LUKA 24
24
Okhusimukukha kwa Yesu
(Mat. 28:1-10; Mk. 16:1-8; Yoh. 20:1-10)
1Litukhu liomwihonga, nikusili mukamba m'mabwebwe, abakhasi yabo bahuna hasilindwa, nibahila amafura akabali nibalombele. 2Nibanyoola lichina likongomibwe okhurula khusilindwa. 3Olwa benjila musilindwa sibalola om'bili kwo Mwami Yesu tawe. 4Olwa bali nibasing'ang'ala khulwa akene yako, abandu babili, abali nibebikhile tsingubo etsinyinanyinanga okhusila nibasinjila ahembi n'nabo. 5Oburi bwahamba abakhasi yabo, nibenamia obweni bwabwe hasi. Abandu yabo nibababool'la, “Busina murunanga oli mwoyo mubafu? 6Siali hano tawe; usimukukhile. Mwitsul'le obwa yamubool'la olwa yali n'nenywe Galilaya:#Mat. 16:21; 17:22-23; 20:18-19; Mk. 8:31; 9:31; 10:33-34; Lk. 9:22; 18:31-33 7‘Omwana wo Mundu okhwola arebwe mumakhono kabetsimbi, nabo bakhamubambe, ne litukhu liakhataru yakhasimukukhe.’ ”
8Ma abakhasi yabo nibetsul'la amang'ana kaake, 9nibarula hasilindwa, nibabool'la abarumwa likhumi namulala amang'ana yako kosi. 10Nabo abahaana amang'ana yako bali Mariamu Magadalena, Joani nende Mariamu nyina Yakobo, halala nende abakhasi bandi abali halala n'nabo. 11Abarumwa babukula amang'ana yako singa tsisambo butswa, sibasubila tawe. [ 12Nebutswa Petero yasinjila, niyelukha tsimbilo natsia hasilindwa; yenama nahenjel'la mwo ne yalola butswa tsingubo tsiekatani tsionyene. Nakalukha ingo nachenyanga khu kosi akali nikekhol'le.]#24:12 Amahandiko kandi amakhulu sikali nesiasia sia 12 tawe.
Oluchendo lwokhutsia Emau
(Mk. 16:12-13)
13Litukhu liene yilio, babili khubalondi ba Yesu bali nibatsitsanga mwitaala elilangwa Emau, oluchendo lwetsikilomita likhumi nende ndala okhurula Yerusalemu. 14Bali nibatwakananga khwo khumang'ana akali nikekhol'le. 15Olwa bali nibatwakananga ne nibareebana, Yesu omwene yesunda khubo nachenda n'nabo. 16Bamulola netsimoni tsiabwe nebutswa sibamumanyilisia tawe. 17Yesu nabareeba, “Nimang'ana sina aka mubool'lananga nimuchenda yaka?” Nibasinjila ne, obweni bwabwe nibufwilil'la khulwesibeela. 18Mulala khubo, owalangwa Kiliopa namukalusia, “Ibe oli omucheni mu Yerusalemu oramanyile akekhol'le yo amatukhu kano?”
19Naye nabareeba, “Mang'ana sina?” Nabo nibamubool'la “Amang'ana akakwiliye Yesu Omunasareti. Yali omuroobi wobunyali mumilimo nende mukhwibaala imbeli wa Nyasaye nende imbeli wabandu bosi. 20Abesaalisi abakhongo nende abaruchi befwe bamuhana akhalachilwe okhufwa, ma nibamubamba. 21Ne ifwe khwali nikhunayanga mbu niye owakhanunuye Abaisiraeli. Ne okhuyomba kosi, leelo nelitukhu liakhataru okhurula akene yaka nikekhola. 22Khandi abakhasi bandi abowefwe bakhuchenyisie. Batsiiye khusilindwa m'mabwebwe, 23ne sibanyooye om'bili kukwe tawe. Nibakalukha nibaboola mbu balutsi abamalaika, ne nibababool'la ali mwoyo. 24Ne abandi khubakhubetsanga n'nabo batsiye hasilindwa nibakobokhela akabakhasi yabo babooye; nebutswa ye sibamulutsi tawe.”
25Yesu nababool'la, “Busina muli abahingwa mbwo, ne khandi abenyoholi bemioyo okhusubila kosi akabaroobi baboola! 26Sikakwan'ne Masihi okhusalila, ma kho yenjile mubukhongo bubwe?” 27Ma nabenoosia amang'ana kosi khuye akali mu Mahandiko Amatsienukhu okhurula khubitapu bia Musa okhwola khumahandiko kabaroobi bosi.
28Olwa bali ahembi okhwola mwitaala elia bali nibatsitsangamwo, Yesu yakhola singa ositsilil'la noluchendo. 29Nebutswa nabo nibamuhomba nibaboola, “Yikhala n'nefwe, sichila bwil'le, isi ibir're.” Ma niyenjila mwitaala, niyekhala n'nabo. 30Olwa yekhala n'nabo khubiokhulia, yabukula omukaati, nakulamila tsikhabi, namekania ma nabahelesia. 31Tsimoni tsiabwe tsiamala nitsikukha, nibamumanyilisia, nebutswa naye nakhama khubo. 32Nibabool'lana, “Emioyo chiefwe sichifwan'nenje singa echiatukhanga olwal'lomele n'nefwe khunjila nakhuribul'la Amahandiko?” 33Nibarula esaa yene yiyo, nibakalukha Yerusalemu, nibanyoola abechi likhumi nende mulala nibali halala nende abandu bandi, 34nibaboola, “Tooto Omwami usimukukhile. Alolekheye Simoni.” 35Abalondi babili yabo bamala nibababool'la akali nikekhol'le khunjila nende singa bamumanyilisia olwa yamekania omukaati.
Yesu yalolekha khubechi baabe
(Mat. 28:16-20; Mk. 16:14-18; Yoh. 20:19-23; Ebikh. 1:6-8)
36Olwa bali nibababool'langa amang'ana yako, Yesu mwene nasinjila hakari wabwe, nababool'la, “Emilembe chibe n'nenywe.” 37Nibekosa ma nibaria okhusila, nibapaala baluutsi esinasukhila. 38Nebutswa naye nababool'la, “Busina mung'ang'al'le, khandi busina muli nende honzoni mumioyo chienywe? 39Lole amakhono kanje nende ebilenje bianje, nise omwene. Mbabasie mulole, sichila esinasukhila sisili nende om'bili nende amakumba singa mulolanga ise nindi n'nabio tawe.”
[ 40Namal'le okhuboola yako ne nabamanyia amakhonoke nende ebilenjebie.]#24:40 Amahandiko kandi amakhulu sikali nesiasia sia 40 tawe. 41Olwa bali nibasili okhuhuchil'la khulwobusangali, ne nibasichenya, yabareba, “Muli khwo nende esiokhulia hano?” 42Nibamuhelesia esitonye sieisuche isianikhe. 43Nasibukula, nalia bosi nibalola. 44Ma nababool'la, “Yaka niko aka ndamubool'la olwa ndali nisili n'nenywe, mbu khatimba kahesibwe kosi akahandikwa khwise mumalako ka Musa nende mubitapu biabaroobi ma nende musitapu sia Saburi.”
45Ma niyekula tsinganakani tsiabwe okhumanyilisia Amahandiko Amatsienukhu. 46Nababool'la, “Nimbwo kahandikwa mbu Masihi okhwola asaal'le ne khwitukhu liakhataru yakhasimukukhe okhurula mubafu, 47khandi nakobuha mbu muliira lilie obweyami nende obulekhelwi bwetsimbi okhwola bukambwe khutsimbia tsiosi, okhuchiachila Yerusalemu. 48Inywe muli abakobokheli ba mang'ana yako. 49Nase mwene ndakhamuler're uyo owa Papa yamulaka. Nebutswa okhwola mulindil'le mwitookho okhwola olwobunyali okhurula mwikulu bwitsa khwinywe.”#Ebikh. 1:4
Yesu yapulukha okhutsia mwikulu
(Mk. 16:19-20; Ebikh. 1:9-11)
50Ma nabemel'la okhurula mwitaala okhwola Betsania, nachinga amakhonoke ikulu, nabalaamila tsikhabi.#Ebikh. 1:9-11 51Olwa yali nabalaamilanga tsikhabi, yarula khubo, nabukulwa ikulu mwikulu. 52Nabo nibamwekayakaya, nibakalukha Yerusalemu nibali nobusangali obukali; 53nibamenya mu Hekalu tsinyinga tsiosi nibetsoominjia Nyasaye.
अहिले सेलेक्ट गरिएको:
LUKA 24: EBAIBO
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©Bible Society of Kenya, 2019