nei ga negma towaswena ossana babitsim gase fala. 33Ga gemer jes gemerserem aaiserem jegme gemer: Afa aamei taterisi Ai Ajes nasbilirim jam isa damtabisirim jam sege etamwebisirim, aamei ga isa towaswesa enggame Ai babitsim ga As fortya. 34Ai bunarsusfer ims towas-towastababili, angtane namwer aa jei naawenaram jei nalefe jam ge terbiyen, taterisi aaiserem seyafter gemerserem Ai Ajes nasbilirim ga sege etamwebisi. 35Winsi yo ogiri aaiserem je sege barwesa, jengga taterisi Amnaiserem je jam barweyan.”
Waakenfer isa gerebaabisnenne, aam temawer aamei ijama towaswebiyen nunu Yesus jem foryalaiserem.
(Markus 13:32-37; Lukas 17:26-30,34-36)
36Yesus gamjon ga balbabili, “Nunu yo jema Ai Tane Angtanemana, Ai Ajem forolaiserem, nunu jeiserem angtane jei jam ne towaswebiyen. Malaikata taman waaken-girip jeiserem, jei teisyena. Ai Tane Uwa Sanbagirmana, Ai teisyena. Jengga tousa ga Uwa Sanbagiri Jenfentowai. 37Nunu Ai Tane Angtanemana, Ai gamjon Jam Ajep forosanyaram ogiri aaiserem jebe, angtane jes jepserem enggam se naawesa, angtane fwatermana gamserem jei aa gemer naawelam, nunu Nabi Nuhmana jepserem. 38Fanamona nalef jam falyan, angtane aa jei naawelam jebe ga jafner naawel, tumilgal mese fo ga jetefer ne tumilwel, ane wini yo anggwana jena ga aane detwel, jamer nunu Nabi Nuh atdusap aa ge kabwitel. 39#Kejadian 7:6-24Jei teisyena afa galap bai se etamwena, jamere fanamona ga til, angtane jepmanaiserem seyafter ga aa ge albitil. Jes gemerserem aaiserem jegme gemer: Angtane ga sege bitbitwebisi nunu Ai Tane Angtanemana, gamjon Ajep forosanyaram.
40Nunu jes jepserem anggwa nauna awelna ga makanap sege gwebisi, malaikata Amna jei anggwa naura jeiserem afelna tefner sene gaartesa, ane afelnaiserem jei jeber se mirtetefalsa. 41Ane wini naura tesa sege wilisi, wini naura jeiserem malaikata Amna afelna tefner se goltesa, ane afelna ga jeber se mirultefalsa.
42Ga jem temawer, aamei ina jeber-jeber waakenfer isa gaaramisnenewena! Aamei teisyena nunu Ai Tuhan imna, Ai gamjon Ajem foryalaiserem. 43Aaiserem jasa sarbi: Afa angtane jena jam jemanserem jei jam gam towaswenaram enggame, angtane komkoma fonggalabar gwinem gase fortya, jei jam tayan, ane angtane komkoma masef ga gam unggwasa jenap jam kawetefe. 44Ga jem temawer, aamei mese ga jam isa menetwesiwena, aam temawer aamei jema ijama towaswemiyen, jema Ai Tane Angtanemana Ai Ajep foryalaiserem.”
Seisya taterisi angtane awelna nafsiminip waakenfer aa jei gwebilirim, ane angtane awelna nafsiminip kabwakfer aa jei gwebilirim ga jem temawer
(Lukas 12:41-48)
45Yesus gamjon ga balbabili, “Angtane awelna nafsiminip waakenfer aa jei gam gwebilirim ane jei gam towaswena, jei ga fom gam eyebili? Angtane jeiserem jei ga aas gamserem ga gemer gam eyebili: Angtane sanbaka jemna jei awelna aa jeman gam gweyibenerem, angtane sanbaka jeiserem jei jam aa jep gam sofnaram, jei angtane awelna waakenfer aa jei gam gwebilirim angtane afweraiserem jemniwer, angtane jeiserem ga gam gaartena enggalfe jei dwakfe gam nwinf jelem afelen mesna afweraiserem jemniwer. Angtane dwakfe aa jei gam nwinirim jeiserem, jei tumilgala angtanemana afweraiserem nunu jeber-jeber gam golmini. 46Ini jemna saaser-saaserfer gam folbana, angtane sanbaka jemna jam gam warautnaram, ane angtane sanbaka jeiserem jei gamjon gam damtana angtane dwakfe aa jei gam nwinirim jeiserem, jei aa jes gam bilibenerem ga jes gam eyebili. 47Ai bunarsusfer ims towas-towastababili, angtane sanbak jeiserem jei angtane jeiserem awelna waakenfer aa jei gwebilirim gamjon ga jes gam gaartena enggalfe, jei dwakfe gam nwinf angtane sanbaka jemna seyafter aa jes gam damtabilirim, apgal jigala jeiserem jei gam gerebaabisnenef.
48Jengga angtane awelna nafsiminip kabwakfer aa jei gam gwebilirim, ane jam towasweyan, jei enggam ga gam eyebili: Jei jelem inibe kapka enggam gam gunurum, ‘Angtane sanbak amna jei gemerje abaka jei gamjon gase warautna.’ 49Ane jei angtane awelna jep aa jei gane gwebilirim afwer jei ga gam towaitababili jam safsaftababife. Ane jei ga gam dwena ane fo mwalswel-mwalswelaiserem ga gane telbili angtane mabukaiserem jebar. 50Angtane jeiserem nunu yo jema jam towaswemiyen, angtane sanbaka jelemana jei gamjon jem waraunalaiserem. Ane jei gamjon waraunala jepserem, 51jei angtane kabwakfer aa jei gam gwebilirim jeiserem ga gam safsaftana jamere tamtamsus, ane ga baftana taman angtane Uwa Sanbagiri akar-akarem aa jei ne tebanaram jebe. Tamna jeiserem jebe, angtane jep ga sege syebinense, ga sene enolsa siginsusu, ini jemna uskambar ga sege jenbamisi.”
अहिले सेलेक्ट गरिएको:
Matius 24: LAIBKL
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्