MATÌÙT 9
9
Yesùt en ap aike eki esok wùt warek mene hagasike wene
(Mrk.2:1-12; Luk.5:17-26)
1Atì'nogo yogosukwama re, at Yesùt so a'la kìlìk, warogo re, i aik ìlì bakwe wùlìpikesik o kota at aua lagaike hak he, 2ap aike eki esok motok wùt warek welagaike mene e talek oba weitek werek kolek yerogo wolok oba wagaukwama, at Yesùt en he,
“It atì inetaùken an noba hìpìrethagasik en wolok wagaika hìgì,” ìlùk, eileken enagat isìlìk he, ap eki esok wùt warek mene a'nogo mel yogosike:
“Naput e. Ha'la hai hakan. Hat weak hagatì lagen mene re, an nen sagalogo legetsìgì o,” ìlùk, yogosike. 3Atì'nogo yogosikomo re, it ap Ala ane helal waganek esewerek mene aike ina'la nen he:
“Eige! Ap yì Ala a'la meathìlìk etage weagathìlì'logo,” ìlùk akasukwa. 4Atì'nogo akasukwama, at Yesùt en inoabùt enagat palhikesik he, mel isike:
“Hit hina'la nen wene kolo mene ebetì lagep atì nahalok. 5An nen ap yì wene yogosusak he, se hake kì akegep.
Hat weak hagatì lagen mene atì arat sagalogo legetsìgì, ìlùk yogotì atì se hake mene yogotì akegep a? Ì a, at he,
Hebe melarìk lan o, ìlùk yogosusak se hake akegep a. Lek o. Hebe melarìk lan, ìlùk yogosumo ekinat o. 6Ekin meneat he, an abat ta'lasi wagagi atì, kweangma yoma logolìk apùnì yì weak tì weak hagatarek mene an nenat sagalogo legetsìkì logouagalùk Ala nen esewerek hanhike atì hùthanuageip,” ìlùk he, ap eki esok wùt warek mene a'nogo mel yogosike:
“Hebe melarìk he, halit talogo nogo ìkì lagen mene arì helaluk haua lan o,” ìlùk lakhesike. 7Lakhesikomo re, ap a'nogo melarìk aua lagaike. 8Atì'nogo hagasikomo re, it apùnì amanogo ineileken hasukwasik inayùk arìk he,
“Ala nen apùnì mene nen yì'nogo hagatì logouagalùk menhesikomo atì nayù e,” ìlùk, Ala hogorasukwa.
Yesùt en Matìùt ayoko hesike wene
(Mrk.2:13-17; Luk.5:27-32)
9At Yesùt o atoma hebùlùk laga logolìk, ap aike etage Matìùt, kantor uang pemerìntah hesik waganogo hìkì lagaukwa ba hùrek were'ma, eileken hìlìk,
“Nopolik eme o,” ìlùk yogosikomo re, melagaikesik he, opoligat lagaike. 10Lagaikesik, at aua Yesùt eperak kìlìk sùpùrùk nùogolùk hùrek were'ma re, it ap uang pemerìntah hesik kìno ìlìk wanhì lagaukwa mene aike mel, it aike weak hagarìk nìkì lagaukwa mene mel, logolegat ki wagaukwasik, at Yesùt ebe inom, agoromì ane wanhì lagaukwa mene amanogo inomat omakìma hù'larìk sùpùrùk nìkì lagaukwa. 11Atì'nogo niko were'ma, it ap Parìsi mene nen ineileken kelagisìlìk he, it ap Yesùt ane wanhì lagaukwa mene amanogo mel yogoisasukwa:
“Hit hinoe wene yakùlhisìlì'logo mene arì, it ap uang pemerìntah hesik kìno ìlìk wanharek mene inom, it aike weak hagarìk negarek mene inom, sùpùrùk omakìma nìlì'lùgì yì nahalok,” ìlùk yogoisasukwa. 12Atì'nogo yogoisasukwama, at Yesùt asuk holhikesik, mel yogoisasike:
“It apùnì aike inoba hano mene, loktet lak en ou hagarinabuagalùk inayoko housak nogo? Lek o. We inoba ou werek halogat loktet lak inayoko housak o. 13#Hos.6:6 Ala ane aike mel isike:
An Ala na'la re, apùnì nen inako wa'netarek atì nabìt o. We, it apùnì aike inetawìrinapì logousak atìat walok o,
ìlùk isike wene atì tùkùmethei lani o. An wagagi atì re, apùnì inoabùt hano hagatarek mene inayoko heigìlùk wagagi hùk. Lek o. We, inoabùt weak hagatarek mene atì inayoko heigìlùk wagagi o,” ìlùk yogoisasike.
Sapan uogolùk sùpùrùk nìkì'lek welagaikarek wene
(Mrk.2:18-22; Luk.5:33-39)
14Atì'nogo yogoisasikesik oba nen he, it Yohanet agoromì ane wanhì lagaukwa mene Yesùt oba wagaukwasik he, mel yogosukwa:
“Nit mel, it ap Parisi mene mel, sapan ninhùp-nanhùp uogolùk, sùpùrùk nìkì'lek welagorek meneat he, it ap hat hane wìlì'lùgì mene yoma nek he, atì'nogo hagarì'lùgì lek atì nahalok,” ìlùk yogosukwa. 15Yogosukwama re, at Yesùt en he, mel yogoisasike:
“Ap aike agwe ìkìki logolìk he, at erùgì agaiya'lak inomat logolìk he, it ina'la wiik-weak hogo logousak nogo? Lek o. Atì'nogo meneat he, erùgì agaiya'lak hisalùk, ap atì wolok logoin oba weregat o. Atì'nogo wolok lamo nek he, it atì ineki aike sùpùrùk nìkì'lek sapanat iko logogunat o,” ìlùk yogoisasike. 16Atì'nogo yogoisasikesik, aike mel yogoisasike:
“Apùnì nen, su alep laberì'lùgì mene lìbìlaga halok, kain ket mene ba hìkìn kasumo, hobuk kain ket mene atì hesùmùrogo kìkì logolìk, su atì hùkoat lìbìlarìk lasak o. 17Atì hake, apùnì nen anggur eken herelogo amusu ket mene isoak wam ogat mene hageat hagarek mene a'la hinatarek lek. Atì'nogo hinato halok he, isoak atì yekalaga logolìk he, anggur eken amusu atì kesalogo alema'lagìk, isoak atì halok hago alema'lagìk, inogo. Atì'nogo inogo ìlùk he, anggur eken amusu ket mene halok he, isoak ket hano hagarek mene halogat a'la hinasusak o. Atì'nogo hinasumo re, pìreat hano logousak,” ìlùk, yogoisasike.
Yesùt en Yaìrùt a'logo mel, he aike mel, ou hagarinapike wene
(Mrk.5:21-43; Luk.8:40-56)
18Atì'nogo yogoisikenem, ap aike o apùnì Yahurì mene sapan egarek oba esewerek logolìk kain welagaike mene atì Yesùt oba wagaikesik, eitep awì yakhìlìk mel yogosike:
“An na'logo ket yaat wa'lagama meneat he, hat en heki haka lamo re, eluk arìk se asigin o, ìlùk hayoko wagì,” ìlùk yogosike. 19Atì'nogo yogosikomo re, at Yesùt ebe mel, ap a'nogo mel, it ap Yesùt ane wanhì lagaukwa mene amanogo mel, inom obogat lagaukwa. 20-21Laganem he, he aike amep lago motok werek kolek 12 tahun haga'lagaike mene, inopolik laga logolìk a'la nen he,
“Yesùt atì asu neki hakamo re, namep palasigin o,” ìlùk, Yesùt asu wùrep eki hakasike. 22Eki hakasikomo re, at Yesùt en elokwe hebek hogo eileken apotma kelakhìlìk he, mel yogosike:
“Na'logo e! Ha'la hai hakan o. Hetaùken noba hìpìrethegen atì nen hano agen o,” ìlùk, iko kolek aremnogoat he, he a'nogo arat hano agaike. 23Atì'nogo hagarìk hagarìk he, at ap kain Yesùt ayoko wagaike mene a'nogo aua lagaukwa hak he, apùnì le aga logolìk pìkon watarek mene watìk, le ngai-wai apik agìk, ikenem eileken isìlìk he, 24mel yogoisasike:
“Helekerek atì wa'lagì'lek. We, nogo ìlì'logo. Halok he, wùlìbi lani o,” ìlùk yogoisasike mene re, it apùnì apik amanogo nen he, agato apik agaukwa. 25Agato apik agaukwama re, inebe wulaksìlìk he, helekerek a'nogo welagaike ba kìlìk eki hagasogo menhesikomo eluk agaike, 26Atì'nogo hagasikomo re,
“Yesùt en hagate o,” ìlùk, o tokwe atoma abok motok sak-pak isike.
Yesùt en ap inebe pìre ineileken weak mene hagarinapike wene
27At Yesùt o atoma nen laganem ap inebe pìre ineileken mùm mene opolik laga logolìk inane hùkorogo mel yogosukwa:
“Ap Taùt en tagokwe mene noe a! Hetawì'ninabin o,” ìlùk yogosukwa. 28Atì'nogo yogosukwama, at Yesùt ebe ouma kìlìk were'ma, it ap inebe pìre ineileken weak mene aremnogo oba kisukwa. Kisukwama re, at Yesùt en, mel yogoisasike:
“Hit hina'la re,
At en elok haga'ninabusak, ìlùk akìkì lagep a?” ìlùk yogoisasikomo re, it en he,
“Ì o. Ninoe. Elogat haga'ninabusak akìkì lago,” ìlùk yogosukwa. 29Atì'nogo yogosukwama re, at Yesùt en ineileken a'nogo eki hagisìkì logolìk he, mel yogoisasike:
“Hinetaùken noba hipìrethegep higit hogoat hagathinabigin. Halok, hano a'ni o,” ìlùk yogoisasike. 30Atì'nogo yogoisiko kolek aremnogoat ineileken a'nogo hano agaukwa. Hano agaukwama re, at Yesùt ane keirogoat yogoisìkì logolìk he,
“An hagathinapì mene yi, apùnì inelu asinogo nen he, aike motok yogoisagùp o,” ìlùk yogoisasike. 31Atì'nogo yogoisasike meneat he, it apùnì amanogo nen o atoma at abok motok yogoisìlìk nìkì lagaukwa.
At Yesùt en ap aike ane motok lek mene hagasike wene
32O atoma nen wùlùpenem he, it apùnì aike nen ap aike mokareke oabùt weak mene a'la kisikomo ane lek motok welagaike mene Yesùt oba wolok wagaukwa. 33Wolok wagaukwama re, at Yesùt en mokareke oabùt weak mene ap a'nogo a'la kìlìk were'ma henogo wulaksasikomo, ap a'nogo ane huak hogo isike. Atì'nogo hagasikomo re, it apùnì apik welagaukwa mene nen Yesùt hogoratì logolìk he, mel isukwa:
“Nit apùnì Isirael mene aike nen yì'nogo hagatenem nineileken hisogorek lek mene nayùk e,” ìlùk hogorasukwa. 34Atì'nogo hogorasukwa meneat he, it ap Parisi mene amanogo nen he, mel isukwa:
“At Yesùt en Ibilit agoromì inoe kain a'nogo omame ba mokareke oabùt weak mene apùnì ina'la kìlìk were'ma henogo wulaksìlì'logo,” ìlùk isukwa.
At Yesùt en apùnì etawìrinapì logolìk yogoisasike wene
35At Yesùt o sili hùkokwe, hamùlùkkwe, ya kìgìk, ta kìgìk, nìkì logolìk, o sapan egarek obakwe kìlìk he, hano wene ninopase Ala nen awe a'ma hinikerek wene a'nogo yakùlisìgìk, yì ou tì ou inoba werek mene mel, inomame lek maben mene mel, hano hagarinapìk, ìlìk nìkì lagaike. 36Atì'nogo hagarinabìk nìkì logolìk he, apùnì apik eileken lagisìlìk he,
“Wam topa warn konharek hak, it yoma koninabu mene lek en yùgùnat sak-pak hogo set yagalek nùgì yoma netawì lak e,” ìlùk etawìrinapike. 37Etawìrinapikesik he, at agoromì ane wanhì lagaukwa mene amanogo mel yogoisasike:
“Eken ugu apik werek meneat he, apùnì eken ebe palusak mene inebe hamùlùgat o. 38Atì nen he, ap eyabu Esewerek mene a'naga nen apùnì eken palusak mene aike laksoak en, at ayoko hìkì logoino,” ìlùk yogoisasike.
अहिले सेलेक्ट गरिएको:
MATÌÙT 9: LAIDNI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्